૩. પઞ્હાપુચ્છકં

૧૫૦. પઞ્ચક્ખન્ધા – રૂપક્ખન્ધો, વેદનાક્ખન્ધો, સઞ્ઞાક્ખન્ધો, સઙ્ખારક્ખન્ધો, વિઞ્ઞાણક્ખન્ધો.

૧૫૧. પઞ્ચન્નં ખન્ધાનં કતિ કુસલા, કતિ અકુસલા, કતિ અબ્યાકતા…પે… કતિ સરણા, કતિ અરણા?

૧. તિકં

૧૫૨. રૂપક્ખન્ધો અબ્યાકતો. ચત્તારો ખન્ધા સિયા કુસલા, સિયા અકુસલા, સિયા અબ્યાકતા. દ્વે ખન્ધા ન વત્તબ્બા – ‘‘સુખાય વેદનાય સમ્પયુત્તા’’તિપિ, ‘‘દુક્ખાય વેદનાય સમ્પયુત્તા’’તિપિ, ‘‘અદુક્ખમસુખાય વેદનાય સમ્પયુત્તા’’તિપિ. તયો ખન્ધા સિયા સુખાય વેદનાય સમ્પયુત્તા, સિયા દુક્ખાય વેદનાય સમ્પયુત્તા, સિયા અદુક્ખમસુખાય વેદનાય સમ્પયુત્તા. રૂપક્ખન્ધો નેવવિપાકનવિપાકધમ્મધમ્મો. ચત્તારો ખન્ધા સિયા વિપાકા, સિયા વિપાકધમ્મધમ્મા, સિયા નેવવિપાકનવિપાકધમ્મધમ્મા. રૂપક્ખન્ધો સિયા ઉપાદિન્નુપાદાનિયો, સિયા અનુપાદિન્નુપાદાનિયો. ચત્તારો ખન્ધા સિયા ઉપાદિન્નુપાદાનિયા, સિયા અનુપાદિન્નુપાદાનિયા, સિયા અનુપાદિન્નઅનુપાદાનિયા.

રૂપક્ખન્ધો અસંકિલિટ્ઠસંકિલેસિકો. ચત્તારો ખન્ધા સિયા સંકિલિટ્ઠસંકિલેસિકા, સિયા અસંકિલિટ્ઠસંકિલેસિકા, સિયા અસંકિલિટ્ઠઅસંકિલેસિકા. રૂપક્ખન્ધો અવિતક્કઅવિચારો. તયો ખન્ધા સિયા સવિતક્કસવિચારા, સિયા અવિતક્કવિચારમત્તા, સિયા અવિતક્કઅવિચારા. સઙ્ખારક્ખન્ધો સિયા સવિતક્કસવિચારો, સિયા અવિતક્કવિચારમત્તો, સિયા અવિતક્કઅવિચારો, સિયા ન વત્તબ્બો – ‘‘સવિતક્કસવિચારો’’તિપિ, ‘‘અવિતક્કવિચારમત્તો’’તિપિ, ‘‘અવિતક્કઅવિચારો’’તિપિ. રૂપક્ખન્ધો ન વત્તબ્બો – ‘‘પીતિસહગતો’’તિપિ, ‘‘સુખસહગતો’’તિપિ, ‘‘ઉપેક્ખાસહગતો’’તિપિ. વેદનાક્ખન્ધો સિયા પીતિસહગતો ન સુખસહગતો ન ઉપેક્ખાસહગતો, સિયા ન વત્તબ્બો – ‘‘પીતિસહગતો’’તિ. તયો ખન્ધા સિયા પીતિસહગતા, સિયા સુખસહગતા, સિયા ઉપેક્ખાસહગતા, સિયા ન વત્તબ્બા – ‘‘પીતિસહગતા’’તિપિ, ‘‘સુખસહગતા’’તિપિ, ‘‘ઉપેક્ખાસહગતા’’તિપિ.

રૂપક્ખન્ધો નેવ દસ્સનેન ન ભાવનાય પહાતબ્બો. ચત્તારો ખન્ધા સિયા દસ્સનેન પહાતબ્બા, સિયા ભાવનાય પહાતબ્બા, સિયા નેવ દસ્સનેન ન ભાવનાય પહાતબ્બા. રૂપક્ખન્ધો નેવ દસ્સનેન ન ભાવનાય પહાતબ્બહેતુકો. ચત્તારો ખન્ધા સિયા દસ્સનેન પહાતબ્બહેતુકા, સિયા ભાવનાય પહાતબ્બહેતુકા, સિયા નેવ દસ્સનેન ન ભાવનાય પહાતબ્બહેતુકા. રૂપક્ખન્ધો નેવાચયગામિનાપચયગામી. ચત્તારો ખન્ધા સિયા આચયગામિનો, સિયા અપચયગામિનો, સિયા નેવાચયગામિનાપચયગામિનો. રૂપક્ખન્ધો નેવસેક્ખનાસેક્ખો. ચત્તારો ખન્ધા સિયા સેક્ખા, સિયા અસેક્ખા, સિયા નેવસેક્ખનાસેક્ખા. રૂપક્ખન્ધો પરિત્તો. ચત્તારો ખન્ધા સિયા પરિત્તા, સિયા મહગ્ગતા, સિયા અપ્પમાણા. રૂપક્ખન્ધો અનારમ્મણો. ચત્તારો ખન્ધા સિયા પરિત્તારમ્મણા, સિયા મહગ્ગતારમ્મણા, સિયા અપ્પમાણારમ્મણા, સિયા ન વત્તબ્બા – ‘‘પરિત્તારમ્મણા’’તિપિ, ‘‘મહગ્ગતારમ્મણા’’તિપિ, ‘‘અપ્પમાણારમ્મણા’’તિપિ. રૂપક્ખન્ધો મજ્ઝિમો. ચત્તારો ખન્ધા સિયા હીના, સિયા મજ્ઝિમા, સિયા પણીતા. રૂપક્ખન્ધો અનિયતો. ચત્તારો ખન્ધા સિયા મિચ્છત્તનિયતા, સિયા સમ્મત્તનિયતા, સિયા અનિયતા.

