૫. પઞ્ચકનિદ્દેસો

૮૦૪. (૧) તત્થ કતમો પઞ્ચઙ્ગિકો સમ્માસમાધિ? પીતિફરણતા, સુખફરણતા, ચેતોફરણતા, આલોકફરણતા, પચ્ચવેક્ખણાનિમિત્તં. દ્વીસુ ઝાનેસુ પઞ્ઞા પીતિફરણતા. તીસુ ઝાનેસુ પઞ્ઞા સુખફરણતા. પરચિત્તે ઞાણં ચેતોફરણતા. દિબ્બચક્ખુ આલોકફરણતા. તમ્હા તમ્હા સમાધિમ્હા વુટ્ઠિતસ્સ પચ્ચવેક્ખણાઞાણં પચ્ચવેક્ખણાનિમિત્તં. અયં વુચ્ચતિ પઞ્ચઙ્ગિકો સમ્માસમાધિ.

(૨) તત્થ કતમો પઞ્ચઞાણિકો સમ્માસમાધિ? ‘‘અયં સમાધિ પચ્ચુપ્પન્નસુખો ચેવ આયતિઞ્ચ સુખવિપાકો’’તિ પચ્ચત્તઞ્ઞેવ ઞાણં ઉપ્પજ્જતિ. ‘‘અયં સમાધિ અરિયો નિરામિસો’’તિ પચ્ચત્તઞ્ઞેવ ઞાણં ઉપ્પજ્જતિ. ‘‘અયં સમાધિ અકાપુરિસસેવિતો’’તિ પચ્ચત્તઞ્ઞેવ ઞાણં ઉપ્પજ્જતિ. ‘‘અયં સમાધિ સન્તો પણીતો પટિપ્પસ્સદ્ધલદ્ધો એકોદિભાવાધિગતો ન સસઙ્ખારનિગ્ગય્હવારિતગતો’’તિ પચ્ચત્તઞ્ઞેવ ઞાણં ઉપ્પજ્જતિ. સો ખો પનાહં ઇમં સમાધિં સતો સમાપજ્જામિ સતો વુટ્ઠહામી’’તિ પચ્ચત્તઞ્ઞેવ ઞાણં ઉપ્પજ્જતિ. અયં પઞ્ચઞાણિકો સમ્માસમાધિ. એવં પઞ્ચવિધેન ઞાણવત્થુ.

પઞ્ચકં.