૧૦. બોજ્ઝઙ્ગવિભઙ્ગો

૧. સુત્તન્તભાજનીયં

૪૬૬. સત્ત બોજ્ઝઙ્ગા – સતિસમ્બોજ્ઝઙ્ગો, ધમ્મવિચયસમ્બોજ્ઝઙ્ગો, વીરિયસમ્બોજ્ઝઙ્ગો, પીતિસમ્બોજ્ઝઙ્ગો, પસ્સદ્ધિસમ્બોજ્ઝઙ્ગો, સમાધિસમ્બોજ્ઝઙ્ગો, ઉપેક્ખાસમ્બોજ્ઝઙ્ગો.

૪૬૭. તત્થ કતમો સતિસમ્બોજ્ઝઙ્ગો? ઇધ ભિક્ખુ સતિમા હોતિ પરમેન સતિનેપક્કેન સમન્નાગતો, ચિરકતમ્પિ ચિરભાસિતમ્પિ સરિતા હોતિ અનુસ્સરિતા – અયં વુચ્ચતિ ‘‘સતિસમ્બોજ્ઝઙ્ગો’’.

સો તથા સતો વિહરન્તો તં ધમ્મં પઞ્ઞાય પવિચિનતિ પવિચરતિ પરિવીમંસમાપજ્જતિ – અયં વુચ્ચતિ ‘‘ધમ્મવિચયસમ્બોજ્ઝઙ્ગો’’.

તસ્સ તં ધમ્મં પઞ્ઞાય પવિચિનતો પવિચરતો પરિવીમંસમાપજ્જતો આરદ્ધં હોતિ વીરિયં અસલ્લીનં – અયં વુચ્ચતિ ‘‘વીરિયસમ્બોજ્ઝઙ્ગો’’.

આરદ્ધવીરિયસ્સ ઉપ્પજ્જતિ પીતિ નિરામિસા – અયં વુચ્ચતિ ‘‘પીતિસમ્બોજ્ઝઙ્ગો’’.

પીતિમનસ્સ કાયોપિ પસ્સમ્ભતિ, ચિત્તમ્પિ પસ્સમ્ભતિ – અયં વુચ્ચતિ ‘‘પસ્સદ્ધિસમ્બોજ્ઝઙ્ગો’’.

પસ્સદ્ધકાયસ્સ સુખિનો ચિત્તં સમાધિયતિ – અયં વુચ્ચતિ ‘‘સમાધિસમ્બોજ્ઝઙ્ગો’’.

સો તથા સમાહિતં ચિત્તં સાધુકં અજ્ઝુપેક્ખિતા હોતિ – અયં વુચ્ચતિ ‘‘ઉપેક્ખાસમ્બોજ્ઝઙ્ગો’’.

૪૬૮. સત્ત બોજ્ઝઙ્ગા – સતિસમ્બોજ્ઝઙ્ગો, ધમ્મવિચયસમ્બોજ્ઝઙ્ગો, વીરિયસમ્બોજ્ઝઙ્ગો, પીતિસમ્બોજ્ઝઙ્ગો, પસ્સદ્ધિસમ્બોજ્ઝઙ્ગો, સમાધિસમ્બોજ્ઝઙ્ગો, ઉપેક્ખાસમ્બોજ્ઝઙ્ગો.

૪૬૯. તત્થ કતમો સતિસમ્બોજ્ઝઙ્ગો? અત્થિ અજ્ઝત્તં ધમ્મેસુ સતિ, અત્થિ બહિદ્ધા ધમ્મેસુ સતિ. યદપિ અજ્ઝત્તં ધમ્મેસુ સતિ તદપિ સતિસમ્બોજ્ઝઙ્ગો અભિઞ્ઞાય સમ્બોધાય નિબ્બાનાય સંવત્તતિ. યદપિ બહિદ્ધા ધમ્મેસુ સતિ તદપિ સતિસમ્બોજ્ઝઙ્ગો અભિઞ્ઞાય સમ્બોધાય નિબ્બાનાય સંવત્તતિ.

