૨. આયતનવિભઙ્ગો

૧. સુત્તન્તભાજનીયં

૧૫૪. દ્વાદસાયતનાનિ – ચક્ખાયતનં, રૂપાયતનં, સોતાયતનં, સદ્દાયતનં, ઘાનાયતનં, ગન્ધાયતનં, જિવ્હાયતનં, રસાયતનં, કાયાયતનં, ફોટ્ઠબ્બાયતનં, મનાયતનં, ધમ્માયતનં.

ચક્ખું અનિચ્ચં દુક્ખં અનત્તા વિપરિણામધમ્મં. રૂપા અનિચ્ચા દુક્ખા અનત્તા વિપરિણામધમ્મા. સોતં અનિચ્ચં દુક્ખં અનત્તા વિપરિણામધમ્મં. સદ્દા અનિચ્ચા દુક્ખા અનત્તા વિપરિણામધમ્મા. ઘાનં અનિચ્ચં દુક્ખં અનત્તા વિપરિણામધમ્મં. ગન્ધા અનિચ્ચા દુક્ખા અનત્તા વિપરિણામધમ્મા. જિવ્હા અનિચ્ચા દુક્ખા અનત્તા વિપરિણામધમ્મા. રસા અનિચ્ચા દુક્ખા અનત્તા વિપરિણામધમ્મા. કાયો અનિચ્ચો દુક્ખો અનત્તા વિપરિણામધમ્મો. ફોટ્ઠબ્બા અનિચ્ચા દુક્ખા અનત્તા વિપરિણામધમ્મા. મનો અનિચ્ચો દુક્ખો અનત્તા વિપરિણામધમ્મો. ધમ્મા અનિચ્ચા દુક્ખા અનત્તા વિપરિણામધમ્મા.

સુત્તન્તભાજનીયં.

૨. અભિધમ્મભાજનીયં

૧૫૫. દ્વાદસાયતનાનિ – ચક્ખાયતનં, સોતાયતનં, ઘાનાયતનં, જિવ્હાયતનં, કાયાયતનં, મનાયતનં, રૂપાયતનં, સદ્દાયતનં, ગન્ધાયતનં, રસાયતનં, ફોટ્ઠબ્બાયતનં, ધમ્માયતનં.

૧૫૬. તત્થ કતમં ચક્ખાયતનં? યં ચક્ખુ [ચક્ખું (સી. સ્યા. ક.) ધ. સ. ૫૯૬-૫૯૯] ચતુન્નં મહાભૂતાનં ઉપાદાય પસાદો અત્તભાવપરિયાપન્નો અનિદસ્સનો સપ્પટિઘો, યેન ચક્ખુના અનિદસ્સનેન સપ્પટિઘેન રૂપં સનિદસ્સનં સપ્પટિઘં પસ્સિ વા પસ્સતિ વા પસ્સિસ્સતિ વા પસ્સે વા, ચક્ખુમ્પેતં ચક્ખાયતનમ્પેતં ચક્ખુધાતુપેસા ચક્ખુન્દ્રિયમ્પેતં લોકોપેસો દ્વારાપેસા સમુદ્દોપેસો પણ્ડરમ્પેતં ખેત્તમ્પેતં વત્થુમ્પેતં નેત્તમ્પેતં નયનમ્પેતં ઓરિમં તીરમ્પેતં સુઞ્ઞો ગામોપેસો. ઇદં વુચ્ચતિ ‘‘ચક્ખાયતનં’’.

૧૫૭. તત્થ કતમં સોતાયતનં? યં સોતં ચતુન્નં મહાભૂતાનં ઉપાદાય પસાદો અત્તભાવપરિયાપન્નો અનિદસ્સનો સપ્પટિઘો, યેન સોતેન અનિદસ્સનેન સપ્પટિઘેન સદ્દં અનિદસ્સનં સપ્પટિઘં સુણિ વા સુણાતિ વા સુણિસ્સતિ વા સુણે વા, સોતમ્પેતં સોતાયતનમ્પેતં સોતધાતુપેસા સોતિન્દ્રિયમ્પેતં લોકોપેસો દ્વારાપેસા સમુદ્દોપેસો પણ્ડરમ્પેતં ખેત્તમ્પેતં વત્થુમ્પેતં ઓરિમં તીરમ્પેતં સુઞ્ઞો ગામોપેસો. ઇદં વુચ્ચતિ ‘‘સોતાયતનં’’.

૧૫૮. તત્થ કતમં ઘાનાયતનં? યં ઘાનં ચતુન્નં મહાભૂતાનં ઉપાદાય પસાદો અત્તભાવપરિયાપન્નો અનિદસ્સનો સપ્પટિઘો, યેન ઘાનેન અનિદસ્સનેન સપ્પટિઘેન ગન્ધં અનિદસ્સનં સપ્પટિઘં ઘાયિ વા ઘાયતિ વા ઘાયિસ્સતિ વા ઘાયે વા, ઘાનમ્પેતં ઘાનાયતનમ્પેતં ઘાનધાતુપેસા ઘાનિન્દ્રિયમ્પેતં લોકોપેસો દ્વારાપેસા સમુદ્દોપેસો પણ્ડરમ્પેતં ખેત્તમ્પેતં વત્થુમ્પેતં ઓરિમં તીરમ્પેતં સુઞ્ઞો ગામોપેસો. ઇદં વુચ્ચતિ ‘‘ઘાનાયતનં’’.

૧૫૯. તત્થ કતમં જિવ્હાયતનં? યા જિવ્હા ચતુન્નં મહાભૂતાનં ઉપાદાય પસાદો અત્તભાવપરિયાપન્નો અનિદસ્સનો સપ્પટિઘો, યાય જિવ્હાય અનિદસ્સનાય સપ્પટિઘાય રસં અનિદસ્સનં સપ્પટિઘં સાયિ વા સાયતિ વા સાયિસ્સતિ વા સાયે વા, જિવ્હાપેસા જિવ્હાયતનમ્પેતં જિવ્હાધાતુપેસા જીવ્હિન્દ્રિયમ્પેતં લોકોપેસો દ્વારાપેસા સમુદ્દોપેસો પણ્ડરમ્પેતં ખેત્તમ્પેતં વત્થુમ્પેતં ઓરિમં તીરમ્પેતં સુઞ્ઞો ગામોપેસો. ઇદં વુચ્ચતિ ‘‘જિવ્હાયતનં’’.

૧૬૦. તત્થ કતમં કાયાયતનં? યો કાયો ચતુન્નં મહાભૂતાનં ઉપાદાય પસાદો અત્તભાવપરિયાપન્નો અનિદસ્સનો સપ્પટિઘો, યેન કાયેન અનિદસ્સનેન સપ્પટિઘેન ફોટ્ઠબ્બં અનિદસ્સનં સપ્પટિઘં ફુસિ વા ફુસતિ વા ફુસિસ્સતિ વા ફુસે વા, કાયોપેસો કાયાયતનમ્પેતં કાયધાતુપેસા કાયિન્દ્રિયમ્પેતં લોકોપેસો દ્વારાપેસા સમુદ્દોપેસો પણ્ડરમ્પેતં ખેત્તમ્પેતં વત્થુમ્પેતં ઓરિમં તીરમ્પેતં સુઞ્ઞો ગામોપેસો. ઇદં વુચ્ચતિ ‘‘કાયાયતનં’’.

૧૬૧. તત્થ કતમં મનાયતનં? એકવિધેન મનાયતનં – ફસ્સસમ્પયુત્તં.

દુવિધેન મનાયતનં – અત્થિ સહેતુકં, અત્થિ અહેતુકં.

તિવિધેન મનાયતનં – અત્થિ કુસલં, અત્થિ અકુસલં, અત્થિ અબ્યાકતં.

