૧. ચરસુત્તવણ્ણના

૧૧. દુતિયસ્સ પઠમે અધિવાસેતીતિ ચિત્તં અધિરોપેત્વા વાસેતિ. નપ્પજહતીતિ ન પરિચ્ચજતિ. ન વિનોદેતીતિ ન નીહરતિ. ન બ્યન્તીકરોતીતિ ન વિગતન્તં પરિચ્છિન્નપરિવટુમં કરોતિ. ન અનભાવં ગમેતીતિ ન અનુઅભાવં અવડ્ઢિં વિનાસં ગમેતિ. ચરમ્પીતિ ચરન્તોપિ. અનાતાપીતિ નિબ્બીરિયો. અનોત્તાપીતિ ઉપવાદભયરહિતો. સતતન્તિ નિચ્ચં. સમિતન્તિ નિરન્તરં. એવં સબ્બત્થ અત્થં ઞત્વા સુક્કપક્ખે વુત્તવિપરિયાયેન અત્થો વેદિતબ્બો.

ગાથાસુ ગેહનિસ્સિતન્તિ કિલેસનિસ્સિતં. મોહનેય્યેસૂતિ મોહજનકેસુ આરમ્મણેસુ. અભબ્બોતિ અભાજનભૂતો. ફુટ્ઠું સમ્બોધિમુત્તમન્તિ અરહત્તમગ્ગસઙ્ખાતં ઉત્તમઞાણં ફુસિતું.