તત્થ કતમો ધમ્મવિચયસમ્બોજ્ઝઙ્ગો? અત્થિ અજ્ઝત્તં ધમ્મેસુ પવિચયો, અત્થિ બહિદ્ધા ધમ્મેસુ પવિચયો. યદપિ અજ્ઝત્તં ધમ્મેસુ પવિચયો તદપિ ધમ્મવિચયસમ્બોજ્ઝઙ્ગો અભિઞ્ઞાય સમ્બોધાય નિબ્બાનાય સંવત્તતિ. યદપિ બહિદ્ધા ધમ્મેસુ પવિચયો તદપિ ધમ્મવિચયસમ્બોજ્ઝઙ્ગો અભિઞ્ઞાય સમ્બોધાય નિબ્બાનાય સંવત્તતિ.

તત્થ કતમો વીરિયસમ્બોજ્ઝઙ્ગો? અત્થિ કાયિકં વીરિયં, અત્થિ ચેતસિકં વીરિયં. યદપિ કાયિકં વીરિયં તદપિ વીરિયસમ્બોજ્ઝઙ્ગો અભિઞ્ઞાય સમ્બોધાય નિબ્બાનાય સંવત્તતિ. યદપિ ચેતસિકં વીરિયં તદપિ વીરિયસમ્બોજ્ઝઙ્ગો અભિઞ્ઞાય સમ્બોધાય નિબ્બાનાય સંવત્તતિ.

તત્થ કતમો પીતિસમ્બોજ્ઝઙ્ગો? અત્થિ સવિતક્કસવિચારા પીતિ, અત્થિ અવિતક્કઅવિચારા પીતિ. યદપિ સવિતક્કસવિચારા પીતિ તદપિ પીતિસમ્બોજ્ઝઙ્ગો અભિઞ્ઞાય સમ્બોધાય નિબ્બાનાય સંવત્તતિ. યદપિ અવિતક્કઅવિચારા પીતિ તદપિ પીતિસમ્બોજ્ઝઙ્ગો અભિઞ્ઞાય સમ્બોધાય નિબ્બાનાય સંવત્તતિ.

તત્થ કતમો પસ્સદ્ધિસમ્બોજ્ઝઙ્ગો? અત્થિ કાયપસ્સદ્ધિ [કાયપ્પસ્સદ્ધિ (સ્યા. ક.)], અત્થિ ચિત્તપસ્સદ્ધિ [ચિત્તપ્પસ્સદ્ધિ (સ્યા. ક.)]. યદપિ કાયપસ્સદ્ધિ તદપિ પસ્સદ્ધિસમ્બોજ્ઝઙ્ગો અભિઞ્ઞાય સમ્બોધાય નિબ્બાનાય સંવત્તતિ. યદપિ ચિત્તપસ્સદ્ધિ તદપિ પસ્સદ્ધિસમ્બોજ્ઝઙ્ગો અભિઞ્ઞાય સમ્બોધાય નિબ્બાનાય સંવત્તતિ.

તત્થ કતમો સમાધિસમ્બોજ્ઝઙ્ગો? અત્થિ સવિતક્કો સવિચારો સમાધિ, અત્થિ અવિતક્કો અવિચારો સમાધિ. યદપિ સવિતક્કો સવિચારો સમાધિ તદપિ સમાધિસમ્બોજ્ઝઙ્ગો અભિઞ્ઞાય સમ્બોધાય નિબ્બાનાય સંવત્તતિ. યદપિ અવિતક્કો અવિચારો સમાધિ તદપિ સમાધિસમ્બોજ્ઝઙ્ગો અભિઞ્ઞાય સમ્બોધાય નિબ્બાનાય સંવત્તતિ.

તત્થ કતમો ઉપેક્ખાસમ્બોજ્ઝઙ્ગો? અત્થિ અજ્ઝત્તં ધમ્મેસુ ઉપેક્ખા, અત્થિ બહિદ્ધા ધમ્મેસુ ઉપેક્ખા. યદપિ અજ્ઝત્તં ધમ્મેસુ ઉપેક્ખા તદપિ ઉપેક્ખાસમ્બોજ્ઝઙ્ગો અભિઞ્ઞાય સમ્બોધાય નિબ્બાનાય સંવત્તતિ. યદપિ બહિદ્ધા ધમ્મેસુ ઉપેક્ખા તદપિ ઉપેક્ખાસમ્બોજ્ઝઙ્ગો અભિઞ્ઞાય સમ્બોધાય નિબ્બાનાય સંવત્તતિ.