ચતુબ્બિધેન મનાયતનં – અત્થિ કામાવચરં, અત્થિ રૂપાવચરં, અત્થિ અરૂપાવચરં, અત્થિ અપરિયાપન્નં.

પઞ્ચવિધેન મનાયતનં – અત્થિ સુખિન્દ્રિયસમ્પયુત્તં, અત્થિ દુક્ખિન્દ્રિયસમ્પયુત્તં, અત્થિ સોમનસ્સિન્દ્રિયસમ્પયુત્તં, અત્થિ દોમનસ્સિન્દ્રિયસમ્પયુત્તં, અત્થિ ઉપેક્ખિન્દ્રિયસમ્પયુત્તં.

છબ્બિધેન મનાયતનં – ચક્ખુવિઞ્ઞાણં, સોતવિઞ્ઞાણં, ઘાનવિઞ્ઞાણં, જિવ્હાવિઞ્ઞાણં, કાયવિઞ્ઞાણં, મનોવિઞ્ઞાણં. એવં છબ્બિધેન મનાયતનં.

સત્તવિધેન મનાયતનં – ચક્ખુવિઞ્ઞાણં, સોતવિઞ્ઞાણં, ઘાનવિઞ્ઞાણં, જિવ્હાવિઞ્ઞાણં, કાયવિઞ્ઞાણં, મનોધાતુ, મનોવિઞ્ઞાણધાતુ. એવં સત્તવિધેન મનાયતનં.

અટ્ઠવિધેન મનાયતનં – ચક્ખુવિઞ્ઞાણં, સોતવિઞ્ઞાણં, ઘાનવિઞ્ઞાણં, જિવ્હાવિઞ્ઞાણં, કાયવિઞ્ઞાણં અત્થિ સુખસહગતં, અત્થિ દુક્ખસહગતં, મનોધાતુ, મનોવિઞ્ઞાણધાતુ. એવં અટ્ઠવિધેન મનાયતનં.

નવવિધેન મનાયતનં – ચક્ખુવિઞ્ઞાણં, સોતવિઞ્ઞાણં, ઘાનવિઞ્ઞાણં, જિવ્હાવિઞ્ઞાણં, કાયવિઞ્ઞાણં, મનોધાતુ, મનોવિઞ્ઞાણધાતુ અત્થિ કુસલં, અત્થિ અકુસલં, અત્થિ અબ્યાકતં. એવં નવવિધેન મનાયતનં.

દસવિધેન મનાયતનં – ચક્ખુવિઞ્ઞાણં, સોતવિઞ્ઞાણં, ઘાનવિઞ્ઞાણં, જિવ્હાવિઞ્ઞાણં, કાયવિઞ્ઞાણં અત્થિ સુખસહગતં, અત્થિ દુક્ખસહગતં, મનોધાતુ, મનોવિઞ્ઞાણધાતુ અત્થિ કુસલં, અત્થિ અકુસલં, અત્થિ અબ્યાકતં. એવં દસવિધેન મનાયતનં.

એકવિધેન મનાયતનં – ફસ્સસમ્પયુત્તં.

દુવિધેન મનાયતનં – અત્થિ સહેતુકં, અત્થિ અહેતુકં.

તિવિધેન મનાયતનં – અત્થિ સુખાય વેદનાય સમ્પયુત્તં, અત્થિ દુક્ખાય વેદનાય સમ્પયુત્તં, અત્થિ અદુક્ખમસુખાય વેદનાય સમ્પયુત્તં…પે…. એવં બહુવિધેન મનાયતનં. ઇદં વુચ્ચતિ ‘‘મનાયતનં’’.

૧૬૨. તત્થ કતમં રૂપાયતનં? યં રૂપં ચતુન્નં મહાભૂતાનં ઉપાદાય વણ્ણનિભા સનિદસ્સનં સપ્પટિઘં નીલં પીતકં લોહિતકં [પીતં લોહિતં (સી.)] ઓદાતં કાળકં મઞ્જિટ્ઠકં [મઞ્જેટ્ઠકં (સી. સ્યા.)] હરિ હરિવણ્ણં અમ્બઙ્કુરવણ્ણં દીઘં રસ્સં અણું થૂલં વટ્ટં પરિમણ્ડલં ચતુરસ્સં છળંસં અટ્ઠંસં સોળસંસં નિન્નં થલં છાયા આતપો આલોકો અન્ધકારો અબ્ભા મહિકા ધૂમો રજો ચન્દમણ્ડલસ્સ વણ્ણનિભા સૂરિયમણ્ડલસ્સ [સુરિયમણ્ડલસ્સ (સી. સ્યા. કં.)] વણ્ણનિભા તારકરૂપાનં વણ્ણનિભા આદાસમણ્ડલસ્સ વણ્ણનિભા મણિસઙ્ખમુત્તવેળુરિયસ્સ વણ્ણનિભા જાતરૂપરજતસ્સ વણ્ણનિભા, યં વા પનઞ્ઞમ્પિ અત્થિ રૂપં ચતુન્નં મહાભૂતાનં ઉપાદાય વણ્ણનિભા સનિદસ્સનં સપ્પટિઘં, યં રૂપં સનિદસ્સનં સપ્પટિઘં ચક્ખુના અનિદસ્સનેન સપ્પટિઘેન પસ્સિ વા પસ્સતિ વા પસ્સિસ્સતિ વા પસ્સે વા, રૂપમ્પેતં રૂપાયતનમ્પેતં રૂપધાતુપેસા. ઇદં વુચ્ચતિ ‘‘રૂપાયતનં’’.

૧૬૩. તત્થ કતમં સદ્દાયતનં? યો સદ્દો ચતુન્નં મહાભૂતાનં ઉપાદાય અનિદસ્સનો સપ્પટિઘો ભેરિસદ્દો મુદિઙ્ગસદ્દો [મુતિઙ્ગસદ્ધો (સી.)] સઙ્ખસદ્દો પણવસદ્દો ગીતસદ્દો વાદિતસદ્દો સમ્મસદ્દો પાણિસદ્દો સત્તાનં નિગ્ઘોસસદ્દો ધાતૂનં સન્નિઘાતસદ્દો વાતસદ્દો ઉદકસદ્દો મનુસ્સસદ્દો અમનુસ્સસદ્દો, યો વા પનઞ્ઞોપિ અત્થિ સદ્દો ચતુન્નં મહાભૂતાનં ઉપાદાય અનિદસ્સનો સપ્પટિઘો, યં સદ્દં અનિદસ્સનં સપ્પટિઘં સોતેન અનિદસ્સનેન સપ્પટિઘેન સુણિ વા સુણાતિ વા સુણિસ્સતિ વા સુણે વા, સદ્દોપેસો સદ્દાયતનમ્પેતં સદ્દધાતુપેસા. ઇદં વુચ્ચતિ ‘‘સદ્દાયતનં’’.

૧૬૪. તત્થ કતમં ગન્ધાયતનં? યો ગન્ધો ચતુન્નં મહાભૂતાનં ઉપાદાય અનિદસ્સનો સપ્પટિઘો મૂલગન્ધો સારગન્ધો તચગન્ધો પત્તગન્ધો પુપ્ફગન્ધો ફલગન્ધો આમગન્ધો વિસ્સગન્ધો સુગન્ધો દુગ્ગન્ધો, યો વા પનઞ્ઞોપિ અત્થિ ગન્ધો ચતુન્નં મહાભૂતાનં ઉપાદાય અનિદસ્સનો સપ્પટિઘો, યં ગન્ધં અનિદસ્સનં સપ્પટિઘં ઘાનેન અનિદસ્સનેન સપ્પટિઘેન ઘાયિ વા ઘાયતિ વા ઘાયિસ્સતિ વા ઘાયે વા, ગન્ધોપેસો ગન્ધાયતનમ્પેતં ગન્ધધાતુપેસા. ઇદં વુચ્ચતિ ‘‘ગન્ધાયતનં’’.