રૂપક્ખન્ધો અનારમ્મણો. ચત્તારો ખન્ધા સિયા મગ્ગારમ્મણા, સિયા મગ્ગહેતુકા, સિયા મગ્ગાધિપતિનો, સિયા ન વત્તબ્બા – ‘‘મગ્ગારમ્મણા’’તિપિ, ‘‘મગ્ગહેતુકા’’તિપિ, ‘‘મગ્ગાધિપતિનો’’તિપિ; સિયા ઉપ્પન્ના, સિયા અનુપ્પન્ના, સિયા ઉપ્પાદિનો; સિયા અતીતા, સિયા અનાગતા, સિયા પચ્ચુપ્પન્ના. રૂપક્ખન્ધો અનારમ્મણો. ચત્તારો ખન્ધા સિયા અતીતારમ્મણા, સિયા અનાગતારમ્મણા, સિયા પચ્ચુપ્પન્નારમ્મણા, સિયા ન વત્તબ્બા – ‘‘અતીતારમ્મણા’’તિપિ, ‘‘અનાગતારમ્મણા’’તિપિ, ‘‘પચ્ચુપ્પન્નારમ્મણા’’તિપિ; સિયા અજ્ઝત્તા, સિયા બહિદ્ધા, સિયા અજ્ઝત્તબહિદ્ધા. રૂપક્ખન્ધો અનારમ્મણો. ચત્તારો ખન્ધા સિયા અજ્ઝત્તારમ્મણા, સિયા બહિદ્ધારમ્મણા, સિયા અજ્ઝત્તબહિદ્ધારમ્મણા, સિયા ન વત્તબ્બા – ‘‘અજ્ઝત્તારમ્મણા’’તિપિ, ‘‘બહિદ્ધારમ્મણા’’તિપિ, ‘‘અજ્ઝત્તબહિદ્ધારમ્મણા’’તિપિ. ચત્તારો ખન્ધા અનિદસ્સનઅપ્પટિઘા. રૂપક્ખન્ધો સિયા સનિદસ્સનસપ્પટિઘો, સિયા અનિદસ્સનસપ્પટિઘો, સિયા અનિદસ્સનઅપ્પટિઘો.

૨. દુકં

૧૫૩. ચત્તારો ખન્ધા ન હેતૂ. સઙ્ખારક્ખન્ધો સિયા હેતુ, સિયા ન હેતુ. રૂપક્ખન્ધો અહેતુકો. ચત્તારો ખન્ધા સિયા સહેતુકા, સિયા અહેતુકા. રૂપક્ખન્ધો હેતુવિપ્પયુત્તો. ચત્તારો ખન્ધા સિયા હેતુસમ્પયુત્તા, સિયા હેતુવિપ્પયુત્તા. રૂપક્ખન્ધો ન વત્તબ્બો – ‘‘હેતુ ચેવ સહેતુકો ચા’’તિપિ, ‘‘સહેતુકો ચેવ ન ચ હેતૂ’’તિપિ. તયો ખન્ધા ન વત્તબ્બા – ‘‘હેતૂ ચેવ સહેતુકા ચા’’તિ, સિયા સહેતુકા ચેવ ન ચ હેતૂ, સિયા ન વત્તબ્બા – ‘‘સહેતુકા ચેવ ન ચ હેતૂ’’તિ. સઙ્ખારક્ખન્ધો સિયા હેતુ ચેવ સહેતુકો ચ, સિયા સહેતુકો ચેવ ન ચ હેતુ, સિયા ન વત્તબ્બો – ‘‘હેતુ ચેવ સહેતુકો ચા’’તિપિ, ‘‘સહેતુકો ચેવ ન ચ હેતૂ’’તિપિ. રૂપક્ખન્ધો ન વત્તબ્બો – ‘‘હેતુ ચેવ હેતુસમ્પયુત્તો ચા’’તિપિ, ‘‘હેતુસમ્પયુત્તો ચેવ ન ચ હેતૂ’’તિપિ. તયો ખન્ધા ન વત્તબ્બા – ‘‘હેતૂ ચેવ હેતુસમ્પયુત્તા ચા’’તિ, સિયા હેતુસમ્પયુત્તા ચેવ ન ચ હેતૂ, સિયા ન વત્તબ્બા – ‘‘હેતુસમ્પયુત્તા ચેવ ન ચ હેતૂ’’તિ. સઙ્ખારક્ખન્ધો સિયા હેતુ ચેવ હેતુસમ્પયુત્તો ચ, સિયા હેતુસમ્પયુત્તો ચેવ ન ચ હેતુ, સિયા ન વત્તબ્બો – ‘‘હેતુ ચેવ હેતુસમ્પયુત્તો ચા’’તિપિ, ‘‘હેતુસમ્પયુત્તો ચેવ ન ચ હેતૂ’’તિપિ. રૂપક્ખન્ધો ન હેતુ અહેતુકો. તયો ખન્ધા સિયા ન હેતૂ સહેતુકા, સિયા ન હેતૂ અહેતુકા. સઙ્ખારક્ખન્ધો સિયા ન હેતુ સહેતુકો, સિયા ન હેતુ અહેતુકો, સિયા ન વત્તબ્બો – ‘‘ન હેતુ સહેતુકો’’તિપિ, ‘‘ન હેતુ અહેતુકો’’તિપિ.