૪૭૦. સત્ત બોજ્ઝઙ્ગા – સતિસમ્બોજ્ઝઙ્ગો, ધમ્મવિચયસમ્બોજ્ઝઙ્ગો, વીરિયસમ્બોજ્ઝઙ્ગો, પીતિસમ્બોજ્ઝઙ્ગો, પસ્સદ્ધિસમ્બોજ્ઝઙ્ગો, સમાધિસમ્બોજ્ઝઙ્ગો, ઉપેક્ખાસમ્બોજ્ઝઙ્ગો.

૪૭૧. તત્થ કતમો સતિસમ્બોજ્ઝઙ્ગો? ઇધ ભિક્ખુ સતિસમ્બોજ્ઝઙ્ગં ભાવેતિ વિવેકનિસ્સિતં વિરાગનિસ્સિતં નિરોધનિસ્સિતં વોસ્સગ્ગપરિણામિં, ધમ્મવિચયસમ્બોજ્ઝઙ્ગં ભાવેતિ…પે… વીરિયસમ્બોજ્ઝઙ્ગં ભાવેતિ… પીતિસમ્બોજ્ઝઙ્ગં ભાવેતિ… પસ્સદ્ધિસમ્બોજ્ઝઙ્ગં ભાવેતિ… સમાધિસમ્બોજ્ઝઙ્ગં ભાવેતિ… ઉપેક્ખાસમ્બોજ્ઝઙ્ગં ભાવેતિ વિવેકનિસ્સિતં વિરાગનિસ્સિતં નિરોધનિસ્સિતં વોસ્સગ્ગપરિણામિં.

સુત્તન્તભાજનીયં.

૨. અભિધમ્મભાજનીયં

૪૭૨. સત્ત બોજ્ઝઙ્ગા – સતિસમ્બોજ્ઝઙ્ગો, ધમ્મવિચયસમ્બોજ્ઝઙ્ગો, વીરિયસમ્બોજ્ઝઙ્ગો, પીતિસમ્બોજ્ઝઙ્ગો, પસ્સદ્ધિસમ્બોજ્ઝઙ્ગો, સમાધિસમ્બોજ્ઝઙ્ગો, ઉપેક્ખાસમ્બોજ્ઝઙ્ગો.

૪૭૩. તત્થ કતમે સત્ત બોજ્ઝઙ્ગા? ઇધ ભિક્ખુ યસ્મિં સમયે લોકુત્તરં ઝાનં ભાવેતિ નિય્યાનિકં અપચયગામિં દિટ્ઠિગતાનં પહાનાય પઠમાય ભૂમિયા પત્તિયા વિવિચ્ચેવ કામેહિ…પે… પઠમં ઝાનં ઉપસમ્પજ્જ વિહરતિ દુક્ખપટિપદં દન્ધાભિઞ્ઞં, તસ્મિં સમયે સત્ત બોજ્ઝઙ્ગા હોન્તિ – સતિસમ્બોજ્ઝઙ્ગો…પે… ઉપેક્ખાસમ્બોજ્ઝઙ્ગો.

૪૭૪. તત્થ કતમો સતિસમ્બોજ્ઝઙ્ગો? યા સતિ અનુસ્સતિ…પે… સમ્માસતિ સતિસમ્બોજ્ઝઙ્ગો મગ્ગઙ્ગં મગ્ગપરિયાપન્નં – અયં વુચ્ચતિ ‘‘સતિસમ્બોજ્ઝઙ્ગો’’.

તત્થ કતમો ધમ્મવિચયસમ્બોજ્ઝઙ્ગો? યા પઞ્ઞા પજાનના…પે… અમોહો ધમ્મવિચયો સમ્માદિટ્ઠિ ધમ્મવિચયસમ્બોજ્ઝઙ્ગો મગ્ગઙ્ગં મગ્ગપરિયાપન્નં – અયં વુચ્ચતિ ‘‘ધમ્મવિચયસમ્બોજ્ઝઙ્ગો’’.