૧૬૫. તત્થ કતમં રસાયતનં? યો રસો ચતુન્નં મહાભૂતાનં ઉપાદાય અનિદસ્સનો સપ્પટિઘો મૂલરસો ખન્ધરસો તચરસો પત્તરસો પુપ્ફરસો ફલરસો અમ્બિલં મધુરં તિત્તકં કટુકં લોણિકં [લપિલકં (સી.), લમ્પિકં (ક. સી.)] ખારિકં લમ્બિકં કસાવો સાદુ અસાદુ, યો વા પનઞ્ઞોપિ અત્થિ રસો ચતુન્નં મહાભૂતાનં ઉપાદાય અનિદસ્સનો સપ્પટિઘો, યં રસં અનિદસ્સનં સપ્પટિઘં જિવ્હાય અનિદસ્સનાય સપ્પટિઘાય સાયિ વા સાયતિ વા સાયિસ્સતિ વા સાયે વા, રસોપેસો રસાયતનમ્પેતં રસધાતુપેસા. ઇદં વુચ્ચતિ ‘‘રસાયતનં’’.

૧૬૬. તત્થ કતમં ફોટ્ઠબ્બાયતનં? પથવીધાતુ તેજોધાતુ વાયોધાતુ કક્ખળં મુદુકં સણ્હં ફરુસં સુખસમ્ફસ્સં દુક્ખસમ્ફસ્સં ગરુકં લહુકં, યં ફોટ્ઠબ્બં અનિદસ્સનં સપ્પટિઘં કાયેન અનિદસ્સનેન સપ્પટિઘેન ફુસિ વા ફુસતિ વા ફુસિસ્સતિ વા ફુસે વા, ફોટ્ઠબ્બોપેસો ફોટ્ઠબ્બાયતનમ્પેતં ફોટ્ઠબ્બધાતુપેસા. ઇદં વુચ્ચતિ ‘‘ફોટ્ઠબ્બાયતનં’’.

૧૬૭. તત્થ કતમં ધમ્માયતનં? વેદનાક્ખન્ધો, સઞ્ઞાક્ખન્ધો, સઙ્ખારક્ખન્ધો, યઞ્ચ રૂપં અનિદસ્સનઅપ્પટિઘં ધમ્માયતનપરિયાપન્નં, અસઙ્ખતા ચ ધાતુ.

તત્થ કતમો વેદનાક્ખન્ધો? એકવિધેન વેદનાક્ખન્ધો – ફસ્સસમ્પયુત્તો. દુવિધેન વેદનાક્ખન્ધો – અત્થિ સહેતુકો, અત્થિ અહેતુકો. તિવિધેન વેદનાક્ખન્ધો – અત્થિ કુસલો, અત્થિ અકુસલો, અત્થિ અબ્યાકતો…પે… એવં દસવિધેન વેદનાક્ખન્ધો…પે… એવં બહુવિધેન વેદનાક્ખન્ધો. અયં વુચ્ચતિ ‘‘વેદનાક્ખન્ધો’’.

તત્થ કતમો સઞ્ઞાક્ખન્ધો? એકવિધેન સઞ્ઞાક્ખન્ધો – ફસ્સસમ્પયુત્તો. દુવિધેન સઞ્ઞાક્ખન્ધો – અત્થિ સહેતુકો, અત્થિ અહેતુકો. તિવિધેન સઞ્ઞાક્ખન્ધો – અત્થિ કુસલો, અત્થિ અકુસલો, અત્થિ અબ્યાકતો…પે… એવં દસવિધેન સઞ્ઞાક્ખન્ધો…પે… એવં બહુવિધેન સઞ્ઞાક્ખન્ધો. અયં વુચ્ચતિ ‘‘સઞ્ઞાક્ખન્ધો’’.

તત્થ કતમો સઙ્ખારક્ખન્ધો? એકવિધેન સઙ્ખારક્ખન્ધો – ચિત્તસમ્પયુત્તો. દુવિધેન સઙ્ખારક્ખન્ધો – અત્થિ હેતુ, અત્થિ ન હેતુ. તિવિધેન સઙ્ખારક્ખન્ધો – અત્થિ કુસલો, અત્થિ અકુસલો, અત્થિ અબ્યાકતો…પે… એવં દસવિધેન સઙ્ખારક્ખન્ધો…પે… એવં બહુવિધેન સઙ્ખારક્ખન્ધો. અયં વુચ્ચતિ ‘‘સઙ્ખારક્ખન્ધો’’.

તત્થ કતમં રૂપં અનિદસ્સનઅપ્પટિઘં ધમ્માયતનપરિયાપન્નં? ઇત્થિન્દ્રિયં પુરિસિન્દ્રિયં…પે… કબળીકારો આહારો. ઇદં વુચ્ચતિ રૂપં ‘‘અનિદસ્સનઅપ્પટિઘં ધમ્માયતનપરિયાપન્નં’’.

તત્થ કતમા અસઙ્ખતા ધાતુ? રાગક્ખયો, દોસક્ખયો, મોહક્ખયો – અયં વુચ્ચતિ ‘‘અસઙ્ખતા ધાતુ’’.

ઇદં વુચ્ચતિ ધમ્માયતનં.

અભિધમ્મભાજનીયં.

૩. પઞ્હાપુચ્છકં

૧૬૮. દ્વાદસાયતનાનિ – ચક્ખાયતનં, રૂપાયતનં, સોતાયતનં, સદ્દાયતનં, ઘાનાયતનં, ગન્ધાયતનં, જિવ્હાયતનં, રસાયતનં, કાયાયતનં, ફોટ્ઠબ્બાયતનં, મનાયતનં, ધમ્માયતનં.

૧૬૯. દ્વાદસન્નં આયતનાનં કતિ કુસલા, કતિ અકુસલા, કતિ અબ્યાકતા…પે… કતિ સરણા, કતિ અરણા?

૧. તિકં

૧૭૦. દસાયતના અબ્યાકતા. દ્વાયતના સિયા કુસલા, સિયા અકુસલા, સિયા અબ્યાકતા. દસાયતના ન વત્તબ્બા – ‘‘સુખાય વેદનાય સમ્પયુત્તા’’તિપિ, ‘‘દુક્ખાય વેદનાય સમ્પયુત્તા’’તિપિ, ‘‘અદુક્ખમસુખાય વેદનાય સમ્પયુત્તા’’તિપિ. મનાયતનં સિયા સુખાય વેદનાય સમ્પયુત્તં, સિયા દુક્ખાય વેદનાય સમ્પયુત્તં, સિયા અદુક્ખમસુખાય વેદનાય સમ્પયુત્તં. ધમ્માયતનં સિયા સુખાય વેદનાય સમ્પયુત્તં, સિયા દુક્ખાય વેદનાય સમ્પયુત્તં, સિયા અદુક્ખમસુખાય વેદનાય સમ્પયુત્તં, સિયા ન વત્તબ્બં – ‘‘સુખાય વેદનાય સમ્પયુત્ત’’ન્તિપિ, ‘‘દુક્ખાય વેદનાય સમ્પયુત્ત’’ન્તિપિ, ‘‘અદુક્ખમસુખાય વેદનાય સમ્પયુત્ત’’ન્તિપિ. દસાયતના નેવવિપાકનવિપાકધમ્મધમ્મા. દ્વાયતના સિયા વિપાકા, સિયા વિપાકધમ્મધમ્મા, સિયા નેવવિપાકનવિપાકધમ્મધમ્મા.