સપ્પચ્ચયા, સઙ્ખતા.

ચત્તારો ખન્ધા અનિદસ્સના. રૂપક્ખન્ધો સિયા સનિદસ્સનો, સિયા અનિદસ્સનો. ચત્તારો ખન્ધા અપ્પટિઘા. રૂપક્ખન્ધો સિયા સપ્પટિઘો, સિયા અપ્પટિઘો. રૂપક્ખન્ધો રૂપં. ચત્તારો ખન્ધા અરૂપા. રૂપક્ખન્ધો લોકિયો. ચત્તારો ખન્ધા સિયા લોકિયા, સિયા લોકુત્તરા; કેનચિ વિઞ્ઞેય્યા, કેનચિ ન વિઞ્ઞેય્યા.

ચત્તારો ખન્ધા નો આસવા. સઙ્ખારક્ખન્ધો સિયા આસવો, સિયા નો આસવો. રૂપક્ખન્ધો સાસવો. ચત્તારો ખન્ધા સિયા સાસવા, સિયા અનાસવા. રૂપક્ખન્ધો આસવવિપ્પયુત્તો. ચત્તારો ખન્ધા સિયા આસવસમ્પયુત્તા, સિયા આસવવિપ્પયુત્તા. રૂપક્ખન્ધો ન વત્તબ્બો – ‘‘આસવો ચેવ સાસવો ચા’’તિ, સાસવો ચેવ નો ચ આસવો. તયો ખન્ધા ન વત્તબ્બા – ‘‘આસવા ચેવ સાસવા ચા’’તિ, સિયા સાસવા ચેવ નો ચ આસવા, સિયા ન વત્તબ્બા – ‘‘સાસવા ચેવ નો ચ આસવા’’તિ. સઙ્ખારક્ખન્ધો સિયા આસવો ચેવ સાસવો ચ, સિયા સાસવો ચેવ નો ચ આસવો, સિયા ન વત્તબ્બો – ‘‘આસવો ચેવ સાસવો ચા’’તિપિ, ‘‘સાસવો ચેવ નો ચ આસવો’’તિપિ. રૂપક્ખન્ધો ન વત્તબ્બો – ‘‘આસવો ચેવ આસવસમ્પયુત્તો ચા’’તિપિ, ‘‘આસવસમ્પયુત્તો ચેવ નો ચ આસવો’’તિપિ. તયો ખન્ધા ન વત્તબ્બા – ‘‘આસવા ચેવ આસવસમ્પયુત્તા ચા’’તિ, સિયા આસવસમ્પયુત્તા ચેવ નો ચ આસવા, સિયા ન વત્તબ્બા – ‘‘આસવસમ્પયુત્તા ચેવ નો ચ આસવા’’તિ. સઙ્ખારક્ખન્ધો સિયા આસવો ચેવ આસવસમ્પયુત્તો ચ, સિયા આસવસમ્પયુત્તો ચેવ નો ચ આસવો, સિયા ન વત્તબ્બો – ‘‘આસવો ચેવ આસવસમ્પયુત્તો ચા’’તિપિ, ‘‘આસવસમ્પયુત્તો ચેવ નો ચ આસવો’’તિપિ. રૂપક્ખન્ધો આસવવિપ્પયુત્તસાસવો. ચત્તારો ખન્ધા સિયા આસવવિપ્પયુત્તસાસવા, સિયા આસવવિપ્પયુત્તઅનાસવા, સિયા ન વત્તબ્બા – ‘‘આસવવિપ્પયુત્તસાસવા’’તિપિ, ‘‘આસવવિપ્પયુત્તઅનાસવા’’તિપિ.

