૧. વિભઙ્ગવારો

હેતુપચ્ચયો

૫૫. પરિત્તો ધમ્મો પરિત્તસ્સ ધમ્મસ્સ હેતુપચ્ચયેન પચ્ચયો – પરિત્તા હેતૂ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં હેતુપચ્ચયેન પચ્ચયો. પટિસન્ધિક્ખણે…પે…. (૧)

મહગ્ગતો ધમ્મો મહગ્ગતસ્સ ધમ્મસ્સ હેતુપચ્ચયેન પચ્ચયો… તીણિ (પવત્તિપટિસન્ધિ કાતબ્બા).

અપ્પમાણો ધમ્મો અપ્પમાણસ્સ ધમ્મસ્સ હેતુપચ્ચયેન પચ્ચયો… તીણિ.

આરમ્મણપચ્ચયો

૫૬. પરિત્તો ધમ્મો પરિત્તસ્સ ધમ્મસ્સ આરમ્મણપચ્ચયેન પચ્ચયો – દાનં દત્વા સીલં સમાદિયિત્વા ઉપોસથકમ્મં કત્વા તં પચ્ચવેક્ખતિ, પુબ્બે સુચિણ્ણાનિ પચ્ચવેક્ખતિ, અરિયા ગોત્રભું પચ્ચવેક્ખન્તિ, વોદાનં પચ્ચવેક્ખન્તિ, પહીને કિલેસે પચ્ચવેક્ખન્તિ, વિક્ખમ્ભિતે કિલેસે પચ્ચવેક્ખન્તિ, પુબ્બે સમુદાચિણ્ણે કિલેસે જાનન્તિ. ચક્ખું…પે… વત્થું… પરિત્તે ખન્ધે અનિચ્ચતો…પે… વિપસ્સન્તિ અસ્સાદેન્તિ અભિનન્દન્તિ, તં આરબ્ભ રાગો ઉપ્પજ્જતિ …પે… દોમનસ્સં ઉપ્પજ્જતિ. રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ આરમ્મણપચ્ચયેન પચ્ચયો. (૧)

પરિત્તો ધમ્મો મહગ્ગતસ્સ ધમ્મસ્સ આરમ્મણપચ્ચયેન પચ્ચયો – દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ, ચેતોપરિયઞાણેન પરિત્તચિત્તસમઙ્ગિસ્સ ચિત્તં જાનાતિ. પરિત્તા ખન્ધા ઇદ્ધિવિધઞાણસ્સ, ચેતોપરિયઞાણસ્સ પુબ્બેનિવાસાનુસ્સતિઞાણસ્સ યથાકમ્મૂપગઞાણસ્સ અનાગતંસઞાણસ્સ આરમ્મણપચ્ચયેન પચ્ચયો. (૨)

૫૭. મહગ્ગતો ધમ્મો મહગ્ગતસ્સ ધમ્મસ્સ આરમ્મણપચ્ચયેન પચ્ચયો – ચેતોપરિયઞાણેન મહગ્ગતચિત્તસમઙ્ગિસ્સ ચિત્તં જાનાતિ, આકાસાનઞ્ચાયતનં વિઞ્ઞાણઞ્ચાયતનસ્સ… આકિઞ્ચઞ્ઞાયતનં નેવસઞ્ઞાનાસઞ્ઞાયતનસ્સ આરમ્મણપચ્ચયેન પચ્ચયો. મહગ્ગતા ખન્ધા ઇદ્ધિવિધઞાણસ્સ, ચેતોપરિયઞાણસ્સ પુબ્બેનિવાસાનુસ્સતિઞાણસ્સ યથાકમ્મૂપગઞાણસ્સ અનાગતંસઞાણસ્સ આરમ્મણપચ્ચયેન પચ્ચયો. (૧)

