૧. કુસલા ધમ્મા (૧) મૂલનયો

૫૦. (ક) યે કેચિ કુસલા ધમ્મા, સબ્બે તે કુસલમૂલાતિ? તીણેવ કુસલમૂલાનિ. અવસેસા કુસલા ધમ્મા ન કુસલમૂલા.

(ખ) યે વા પન કુસલમૂલા, સબ્બે તે ધમ્મા કુસલાતિ? આમન્તા.

૫૧. (ક) યે કેચિ કુસલા ધમ્મા, સબ્બે તે કુસલમૂલેન એકમૂલાતિ? આમન્તા.

(ખ) યે વા પન કુસલમૂલેન એકમૂલા, સબ્બે તે ધમ્મા કુસલાતિ?

કુસલસમુટ્ઠાનં રૂપં કુસલમૂલેન એકમૂલં, ન કુસલં. કુસલં કુસલમૂલેન એકમૂલઞ્ચેવ કુસલઞ્ચ.

૫૨. (ક) યે કેચિ કુસલમૂલેન એકમૂલા ધમ્મા, સબ્બે તે કુસલમૂલેન અઞ્ઞમઞ્ઞમૂલાતિ?

મૂલાનિ યાનિ એકતો ઉપ્પજ્જન્તિ કુસલમૂલાનિ એકમૂલાનિ ચેવ અઞ્ઞમઞ્ઞમૂલાનિ ચ. અવસેસા કુસલમૂલસહજાતા ધમ્મા કુસલમૂલેન એકમૂલા, ન ચ અઞ્ઞમઞ્ઞમૂલા.

(ખ) યે વા પન કુસલમૂલેન અઞ્ઞમઞ્ઞમૂલા, સબ્બે તે ધમ્મા કુસલાતિ? આમન્તા.

(૨) મૂલમૂલનયો

૫૩. (ક) યે કેચિ કુસલા ધમ્મા, સબ્બે તે કુસલમૂલમૂલાતિ? તીણેવ કુસલમૂલમૂલાનિ. અવસેસા કુસલા ધમ્મા ન કુસલમૂલમૂલા.

(ખ) યે વા પન કુસલમૂલમૂલા, સબ્બે તે ધમ્મા કુસલાતિ? આમન્તા.

૫૪. (ક) યે કેચિ કુસલા ધમ્મા, સબ્બે તે કુસલમૂલેન એકમૂલમૂલાતિ? આમન્તા.

(ખ) યે વા પન કુસલમૂલેન એકમૂલમૂલા, સબ્બે તે ધમ્મા કુસલાતિ?

કુસલસમુટ્ઠાનં રૂપં કુસલમૂલેન એકમૂલમૂલં, ન કુસલં. કુસલં કુસલમૂલેન એકમૂલમૂલઞ્ચેવ કુસલઞ્ચ.

૫૫. (ક) યે કેચિ કુસલમૂલેન એકમૂલમૂલા ધમ્મા, સબ્બે તે કુસલમૂલેન અઞ્ઞમઞ્ઞમૂલમૂલાતિ?

મૂલાનિ યાનિ એકતો ઉપ્પજ્જન્તિ કુસલમૂલાનિ એકમૂલમૂલાનિ ચેવ અઞ્ઞમઞ્ઞમૂલમૂલાનિ ચ. અવસેસા કુસલમૂલસહજાતા ધમ્મા કુસલમૂલેન એકમૂલમૂલા, ન ચ અઞ્ઞમઞ્ઞમૂલમૂલા.

(ખ) યે વા પન કુસલમૂલેન અઞ્ઞમઞ્ઞમૂલમૂલા, સબ્બે તે ધમ્મા કુસલાતિ? આમન્તા.

(૩) મૂલકનયો

૫૬. (ક) યે કેચિ કુસલા ધમ્મા, સબ્બે તે કુસલમૂલકાતિ? આમન્તા.

(ખ) યે વા પન કુસલમૂલકા, સબ્બે તે ધમ્મા કુસલાતિ?

કુસલસમુટ્ઠાનં રૂપં કુસલમૂલકં ન કુસલં. કુસલં કુસલમૂલકઞ્ચેવ કુસલઞ્ચ.

૫૭. (ક) યે કેચિ કુસલા ધમ્મા, સબ્બે તે કુસલમૂલેન એકમૂલકાતિ? આમન્તા.

(ખ) યે વા પન કુસલમૂલેન એકમૂલકા, સબ્બે તે ધમ્મા કુસલાતિ?

કુસલસમુટ્ઠાનં રૂપં કુસલમૂલેન એકમૂલકં, ન કુસલં. કુસલં કુસલમૂલેન એકમૂલકઞ્ચેવ કુસલઞ્ચ.

૫૮. (ક) યે કેચિ કુસલમૂલેન એકમૂલકા ધમ્મા, સબ્બે તે કુસલમૂલેન અઞ્ઞમઞ્ઞમૂલકાતિ?

મૂલાનિ યાનિ એકતો ઉપ્પજ્જન્તિ કુસલમૂલાનિ એકમૂલકાનિ ચેવ અઞ્ઞમઞ્ઞમૂલકાનિ ચ. અવસેસા કુસલમૂલસહજાતા ધમ્મા કુસલમૂલેન એકમૂલકા, ન ચ અઞ્ઞમઞ્ઞમૂલકા.

(ખ) યે વા પન કુસલમૂલેન અઞ્ઞમઞ્ઞમૂલકા, સબ્બે તે ધમ્મા કુસલાતિ? આમન્તા.

(૪) મૂલમૂલકનયો

૫૯. (ક) યે કેચિ કુસલા ધમ્મા, સબ્બે તે કુસલમૂલમૂલકાતિ? આમન્તા.

(ખ) યે વા પન કુસલમૂલમૂલકા, સબ્બે તે ધમ્મા કુસલાતિ?

કુસલસમુટ્ઠાનં રૂપં કુસલમૂલમૂલકં ન કુસલં. કુસલં કુસલમૂલમૂલકઞ્ચેવ કુસલઞ્ચ.

૬૦. (ક) યે કેચિ કુસલા ધમ્મા, સબ્બે તે કુસલમૂલેન એકમૂલમૂલકાતિ? આમન્તા.

(ખ) યે વા પન કુસલમૂલેન એકમૂલમૂલકા, સબ્બે તે ધમ્મા કુસલાતિ?

કુસલસમુટ્ઠાનં રૂપં કુસલમૂલેન એકમૂલમૂલકં, ન કુસલં. કુસલં કુસલમૂલેન એકમૂલમૂલકઞ્ચેવ કુસલઞ્ચ.

૬૧. (ક) યે કેચિ કુસલમૂલેન એકમૂલમૂલકા ધમ્મા, સબ્બે તે કુસલમૂલેન અઞ્ઞમઞ્ઞમૂલમૂલકાતિ?

મૂલાનિ યાનિ એકતો ઉપ્પજ્જન્તિ કુસલમૂલાનિ એકમૂલમૂલકાનિ ચેવ અઞ્ઞમઞ્ઞમૂલમૂલકાનિ ચ. અવસેસા કુસલમૂલસહજાતા ધમ્મા કુસલમૂલેન એકમૂલમૂલકા, ન ચ અઞ્ઞમઞ્ઞમૂલમૂલકા.

(ખ) યે વા પન કુસલમૂલેન અઞ્ઞમઞ્ઞમૂલમૂલકા, સબ્બે તે ધમ્મા કુસલાતિ? આમન્તા.