૧. સુત્તન્તભાજનીયં

૪૬૬. સત્ત બોજ્ઝઙ્ગા – સતિસમ્બોજ્ઝઙ્ગો, ધમ્મવિચયસમ્બોજ્ઝઙ્ગો, વીરિયસમ્બોજ્ઝઙ્ગો, પીતિસમ્બોજ્ઝઙ્ગો, પસ્સદ્ધિસમ્બોજ્ઝઙ્ગો, સમાધિસમ્બોજ્ઝઙ્ગો, ઉપેક્ખાસમ્બોજ્ઝઙ્ગો.

૪૬૭. તત્થ કતમો સતિસમ્બોજ્ઝઙ્ગો? ઇધ ભિક્ખુ સતિમા હોતિ પરમેન સતિનેપક્કેન સમન્નાગતો, ચિરકતમ્પિ ચિરભાસિતમ્પિ સરિતા હોતિ અનુસ્સરિતા – અયં વુચ્ચતિ ‘‘સતિસમ્બોજ્ઝઙ્ગો’’.

સો તથા સતો વિહરન્તો તં ધમ્મં પઞ્ઞાય પવિચિનતિ પવિચરતિ પરિવીમંસમાપજ્જતિ – અયં વુચ્ચતિ ‘‘ધમ્મવિચયસમ્બોજ્ઝઙ્ગો’’.

તસ્સ તં ધમ્મં પઞ્ઞાય પવિચિનતો પવિચરતો પરિવીમંસમાપજ્જતો આરદ્ધં હોતિ વીરિયં અસલ્લીનં – અયં વુચ્ચતિ ‘‘વીરિયસમ્બોજ્ઝઙ્ગો’’.

આરદ્ધવીરિયસ્સ ઉપ્પજ્જતિ પીતિ નિરામિસા – અયં વુચ્ચતિ ‘‘પીતિસમ્બોજ્ઝઙ્ગો’’.

પીતિમનસ્સ કાયોપિ પસ્સમ્ભતિ, ચિત્તમ્પિ પસ્સમ્ભતિ – અયં વુચ્ચતિ ‘‘પસ્સદ્ધિસમ્બોજ્ઝઙ્ગો’’.

પસ્સદ્ધકાયસ્સ સુખિનો ચિત્તં સમાધિયતિ – અયં વુચ્ચતિ ‘‘સમાધિસમ્બોજ્ઝઙ્ગો’’.

સો તથા સમાહિતં ચિત્તં સાધુકં અજ્ઝુપેક્ખિતા હોતિ – અયં વુચ્ચતિ ‘‘ઉપેક્ખાસમ્બોજ્ઝઙ્ગો’’.

૪૬૮. સત્ત બોજ્ઝઙ્ગા – સતિસમ્બોજ્ઝઙ્ગો, ધમ્મવિચયસમ્બોજ્ઝઙ્ગો, વીરિયસમ્બોજ્ઝઙ્ગો, પીતિસમ્બોજ્ઝઙ્ગો, પસ્સદ્ધિસમ્બોજ્ઝઙ્ગો, સમાધિસમ્બોજ્ઝઙ્ગો, ઉપેક્ખાસમ્બોજ્ઝઙ્ગો.

૪૬૯. તત્થ કતમો સતિસમ્બોજ્ઝઙ્ગો? અત્થિ અજ્ઝત્તં ધમ્મેસુ સતિ, અત્થિ બહિદ્ધા ધમ્મેસુ સતિ. યદપિ અજ્ઝત્તં ધમ્મેસુ સતિ તદપિ સતિસમ્બોજ્ઝઙ્ગો અભિઞ્ઞાય સમ્બોધાય નિબ્બાનાય સંવત્તતિ. યદપિ બહિદ્ધા ધમ્મેસુ સતિ તદપિ સતિસમ્બોજ્ઝઙ્ગો અભિઞ્ઞાય સમ્બોધાય નિબ્બાનાય સંવત્તતિ.

તત્થ કતમો ધમ્મવિચયસમ્બોજ્ઝઙ્ગો? અત્થિ અજ્ઝત્તં ધમ્મેસુ પવિચયો, અત્થિ બહિદ્ધા ધમ્મેસુ પવિચયો. યદપિ અજ્ઝત્તં ધમ્મેસુ પવિચયો તદપિ ધમ્મવિચયસમ્બોજ્ઝઙ્ગો અભિઞ્ઞાય સમ્બોધાય નિબ્બાનાય સંવત્તતિ. યદપિ બહિદ્ધા ધમ્મેસુ પવિચયો તદપિ ધમ્મવિચયસમ્બોજ્ઝઙ્ગો અભિઞ્ઞાય સમ્બોધાય નિબ્બાનાય સંવત્તતિ.