મહગ્ગતો ધમ્મો પરિત્તસ્સ ધમ્મસ્સ આરમ્મણપચ્ચયેન પચ્ચયો – પઠમં ઝાનં પચ્ચવેક્ખતિ…પે… નેવસઞ્ઞાનાસઞ્ઞાયતનં પચ્ચવેક્ખતિ, દિબ્બં ચક્ખું પચ્ચવેક્ખતિ, દિબ્બં સોતધાતું પચ્ચવેક્ખતિ, ઇદ્ધિવિધઞાણં પચ્ચવેક્ખતિ, ચેતોપરિયઞાણં પચ્ચવેક્ખતિ, પુબ્બેનિવાસાનુસ્સતિઞાણં પચ્ચવેક્ખતિ, યથાકમ્મૂપગઞાણં પચ્ચવેક્ખતિ, અનાગતંસઞાણં પચ્ચવેક્ખતિ. મહગ્ગતે ખન્ધે અનિચ્ચતો…પે… વિપ્પસ્સતિ અસ્સાદેતિ અભિનન્દતિ, તં આરબ્ભ રાગો ઉપ્પજ્જતિ…પે… દોમનસ્સં ઉપ્પજ્જતિ. (૨)

૫૮. અપ્પમાણો ધમ્મો અપ્પમાણસ્સ ધમ્મસ્સ આરમ્મણપચ્ચયેન પચ્ચયો – નિબ્બાનં મગ્ગસ્સ, ફલસ્સ આરમ્મણપચ્ચયેન પચ્ચયો. (૧)

અપ્પમાણો ધમ્મો પરિત્તસ્સ ધમ્મસ્સ આરમ્મણપચ્ચયેન પચ્ચયો – અરિયા મગ્ગા વુટ્ઠહિત્વા મગ્ગં પચ્ચવેક્ખન્તિ, ફલં પચ્ચવેક્ખન્તિ, નિબ્બાનં પચ્ચવેક્ખન્તિ, નિબ્બાનં ગોત્રભુસ્સ, વોદાનસ્સ, આવજ્જનાય આરમ્મણપચ્ચયેન પચ્ચયો. (૨)

અપ્પમાણો ધમ્મો મહગ્ગતસ્સ ધમ્મસ્સ આરમ્મણપચ્ચયેન પચ્ચયો – અરિયા ચેતોપરિયઞાણેન અપ્પમાણચિત્તસમઙ્ગિસ્સ ચિત્તં જાનન્તિ, અપ્પમાણા ખન્ધા ચેતોપરિયઞાણસ્સ, પુબ્બેનિવાસાનુસ્સતિઞાણસ્સ, અનાગતંસઞાણસ્સ આરમ્મણપચ્ચયેન પચ્ચયો. (૩)

અધિપતિપચ્ચયો

૫૯. પરિત્તો ધમ્મો પરિત્તસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – દાનં દત્વા સીલં સમાદિયિત્વા ઉપોસથકમ્મં કત્વા તં ગરું કત્વા પચ્ચવેક્ખતિ, પુબ્બે સુચિણ્ણાનિ ગરું કત્વા પચ્ચવેક્ખતિ. સેક્ખા ગોત્રભું ગરું કત્વા પચ્ચવેક્ખન્તિ, વોદાનં ગરું કત્વા પચ્ચવેક્ખન્તિ. ચક્ખું…પે… વત્થું… પરિત્તે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ, દિટ્ઠિ ઉપ્પજ્જતિ. સહજાતાધિપતિ – પરિત્તાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૧)

મહગ્ગતો ધમ્મો મહગ્ગતસ્સ ધમ્મસ્સ અધિપતિપચ્ચયેન પચ્ચયો. સહજાતાધિપતિ – મહગ્ગતાધિપતિ સમ્પયુત્તકાનં ખન્ધાનં અધિપતિપચ્ચયેન પચ્ચયો. (૧)

મહગ્ગતો ધમ્મો પરિત્તસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – પઠમં ઝાનં ગરું કત્વા…પે… નેવસઞ્ઞાનાસઞ્ઞાયતનં…પે… દિબ્બં ચક્ખું…પે… અનાગતંસઞાણં ગરું કત્વા પચ્ચવેક્ખતિ. મહગ્ગતે ખન્ધે ગરું કત્વા અસ્સાદેતિ અભિનન્દતિ, તં ગરું કત્વા રાગો ઉપ્પજ્જતિ… દિટ્ઠિ ઉપ્પજ્જતિ. સહજાતાધિપતિ – મહગ્ગતાધિપતિ ચિત્તસમુટ્ઠાનાનં રૂપાનં અધિપતિપચ્ચયેન પચ્ચયો. (૨)