ચત્તારો ખન્ધા નો સંયોજના. સઙ્ખારક્ખન્ધો સિયા સંયોજનં, સિયા નો સંયોજનં. રૂપક્ખન્ધો સંયોજનિયો. ચત્તારો ખન્ધા સિયા સંયોજનિયા, સિયા અસંયોજનિયા. રૂપક્ખન્ધો સંયોજનવિપ્પયુત્તો. ચત્તારો ખન્ધા સિયા સંયોજનસમ્પયુત્તા, સિયા સંયોજનવિપ્પયુત્તા. રૂપક્ખન્ધો ન વત્તબ્બો – ‘‘સંયોજનઞ્ચેવ સંયોજનિયો ચા’’તિ, ‘‘સંયોજનિયો ચેવ નો ચ સંયોજનં’’. તયો ખન્ધા ન વત્તબ્બા – ‘‘સંયોજના ચેવ સંયોજનિયા ચા’’તિ, સિયા સંયોજનિયા ચેવ નો ચ સંયોજના, સિયા ન વત્તબ્બા – ‘‘સંયોજનિયા ચેવ નો ચ સંયોજના’’તિ. સઙ્ખારક્ખન્ધો સિયા સંયોજનઞ્ચેવ સંયોજનિયો ચ, સિયા સંયોજનિયો ચેવ નો ચ સંયોજનં, સિયા ન વત્તબ્બો – ‘‘સંયોજનઞ્ચેવ સંયોજનિયો ચા’’તિપિ, ‘‘સંયોજનિયો ચેવ નો ચ સંયોજન’’ન્તિપિ. રૂપક્ખન્ધો ન વત્તબ્બો – ‘‘સંયોજનઞ્ચેવ સંયોજનસમ્પયુત્તો ચા’’તિપિ, ‘‘સંયોજનસમ્પયુત્તો ચેવ નો ચ સંયોજન’’ન્તિપિ. તયો ખન્ધા ન વત્તબ્બા – ‘‘સંયોજના ચેવ સંયોજનસમ્પયુત્તા ચા’’તિ, સિયા સંયોજનસમ્પયુત્તા ચેવ નો ચ સંયોજના, સિયા ન વત્તબ્બા – ‘‘સંયોજનસમ્પયુત્તા ચેવ નો ચ સંયોજના’’તિ. સઙ્ખારક્ખન્ધો સિયા સંયોજનઞ્ચેવ સંયોજનસમ્પયુત્તો ચ, સિયા સંયોજનસમ્પયુત્તો ચેવ નો ચ સંયોજનં, સિયા ન વત્તબ્બો – ‘‘સંયોજનઞ્ચેવ સંયોજનસમ્પયુત્તો ચા’’તિપિ, ‘‘સંયોજનસમ્પયુત્તો ચેવ નો ચ સંયોજન’’ન્તિપિ. રૂપક્ખન્ધો સંયોજનવિપ્પયુત્તસંયોજનિયો. ચત્તારો ખન્ધા સિયા સંયોજનવિપ્પયુત્તસંયોજનિયા, સિયા સંયોજનવિપ્પયુત્તઅસંયોજનિયા, સિયા ન વત્તબ્બા – ‘‘સંયોજનવિપ્પયુત્તસંયોજનિયા’’તિપિ, ‘‘સંયોજનવિપ્પયુત્તઅસંયોજનિયા’’તિપિ.

ચત્તારો ખન્ધા નો ગન્થા. સઙ્ખારક્ખન્ધો સિયા ગન્થો, સિયા નો ગન્થો. રૂપક્ખન્ધો ગન્થનિયો. ચત્તારો ખન્ધા સિયા ગન્થનિયા, સિયા અગન્થનિયા. રૂપક્ખન્ધો ગન્થવિપ્પયુત્તો. ચત્તારો ખન્ધા સિયા ગન્થસમ્પયુત્તા, સિયા ગન્થવિપ્પયુત્તા. રૂપક્ખન્ધો ન વત્તબ્બો – ‘‘ગન્થો ચેવ ગન્થનિયો ચા’’તિ, ‘‘ગન્થનિયો ચેવ નો ચ ગન્થો’’. તયો ખન્ધા ન વત્તબ્બા – ‘‘ગન્થા ચેવ ગન્થનિયા ચા’’તિ, સિયા ગન્થનિયા ચેવ નો ચ ગન્થા, સિયા ન વત્તબ્બા – ‘‘ગન્થનિયા ચેવ નો ચ ગન્થા’’તિ. સઙ્ખારક્ખન્ધો સિયા ગન્થો ચેવ ગન્થનિયો ચ, સિયા ગન્થનિયો ચેવ નો ચ ગન્થો, સિયા ન વત્તબ્બો – ‘‘ગન્થો ચેવ ગન્થનિયો ચા’’તિપિ, ‘‘ગન્થનિયો ચેવ નો ચ ગન્થો’’તિપિ. રૂપક્ખન્ધો ન વત્તબ્બો – ‘‘ગન્થો ચેવ ગન્થસમ્પયુત્તો ચા’’તિપિ, ‘‘ગન્થસમ્પયુત્તો ચેવ નો ચ ગન્થો’’તિપિ. તયો ખન્ધા ન વત્તબ્બા – ‘‘ગન્થા ચેવ ગન્થસમ્પયુત્તા ચા’’તિ, સિયા ગન્થસમ્પયુત્તા ચેવ નો ચ ગન્થા, સિયા ન વત્તબ્બા – ‘‘ગન્થસમ્પયુત્તા ચેવ નો ચ ગન્થા’’તિ. સઙ્ખારક્ખન્ધો સિયા ગન્થો ચેવ ગન્થસમ્પયુત્તો ચ, સિયા ગન્થસમ્પયુત્તો ચેવ નો ચ ગન્થો, સિયા ન વત્તબ્બો – ‘‘ગન્થો ચેવ ગન્થસમ્પયુત્તો ચા’’તિપિ, ‘‘ગન્થસમ્પયુત્તો ચેવ નો ચ ગન્થો’’તિ પિ. રૂપક્ખન્ધો ગન્થવિપ્પયુત્તગન્થનિયો. ચત્તારો ખન્ધા સિયા ગન્થવિપ્પયુત્તગન્થનિયા, સિયા ગન્થવિપ્પયુત્તઅગન્થનિયા, સિયા ન વત્તબ્બા – ‘‘ગન્થવિપ્પયુત્તગન્થનિયા’’તિપિ, ‘‘ગન્થવિપ્પયુત્તઅગન્થનિયા’’તિપિ.