પઞ્ચાયતના ઉપાદિન્નુપાદાનિયા. સદ્દાયતનં અનુપાદિન્નુપાદાનિયં. ચત્તારો આયતના સિયા ઉપાદિન્નુપાદાનિયા, સિયા અનુપાદિન્નુપાદાનિયા, સિયા અનુપાદાનિયા. દ્વાયતના સિયા ઉપાદિન્નુપાદાનિયા, સિયા અનુપાદિન્નુપાદાનિયા, સિયા અનુપાદિન્નઅનુપાદાનિયા. દસાયતના અસંકિલિટ્ઠસંકિલેસિકા. દ્વાયતના સિયા સંકિલિટ્ઠસંકિલેસિકા, સિયા અસંકિલિટ્ઠસંકિલેસિકા, સિયા અસંકિલિટ્ઠઅસંકિલેસિકા. દસાયતના અવિતક્કઅવિચારા. મનાયતનં સિયા સવિતક્કસવિચારં, સિયા અવિતક્કવિચારમત્તં, સિયા અવિતક્કઅવિચારં. ધમ્માયતનં સિયા સવિતક્કસવિચારં, સિયા અવિતક્કવિચારમત્તં, સિયા અવિતક્કઅવિચારં, સિયા ન વત્તબ્બં – ‘‘સવિતક્કસવિચાર’’ન્તિપિ, ‘‘અવિતક્કવિચારમત્ત’’ન્તિપિ, ‘‘અવિતક્કઅવિચાર’’ન્તિપિ. દસાયતના ન વત્તબ્બા – ‘‘પીતિસહગતા’’તિપિ, ‘‘સુખસહગતા’’તિપિ, ‘‘ઉપેક્ખાસહગતા’’તિપિ. દ્વાયતના સિયા પીતિસહગતા, સિયા સુખસહગતા, સિયા ઉપેક્ખાસહગતા, સિયા ન વત્તબ્બા – ‘‘પીતિસહગતા’’તિપિ, ‘‘સુખસહગતા’’તિપિ, ‘‘ઉપેક્ખાસહગતા’’તિપિ.

દસાયતના નેવ દસ્સનેન ન ભાવનાય પહાતબ્બા. દ્વાયતના સિયા દસ્સનેન પહાતબ્બા, સિયા ભાવનાય પહાતબ્બા, સિયા નેવ દસ્સનેન ન ભાવનાય પહાતબ્બા. દસાયતના નેવ દસ્સનેન ન ભાવનાય પહાતબ્બહેતુકા. દ્વાયતના સિયા દસ્સનેન પહાતબ્બહેતુકા, સિયા ભાવનાય પહાતબ્બહેતુકા, સિયા નેવ દસ્સનેન ન ભાવનાય પહાતબ્બહેતુકા. દસાયતના નેવાચયગામિનાપચયગામિનો. દ્વાયતના સિયા આચયગામિનો, સિયા અપચયગામિનો, સિયા નેવાચયગામિનાપચયગામિનો. દસાયતના નેવસેક્ખનાસેક્ખા. દ્વાયતના સિયા સેક્ખા, સિયા અસેક્ખા, સિયા નેવસેક્ખનાસેક્ખા. દસાયતના પરિત્તા. દ્વાયતના સિયા પરિત્તા, સિયા મહગ્ગતા, સિયા અપ્પમાણા. દસાયતના અનારમ્મણા. દ્વાયતના સિયા પરિત્તારમ્મણા, સિયા મહગ્ગતારમ્મણા, સિયા અપ્પમાણારમ્મણા, સિયા ન વત્તબ્બા – ‘‘પરિત્તારમ્મણા’’તિપિ, ‘‘મહગ્ગતારમ્મણા’’તિપિ, ‘‘અપ્પમાણારમ્મણા’’તિપિ. દસાયતના મજ્ઝિમા. દ્વાયતના સિયા હીના, સિયા મજ્ઝિમા, સિયા પણીતા. દસાયતના અનિયતા. દ્વાયતના સિયા મિચ્છત્તનિયતા, સિયા સમ્મત્તનિયતા, સિયા અનિયતા.

દસાયતના અનારમ્મણા. દ્વાયતના સિયા મગ્ગારમ્મણા, સિયા મગ્ગહેતુકા, સિયા મગ્ગાધિપતિનો, સિયા ન વત્તબ્બા – ‘‘મગ્ગારમ્મણા’’તિપિ, ‘‘મગ્ગહેતુકા’’તિપિ, ‘‘મગ્ગાધિપતિનો’’તિપિ. પઞ્ચાયતના સિયા ઉપ્પન્ના, સિયા ઉપ્પાદિનો, ન વત્તબ્બા – ‘‘અનુપ્પન્ના’’તિ. સદ્દાયતનં સિયા ઉપ્પન્નં, સિયા અનુપ્પન્નં, ન વત્તબ્બં – ‘‘ઉપ્પાદી’’તિ. પઞ્ચાયતના સિયા ઉપ્પન્ના, સિયા અનુપ્પન્ના, સિયા ઉપ્પાદિનો. ધમ્માયતનં સિયા ઉપ્પન્નં, સિયા અનુપ્પન્નં, સિયા ઉપ્પાદિ, સિયા ન વત્તબ્બં – ‘‘ઉપ્પન્ન’’ન્તિપિ, ‘‘અનુપ્પન્ન’’ન્તિપિ, ‘‘ઉપ્પાદી’’તિપિ. એકાદસાયતના સિયા અતીતા, સિયા અનાગતા, સિયા પચ્ચુપ્પન્ના. ધમ્માયતનં સિયા અતીતં, સિયા અનાગતં, સિયા પચ્ચુપ્પન્નં, સિયા ન વત્તબ્બં – ‘‘અતીત’’ન્તિપિ, ‘‘અનાગત’’ન્તિપિ, ‘‘પચ્ચુપ્પન્ન’’ન્તિપિ. દસાયતના અનારમ્મણા. દ્વાયતના સિયા અતીતારમ્મણા, સિયા અનાગતારમ્મણા, સિયા પચ્ચુપ્પન્નારમ્મણા, સિયા ન વત્તબ્બા – ‘‘અતીતારમ્મણા’’તિપિ, ‘‘અનાગતારમ્મણા’’તિપિ, ‘‘પચ્ચુપ્પન્નારમ્મણા’’તિપિ; સિયા અજ્ઝત્તા, સિયા બહિદ્ધા, સિયા અજ્ઝત્તબહિદ્ધા. દસાયતના અનારમ્મણા. દ્વાયતના સિયા અજ્ઝત્તારમ્મણા, સિયા બહિદ્ધારમ્મણા, સિયા અજ્ઝત્તબહિદ્ધારમ્મણા, સિયા ન વત્તબ્બા – ‘‘અજ્ઝત્તારમ્મણા’’તિપિ, ‘‘બહિદ્ધારમ્મણા’’તિપિ, ‘‘અજ્ઝત્તબહિદ્ધારમ્મણા’’તિપિ. રૂપાયતનં સનિદસ્સનસપ્પટિઘં. નવાયતના અનિદસ્સનસપ્પટિઘા. દ્વાયતના અનિદસ્સનઅપ્પટિઘા.

