(૩) મૂલકનયો

૫૬. (ક) યે કેચિ કુસલા ધમ્મા, સબ્બે તે કુસલમૂલકાતિ? આમન્તા.

(ખ) યે વા પન કુસલમૂલકા, સબ્બે તે ધમ્મા કુસલાતિ?

કુસલસમુટ્ઠાનં રૂપં કુસલમૂલકં ન કુસલં. કુસલં કુસલમૂલકઞ્ચેવ કુસલઞ્ચ.

૫૭. (ક) યે કેચિ કુસલા ધમ્મા, સબ્બે તે કુસલમૂલેન એકમૂલકાતિ? આમન્તા.

(ખ) યે વા પન કુસલમૂલેન એકમૂલકા, સબ્બે તે ધમ્મા કુસલાતિ?

કુસલસમુટ્ઠાનં રૂપં કુસલમૂલેન એકમૂલકં, ન કુસલં. કુસલં કુસલમૂલેન એકમૂલકઞ્ચેવ કુસલઞ્ચ.

૫૮. (ક) યે કેચિ કુસલમૂલેન એકમૂલકા ધમ્મા, સબ્બે તે કુસલમૂલેન અઞ્ઞમઞ્ઞમૂલકાતિ?

મૂલાનિ યાનિ એકતો ઉપ્પજ્જન્તિ કુસલમૂલાનિ એકમૂલકાનિ ચેવ અઞ્ઞમઞ્ઞમૂલકાનિ ચ. અવસેસા કુસલમૂલસહજાતા ધમ્મા કુસલમૂલેન એકમૂલકા, ન ચ અઞ્ઞમઞ્ઞમૂલકા.

(ખ) યે વા પન કુસલમૂલેન અઞ્ઞમઞ્ઞમૂલકા, સબ્બે તે ધમ્મા કુસલાતિ? આમન્તા.