ચત્તારો ખન્ધા નો ઓઘા…પે… નો યોગા…પે… નો નીવરણા. સઙ્ખારક્ખન્ધો સિયા નીવરણં, સિયા નો નીવરણં. રૂપક્ખન્ધો નીવરણિયો. ચત્તારો ખન્ધા સિયા નીવરણિયા, સિયા અનીવરણિયા. રૂપક્ખન્ધો નીવરણવિપ્પયુત્તો. ચત્તારો ખન્ધા સિયા નીવરણસમ્પયુત્તા, સિયા નીવરણવિપ્પયુત્તા. રૂપક્ખન્ધો ન વત્તબ્બો – ‘‘નીવરણઞ્ચેવ નીવરણિયો ચા’’તિ, ‘‘નીવરણિયો ચેવ નો ચ નીવરણં’’. તયો ખન્ધા ન વત્તબ્બા – ‘‘નીવરણા ચેવ નીવરણિયા ચા’’તિ, સિયા નીવરણિયા ચેવ નો ચ નીવરણા, સિયા ન વત્તબ્બા – ‘‘નીવરણિયા ચેવ નો ચ નીવરણા’’તિ. સઙ્ખારક્ખન્ધો સિયા નીવરણઞ્ચેવ નીવરણિયો ચ, સિયા નીવરણિયો ચેવ નો ચ નીવરણં, સિયા ન વત્તબ્બો – ‘‘નીવરણઞ્ચેવ નીવરણિયો ચા’’તિપિ, ‘‘નીવરણિયો ચેવ નો ચ નીવરણ’’ન્તિપિ. રૂપક્ખન્ધો ન વત્તબ્બો – ‘‘નીવરણઞ્ચેવ નીવરણસમ્પયુત્તો ચા’’તિપિ, ‘‘નીવરણસમ્પયુત્તો ચેવ નો ચ નીવરણ’’ન્તિપિ. તયો ખન્ધા ન વત્તબ્બા – ‘‘નીવરણા ચેવ નીવરણસમ્પયુત્તા ચા’’તિ, સિયા નીવરણસમ્પયુત્તા ચેવ નો ચ નીવરણા, સિયા ન વત્તબ્બા – ‘‘નીવરણસમ્પયુત્તા ચેવ નો ચ નીવરણા’’તિ. સઙ્ખારક્ખન્ધો સિયા નીવરણઞ્ચેવ નીવરણસમ્પયુત્તો ચ, સિયા નીવરણસમ્પયુત્તો ચેવ નો ચ નીવરણં, સિયા ન વત્તબ્બો – ‘‘નીવરણઞ્ચેવ નીવરણસમ્પયુત્તો ચા’’તિપિ, ‘‘નીવરણસમ્પયુત્તો ચેવ નો ચ નીવરણ’’ન્તિપિ. રૂપક્ખન્ધો નીવરણવિપ્પયુત્તનીવરણિયો. ચત્તારો ખન્ધા સિયા નીવરણવિપ્પયુત્તનીવરણિયા, સિયા નીવરણવિપ્પયુત્તઅનીવરણિયા, સિયા ન વત્તબ્બા – ‘‘નીવરણવિપ્પયુત્તનીવરણિયા’’તિપિ, ‘‘નીવરણવિપ્પયુત્તઅનીવરણિયા’’તિપિ.

ચત્તારો ખન્ધા નો પરામાસા. સઙ્ખારક્ખન્ધો સિયા પરામાસો, સિયા નો પરામાસો. રૂપક્ખન્ધો પરામટ્ઠો. ચત્તારો ખન્ધા સિયા પરામટ્ઠા, સિયા અપરામટ્ઠા. રૂપક્ખન્ધો પરામાસવિપ્પયુત્તો. તયો ખન્ધા સિયા પરામાસસમ્પયુત્તા, સિયા પરામાસવિપ્પયુત્તા. સઙ્ખારક્ખન્ધો સિયા પરામાસસમ્પયુત્તો, સિયા પરામાસવિપ્પયુત્તો, સિયા ન વત્તબ્બો – ‘‘પરામાસસમ્પયુત્તો’’તિપિ, ‘‘પરામાસવિપ્પયુત્તો’’તિપિ. રૂપક્ખન્ધો ન વત્તબ્બો – ‘‘પરામાસો ચેવ પરામટ્ઠો ચા’’તિ, ‘‘પરામટ્ઠો ચેવ નો ચ પરામાસો’’. તયો ખન્ધા ન વત્તબ્બા – ‘‘પરામાસા ચેવ પરામટ્ઠા ચા’’તિ, સિયા પરામટ્ઠા ચેવ નો ચ પરામાસા, સિયા ન વત્તબ્બા – ‘‘પરામટ્ઠા ચેવ નો ચ પરામાસા’’તિ. સઙ્ખારક્ખન્ધો સિયા પરામાસો ચેવ પરામટ્ઠો ચ, સિયા પરામટ્ઠો ચેવ નો ચ પરામાસો, સિયા ન વત્તબ્બો – ‘‘પરામાસો ચેવ પરામટ્ઠો ચા’’તિપિ, ‘‘પરામટ્ઠો ચેવ નો ચ પરામાસો’’તિપિ. રૂપક્ખન્ધો પરામાસવિપ્પયુત્તપરામટ્ઠો. ચત્તારો ખન્ધા સિયા પરામાસવિપ્પયુત્તપરામટ્ઠા, સિયા પરામાસવિપ્પયુત્તઅપરામટ્ઠા, સિયા ન વત્તબ્બા – ‘‘પરામાસવિપ્પયુત્તપરામટ્ઠા’’તિપિ, ‘‘પરામાસવિપ્પયુત્તઅપરામટ્ઠા’’તિપિ.