૨. દુકં

૧૭૧. એકાદસાયતના ન હેતૂ. ધમ્માયતનં સિયા હેતુ, સિયા ન હેતુ. દસાયતના અહેતુકા. દ્વાયતના સિયા સહેતુકા, સિયા અહેતુકા. દસાયતના હેતુવિપ્પયુત્તા. દ્વાયતના સિયા હેતુસમ્પયુત્તા, સિયા હેતુવિપ્પયુત્તા. દસાયતના ન વત્તબ્બા – ‘‘હેતૂ ચેવ સહેતુકા ચા’’તિપિ, ‘‘સહેતુકા ચેવ ન ચ હેતૂ’’તિપિ. મનાયતનં ન વત્તબ્બં – ‘‘હેતુ ચેવ સહેતુકઞ્ચા’’તિ, સિયા સહેતુકઞ્ચેવ ન ચ હેતુ, સિયા ન વત્તબ્બં – ‘‘સહેતુકઞ્ચેવ ન ચ હેતૂ’’તિ. ધમ્માયતનં સિયા હેતુ ચેવ સહેતુકઞ્ચ, સિયા સહેતુકઞ્ચેવ ન ચ હેતુ, સિયા ન વત્તબ્બં – ‘‘હેતુ ચેવ સહેતુકઞ્ચા’’તિપિ, ‘‘સહેતુકઞ્ચેવ ન ચ હેતૂ’’તિપિ. દસાયતના ન વત્તબ્બા – ‘‘હેતૂ ચેવ હેતુસમ્પયુત્તા ચા’’તિપિ, ‘‘હેતુસમ્પયુત્તા ચેવ ન ચ હેતૂ’’તિપિ. મનાયતનં ન વત્તબ્બં – ‘‘હેતુ ચેવ હેતુસમ્પયુત્તઞ્ચા’’તિ, સિયા હેતુસમ્પયુત્તઞ્ચેવ ન ચ હેતુ, સિયા ન વત્તબ્બં – ‘‘હેતુસમ્પયુત્તઞ્ચેવ ન ચ હેતૂ’’તિ. ધમ્માયતનં સિયા હેતુ ચેવ હેતુસમ્પયુત્તઞ્ચ, સિયા હેતુસમ્પયુત્તઞ્ચેવ ન ચ હેતુ, સિયા ન વત્તબ્બં – ‘‘હેતુ ચેવ હેતુસમ્પયુત્તઞ્ચા’’તિપિ, ‘‘હેતુસમ્પયુત્તઞ્ચેવ ન ચ હેતૂ’’તિપિ. દસાયતના ન હેતૂઅહેતુકા. મનાયતનં સિયા ન હેતુસહેતુકં, સિયા ન હેતુઅહેતુકં. ધમ્માયતનં સિયા ન હેતુસહેતુકં, સિયા ન હેતુઅહેતુકં, સિયા ન વત્તબ્બં – ‘‘ન હેતુસહેતુક’’ન્તિપિ, ‘‘ન હેતુઅહેતુક’’ન્તિપિ.

એકાદસાયતના સપ્પચ્ચયા. ધમ્માયતનં સિયા સપ્પચ્ચયં, સિયા અપ્પચ્ચયં. એકાદસાયતના સઙ્ખતા. ધમ્માયતનં સિયા સઙ્ખતં, સિયા અસઙ્ખતં. રૂપાયતનં સનિદસ્સનં. એકાદસાયતના અનિદસ્સના. દસાયતના સપ્પટિઘા. દ્વાયતના અપ્પટિઘા. દસાયતના રૂપા. મનાયતનં અરૂપં. ધમ્માયતનં સિયા રૂપં, સિયા અરૂપં. દસાયતના લોકિયા. દ્વાયતના સિયા લોકિયા, સિયા લોકુત્તરા; કેનચિ વિઞ્ઞેય્યા, કેનચિ ન વિઞ્ઞેય્યા.

એકાદસાયતના નો આસવા. ધમ્માયતનં સિયા આસવો, સિયા નો આસવો. દસાયતના સાસવા. દ્વાયતના સિયા સાસવા, સિયા અનાસવા. દસાયતના આસવવિપ્પયુત્તા. દ્વાયતના સિયા આસવસમ્પયુત્તા, સિયા આસવવિપ્પયુત્તા. દસાયતના ન વત્તબ્બા – ‘‘આસવા ચેવ સાસવા ચા’’તિ, ‘‘સાસવા ચેવ નો ચ આસવા’’. મનાયતનં ન વત્તબ્બં – ‘‘આસવો ચેવ સાસવઞ્ચા’’તિ, સિયા સાસવઞ્ચેવ નો ચ આસવો, સિયા ન વત્તબ્બં – ‘‘સાસવઞ્ચેવ નો ચ આસવો’’તિ. ધમ્માયતનં સિયા આસવો ચેવ સાસવઞ્ચ, સિયા સાસવઞ્ચેવ નો ચ આસવો, સિયા ન વત્તબ્બં – ‘‘આસવો ચેવ સાસવઞ્ચા’’તિપિ, ‘‘સાસવઞ્ચેવ નો ચ આસવો’’તિપિ. દસાયતના ન વત્તબ્બા – ‘‘આસવા ચેવ આસવસમ્પયુત્તા ચા’’તિપિ, ‘‘આસવસમ્પયુત્તા ચેવ નો ચ આસવા’’તિપિ. મનાયતનં ન વત્તબ્બં – ‘‘આસવો ચેવ આસવસમ્પયુત્તઞ્ચા’’તિ, સિયા આસવસમ્પયુત્તઞ્ચેવ નો ચ આસવો, સિયા ન વત્તબ્બં – ‘‘આસવસમ્પયુત્તઞ્ચેવ નો ચ આસવો’’તિ. ધમ્માયતનં સિયા આસવો ચેવ આસવસમ્પયુત્તઞ્ચ, સિયા આસવસમ્પયુત્તઞ્ચેવ નો ચ આસવો, સિયા ન વત્તબ્બં – ‘‘આસવો ચેવ આસવસમ્પયુત્તઞ્ચા’’તિપિ, ‘‘આસવસમ્પયુત્તઞ્ચેવ નો ચ આસવો’’તિપિ. દસાયતના આસવવિપ્પયુત્તસાસવા. દ્વાયતના સિયા આસવવિપ્પયુત્તસાસવા, સિયા આસવવિપ્પયુત્તઅનાસવા, સિયા ન વત્તબ્બા – ‘‘આસવવિપ્પયુત્તસાસવા’’તિપિ, ‘‘આસવવિપ્પયુત્તઅનાસવા’’તિપિ.

એકાદસાયતના નો સંયોજના. ધમ્માયતનં સિયા સંયોજનં, સિયા નો સંયોજનં. દસાયતના સંયોજનિયા. દ્વાયતના સિયા સંયોજનિયા, સિયા અસંયોજનિયા. દસાયતના સંયોજનવિપ્પયુત્તા. દ્વાયતના સિયા સંયોજનસમ્પયુત્તા, સિયા સંયોજનવિપ્પયુત્તા. દસાયતના ન વત્તબ્બા – ‘‘સંયોજના ચેવ સંયોજનિયા ચા’’તિ, સંયોજનિયા ચેવ નો ચ સંયોજના. મનાયતનં ન વત્તબ્બં – ‘‘સંયોજનઞ્ચેવ સંયોજનિયઞ્ચા’’તિ, સિયા સંયોજનિયઞ્ચેવ નો ચ સંયોજનં, સિયા ન વત્તબ્બં – ‘‘સંયોજનિયઞ્ચેવ નો ચ સંયોજન’’ન્તિ. ધમ્માયતનં સિયા સંયોજનઞ્ચેવ સંયોજનિયઞ્ચ, સિયા સંયોજનિયઞ્ચેવ નો ચ સંયોજનં, સિયા ન વત્તબ્બં – ‘‘સંયોજનઞ્ચેવ સંયોજનિય’’ન્તિપિ, ‘‘સંયોજનિયઞ્ચેવ નો ચ સંયોજન’’ન્તિપિ. દસાયતના ન વત્તબ્બા – ‘‘સંયોજના ચેવ સંયોજનસમ્પયુત્તા ચા’’તિપિ, ‘‘સંયોજનસમ્પયુત્તા ચેવ નો ચ સંયોજના’’તિપિ. મનાયતનં ન વત્તબ્બં – ‘‘સંયોજનઞ્ચેવ સંયોજનસમ્પયુત્તઞ્ચા’’તિ, સિયા સંયોજનસમ્પયુત્તઞ્ચેવ નો ચ સંયોજનં, સિયા ન વત્તબ્બં – ‘‘સંયોજનસમ્પયુત્તઞ્ચેવ નો ચ સંયોજન’’ન્તિ. ધમ્માયતનં સિયા સંયોજનઞ્ચેવ સંયોજનસમ્પયુત્તઞ્ચ, સિયા સંયોજનસમ્પયુત્તઞ્ચેવ નો ચ સંયોજનં, સિયા ન વત્તબ્બં – ‘‘સંયોજનઞ્ચેવ સંયોજનસમ્પયુત્તઞ્ચા’’તિપિ, ‘‘સંયોજનસમ્પયુત્તઞ્ચેવ નો ચ સંયોજન’’ન્તિપિ. દસાયતના સંયોજનવિપ્પયુત્તસંયોજનિયા. દ્વાયતના સિયા સંયોજનવિપ્પયુત્તસંયોજનિયા, સિયા સંયોજનવિપ્પયુત્તઅસંયોજનિયા, સિયા ન વત્તબ્બા – ‘‘સંયોજનવિપ્પયુત્તસંયોજનિયા’’તિપિ, ‘‘સંયોજનવિપ્પયુત્તઅસંયોજનિયા’’તિપિ.