મહગ્ગતો ધમ્મો પરિત્તસ્સ ચ મહગ્ગતસ્સ ચ ધમ્મસ્સ અધિપતિપચ્ચયેન પચ્ચયો. સહજાતાધિપતિ – મહગ્ગતાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૩)

૬૦. અપ્પમાણો ધમ્મો અપ્પમાણસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – નિબ્બાનં મગ્ગસ્સ… ફલસ્સ અધિપતિપચ્ચયેન પચ્ચયો. સહજાતાધિપતિ – અપ્પમાણાધિપતિ સમ્પયુત્તકાનં ખન્ધાનં અધિપતિપચ્ચયેન પચ્ચયો. (૧)

અપ્પમાણો ધમ્મો પરિત્તસ્સ ધમ્મસ્સ અધિપતિપચ્ચયેન પચ્ચયો – આરમ્મણાધિપતિ, સહજાતાધિપતિ. આરમ્મણાધિપતિ – અરિયા મગ્ગા વુટ્ઠહિત્વા મગ્ગં ગરું કત્વા પચ્ચવેક્ખન્તિ, ફલં ગરું કત્વા પચ્ચવેક્ખન્તિ, નિબ્બાનં ગરું કત્વા પચ્ચવેક્ખન્તિ, નિબ્બાનં ગોત્રભુસ્સ, વોદાનસ્સ અધિપતિપચ્ચયેન પચ્ચયો. સહજાતાધિપતિ – અપ્પમાણાધિપતિ ચિત્તસમુટ્ઠાનાનં રૂપાનં અધિપતિપચ્ચયેન પચ્ચયો. (૨)

અપ્પમાણો ધમ્મો પરિત્તસ્સ ચ અપ્પમાણસ્સ ચ ધમ્મસ્સ અધિપતિપચ્ચયેન પચ્ચયો. સહજાતાધિપતિ – અપ્પમાણાધિપતિ સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં અધિપતિપચ્ચયેન પચ્ચયો. (૩)

અનન્તરપચ્ચયો

૬૧. પરિત્તો ધમ્મો પરિત્તસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા પરિત્તા ખન્ધા પચ્છિમાનં પચ્છિમાનં પરિત્તાનં ખન્ધાનં અનન્તરપચ્ચયેન પચ્ચયો. અનુલોમં ગોત્રભુસ્સ… અનુલોમં વોદાનસ્સ… આવજ્જના પરિત્તાનં ખન્ધાનં અનન્તરપચ્ચયેન પચ્ચયો. (૧)

પરિત્તો ધમ્મો મહગ્ગતસ્સ ધમ્મસ્સ અનન્તરપચ્ચયેન પચ્ચયો – પરિત્તં ચુતિચિત્તં મહગ્ગતસ્સ ઉપપત્તિચિત્તસ્સ અનન્તરપચ્ચયેન પચ્ચયો. પરિત્તા ખન્ધા મહગ્ગતસ્સ વુટ્ઠાનસ્સ અનન્તરપચ્ચયેન પચ્ચયો. પઠમસ્સ ઝાનસ્સ પરિકમ્મં…પે… નેવસઞ્ઞાનાસઞ્ઞાયતનસ્સ પરિકમ્મં…પે… દિબ્બસ્સ ચક્ખુસ્સ પરિકમ્મં…પે… અનાગતંસઞાણસ્સ પરિકમ્મં અનાગતંસઞાણસ્સ અનન્તરપચ્ચયેન પચ્ચયો. (૨)

પરિત્તો ધમ્મો અપ્પમાણસ્સ ધમ્મસ્સ અનન્તરપચ્ચયેન પચ્ચયો – ગોત્રભુ મગ્ગસ્સ… વોદાનં મગ્ગસ્સ… અનુલોમં ફલસમાપત્તિયા અનન્તરપચ્ચયેન પચ્ચયો. (૩)