તત્થ કતમો વીરિયસમ્બોજ્ઝઙ્ગો? યો ચેતસિકો વીરિયારમ્ભો…પે… સમ્માવાયામો વીરિયસમ્બોજ્ઝઙ્ગો મગ્ગઙ્ગં મગ્ગપરિયાપન્નં – અયં વુચ્ચતિ ‘‘વીરિયસમ્બોજ્ઝઙ્ગો’’.

તત્થ કતમો પીતિસમ્બોજ્ઝઙ્ગો? યા પીતિ પામોજ્જં આમોદના પમોદના હાસો પહાસો વિત્તિ ઓદગ્યં [ઓદગ્ગં (સી.) ધ. સ. ૯] અત્તમનતા ચિત્તસ્સ પીતિસમ્બોજ્ઝઙ્ગો – અયં વુચ્ચતિ ‘‘પીતિસમ્બોજ્ઝઙ્ગો’’.

તત્થ કતમો પસ્સદ્ધિસમ્બોજ્ઝઙ્ગો? યા વેદનાક્ખન્ધસ્સ સઞ્ઞાક્ખન્ધસ્સ સઙ્ખારક્ખન્ધસ્સ વિઞ્ઞાણક્ખન્ધસ્સ પસ્સદ્ધિ પટિપ્પસ્સદ્ધિ પસ્સમ્ભના પટિપ્પસ્સમ્ભના પટિપ્પસ્સમ્ભિતત્તં પસ્સદ્ધિસમ્બોજ્ઝઙ્ગો – અયં વુચ્ચતિ ‘‘પસ્સદ્ધિસમ્બોજ્ઝઙ્ગો’’.

તત્થ કતમો સમાધિસમ્બોજ્ઝઙ્ગો? યા ચિત્તસ્સ ઠિતિ…પે… સમ્માસમાધિ સમાધિસમ્બોજ્ઝઙ્ગો મગ્ગઙ્ગં મગ્ગપરિયાપન્નં – અયં વુચ્ચતિ ‘‘સમાધિસમ્બોજ્ઝઙ્ગો’’.

તત્થ કતમો ઉપેક્ખાસમ્બોજ્ઝઙ્ગો? યા ઉપેક્ખા ઉપેક્ખના અજ્ઝુપેક્ખના મજ્ઝત્તતા ચિત્તસ્સ ઉપેક્ખાસમ્બોજ્ઝઙ્ગો – અયં વુચ્ચતિ ‘‘ઉપેક્ખાસમ્બોજ્ઝઙ્ગો’’. ઇમે વુચ્ચન્તિ સત્ત બોજ્ઝઙ્ગા. અવસેસા ધમ્મા સત્તહિ બોજ્ઝઙ્ગેહિ સમ્પયુત્તા.

૪૭૫. સત્ત બોજ્ઝઙ્ગા – સતિસમ્બોજ્ઝઙ્ગો…પે… ઉપેક્ખાસમ્બોજ્ઝઙ્ગો.

૪૭૬. તત્થ કતમો સતિસમ્બોજ્ઝઙ્ગો? ઇધ ભિક્ખુ યસ્મિં સમયે લોકુત્તરં ઝાનં ભાવેતિ નિય્યાનિકં અપચયગામિં દિટ્ઠિગતાનં પહાનાય પઠમાય ભૂમિયા પત્તિયા વિવિચ્ચેવ કામેહિ…પે… પઠમં ઝાનં ઉપસમ્પજ્જ વિહરતિ દુક્ખપટિપદં દન્ધાભિઞ્ઞં, યા તસ્મિં સમયે સતિ અનુસ્સતિ સમ્માસતિ સતિસમ્બોજ્ઝઙ્ગો મગ્ગઙ્ગં મગ્ગપરિયાપન્નં – અયં વુચ્ચતિ ‘‘સતિસમ્બોજ્ઝઙ્ગો’’. અવસેસા ધમ્મા સતિસમ્બોજ્ઝઙ્ગસમ્પયુત્તા…પે… અવસેસા ધમ્મા ધમ્મવિચયસમ્બોજ્ઝઙ્ગસમ્પયુત્તા…પે… અવસેસા ધમ્મા વીરિયસમ્બોજ્ઝઙ્ગસમ્પયુત્તા…પે… અવસેસા ધમ્મા પીતિસમ્બોજ્ઝઙ્ગસમ્પયુત્તા…પે… અવસેસા ધમ્મા પસ્સદ્ધિસમ્બોજ્ઝઙ્ગસમ્પયુત્તા…પે… અવસેસા ધમ્મા સમાધિસમ્બોજ્ઝઙ્ગસમ્પયુત્તા.

