૬. છક્કપુગ્ગલપઞ્ઞત્તિ

૨૦૨. તત્ર ય્વાયં પુગ્ગલો પુબ્બે અનનુસ્સુતેસુ ધમ્મેસુ સામં સચ્ચાનિ અભિસમ્બુજ્ઝતિ, તત્થ ચ સબ્બઞ્ઞુતં પાપુણાતિ બલેસુ ચ વસીભાવં, સમ્માસમ્બુદ્ધો તેન દટ્ઠબ્બો.

તત્ર ય્વાયં પુગ્ગલો પુબ્બે અનનુસ્સુતેસુ ધમ્મેસુ સામં સચ્ચાનિ અભિસમ્બુજ્ઝતિ, ન ચ તત્થ સબ્બઞ્ઞુતં પાપુણાતિ ન ચ બલેસુ વસીભાવં, પચ્ચેકસમ્બુદ્ધો તેન દટ્ઠબ્બો.

તત્ર ય્વાયં પુગ્ગલો પુબ્બે અનનુસ્સુતેસુ ધમ્મેસુ સામં સચ્ચાનિ અનભિસમ્બુજ્ઝતિ, દિટ્ઠેવ ધમ્મે દુક્ખસ્સન્તકરો હોતિ [દુક્ખસ્સન્તં કરોતિ (સી.) એવમુપરિપિ], સાવકપારમિઞ્ચ પાપુણાતિ, સારિપુત્તમોગ્ગલ્લાના તેન દટ્ઠબ્બા.

તત્ર ય્વાયં પુગ્ગલો પુબ્બે અનનુસ્સુતેસુ ધમ્મેસુ સામં સચ્ચાનિ અનભિસમ્બુજ્ઝતિ, દિટ્ઠેવ ધમ્મે દુક્ખસ્સન્તકરો હોતિ, ન ચ સાવકપારમિં પાપુણાતિ, અવસેસા અરહન્તા તેન દટ્ઠબ્બા.

તત્ર ય્વાયં પુગ્ગલો પુબ્બે અનનુસ્સુતેસુ ધમ્મેસુ સામં સચ્ચાનિ અનભિસમ્બુજ્ઝતિ, ન ચ દિટ્ઠેવ ધમ્મે દુક્ખસ્સન્તકરો હોતિ, અનાગામી હોતિ અનાગન્તા ઇત્થત્તં, અનાગામી તેન દટ્ઠબ્બો.

તત્ર ય્વાયં પુગ્ગલો પુબ્બે અનનુસ્સુતેસુ ધમ્મેસુ સામં સચ્ચાનિ અનભિસમ્બુજ્ઝતિ, ન ચ દિટ્ઠેવ ધમ્મે દુક્ખસ્સન્તકરો હોતિ, આગન્તા ઇત્થત્તં, સોતાપન્નસકદાગામિનો તેન દટ્ઠબ્બા.

છક્કનિદ્દેસો.