રૂપક્ખન્ધો અનારમ્મણો. ચત્તારો ખન્ધા સારમ્મણા. વિઞ્ઞાણક્ખન્ધો ચિત્તં. ચત્તારો ખન્ધા નો ચિત્તા. તયો ખન્ધા ચેતસિકા. દ્વે ખન્ધા અચેતસિકા. તયો ખન્ધા ચિત્તસમ્પયુત્તા. રૂપક્ખન્ધો ચિત્તવિપ્પયુત્તો. વિઞ્ઞાણક્ખન્ધો ન વત્તબ્બો – ‘‘ચિત્તેન સમ્પયુત્તો’’તિપિ, ‘‘ચિત્તેન વિપ્પયુત્તો’’તિપિ. તયો ખન્ધા ચિત્તસંસટ્ઠા. રૂપક્ખન્ધો ચિત્તવિસંસટ્ઠો. વિઞ્ઞાણક્ખન્ધો ન વત્તબ્બો – ‘‘ચિત્તેન સંસટ્ઠો’’તિપિ, ‘‘ચિત્તેન વિસંસટ્ઠો’’તિપિ. તયો ખન્ધા ચિત્તસમુટ્ઠાના. વિઞ્ઞાણક્ખન્ધો નો ચિત્તસમુટ્ઠાનો. રૂપક્ખન્ધો સિયા ચિત્તસમુટ્ઠાનો, સિયા નો ચિત્તસમુટ્ઠાનો. તયો ખન્ધા ચિત્તસહભુનો. વિઞ્ઞાણક્ખન્ધો નો ચિત્તસહભૂ. રૂપક્ખન્ધો સિયા ચિત્તસહભૂ, સિયા નો ચિત્તસહભૂ. તયો ખન્ધા ચિત્તાનુપરિવત્તિનો. વિઞ્ઞાણક્ખન્ધો નો ચિત્તાનુપરિવત્તિ. રૂપક્ખન્ધો સિયા ચિત્તાનુપરિવત્તિ, સિયા નો ચિત્તાનુપરિવત્તિ. તયો ખન્ધા ચિત્તસંસટ્ઠસમુટ્ઠાના. દ્વે ખન્ધા નો ચિત્તસંસટ્ઠસમુટ્ઠાના. તયો ખન્ધા ચિત્તસંસટ્ઠસમુટ્ઠાનસહભુનો. દ્વે ખન્ધા નો ચિત્તસંસટ્ઠસમુટ્ઠાનસહભુનો. તયો ખન્ધા ચિત્તસંસટ્ઠસમુટ્ઠાનાનુપરિવત્તિનો. દ્વે ખન્ધા નો ચિત્તસંસટ્ઠસમુટ્ઠાનાનુપરિવત્તિનો.