તત્થ કતમો ઉપેક્ખાસમ્બોજ્ઝઙ્ગો? ઇધ ભિક્ખુ યસ્મિં સમયે લોકુત્તરં ઝાનં ભાવેતિ નિય્યાનિકં અપચયગામિં દિટ્ઠિગતાનં પહાનાય પઠમાય ભૂમિયા પત્તિયા વિવિચ્ચેવ કામેહિ…પે… પઠમં ઝાનં ઉપસમ્પજ્જ વિહરતિ દુક્ખપટિપદં દન્ધાભિઞ્ઞં, યા તસ્મિં સમયે ઉપેક્ખા ઉપેક્ખના અજ્ઝુપેક્ખના મજ્ઝત્તતા ચિત્તસ્સ ઉપેક્ખાસમ્બોજ્ઝઙ્ગો – અયં વુચ્ચતિ ‘‘ઉપેક્ખાસમ્બોજ્ઝઙ્ગો’’. અવસેસા ધમ્મા ઉપેક્ખાસમ્બોજ્ઝઙ્ગસમ્પયુત્તા.

૪૭૭. સત્ત બોજ્ઝઙ્ગા – સતિસમ્બોજ્ઝઙ્ગો…પે… ઉપેક્ખાસમ્બોજ્ઝઙ્ગો.

૪૭૮. તત્થ કતમે સત્ત બોજ્ઝઙ્ગા? ઇધ ભિક્ખુ યસ્મિં સમયે લોકુત્તરં ઝાનં ભાવેતિ નિય્યાનિકં અપચયગામિં દિટ્ઠિગતાનં પહાનાય પઠમાય ભૂમિયા પત્તિયા વિવિચ્ચેવ કામેહિ …પે… પઠમં ઝાનં ઉપસમ્પજ્જ વિહરતિ દુક્ખપટિપદં દન્ધાભિઞ્ઞં, યો તસ્મિં સમયે ફસ્સો હોતિ…પે… અવિક્ખેપો હોતિ – ઇમે ધમ્મા કુસલા. તસ્સેવ લોકુત્તરસ્સ કુસલસ્સ ઝાનસ્સ કતત્તા ભાવિતત્તા વિપાકં વિવિચ્ચેવ કામેહિ…પે… પઠમં ઝાનં ઉપસમ્પજ્જ વિહરતિ દુક્ખપટિપદં દન્ધાભિઞ્ઞં સુઞ્ઞતં, તસ્મિં સમયે સત્ત બોજ્ઝઙ્ગા હોન્તિ – સતિસમ્બોજ્ઝઙ્ગો…પે… ઉપેક્ખાસમ્બોજ્ઝઙ્ગો.

૪૭૯. તત્થ કતમો સતિસમ્બોજ્ઝઙ્ગો? યા સતિ અનુસ્સતિ…પે… સમ્માસતિ સતિસમ્બોજ્ઝઙ્ગો મગ્ગઙ્ગં મગ્ગપરિયાપન્નં – અયં વુચ્ચતિ ‘‘સતિસમ્બોજ્ઝઙ્ગો’’…પે….

