૭. સત્તકપુગ્ગલપઞ્ઞત્તિ

૨૦૩. કથઞ્ચ પુગ્ગલો સકિં નિમુગ્ગો નિમુગ્ગોવ હોતિ? ઇધેકચ્ચો પુગ્ગલો સમન્નાગતો હોતિ એકન્તકાળકેહિ અકુસલેહિ ધમ્મેહિ. એવં પુગ્ગલો સકિં નિમુગ્ગો નિમુગ્ગોવ હોતિ.

કથઞ્ચ પુગ્ગલો ઉમ્મુજ્જિત્વા નિમુજ્જતિ? ઇધેકચ્ચો પુગ્ગલો ઉમ્મુજ્જતિ ‘‘સાહુ સદ્ધા કુસલેસુ ધમ્મેસુ, સાધુ [સાહુ (સી. સ્યા.) એવં તીસુ ઠાનેસુપિ] હિરી કુસલેસુ ધમ્મેસુ, સાધુ ઓત્તપ્પં કુસલેસુ ધમ્મેસુ, સાધુ વીરિયં [વિરિયં (સી. સ્યા.)] કુસલેસુ ધમ્મેસુ, સાધુ પઞ્ઞા કુસલેસુ ધમ્મેસૂ’’તિ. તસ્સ સા સદ્ધા નેવ તિટ્ઠતિ નો વડ્ઢતિ હાયતિયેવ, તસ્સ સા હિરી નેવ તિટ્ઠતિ નો વડ્ઢતિ હાયતિયેવ, તસ્સ તં ઓત્તપ્પં નેવ તિટ્ઠતિ નો વડ્ઢતિ હાયતિયેવ, તસ્સ તં વીરિયં નેવ તિટ્ઠતિ નો વડ્ઢતિ હાયતિયેવ, તસ્સ સા પઞ્ઞા નેવ તિટ્ઠતિ નો વડ્ઢતિ હાયતિયેવ. એવં પુગ્ગલો ઉમ્મુજ્જિત્વા નિમુજ્જતિ.

કથઞ્ચ પુગ્ગલો ઉમ્મુજ્જિત્વા ઠિતો હોતિ? ઇધેકચ્ચો પુગ્ગલો ઉમ્મુજ્જતિ ‘‘સાહુ સદ્ધા કુસલેસુ ધમ્મેસુ, સાધુ હિરી કુસલેસુ ધમ્મેસુ, સાધુ ઓત્તપ્પં કુસલેસુ ધમ્મેસુ, સાધુ વીરિયં કુસલેસુ ધમ્મેસુ, સાધુ પઞ્ઞા કુસલેસુ ધમ્મેસૂ’’તિ. તસ્સ સા સદ્ધા નેવ હાયતિ નો વડ્ઢતિ ઠિતા હોતિ, તસ્સ સા હિરી નેવ હાયતિ નો વડ્ઢતિ ઠિતા હોતિ, તસ્સ તં ઓત્તપ્પં નેવ હાયતિ નો વડ્ઢતિ ઠિતં હોતિ, તસ્સ તં વીરિયં નેવ હાયતિ નો વડ્ઢતિ ઠિતં હોતિ, તસ્સ સા પઞ્ઞા નેવ હાયતિ નો વડ્ઢતિ ઠિતા હોતિ. એવં પુગ્ગલો ઉમ્મુજ્જિત્વા ઠિતો હોતિ.

કથઞ્ચ પુગ્ગલો ઉમ્મુજ્જિત્વા વિપસ્સતિ વિલોકેતિ? ઇધેકચ્ચો પુગ્ગલો ઉમ્મુજ્જતિ ‘‘સાહુ સદ્ધા કુસલેસુ ધમ્મેસુ, સાધુ હિરી કુસલેસુ ધમ્મેસુ, સાધુ ઓત્તપ્પં કુસલેસુ ધમ્મેસુ, સાધુ વીરિયં કુસલેસુ ધમ્મેસુ, સાધુ પઞ્ઞા કુસલેસુ ધમ્મેસૂ’’તિ. સો તિણ્ણં સંયોજનાનં પરિક્ખયા સોતાપન્નો હોતિ અવિનિપાતધમ્મો નિયતો સમ્બોધિપરાયનો. એવં પુગ્ગલો ઉમ્મુજ્જિત્વા વિપસ્સતિ વિલોકેતિ.

