૧. ચક્કસુત્તવણ્ણના

૩૧. ચતુત્થસ્સ પઠમે ચક્કાનીતિ સમ્પત્તિયો. ચતુચક્કં વત્તતીતિ ચત્તારિ સમ્પત્તિચક્કાનિ વત્તન્તિ ઘટિયન્તિયેવાતિ અત્થો. પતિરૂપદેસવાસોતિ યત્થ ચતસ્સો પરિસા સન્દિસ્સન્તિ, એવરૂપે અનુચ્છવિકે દેસે વાસો. સપ્પુરિસાવસ્સયોતિ બુદ્ધાદીનં સપ્પુરિસાનં અવસ્સયનં સેવનં ભજનં, ન રાજાનં. અત્તસમ્માપણિધીતિ અત્તનો સમ્મા ઠપનં, સચે પુબ્બે અસ્સદ્ધાદીહિ સમન્નાગતો હોતિ, તાનિ પહાય સદ્ધાદીસુ પતિટ્ઠાપનં. પુબ્બે ચ કતપુઞ્ઞતાતિ પુબ્બે ઉપચિતકુસલતા. ઇદમેવ ચેત્થ પમાણં. યેન હિ ઞાણસમ્પયુત્તચિત્તેન કુસલકમ્મં કતં હોતિ, તદેવ કુસલં તં પુરિસં પતિરૂપદેસે ઉપનેતિ, સપ્પુરિસે ભજાપેતિ, સો એવ ચ પુગ્ગલો અત્તાનં સમ્મા ઠપેતિ. પુઞ્ઞકતોતિ કતપુઞ્ઞો. સુખઞ્ચેતંધિવત્તતીતિ સુખઞ્ચ એતં પુગ્ગલં અધિવત્તતિ, અવત્થરતીતિ અત્થો.