તત્થ કતમો ઉપેક્ખાસમ્બોજ્ઝઙ્ગો? યા ઉપેક્ખા ઉપેક્ખના અજ્ઝુપેક્ખના મજ્ઝત્તતા ચિત્તસ્સ ઉપેક્ખાસમ્બોજ્ઝઙ્ગો – અયં વુચ્ચતિ ‘‘ઉપેક્ખાસમ્બોજ્ઝઙ્ગો’’. ઇમે વુચ્ચન્તિ ‘‘સત્ત બોજ્ઝઙ્ગા’’. અવસેસા ધમ્મા સત્તહિ બોજ્ઝઙ્ગેહિ સમ્પયુત્તા.

૪૮૦. સત્ત બોજ્ઝઙ્ગા – સતિસમ્બોજ્ઝઙ્ગો…પે… ઉપેક્ખાસમ્બોજ્ઝઙ્ગો.

૪૮૧. તત્થ કતમો સતિસમ્બોજ્ઝઙ્ગો? ઇધ ભિક્ખુ યસ્મિં સમયે લોકુત્તરં ઝાનં ભાવેતિ નિય્યાનિકં અપચયગામિં દિટ્ઠિગતાનં પહાનાય પઠમાય ભૂમિયા પત્તિયા વિવિચ્ચેવ કામેહિ…પે… પઠમં ઝાનં ઉપસમ્પજ્જ વિહરતિ દુક્ખપટિપદં દન્ધાભિઞ્ઞં, તસ્મિં સમયે ફસ્સો હોતિ…પે… અવિક્ખેપો હોતિ. ઇમે ધમ્મા કુસલા. તસ્સેવ લોકુત્તરસ્સ કુસલસ્સ ઝાનસ્સ કતત્તા ભાવિતત્તા વિપાકં વિવિચ્ચેવ કામેહિ…પે… પઠમં ઝાનં ઉપસમ્પજ્જ વિહરતિ દુક્ખપટિપદં દન્ધાભિઞ્ઞં, યા તસ્મિં સમયે સતિ અનુસ્સતિ સમ્માસતિ સતિસમ્બોજ્ઝઙ્ગો મગ્ગઙ્ગં મગ્ગપરિયાપન્નં – અયં વુચ્ચતિ ‘‘સતિસમ્બોજ્ઝઙ્ગો’’. અવસેસા ધમ્મા સતિસમ્બોજ્ઝઙ્ગસમ્પયુત્તા…પે… અવસેસા ધમ્મા ધમ્મવિચયસમ્બોજ્ઝઙ્ગસમ્પયુત્તા …પે… અવસેસા ધમ્મા વીરિયસમ્બોજ્ઝઙ્ગસમ્પયુત્તા…પે… અવસેસા ધમ્મા પીતિસમ્બોજ્ઝઙ્ગસમ્પયુત્તા…પે… અવસેસા ધમ્મા પસ્સદ્ધિસમ્બોજ્ઝઙ્ગસમ્પયુત્તા…પે… અવસેસા ધમ્મા સમાધિસમ્બોજ્ઝઙ્ગસમ્પયુત્તા.

તત્થ કતમો ઉપેક્ખાસમ્બોજ્ઝઙ્ગો? ઇધ ભિક્ખુ યસ્મિં સમયે લોકુત્તરં ઝાનં ભાવેતિ નિય્યાનિકં અપચયગામિં દિટ્ઠિગતાનં પહાનાય પઠમાય ભૂમિયા પત્તિયા વિવિચ્ચેવ કામેહિ…પે… પઠમં ઝાનં ઉપસમ્પજ્જ વિહરતિ દુક્ખપટિપદં દન્ધાભિઞ્ઞં, તસ્મિં સમયે ફસ્સો હોતિ…પે… અવિક્ખેપો હોતિ. ઇમે ધમ્મા કુસલા. તસ્સેવ લોકુત્તરસ્સ કુસલસ્સ ઝાનસ્સ કતત્તા ભાવિતત્તા વિપાકં વિવિચ્ચેવ કામેહિ…પે… પઠમં ઝાનં ઉપસમ્પજ્જ વિહરતિ દુક્ખપટિપદં દન્ધાભિઞ્ઞં સુઞ્ઞતં, યા તસ્મિં સમયે ઉપેક્ખા ઉપેક્ખના અજ્ઝુપેક્ખના મજ્ઝત્તતા ચિત્તસ્સ ઉપેક્ખાસમ્બોજ્ઝઙ્ગો – અયં વુચ્ચતિ ‘‘ઉપેક્ખાસમ્બોજ્ઝઙ્ગો’’. અવસેસા ધમ્મા ઉપેક્ખાસમ્બોજ્ઝઙ્ગસમ્પયુત્તા.