એકાદસાયતના નો ગન્થા. ધમ્માયતનં સિયા ગન્થો, સિયા નો ગન્થો. દસાયતના ગન્થનિયા. દ્વાયતના સિયા ગન્થનિયા, સિયા અગન્થનિયા. દસાયતના ગન્થવિપ્પયુત્તા. દ્વાયતના સિયા ગન્થસમ્પયુત્તા, સિયા ગન્થવિપ્પયુત્તા. દસાયતના ન વત્તબ્બા – ‘‘ગન્થા ચેવ ગન્થનિયા ચા’’તિ, ગન્થનિયા ચેવ નો ચ ગન્થા. મનાયતનં ન વત્તબ્બં – ‘‘ગન્થો ચેવ ગન્થનિયઞ્ચા’’તિ, સિયા ગન્થનિયઞ્ચેવ નો ચ ગન્થો, સિયા ન વત્તબ્બં – ‘‘ગન્થનિયઞ્ચેવ નો ચ ગન્થો’’તિ. ધમ્માયતનં સિયા ગન્થો ચેવ ગન્થનિયઞ્ચ, સિયા ગન્થનિયઞ્ચેવ નો ચ ગન્થો, સિયા ન વત્તબ્બં – ‘‘ગન્થો ચેવ ગન્થનિયઞ્ચા’’તિપિ, ‘‘ગન્થનિયઞ્ચેવ નો ચ ગન્થો’’તિપિ. દસાયતના ન વત્તબ્બા – ‘‘ગન્થા ચેવ ગન્થસમ્પયુત્તા ચા’’તિપિ, ‘‘ગન્થસમ્પયુત્તા ચેવ નો ચ ગન્થા’’તિપિ. મનાયતનં ન વત્તબ્બં – ‘‘ગન્થો ચેવ ગન્થસમ્પયુત્તઞ્ચા’’તિ, સિયા ગન્થસમ્પયુત્તઞ્ચેવ નો ચ ગન્થો, સિયા ન વત્તબ્બં – ‘‘ગન્થસમ્પયુત્તઞ્ચેવ નો ચ ગન્થો’’તિ. ધમ્માયતનં સિયા ગન્થો ચેવ ગન્થસમ્પયુત્તઞ્ચ, સિયા ગન્થસમ્પયુત્તઞ્ચેવ નો ચ ગન્થો, સિયા ન વત્તબ્બં – ‘‘ગન્થો ચેવ ગન્થસમ્પયુત્તઞ્ચા’’તિપિ, ‘‘ગન્થસમ્પયુત્તઞ્ચેવ નો ચ ગન્થો’’તિપિ. દસાયતના ગન્થવિપ્પયુત્તગન્થનિયા. દ્વાયતના સિયા ગન્થવિપ્પયુત્તગન્થનિયા, સિયા ગન્થવિપ્પયુત્તઅગન્થનિયા, સિયા ન વત્તબ્બા – ‘‘ગન્થવિપ્પયુત્તગન્થનિયા’’તિપિ, ‘‘ગન્થવિપ્પયુત્તઅગન્થનિયા’’તિપિ.

એકાદસાયતના નો ઓઘા…પે… નો યોગા…પે… નો નીવરણા. ધમ્માયતનં સિયા નીવરણં, સિયા નો નીવરણં. દસાયતના નીવરણિયા. દ્વાયતના સિયા નીવરણિયા, સિયા અનીવરણિયા. દસાયતના નીવરણવિપ્પયુત્તા. દ્વાયતના સિયા નીવરણસમ્પયુત્તા, સિયા નીવરણવિપ્પયુત્તા. દસાયતના ન વત્તબ્બા – ‘‘નીવરણા ચેવ નીવરણિયા ચા’’તિ, નીવરણિયા ચેવ નો ચ નીવરણા. મનાયતનં ન વત્તબ્બં – ‘‘નીવરણઞ્ચેવ નીવરણિયઞ્ચા’’તિ, સિયા નીવરણિયઞ્ચેવ નો ચ નીવરણં, સિયા ન વત્તબ્બં – ‘‘નીવરણિયઞ્ચેવ નો ચ નીવરણ’’ન્તિ. ધમ્માયતનં સિયા નીવરણઞ્ચેવ નીવરણિયઞ્ચ, સિયા નીવરણિયઞ્ચેવ નો ચ નીવરણં, સિયા ન વત્તબ્બં – ‘‘નીવરણઞ્ચેવ નીવરણિયઞ્ચા’’તિપિ, ‘‘નીવરણિયઞ્ચેવ નો ચ નીવરણ’’ન્તિપિ. દસાયતના ન વત્તબ્બા – ‘‘નીવરણા ચેવ નીવરણસમ્પયુત્તા ચા’’તિપિ, ‘‘નીવરણસમ્પયુત્તા ચેવ નો ચ નીવરણા’’તિપિ. મનાયતનં ન વત્તબ્બં – ‘‘નીવરણઞ્ચેવ નીવરણસમ્પયુત્તઞ્ચા’’તિ, સિયા નીવરણસમ્પયુત્તઞ્ચેવ નો ચ નીવરણં, સિયા ન વત્તબ્બં – ‘‘નીવરણસમ્પયુત્તઞ્ચેવ નો ચ નીવરણ’’ન્તિ. ધમ્માયતનં સિયા નીવરણઞ્ચેવ નીવરણસમ્પયુત્તઞ્ચ, સિયા નીવરણસમ્પયુત્તઞ્ચેવ નો ચ નીવરણં, સિયા ન વત્તબ્બં – ‘‘નીવરણઞ્ચેવ નીવરણસમ્પયુત્તઞ્ચા’’તિપિ, ‘‘નીવરણસમ્પયુત્તઞ્ચેવ નો ચ નીવરણ’’ન્તિપિ. દસાયતના નીવરણવિપ્પયુત્તનીવરણિયા. દ્વાયતના સિયા નીવરણવિપ્પયુત્તનીવરણિયા, સિયા નીવરણવિપ્પયુત્તઅનીવરણિયા, સિયા ન વત્તબ્બા – ‘‘નીવરણવિપ્પયુત્તનીવરણિયા’’તિપિ, ‘‘નીવરણવિપ્પયુત્તઅનીવરણિયા’’તિપિ.