વિઞ્ઞાણક્ખન્ધો અજ્ઝત્તિકો. તયો ખન્ધા બાહિરા. રૂપક્ખન્ધો સિયા અજ્ઝત્તિકો, સિયા બાહિરો. ચત્તારો ખન્ધા નો ઉપાદા. રૂપક્ખન્ધો સિયા ઉપાદા, સિયા નો ઉપાદા, સિયા ઉપાદિન્ના, સિયા અનુપાદિન્ના. ચત્તારો ખન્ધા નો ઉપાદાના. સઙ્ખારક્ખન્ધો સિયા ઉપાદાનં, સિયા નો ઉપાદાનં. રૂપક્ખન્ધો ઉપાદાનિયો. ચત્તારો ખન્ધા સિયા ઉપાદાનિયા, સિયા અનુપાદાનિયા. રૂપક્ખન્ધો ઉપાદાનવિપ્પયુત્તો. ચત્તારો ખન્ધા સિયા ઉપાદાનસમ્પયુત્તા, સિયા ઉપાદાનવિપ્પયુત્તા. રૂપક્ખન્ધો ન વત્તબ્બો – ‘‘ઉપાદાનઞ્ચેવ ઉપાદાનિયો ચા’’તિ, ‘‘ઉપાદાનિયો ચેવ નો ચ ઉપાદાનં’’. તયો ખન્ધા ન વત્તબ્બા – ‘‘ઉપાદાનઞ્ચેવ ઉપાદાનિયા ચા’’તિ, સિયા ઉપાદાનિયા ચેવ નો ચ ઉપાદાના, સિયા ન વત્તબ્બા – ‘‘ઉપાદાનિયા ચેવ નો ચ ઉપાદાના’’તિ. સઙ્ખારક્ખન્ધો સિયા ઉપાદાનઞ્ચેવ ઉપાદાનિયો ચ, સિયા ઉપાદાનિયો ચેવ નો ચ ઉપાદાનં, સિયા ન વત્તબ્બો – ‘‘ઉપાદાનઞ્ચેવ ઉપાદાનિયો ચા’’તિપિ, ‘‘ઉપાદાનિયો ચેવ નો ચ ઉપાદાન’’ન્તિપિ. રૂપક્ખન્ધો ન વત્તબ્બો – ‘‘ઉપાદાનઞ્ચેવ ઉપાદાનસમ્પયુત્તો ચા’’તિપિ, ‘‘ઉપાદાનસમ્પયુત્તો ચેવ નો ચ ઉપાદાન’’ન્તિપિ. તયો ખન્ધા ન વત્તબ્બા – ‘‘ઉપાદાના ચેવ ઉપાદાનસમ્પયુત્તા ચા’’તિ, સિયા ઉપાદાનસમ્પયુત્તા ચેવ નો ચ ઉપાદાના, સિયા ન વત્તબ્બા – ‘‘ઉપાદાનસમ્પયુત્તા ચેવ નો ચ ઉપાદાના’’તિ. સઙ્ખારક્ખન્ધો સિયા ઉપાદાનઞ્ચેવ ઉપાદાનસમ્પયુત્તો ચ, સિયા ઉપાદાનસમ્પયુત્તો ચેવ નો ચ ઉપાદાનં, સિયા ન વત્તબ્બો – ‘‘ઉપાદાનઞ્ચેવ ઉપાદાનસમ્પયુત્તો ચા’’તિપિ, ‘‘ઉપાદાનસમ્પયુત્તો ચેવ નો ચ ઉપાદાન’’ન્તિપિ. રૂપક્ખન્ધો ઉપાદાનવિપ્પયુત્તઉપાદાનિયો. ચત્તારો ખન્ધા સિયા ઉપાદાનવિપ્પયુત્તઉપાદાનિયા, સિયા ઉપાદાનવિપ્પયુત્તઅનુપાદાનિયા, સિયા ન વત્તબ્બા – ‘‘ઉપાદાનવિપ્પયુત્તઉપાદાનિયા’’તિપિ, ‘‘ઉપાદાનવિપ્પયુત્તઅનુપાદાનિયા’’તિપિ.

ચત્તારો ખન્ધા નો કિલેસા. સઙ્ખારક્ખન્ધો સિયા કિલેસો, સિયા નો કિલેસો. રૂપક્ખન્ધો સંકિલેસિકો. ચત્તારો ખન્ધા સિયા સંકિલેસિકા, સિયા અસંકિલેસિકા. રૂપક્ખન્ધો અસંકિલિટ્ઠો. ચત્તારો ખન્ધા સિયા સંકિલિટ્ઠા, સિયા અસંકિલિટ્ઠા. રૂપક્ખન્ધો કિલેસવિપ્પયુત્તો. ચત્તારો ખન્ધા સિયા કિલેસસમ્પયુત્તા, સિયા કિલેસવિપ્પયુત્તા. રૂપક્ખન્ધો ન વત્તબ્બો – ‘‘કિલેસો ચેવ સંકિલેસિકો ચા’’તિ, ‘‘સંકિલેસિકો ચેવ નો ચ કિલેસો’’. તયો ખન્ધા ન વત્તબ્બા – ‘‘કિલેસા ચેવ સંકિલેસિકા ચા’’તિ, સિયા સંકિલેસિકા ચેવ નો ચ કિલેસા, સિયા ન વત્તબ્બા – ‘‘સંકિલેસિકા ચેવ નો ચ કિલેસા’’તિ. સઙ્ખારક્ખન્ધો સિયા કિલેસો ચેવ સંકિલેસિકો ચ, સિયા સંકિલેસિકો ચેવ નો ચ કિલેસો, સિયા ન વત્તબ્બો – ‘‘કિલેસો ચેવ સંકિલેસિકો ચા’’તિપિ, ‘‘સંકિલેસિકો ચેવ નો ચ કિલેસો’’તિપિ. રૂપક્ખન્ધો ન વત્તબ્બો – ‘‘કિલેસો ચેવ સંકિલિટ્ઠો ચા’’તિપિ, ‘‘સંકિલિટ્ઠો ચેવ નો ચ કિલેસો’’તિપિ. તયો ખન્ધા ન વત્તબ્બા – ‘‘કિલેસો ચેવ સંકિલિટ્ઠા ચા’’તિ, સિયા સંકિલિટ્ઠા ચેવ નો ચ કિલેસા, સિયા ન વત્તબ્બા – ‘‘સંકિલિટ્ઠા ચેવ નો ચ કિલેસા’’તિ. સઙ્ખારક્ખન્ધો સિયા કિલેસો ચેવ સંકિલિટ્ઠો ચ, સિયા સંકિલિટ્ઠો ચેવ નો ચ કિલેસો, સિયા ન વત્તબ્બો – ‘‘કિલેસો ચેવ સંકિલિટ્ઠો ચા’’તિપિ, ‘‘સંકિલિટ્ઠો ચેવ નો ચ કિલેસો’’તિપિ.