અભિધમ્મભાજનીયં.

૩. પઞ્હાપુચ્છકં

૪૮૨. સત્ત બોજ્ઝઙ્ગા – સતિસમ્બોજ્ઝઙ્ગો, ધમ્મવિચયસમ્બોજ્ઝઙ્ગો, વીરિયસમ્બોજ્ઝઙ્ગો, પીતિસમ્બોજ્ઝઙ્ગો, પસ્સદ્ધિસમ્બોજ્ઝઙ્ગો, સમાધિસમ્બોજ્ઝઙ્ગો, ઉપેક્ખાસમ્બોજ્ઝઙ્ગો.

૪૮૩. સત્તન્નં બોજ્ઝઙ્ગાનં કતિ કુસલા, કતિ અકુસલા, કતિ અબ્યાકતા…પે… કતિ સરણા, કતિ અરણા?

૧. તિકં

૪૮૪. સિયા કુસલા, સિયા અબ્યાકતા. પીતિસમ્બોજ્ઝઙ્ગો સુખાય વેદનાય સમ્પયુત્તો; છ બોજ્ઝઙ્ગા સિયા સુખાય વેદનાય સમ્પયુત્તા, સિયા અદુક્ખમસુખાય વેદનાય સમ્પયુત્તા. સિયા વિપાકા, સિયા વિપાકધમ્મધમ્મા. અનુપાદિન્નઅનુપાદાનિયા. અસંકિલિટ્ઠઅસંકિલેસિકા. સિયા સવિતક્કસવિચારા, સિયા અવિતક્કવિચારમત્તા, સિયા અવિતક્કઅવિચારા. પીતિસમ્બોજ્ઝઙ્ગો ન પીતિસહગતો, સુખસહગતો, ન ઉપેક્ખાસહગતો; છ બોજ્ઝઙ્ગા સિયા પીતિસહગતા, સિયા સુખસહગતા, સિયા ઉપેક્ખાસહગતા. નેવ દસ્સનેન ન ભાવનાય પહાતબ્બા. નેવ દસ્સનેન ન ભાવનાય પહાતબ્બહેતુકા. સિયા અપચયગામિનો, સિયા નેવાચયગામિનાપચયગામિનો. સિયા સેક્ખા, સિયા અસેક્ખા. અપ્પમાણા. અપ્પમાણારમ્મણા. પણીતા. સિયા સમ્મત્તનિયતા, સિયા અનિયતા. ન મગ્ગારમ્મણા, સિયા મગ્ગહેતુકા, સિયા મગ્ગાધિપતિનો; સિયા ન વત્તબ્બા મગ્ગહેતુકાતિપિ, મગ્ગાધિપતિનોતિપિ. સિયા ઉપ્પન્ના, સિયા અનુપ્પન્ના, સિયા ઉપ્પાદિનો. સિયા અતીતા, સિયા અનાગતા, સિયા પચ્ચુપ્પન્ના. ન વત્તબ્બા અતીતારમ્મણાતિપિ, અનાગતારમ્મણાતિપિ, પચ્ચુપ્પન્નારમ્મણાતિપિ. સિયા અજ્ઝત્તા, સિયા બહિદ્ધા, સિયા અજ્ઝત્તબહિદ્ધા. બહિદ્ધારમ્મણા. અનિદસ્સનઅપ્પટિઘા.