એકાદસાયતના નો પરામાસા. ધમ્માયતનં સિયા પરામાસો, સિયા નો પરામાસો. દસાયતના પરામટ્ઠા. દ્વાયતના સિયા પરામટ્ઠા, સિયા અપરામટ્ઠા. દસાયતના પરામાસવિપ્પયુત્તા. મનાયતનં સિયા પરામાસસમ્પયુત્તં, સિયા પરામાસવિપ્પયુત્તં. ધમ્માયતનં સિયા પરામાસસમ્પયુત્તં, સિયા પરામાસવિપ્પયુત્તં, સિયા ન વત્તબ્બં – ‘‘પરામાસસમ્પયુત્ત’’ન્તિપિ, ‘‘પરામાસવિપ્પયુત્ત’’ન્તિપિ. દસાયતના ન વત્તબ્બા – ‘‘પરામાસા ચેવ પરામટ્ઠા ચા’’તિ, ‘‘પરામટ્ઠા ચેવ નો ચ પરામાસા’’. મનાયતનં ન વત્તબ્બં – ‘‘પરામાસો ચેવ પરામટ્ઠઞ્ચા’’તિ, સિયા પરામટ્ઠઞ્ચેવ નો ચ પરામાસો, સિયા ન વત્તબ્બં – ‘‘પરામટ્ઠઞ્ચેવ નો ચ પરામાસો’’તિ. ધમ્માયતનં સિયા પરામાસો ચેવ પરામટ્ઠઞ્ચ, સિયા પરામટ્ઠઞ્ચેવ નો ચ પરામાસો, સિયા ન વત્તબ્બં – ‘‘પરામાસો ચેવ પરામટ્ઠઞ્ચા’’તિપિ, ‘‘પરામટ્ઠઞ્ચેવ નો ચ પરામાસો’’તિપિ. દસાયતના પરામાસવિપ્પયુત્તપરામટ્ઠા. દ્વાયતના સિયા પરામાસવિપ્પયુત્તપરામટ્ઠા, સિયા પરામાસવિપ્પયુત્તઅપરામટ્ઠા, સિયા ન વત્તબ્બા – ‘‘પરામાસવિપ્પયુત્તપરામટ્ઠા’’તિપિ, ‘‘પરામાસવિપ્પયુત્તઅપરામટ્ઠા’’તિપિ.

દસાયતના અનારમ્મણા. મનાયતનં સારમ્મણં. ધમ્માયતનં સિયા સારમ્મણં, સિયા અનારમ્મણં. મનાયતનં ચિત્તં. એકાદસાયતના નો ચિત્તા. એકાદસાયતના અચેતસિકા. ધમ્માયતનં સિયા ચેતસિકં, સિયા અચેતસિકં. દસાયતના ચિત્તવિપ્પયુત્તા. ધમ્માયતનં સિયા ચિત્તસમ્પયુત્તં, સિયા ચિત્તવિપ્પયુત્તં. મનાયતનં ન વત્તબ્બં – ‘‘ચિત્તેન સમ્પયુત્ત’’ન્તિપિ, ‘‘ચિત્તેન વિપ્પયુત્ત’’ન્તિપિ. દસાયતના ચિત્તવિસંસટ્ઠા. ધમ્માયતનં સિયા ચિત્તસંસટ્ઠં, સિયા ચિત્તવિસંસટ્ઠં. મનાયતનં ન વત્તબ્બં – ‘‘ચિત્તેન સંસટ્ઠ’’ન્તિપિ, ‘‘ચિત્તેન વિસંસટ્ઠ’’ન્તિપિ. છાયતના નો ચિત્તસમુટ્ઠાના. છાયતના સિયા ચિત્તસમુટ્ઠાના, સિયા નો ચિત્તસમુટ્ઠાના. એકાદસાયતના નો ચિત્તસહભુનો. ધમ્માયતનં સિયા ચિત્તસહભૂ, સિયા નો ચિત્તસહભૂ. એકાદસાયતના નો ચિત્તાનુપરિવત્તિનો. ધમ્માયતનં સિયા ચિત્તાનુપરિવત્તિ, સિયા નો ચિત્તાનુપરિવત્તિ. એકાદસાયતના નો ચિત્તસંસટ્ઠસમુટ્ઠાના. ધમ્માયતનં સિયા ચિત્તસંસટ્ઠસમુટ્ઠાનં, સિયા નો ચિત્તસંસટ્ઠસમુટ્ઠાનં. એકાદસાયતના નો ચિત્તસંસટ્ઠસમુટ્ઠાનસહભુનો. ધમ્માયતનં સિયા ચિત્તસંસટ્ઠસમુટ્ઠાનસહભૂ, સિયા નો ચિત્તસંસટ્ઠસમુટ્ઠાનસહભૂ. એકાદસાયતના નો ચિત્તસંસટ્ઠસમુટ્ઠાનાનુપરિવત્તિનો. ધમ્માયતનં સિયા ચિત્તસંસટ્ઠસમુટ્ઠાનાનુપરિવત્તિ, સિયા નો ચિત્તસંસટ્ઠસમુટ્ઠાનાનુપરિવત્તિ.

છાયતના અજ્ઝત્તિકા. છાયતના બાહિરા. નવાયતના ઉપાદા. દ્વાયતના નો ઉપાદા. ધમ્માયતનં સિયા ઉપાદા, સિયા નો ઉપાદા. પઞ્ચાયતના ઉપાદિન્ના. સદ્દાયતનં અનુપાદિન્નં. છાયતના સિયા ઉપાદિન્ના, સિયા અનુપાદિન્ના. એકાદસાયતના નો ઉપાદાના. ધમ્માયતનં સિયા ઉપાદાનં, સિયા નો ઉપાદાનં. દસાયતના ઉપાદાનિયા. દ્વાયતના સિયા ઉપાદાનિયા, સિયા અનુપાદાનિયા. દસાયતના ઉપાદાનવિપ્પયુત્તા. દ્વાયતના સિયા ઉપાદાનસમ્પયુત્તા, સિયા ઉપાદાનવિપ્પયુત્તા. દસાયતના ન વત્તબ્બા – ‘‘ઉપાદાના ચેવ ઉપાદાનિયા ચા’’તિ, ઉપાદાનિયા ચેવ નો ચ ઉપાદાના. મનાયતનં ન વત્તબ્બં – ‘‘ઉપાદાનઞ્ચેવ ઉપાદાનિયઞ્ચા’’તિ, સિયા ઉપાદાનિયઞ્ચેવ નો ચ ઉપાદાનં, સિયા ન વત્તબ્બં – ‘‘ઉપાદાનિયઞ્ચેવ નો ચ ઉપાદાન’’ન્તિ. ધમ્માયતનં સિયા ઉપાદાનઞ્ચેવ ઉપાદાનિયઞ્ચ, સિયા ઉપાદાનિયઞ્ચેવ નો ચ ઉપાદાનં, સિયા ન વત્તબ્બં – ‘‘ઉપાદાનઞ્ચેવ ઉપાદાનિયઞ્ચા’’તિપિ, ‘‘ઉપાદાનિયઞ્ચેવ નો ચ ઉપાદાન’’ન્તિપિ. દસાયતના ન વત્તબ્બા – ‘‘ઉપાદાના ચેવ ઉપાદાનસમ્પયુત્તા ચા’’તિપિ, ‘‘ઉપાદાનસમ્પયુત્તા ચેવ નો ચ ઉપાદાના’’તિપિ. મનાયતનં ન વત્તબ્બં – ‘‘ઉપાદાનિયઞ્ચેવ ઉપાદાનસમ્પયુત્તઞ્ચા’’તિ, સિયા ઉપાદાનસમ્પયુત્તઞ્ચેવ નો ચ ઉપાદાનં, સિયા ન વત્તબ્બં – ‘‘ઉપાદાનસમ્પયુત્તઞ્ચેવ નો ચ ઉપાદાન’’ન્તિ. ધમ્માયતનં સિયા ઉપાદાનઞ્ચેવ ઉપાદાનસમ્પયુત્તઞ્ચ, સિયા ઉપાદાનસમ્પયુત્તઞ્ચેવ નો ચ ઉપાદાનં, સિયા ન વત્તબ્બં – ‘‘ઉપાદાનઞ્ચેવ ઉપાદાનસમ્પયુત્તઞ્ચા’’તિપિ, ‘‘ઉપાદાનસમ્પયુત્તઞ્ચેવ નો ચ ઉપાદાન’’ન્તિપિ. દસાયતના ઉપાદાનવિપ્પયુત્તઉપાદાનિયા. દ્વાયતના સિયા ઉપાદાનસમ્પયુત્તઉપાદાનિયા, સિયા ઉપાદાનવિપ્પયુત્તઅનુપાદાનિયા, સિયા ન વત્તબ્બા – ‘‘ઉપાદાનવિપ્પયુત્તઉપાદાનિયા’’તિપિ, ‘‘ઉપાદાનવિપ્પયુત્તઅનુપાદાનિયા’’તિપિ.

