૧. યોધાજીવસુત્તવણ્ણના

૧૩૪. ચતુત્થસ્સ પઠમે યુદ્ધં ઉપજીવતીતિ યોધાજીવો. રાજારહોતિ રઞ્ઞો અનુચ્છવિકો. રાજભોગ્ગોતિ રઞ્ઞો ઉપભોગપરિભોગો. અઙ્ગન્તેવ સઙ્ખ્યં ગચ્છતીતિ હત્થો વિય પાદો વિય ચ અવસ્સં ઇચ્છિતબ્બત્તા અઙ્ગન્તિ સઙ્ખ્યં ગચ્છતિ. દૂરે પાતી હોતીતિ ઉદકે ઉસભમત્તં, થલે અટ્ઠુસભમત્તં, તતો વા ઉત્તરિન્તિ દૂરે કણ્ડં પાતેતિ. દુટ્ઠગામણિઅભયસ્સ હિ યોધાજીવો નવઉસભમત્તં કણ્ડં પાતેસિ, પચ્છિમભવે બોધિસત્તો યોજનપ્પમાણં. અક્ખણવેધીતિ અવિરાધિતવેધી, અક્ખણં વા વિજ્જુ વિજ્જન્તરિકાય વિજ્ઝિતું સમત્થોતિ અત્થો. મહતો કાયસ્સ પદાલેતાતિ એકતોબદ્ધં ફલકસતમ્પિ મહિંસચમ્મસતમ્પિ અઙ્ગુટ્ઠપમાણબહલં લોહપટ્ટમ્પિ ચતુરઙ્ગુલબહલં અસનપદરમ્પિ વિદત્થિબહલં ઉદુમ્બરપદરમ્પિ દીઘન્તેન વાલિકસકટમ્પિ વિનિવિજ્ઝિતું સમત્થોતિ અત્થો. યંકિઞ્ચિ રૂપન્તિઆદિ વિસુદ્ધિમગ્ગે વિત્થારિતમેવ. નેતં મમાતિઆદિ તણ્હામાનદિટ્ઠિપટિક્ખેપવસેન વુત્તં. સમ્મપ્પઞ્ઞાય પસ્સતીતિ સમ્મા હેતુના કારણેન સહવિપસ્સનાય મગ્ગપઞ્ઞાય પસ્સતિ. પદાલેતીતિ અરહત્તમગ્ગેન પદાલેતિ.