૬૨. મહગ્ગતો ધમ્મો મહગ્ગતસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા મહગ્ગતા ખન્ધા પચ્છિમાનં પચ્છિમાનં મહગ્ગતાનં ખન્ધાનં અનન્તરપચ્ચયેન પચ્ચયો. (૧)

મહગ્ગતો ધમ્મો પરિત્તસ્સ ધમ્મસ્સ અનન્તરપચ્ચયેન પચ્ચયો – મહગ્ગતં ચુતિચિત્તં પરિત્તસ્સ ઉપપત્તિચિત્તસ્સ અનન્તરપચ્ચયેન પચ્ચયો. મહગ્ગતં ભવઙ્ગં આવજ્જનાય અનન્તરપચ્ચયેન પચ્ચયો. મહગ્ગતા ખન્ધા પરિત્તસ્સ વુટ્ઠાનસ્સ અનન્તરપચ્ચયેન પચ્ચયો. (૨)

મહગ્ગતો ધમ્મો અપ્પમાણસ્સ ધમ્મસ્સ અનન્તરપચ્ચયેન પચ્ચયો – નેવસઞ્ઞાનાસઞ્ઞાયતનં નિરોધા વુટ્ઠહન્તસ્સ ફલસમાપત્તિયા અનન્તરપચ્ચયેન પચ્ચયો. (૩)

૬૩. અપ્પમાણો ધમ્મો અપ્પમાણસ્સ ધમ્મસ્સ અનન્તરપચ્ચયેન પચ્ચયો – પુરિમા પુરિમા અપ્પમાણા ખન્ધા પચ્છિમાનં પચ્છિમાનં અપ્પમાણાનં ખન્ધાનં અનન્તરપચ્ચયેન પચ્ચયો. મગ્ગો ફલસ્સ… ફલં ફલસ્સ અનન્તરપચ્ચયેન પચ્ચયો. (૧)

અપ્પમાણો ધમ્મો પરિત્તસ્સ ધમ્મસ્સ અનન્તરપચ્ચયેન પચ્ચયો – ફલં પરિત્તસ્સ વુટ્ઠાનસ્સ અનન્તરપચ્ચયેન પચ્ચયો. (૨)

અપ્પમાણો ધમ્મો મહગ્ગતસ્સ ધમ્મસ્સ અનન્તરપચ્ચયેન પચ્ચયો – ફલં મહગ્ગતસ્સ વુટ્ઠાનસ્સ અનન્તરપચ્ચયેન પચ્ચયો. (૩)

(સમનન્તરપચ્ચયં અનન્તરપચ્ચયસદિસં.)

સહજાતપચ્ચયો

૬૪. પરિત્તો ધમ્મો પરિત્તસ્સ ધમ્મસ્સ સહજાતપચ્ચયેન પચ્ચયો – પરિત્તો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં સહજાતપચ્ચયેન પચ્ચયો…પે… દ્વે ખન્ધા…પે… પટિસન્ધિક્ખણે…પે… ખન્ધા વત્થુસ્સ, વત્થુ ખન્ધાનં સહજાતપચ્ચયેન પચ્ચયો; એકં મહાભૂતં…પે… અસઞ્ઞસત્તાનં…પે…. (૧)

પરિત્તો ધમ્મો મહગ્ગતસ્સ ધમ્મસ્સ સહજાતપચ્ચયેન પચ્ચયો – પટિસન્ધિક્ખણે વત્થુ મહગ્ગતાનં ખન્ધાનં સહજાતપચ્ચયેન પચ્ચયો. (૨)

૬૫. મહગ્ગતો ધમ્મો મહગ્ગતસ્સ ધમ્મસ્સ સહજાતપચ્ચયેન પચ્ચયો – મહગ્ગતો એકો ખન્ધો તિણ્ણન્નં ખન્ધાનં…પે… દ્વે ખન્ધા…પે… પટિસન્ધિક્ખણે…પે…. (૧)

મહગ્ગતો ધમ્મો પરિત્તસ્સ ધમ્મસ્સ સહજાતપચ્ચયેન પચ્ચયો – મહગ્ગતા ખન્ધા ચિત્તસમુટ્ઠાનાનં રૂપાનં સહજાતપચ્ચયેન પચ્ચયો. પટિસન્ધિક્ખણે મહગ્ગતા ખન્ધા કટત્તારૂપાનં સહજાતપચ્ચયેન પચ્ચયો. (૨)

