૪. દુતિયનાનાકરણસુત્તવણ્ણના

૧૨૪. ચતુત્થે રૂપમેવ રૂપગતં. સેસપદેસુપિ એસેવ નયો. અનિચ્ચતોતિઆદીસુ હુત્વા અભાવટ્ઠેન અનિચ્ચતો, આબાધટ્ઠેન રોગતો, અન્તો પદુસ્સનટ્ઠેન ગણ્ડતો, અનુપવિટ્ઠટ્ઠેન સલ્લતો, સદુક્ખટ્ઠેન અઘતો, સમ્પીળનટ્ઠેન આબાધતો, અવિધેય્યટ્ઠેન પરતો, પલુજ્જનટ્ઠેન પલોકતો, નિસ્સત્તટ્ઠેન સુઞ્ઞતો, અવસવત્તનટ્ઠેન અનત્તતો. એત્થ ચ ‘‘અનિચ્ચતો પલોકતો’’તિ દ્વીહિ પદેહિ અનિચ્ચલક્ખણં કથિતં, ‘‘સુઞ્ઞતો અનત્તતો’’તિ દ્વીહિ અનત્તલક્ખણં, સેસેહિ દુક્ખલક્ખણં કથિતન્તિ વેદિતબ્બં. સમનુપસ્સતીતિ ઞાણેન પસ્સતિ. એવં પઞ્ચક્ખન્ધે તિલક્ખણં આરોપેત્વા પસ્સન્તો તયો મગ્ગે તીણિ ફલાનિ સચ્છિકરોતિ. સુદ્ધાવાસાનં દેવાનં સહબ્યતં ઉપપજ્જતીતિ તત્થ ઠિતો ચતુત્થજ્ઝાનં ભાવેત્વા ઉપપજ્જતિ.