૨. પઞ્હાપુચ્છકં

૭૧૪. પઞ્ચ સિક્ખાપદાનિ – પાણાતિપાતા વેરમણી સિક્ખાપદં, અદિન્નાદાના વેરમણી સિક્ખાપદં, કામેસુમિચ્છાચારા વેરમણી સિક્ખાપદં, મુસાવાદા વેરમણી સિક્ખાપદં, સુરામેરયમજ્જપમાદટ્ઠાના વેરમણી સિક્ખાપદં.

૭૧૫. પઞ્ચન્નં સિક્ખાપદાનં કતિ કુસલા, કતિ અકુસલા, કતિ અબ્યાકતા…પે… કતિ સરણા, કતિ અરણા?

૧. તિકં

૭૧૬. કુસલાયેવ. સિયા સુખાય વેદનાય સમ્પયુત્તા, સિયા અદુક્ખમસુખાય વેદનાય સમ્પયુત્તા, વિપાકધમ્મધમ્મા, અનુપાદિન્નુપાદાનિયા, અસંકિલિટ્ઠસંકિલેસિકા, સવિતક્કસવિચારા, સિયા પીતિસહગતા, સિયા સુખસહગતા, સિયા ઉપેક્ખાસહગતા.

નેવ દસ્સનેન ન ભાવનાય પહાતબ્બા, નેવ દસ્સનેન ન ભાવનાય પહાતબ્બહેતુકા, આચયગામિનો, નેવસેક્ખનાસેક્ખા, પરિત્તા, પરિત્તારમ્મણા, મજ્ઝિમા, અનિયતા, ન વત્તબ્બા મગ્ગારમ્મણાતિપિ, મગ્ગહેતુકાતિપિ, મગ્ગાધિપતિનોતિપિ. સિયા ઉપ્પન્ના, સિયા અનુપ્પન્ના, ન વત્તબ્બા ઉપ્પાદિનોતિ, સિયા અતીતા, સિયા અનાગતા, સિયા પચ્ચુપ્પન્ના, પચ્ચુપ્પન્નારમ્મણા, સિયા અજ્ઝત્તા, સિયા બહિદ્ધા, સિયા અજ્ઝત્તબહિદ્ધા, બહિદ્ધારમ્મણા, અનિદસ્સનઅપ્પટિઘા.

૨. દુકં

૭૧૭. ન હેતૂ સહેતુકા, હેતુસમ્પયુત્તા. ન વત્તબ્બા ‘‘હેતૂ ચેવ સહેતુકા ચા’’તિ, સહેતુકા ચેવ ન ચ હેતૂ, ન વત્તબ્બા ‘‘હેતૂ ચેવ હેતુસમ્પયુત્તા ચા’’તિ, હેતુસમ્પયુત્તા ચેવ ન ચ હેતૂ, ન હેતુ સહેતૂકા, સપ્પચ્ચયા, સઙ્ખતા, અનિદસ્સના, અપ્પટિઘા, અરૂપા, લોકિયા, કેનચિ વિઞ્ઞેય્યા, કેનચિ ન વિઞ્ઞેય્યા.

નો આસવા, સાસવા, આસવવિપ્પયુત્તા, ન વત્તબ્બા ‘‘આસવા ચેવ સાસવા ચા’’તિ, સાસવા ચેવ નો ચ આસવા, ન વત્તબ્બા ‘‘આસવા ચેવ આસવસમ્પયુત્તા ચા’’તિપિ, ‘‘આસવસમ્પયુત્તા ચેવ નો ચ આસવા’’તિપિ. આસવવિપ્પયુત્તા સાસવા, નો સંયોજના…પે… નો ગન્થા…પે… નો ઓઘા…પે… નો યોગા…પે… નો નીવરણા…પે… નો પરામાસા…પે… સારમ્મણા, નો ચિત્તા, ચેતસિકા, ચિત્તસમ્પયુત્તા, ચિત્તસંસટ્ઠા, ચિત્તસમુટ્ઠાના, ચિત્તસહભુનો, ચિત્તાનુપરિવત્તિનો, ચિત્તસંસટ્ઠસમુટ્ઠાના, ચિત્તસંસટ્ઠસમુટ્ઠાનસહભુનો, ચિત્તસંસટ્ઠસમુટ્ઠાનાનુપરિવત્તિનો, બાહિરા, નો ઉપાદા, અનુપાદિન્ના, નો ઉપાદાના…પે… નો કિલેસા.

ન દસ્સનેન પહાતબ્બા, ન ભાવનાયપહાતબ્બા, ન દસ્સનેન પહાતબ્બહેતુકા, ન ભાવનાય પહાતબ્બહેતુકા, સવિતક્કા, સવિચારા, સિયા સપ્પીતિકા, સિયા અપ્પીતિકા, સિયા પીતિસહગતા, સિયા ન પીતિસહગતા, સિયા સુખસહગતા, સિયા ન સુખસહગતા, સિયા ઉપેક્ખાસહગતા, સિયા ન ઉપેક્ખાસહગતા, કામાવચરા, ન રૂપાવચરા, ન અરૂપાવચરા, પરિયાપન્ના, અનિય્યાનિકા, અનિયતા, સઉત્તરા, અરણાતિ.

પઞ્હાપુચ્છકં.

સિક્ખાપદવિભઙ્ગો નિટ્ઠિતો.