૨. દુકં

૪૮૫. ધમ્મવિચયસમ્બોજ્ઝઙ્ગો હેતુ, છ બોજ્ઝઙ્ગા હેતુસમ્પયુત્તા. ધમ્મવિચયસમ્બોજ્ઝઙ્ગો હેતુ ચેવ સહેતુકો ચ, છ બોજ્ઝઙ્ગા ન વત્તબ્બા હેતૂ ચેવ સહેતુકા ચાતિ, સહેતુકા ચેવ ન ચ હેતૂ. ધમ્મવિચયસમ્બોજ્ઝઙ્ગો હેતુ ચેવ હેતુસમ્પયુત્તો ચ, છ બોજ્ઝઙ્ગા ન વત્તબ્બા હેતૂ ચેવ હેતુસમ્પયુત્તા ચાતિ, હેતુસમ્પયુત્તા ચેવ ન ચ હેતૂ. છ બોજ્ઝઙ્ગા ન હેતૂ સહેતુકા, ધમ્મવિચયસમ્બોજ્ઝઙ્ગો ન વત્તબ્બો ન હેતુસહેતુકોતિપિ, ન હેતુઅહેતુકોતિપિ. સપ્પચ્ચયા. સઙ્ખતા. અનિદસ્સના. અપ્પટિઘા. અરૂપા. લોકુત્તરા. કેનચિ વિઞ્ઞેય્યા, કેનચિ ન વિઞ્ઞેય્યા. નો આસવા. અનાસવા આસવવિપ્પયુત્તા. ન વત્તબ્બા આસવા ચેવ સાસવા ચાતિપિ, સાસવા ચેવ નો ચ આસવાતિપિ. આસવા ચેવ આસવસમ્પયુત્તા ચાતિપિ, આસવસમ્પયુત્તા ચેવ નો ચ આસવાતિપિ. આસવવિપ્પયુત્તા. અનાસવા. નો સંયોજના…પે… નો ગન્થા…પે… નો ઓઘા…પે… નો યોગા…પે… નો નીવરણા…પે… નો પરામાસા…પે… સારમ્મણા. નો ચિત્તા. ચેતસિકા. ચિત્તસમ્પયુત્તા. ચિત્તસંસટ્ઠા. ચિત્તસમુટ્ઠાના. ચિત્તસહભુનો. ચિત્તાનુપરિવત્તિનો. ચિત્તસંસટ્ઠસમુટ્ઠાના. ચિત્તસંસટ્ઠસમુટ્ઠાનસહભુનો. ચિત્તસંસટ્ઠસમુટ્ઠાનાનુપરિવત્તિનો. બાહિરા. નો ઉપાદા. અનુપાદિન્ના. નો ઉપાદાના…પે… નો કિલેસા…પે… ન દસ્સનેન પહાતબ્બા. ન ભાવનાય પહાતબ્બા. ન દસ્સનેન પહાતબ્બહેતુકા. ન ભાવનાય પહાતબ્બહેતુકા. સિયા સવિતક્કા, સિયા અવિતક્કા. સિયા સવિચારા, સિયા અવિચારા.

પીતિસમ્બોજ્ઝઙ્ગો અપ્પીતિકો, છ બોજ્ઝઙ્ગા સિયા સપ્પીતિકા, સિયા અપ્પીતિકા. પીતિસમ્બોજ્ઝઙ્ગો ન પીતિસહગતો, છ બોજ્ઝઙ્ગા સિયા પીતિસહગતા, સિયા ન પીતિસહગતા. પીતિસમ્બોજ્ઝઙ્ગો સુખસહગતો, છ બોજ્ઝઙ્ગા સિયા સુખસહગતા, સિયા ન સુખસહગતા. પીતિસમ્બોજ્ઝઙ્ગો ન ઉપેક્ખાસહગતો, છ બોજ્ઝઙ્ગા સિયા ઉપેક્ખાસહગતા, સિયા ન ઉપેક્ખાસહગતા. ન કામાવચરા. ન રૂપાવચરા. ન અરૂપાવચરા. અપરિયાપન્ના. સિયા નિય્યાનિકા, સિયા અનિય્યાનિકા. સિયા નિયતા, સિયા અનિયતા. અનુત્તરા. અરણાતિ.

પઞ્હાપુચ્છકં.

બોજ્ઝઙ્ગવિભઙ્ગો નિટ્ઠિતો.