એકાદસાયતના નો કિલેસા. ધમ્માયતનં સિયા કિલેસો, સિયા નો કિલેસો. દસાયતના સંકિલેસિકા. દ્વાયતના સિયા સંકિલેસિકા, સિયા અસંકિલેસિકા. દસાયતના અસંકિલિટ્ઠા. દ્વાયતના સિયા સંકિલિટ્ઠા, સિયા અસંકિલિટ્ઠા. દસાયતના કિલેસવિપ્પયુત્તા. દ્વાયતના સિયા કિલેસસમ્પયુત્તા, સિયા કિલેસવિપ્પયુત્તા. દસાયતના ન વત્તબ્બા – ‘‘કિલેસા ચેવ સંકિલેસિકા ચા’’તિ, ‘‘સંકિલેસિકા ચેવ નો ચ કિલેસા’’. મનાયતનં ન વત્તબ્બં – ‘‘કિલેસો ચેવ સંકિલેસિકઞ્ચા’’તિ, સિયા સંકિલેસિકઞ્ચેવ નો ચ કિલેસો, સિયા ન વત્તબ્બં – ‘‘સંકિલેસિકઞ્ચેવ નો ચ કિલેસો’’તિ. ધમ્માયતનં સિયા કિલેસો ચેવ સંકિલેસિકઞ્ચ, સિયા સંકિલેસિકઞ્ચેવ નો ચ કિલેસો, સિયા ન વત્તબ્બં – ‘‘કિલેસો ચેવ સંકિલેસિકઞ્ચા’’તિપિ, ‘‘સંકિલેસિકઞ્ચેવ નો ચ કિલેસો’’તિપિ. દસાયતના ન વત્તબ્બા – ‘‘કિલેસા ચેવ સંકિલિટ્ઠા ચા’’તિપિ, ‘‘સંકિલિટ્ઠા ચેવ નો ચ કિલેસા’’તિપિ. મનાયતનં ન વત્તબ્બં – ‘‘કિલેસો ચેવ સંકિલિટ્ઠઞ્ચા’’તિ, સિયા સંકિલિટ્ઠઞ્ચેવ નો ચ કિલેસો, સિયા ન વત્તબ્બં – ‘‘સંકિલિટ્ઠઞ્ચેવ નો ચ કિલેસો’’તિ. ધમ્માયતનં સિયા કિલેસો ચેવ સંકિલિટ્ઠઞ્ચ, સિયા સંકિલિટ્ઠઞ્ચેવ નો ચ કિલેસો, સિયા ન વત્તબ્બં – ‘‘કિલેસો ચેવ સંકિલિટ્ઠઞ્ચા’’તિપિ, ‘‘સંકિલિટ્ઠઞ્ચેવ નો ચ કિલેસો’’તિપિ.

દસાયતના ન વત્તબ્બા – ‘‘કિલેસા ચેવ કિલેસસમ્પયુત્તા ચા’’તિપિ, ‘‘કિલેસસમ્પયુત્તા ચેવ નો ચ ન કિલેસા’’તિપિ. મનાયતનં ન વત્તબ્બં – ‘‘કિલેસો ચેવ કિલેસસમ્પયુત્તઞ્ચા’’તિ, સિયા કિલેસસમ્પયુત્તઞ્ચેવ નો ચ કિલેસો, સિયા ન વત્તબ્બં – ‘‘કિલેસસમ્પયુત્તઞ્ચેવ નો ચ કિલેસો’’તિ. ધમ્માયતનં સિયા કિલેસો ચેવ કિલેસસમ્પયુત્તઞ્ચ, સિયા કિલેસસમ્પયુત્તઞ્ચેવ નો ચ કિલેસો, સિયા ન વત્તબ્બં – ‘‘કિલેસો ચેવ કિલેસસમ્પયુત્તઞ્ચા’’તિપિ, ‘‘કિલેસસમ્પયુત્તઞ્ચેવ નો ચ કિલેસો’’તિપિ. દસાયતના કિલેસવિપ્પયુત્તસંકિલેસિકા. દ્વાયતના સિયા કિલેસવિપ્પયુત્તસંકિલેસિકા, સિયા કિલેસવિપ્પયુત્તઅસંકિલેસિકા, સિયા ન વત્તબ્બા – ‘‘કિલેસવિપ્પયુત્તસંકિલેસિકા’’તિપિ, ‘‘કિલેસવિપ્પયુત્તઅસંકિલેસિકા’’તિપિ.

દસાયતના ન દસ્સનેન પહાતબ્બા. દ્વાયતના સિયા દસ્સનેન પહાતબ્બા, સિયા ન દસ્સનેન પહાતબ્બા. દસાયતના ન ભાવનાય પહાતબ્બા. દ્વાયતના સિયા ભાવનાય પહાતબ્બા, સિયા ન ભાવનાય પહાતબ્બા. દસાયતના ન દસ્સનેન પહાતબ્બહેતુકા. દ્વાયતના સિયા દસ્સનેન પહાતબ્બહેતુકા, સિયા ન દસ્સનેન પહાતબ્બહેતુકા. દસાયતના ન ભાવનાય પહાતબ્બહેતુકા. દ્વાયતના સિયા ભાવનાય પહાતબ્બહેતુકા, સિયા ન ભાવનાય પહાતબ્બહેતુકા. દસાયતના અવિતક્કા. દ્વાયતના સિયા સવિતક્કા, સિયા અવિતક્કા. દસાયતના અવિચારા. દ્વાયતના સિયા સવિચારા, સિયા અવિચારા. દસાયતના અપ્પીતિકા. દ્વાયતના સિયા સપ્પીતિકા, સિયા અપ્પીતિકા. દસાયતના ન પીતિસહગતા. દ્વાયતના સિયા પીતિસહગતા, સિયા ન પીતિસહગતા. દસાયતના ન સુખસહગતા. દ્વાયતના સિયા સુખસહગતા, સિયા ન સુખસહગતા. દસાયતના ન ઉપેક્ખાસહગતા. દ્વાયતના સિયા ઉપેક્ખાસહગતા, સિયા ન ઉપેક્ખાસહગતા.

દસાયતના કામાવચરા. દ્વાયતના સિયા કામાવચરા, સિયા ન કામાવચરા. દસાયતના ન રૂપાવચરા. દ્વાયતના સિયા રૂપાવચરા, સિયા ન રૂપાવચરા. દસાયતના ન અરૂપાવચરા. દ્વાયતના સિયા અરૂપાવચરા, સિયા ન અરૂપાવચરા. દસાયતના પરિયાપન્ના. દ્વાયતના સિયા પરિયાપન્ના, સિયા અપરિયાપન્ના. દસાયતના અનિય્યાનિકા. દ્વાયતના સિયા નિય્યાનિકા, સિયા અનિય્યાનિકા. દસાયતના અનિયતા. દ્વાયતના સિયા નિયતા, સિયા અનિયતા. દસાયતના સઉત્તરા. દ્વાયતના સિયા સઉત્તરા, સિયા અનુત્તરા. દસાયતના અરણા. દ્વાયતના સિયા સરણા, સિયા અરણાતિ.

પઞ્હાપુચ્છકં.

આયતનવિભઙ્ગો નિટ્ઠિતો.