તત્થ કતમો વીરિયસમ્બોજ્ઝઙ્ગો? અત્થિ કાયિકં વીરિયં, અત્થિ ચેતસિકં વીરિયં. યદપિ કાયિકં વીરિયં તદપિ વીરિયસમ્બોજ્ઝઙ્ગો અભિઞ્ઞાય સમ્બોધાય નિબ્બાનાય સંવત્તતિ. યદપિ ચેતસિકં વીરિયં તદપિ વીરિયસમ્બોજ્ઝઙ્ગો અભિઞ્ઞાય સમ્બોધાય નિબ્બાનાય સંવત્તતિ.

તત્થ કતમો પીતિસમ્બોજ્ઝઙ્ગો? અત્થિ સવિતક્કસવિચારા પીતિ, અત્થિ અવિતક્કઅવિચારા પીતિ. યદપિ સવિતક્કસવિચારા પીતિ તદપિ પીતિસમ્બોજ્ઝઙ્ગો અભિઞ્ઞાય સમ્બોધાય નિબ્બાનાય સંવત્તતિ. યદપિ અવિતક્કઅવિચારા પીતિ તદપિ પીતિસમ્બોજ્ઝઙ્ગો અભિઞ્ઞાય સમ્બોધાય નિબ્બાનાય સંવત્તતિ.

તત્થ કતમો પસ્સદ્ધિસમ્બોજ્ઝઙ્ગો? અત્થિ કાયપસ્સદ્ધિ [કાયપ્પસ્સદ્ધિ (સ્યા. ક.)], અત્થિ ચિત્તપસ્સદ્ધિ [ચિત્તપ્પસ્સદ્ધિ (સ્યા. ક.)]. યદપિ કાયપસ્સદ્ધિ તદપિ પસ્સદ્ધિસમ્બોજ્ઝઙ્ગો અભિઞ્ઞાય સમ્બોધાય નિબ્બાનાય સંવત્તતિ. યદપિ ચિત્તપસ્સદ્ધિ તદપિ પસ્સદ્ધિસમ્બોજ્ઝઙ્ગો અભિઞ્ઞાય સમ્બોધાય નિબ્બાનાય સંવત્તતિ.

તત્થ કતમો સમાધિસમ્બોજ્ઝઙ્ગો? અત્થિ સવિતક્કો સવિચારો સમાધિ, અત્થિ અવિતક્કો અવિચારો સમાધિ. યદપિ સવિતક્કો સવિચારો સમાધિ તદપિ સમાધિસમ્બોજ્ઝઙ્ગો અભિઞ્ઞાય સમ્બોધાય નિબ્બાનાય સંવત્તતિ. યદપિ અવિતક્કો અવિચારો સમાધિ તદપિ સમાધિસમ્બોજ્ઝઙ્ગો અભિઞ્ઞાય સમ્બોધાય નિબ્બાનાય સંવત્તતિ.

તત્થ કતમો ઉપેક્ખાસમ્બોજ્ઝઙ્ગો? અત્થિ અજ્ઝત્તં ધમ્મેસુ ઉપેક્ખા, અત્થિ બહિદ્ધા ધમ્મેસુ ઉપેક્ખા. યદપિ અજ્ઝત્તં ધમ્મેસુ ઉપેક્ખા તદપિ ઉપેક્ખાસમ્બોજ્ઝઙ્ગો અભિઞ્ઞાય સમ્બોધાય નિબ્બાનાય સંવત્તતિ. યદપિ બહિદ્ધા ધમ્મેસુ ઉપેક્ખા તદપિ ઉપેક્ખાસમ્બોજ્ઝઙ્ગો અભિઞ્ઞાય સમ્બોધાય નિબ્બાનાય સંવત્તતિ.

૪૭૦. સત્ત બોજ્ઝઙ્ગા – સતિસમ્બોજ્ઝઙ્ગો, ધમ્મવિચયસમ્બોજ્ઝઙ્ગો, વીરિયસમ્બોજ્ઝઙ્ગો, પીતિસમ્બોજ્ઝઙ્ગો, પસ્સદ્ધિસમ્બોજ્ઝઙ્ગો, સમાધિસમ્બોજ્ઝઙ્ગો, ઉપેક્ખાસમ્બોજ્ઝઙ્ગો.

૪૭૧. તત્થ કતમો સતિસમ્બોજ્ઝઙ્ગો? ઇધ ભિક્ખુ સતિસમ્બોજ્ઝઙ્ગં ભાવેતિ વિવેકનિસ્સિતં વિરાગનિસ્સિતં નિરોધનિસ્સિતં વોસ્સગ્ગપરિણામિં, ધમ્મવિચયસમ્બોજ્ઝઙ્ગં ભાવેતિ…પે… વીરિયસમ્બોજ્ઝઙ્ગં ભાવેતિ… પીતિસમ્બોજ્ઝઙ્ગં ભાવેતિ… પસ્સદ્ધિસમ્બોજ્ઝઙ્ગં ભાવેતિ… સમાધિસમ્બોજ્ઝઙ્ગં ભાવેતિ… ઉપેક્ખાસમ્બોજ્ઝઙ્ગં ભાવેતિ વિવેકનિસ્સિતં વિરાગનિસ્સિતં નિરોધનિસ્સિતં વોસ્સગ્ગપરિણામિં.

સુત્તન્તભાજનીયં.