(૨) મૂલમૂલનયો

૫૩. (ક) યે કેચિ કુસલા ધમ્મા, સબ્બે તે કુસલમૂલમૂલાતિ? તીણેવ કુસલમૂલમૂલાનિ. અવસેસા કુસલા ધમ્મા ન કુસલમૂલમૂલા.

(ખ) યે વા પન કુસલમૂલમૂલા, સબ્બે તે ધમ્મા કુસલાતિ? આમન્તા.

૫૪. (ક) યે કેચિ કુસલા ધમ્મા, સબ્બે તે કુસલમૂલેન એકમૂલમૂલાતિ? આમન્તા.

(ખ) યે વા પન કુસલમૂલેન એકમૂલમૂલા, સબ્બે તે ધમ્મા કુસલાતિ?

કુસલસમુટ્ઠાનં રૂપં કુસલમૂલેન એકમૂલમૂલં, ન કુસલં. કુસલં કુસલમૂલેન એકમૂલમૂલઞ્ચેવ કુસલઞ્ચ.

૫૫. (ક) યે કેચિ કુસલમૂલેન એકમૂલમૂલા ધમ્મા, સબ્બે તે કુસલમૂલેન અઞ્ઞમઞ્ઞમૂલમૂલાતિ?

મૂલાનિ યાનિ એકતો ઉપ્પજ્જન્તિ કુસલમૂલાનિ એકમૂલમૂલાનિ ચેવ અઞ્ઞમઞ્ઞમૂલમૂલાનિ ચ. અવસેસા કુસલમૂલસહજાતા ધમ્મા કુસલમૂલેન એકમૂલમૂલા, ન ચ અઞ્ઞમઞ્ઞમૂલમૂલા.

(ખ) યે વા પન કુસલમૂલેન અઞ્ઞમઞ્ઞમૂલમૂલા, સબ્બે તે ધમ્મા કુસલાતિ? આમન્તા.