કથઞ્ચ પુગ્ગલો ઉમ્મુજ્જિત્વા પતરતિ? ઇધેકચ્ચો પુગ્ગલો ઉમ્મુજ્જતિ ‘‘સાહુ સદ્ધા કુસલેસુ ધમ્મેસુ, સાધુ હિરી કુસલેસુ ધમ્મેસુ, સાધુ ઓત્તપ્પં કુસલેસુ ધમ્મેસુ, સાધુ વીરિયં કુસલેસુ ધમ્મેસુ, સાધુ પઞ્ઞા કુસલેસુ ધમ્મેસૂ’’તિ. સો તિણ્ણં સંયોજનાનં પરિક્ખયા રાગદોસમોહાનં તનુત્તા સકદાગામી હોતિ સકિદેવ ઇમં લોકં આગન્ત્વા દુક્ખસ્સન્તકરો હોતિ. એવં પુગ્ગલો ઉમ્મુજ્જિત્વા પતરતિ.

કથઞ્ચ પુગ્ગલો ઉમ્મુજ્જિત્વા પતિગાધપ્પત્તો હોતિ? ઇધેકચ્ચો પુગ્ગલો ઉમ્મુજ્જતિ ‘‘સાહુ સદ્ધા કુસલેસુ ધમ્મેસુ, સાધુ હિરી કુસલેસુ ધમ્મેસુ, સાધુ ઓત્તપ્પં કુસલેસુ ધમ્મેસુ, સાધુ વીરિયં કુસલેસુ ધમ્મેસુ, સાધુ પઞ્ઞા કુસલેસુ ધમ્મેસૂ’’તિ. સો પઞ્ચન્નં ઓરમ્ભાગિયાનં સંયોજનાનં પરિક્ખયા ઓપપાતિકો હોતિ તત્થ પરિનિબ્બાયી અનાવત્તિધમ્મો તસ્મા લોકા. એવં પુગ્ગલો ઉમ્મુજ્જિત્વા પતિગાધપ્પત્તો હોતિ.

કથઞ્ચ પુગ્ગલો ઉમ્મુજ્જિત્વા તિણ્ણો હોતિ પારઙ્ગતો થલે તિટ્ઠતિ બ્રાહ્મણો? ઇધેકચ્ચો પુગ્ગલો ઉમ્મુજ્જતિ ‘‘સાહુ સદ્ધા કુસલેસુ ધમ્મેસુ, સાધુ હિરી કુસલેસુ ધમ્મેસુ, સાધુ ઓત્તપ્પં કુસલેસુ ધમ્મેસુ, સાધુ વીરિયં કુસલેસુ ધમ્મેસુ, સાધુ પઞ્ઞા કુસલેસુ ધમ્મેસૂ’’તિ. સો આસવાનં ખયા અનાસવં ચેતોવિમુત્તિં પઞ્ઞાવિમુત્તિં દિટ્ઠેવ ધમ્મે સયં અભિઞ્ઞા સચ્છિકત્વા ઉપસમ્પજ્જ વિહરતિ. એવં પુગ્ગલો ઉમ્મુજ્જિત્વા તિણ્ણો હોતિ પારઙ્ગતો થલે તિટ્ઠતિ બ્રાહ્મણો.

૨૦૪. કતમો ચ પુગ્ગલો ઉભતોભાગવિમુત્તો? ઇધેકચ્ચો પુગ્ગલો અટ્ઠ વિમોક્ખે કાયેન ફુસિત્વા વિહરતિ પઞ્ઞાય ચસ્સ દિસ્વા આસવા પરિક્ખીણા હોન્તિ. અયં વુચ્ચતિ પુગ્ગલો ઉભતોભાગવિમુત્તો.

૨૦૫. કતમો ચ પુગ્ગલો પઞ્ઞાવિમુત્તો…પે… કાયસક્ખી… દિટ્ઠિપ્પત્તો… સદ્ધાવિમુત્તો… ધમ્માનુસારી ….

૨૦૬. કતમો ચ પુગ્ગલો સદ્ધાનુસારી? યસ્સ પુગ્ગલસ્સ સોતાપત્તિફલસચ્છિકિરિયાય પટિપન્નસ્સ સદ્ધિન્દ્રિયં અધિમત્તં હોતિ, સદ્ધાવાહિં સદ્ધાપુબ્બઙ્ગમં અરિયમગ્ગં ભાવેતિ. અયં વુચ્ચતિ પુગ્ગલો સદ્ધાનુસારી. સોતાપત્તિફલસચ્છિકિરિયાય પટિપન્નો પુગ્ગલો સદ્ધાનુસારી, ફલે ઠિતો સદ્ધાવિમુત્તોતિ.

સત્તકનિદ્દેસો.