૨. પપતિતસુત્તવણ્ણના

૨. દુતિયે પપતિતોતિ પતિતો ચુતો. અપ્પપતિતોતિ અપતિતો પતિટ્ઠિતો. તત્થ લોકિયમહાજનો પતિતોયેવ નામ, સોતાપન્નાદયો કિલેસુપ્પત્તિક્ખણે પતિતા નામ, ખીણાસવો એકન્તપતિટ્ઠિતો નામ.

ચુતા પતન્તીતિ યે ચુતા, તે પતન્તિ નામ. પતિતાતિ યે પતિતા, તે ચુતા નામ. ચુતત્તા પતિતા, પતિતત્તા ચુતાતિ અત્થો. ગિદ્ધાતિ રાગરત્તા. પુનરાગતાતિ પુન જાતિં પુન જરં પુન બ્યાધિં પુન મરણં આગતા નામ હોન્તિ. કતં કિચ્ચન્તિ ચતૂહિ મગ્ગેહિ કત્તબ્બકિચ્ચં કતં. રતં રમ્મન્તિ રમિતબ્બયુત્તકે ગુણજાતે રમિતં. સુખેનાન્વાગતં સુખન્તિ સુખેન સુખં અનુઆગતં સમ્પત્તં. માનુસકસુખેન દિબ્બસુખં, ઝાનસુખેન વિપસ્સનાસુખં, વિપસ્સનાસુખેન મગ્ગસુખં, મગ્ગસુખેન ફલસુખં, ફલસુખેન નિબ્બાનસુખં સમ્પત્તં અધિગતન્તિ અત્થો.