રૂપક્ખન્ધો ન વત્તબ્બો – ‘‘કિલેસો ચેવ કિલેસસમ્પયુત્તો ચા’’તિપિ, ‘‘કિલેસસમ્પયુત્તો ચેવ નો ચ કિલેસો’’તિપિ. તયો ખન્ધા ન વત્તબ્બા – ‘‘કિલેસા ચેવ કિલેસસમ્પયુત્તા ચા’’તિ, સિયા કિલેસસમ્પયુત્તા ચેવ નો ચ કિલેસા, સિયા ન વત્તબ્બા – કિલેસસમ્પયુત્તા ચેવ નો ચ કિલેસા’’તિ. સઙ્ખારક્ખન્ધો સિયા કિલેસો ચેવ કિલેસસમ્પયુત્તો ચ, સિયા કિલેસસમ્પયુત્તો ચેવ નો ચ કિલેસો, સિયા ન વત્તબ્બો – ‘‘કિલેસો ચેવ કિલેસસમ્પયુત્તો ચા’’તિપિ, ‘‘કિલેસસમ્પયુત્તો ચેવ નો ચ કિલેસો’’તિપિ. રૂપક્ખન્ધો કિલેસવિપ્પયુત્તસંકિલેસિકો. ચત્તારો ખન્ધા સિયા કિલેસવિપ્પયુત્તસંકિલેસિકા, સિયા કિલેસવિપ્પયુત્તઅસંકિલેસિકા, સિયા ન વત્તબ્બા – ‘‘કિલેસવિપ્પયુત્તસંકિલેસિકા’’તિપિ, ‘‘કિલેસવિપ્પયુત્તઅસંકિલેસિકા’’તિપિ.

રૂપક્ખન્ધો ન દસ્સનેન પહાતબ્બો. ચત્તારો ખન્ધા સિયા દસ્સનેન પહાતબ્બા, સિયા ન દસ્સનેન પહાતબ્બા. રૂપક્ખન્ધો ન ભાવનાય પહાતબ્બો. ચત્તારો ખન્ધા સિયા ભાવનાય પહાતબ્બા, સિયા ન ભાવનાય પહાતબ્બા. રૂપક્ખન્ધો ન દસ્સનેન પહાતબ્બહેતુકો. ચત્તારો ખન્ધા સિયા દસ્સનેન પહાતબ્બહેતુકા, સિયા ન દસ્સનેન પહાતબ્બહેતુકા. રૂપક્ખન્ધો ન ભાવનાય પહાતબ્બહેતુકો. ચત્તારો ખન્ધા સિયા ભાવનાય પહાતબ્બહેતુકા, સિયા ન ભાવનાય પહાતબ્બહેતુકા. રૂપક્ખન્ધો અવિતક્કો. ચત્તારો ખન્ધા સિયા સવિતક્કા, સિયા અવિતક્કા. રૂપક્ખન્ધો અવિચારો. ચત્તારો ખન્ધા સિયા સવિચારા, સિયા અવિચારા. રૂપક્ખન્ધો અપ્પીતિકો, ચત્તારો ખન્ધા સિયા સપ્પીતિકા, સિયા અપ્પીતિકા. રૂપક્ખન્ધો ન પીતિસહગતો. ચત્તારો ખન્ધા સિયા પીતિસહગતા, સિયા ન પીતિસહગતા. દ્વે ખન્ધા ન સુખસહગતા. તયો ખન્ધા સિયા સુખસહગતા, સિયા ન સુખસહગતા. દ્વે ખન્ધા ન ઉપેક્ખાસહગતા. તયો ખન્ધા સિયા ઉપેક્ખાસહગતા, સિયા ન ઉપેક્ખાસહગતા.

રૂપક્ખન્ધો કામાવચરો. ચત્તારો ખન્ધા સિયા કામાવચરા, સિયા ન કામાવચરા. રૂપક્ખન્ધો ન રૂપાવચરો. ચત્તારો ખન્ધા સિયા રૂપાવચરા, સિયા ન રૂપાવચરા. રૂપક્ખન્ધો ન અરૂપાવચરો. ચત્તારો ખન્ધા સિયા અરૂપાવચરા, સિયા ન અરૂપાવચરા. રૂપક્ખન્ધો પરિયાપન્નો. ચત્તારો ખન્ધા સિયા પરિયાપન્ના, સિયા અપરિયાપન્ના. રૂપક્ખન્ધો અનિય્યાનિકો. ચત્તારો ખન્ધા સિયા નિય્યાનિકા, સિયા અનિય્યાનિકા. રૂપક્ખન્ધો અનિયતો. ચત્તારો ખન્ધા સિયા નિયતા, સિયા અનિયતા. રૂપક્ખન્ધો સઉત્તરો. ચત્તારો ખન્ધા સિયા સઉત્તરા, સિયા અનુત્તરા. રૂપક્ખન્ધો અરણો. ચત્તારો ખન્ધા સિયા સરણા, સિયા અરણાતિ.

પઞ્હાપુચ્છકં.

ખન્ધવિભઙ્ગો નિટ્ઠિતો.