મહગ્ગતો ધમ્મો પરિત્તસ્સ ચ મહગ્ગતસ્સ ચ ધમ્મસ્સ સહજાતપચ્ચયેન પચ્ચયો – મહગ્ગતો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં સહજાતપચ્ચયેન પચ્ચયો…પે… દ્વે ખન્ધા…પે… પટિસન્ધિક્ખણે…પે…. (૩)

૬૬. અપ્પમાણો ધમ્મો અપ્પમાણસ્સ ધમ્મસ્સ સહજાતપચ્ચયેન પચ્ચયો – અપ્પમાણો એકો ખન્ધો તિણ્ણન્નં ખન્ધાનં સહજાતપચ્ચયેન પચ્ચયો…પે…. (૧)

અપ્પમાણો ધમ્મો પરિત્તસ્સ ધમ્મસ્સ સહજાતપચ્ચયેન પચ્ચયો – અપ્પમાણા ખન્ધા ચિત્તસમુટ્ઠાનાનં રૂપાનં સહજાતપચ્ચયેન પચ્ચયો. (૨)

અપ્પમાણો ધમ્મો પરિત્તસ્સ ચ અપ્પમાણસ્સ ચ ધમ્મસ્સ સહજાતપચ્ચયેન પચ્ચયો – અપ્પમાણો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં સહજાતપચ્ચયેન પચ્ચયો…પે…. (૩)

૬૭. પરિત્તો ચ અપ્પમાણો ચ ધમ્મા પરિત્તસ્સ ધમ્મસ્સ સહજાતપચ્ચયેન પચ્ચયો – અપ્પમાણા ખન્ધા ચ મહાભૂતા ચ ચિત્તસમુટ્ઠાનાનં રૂપાનં સહજાતપચ્ચયેન પચ્ચયો. (૧)

પરિત્તો ચ મહગ્ગતો ચ ધમ્મા પરિત્તસ્સ ધમ્મસ્સ સહજાતપચ્ચયેન પચ્ચયો – મહગ્ગતા ખન્ધા ચ મહાભૂતા ચ ચિત્તસમુટ્ઠાનાનં રૂપાનં સહજાતપચ્ચયેન પચ્ચયો. પટિસન્ધિક્ખણે મહગ્ગતા ખન્ધા ચ મહાભૂતા ચ કટત્તારૂપાનં સહજાતપચ્ચયેન પચ્ચયો. (૧)

પરિત્તો ચ મહગ્ગતો ચ ધમ્મા મહગ્ગતસ્સ ધમ્મસ્સ સહજાતપચ્ચયેન પચ્ચયો – પટિસન્ધિક્ખણે મહગ્ગતો એકો ખન્ધો ચ વત્થુ ચ તિણ્ણન્નં ખન્ધાનં સહજાતપચ્ચયેન પચ્ચયો…પે…. (૨)

અઞ્ઞમઞ્ઞપચ્ચયો

૬૮. પરિત્તો ધમ્મો પરિત્તસ્સ ધમ્મસ્સ અઞ્ઞમઞ્ઞપચ્ચયેન પચ્ચયો – પરિત્તો એકો ખન્ધો તિણ્ણન્નં ખન્ધાનં અઞ્ઞમઞ્ઞપચ્ચયેન પચ્ચયો…પે… પટિસન્ધિક્ખણે…પે… ખન્ધા વત્થુસ્સ…પે… વત્થુ ખન્ધાનં અઞ્ઞમઞ્ઞપચ્ચયેન પચ્ચયો; એકં મહાભૂતં…પે… અસઞ્ઞસત્તાનં…પે…. (૧)

પરિત્તો ધમ્મો મહગ્ગતસ્સ ધમ્મસ્સ અઞ્ઞમઞ્ઞપચ્ચયેન પચ્ચયો…પે… પટિસન્ધિક્ખણે વત્થુ મહગ્ગતાનં ખન્ધાનં અઞ્ઞમઞ્ઞપચ્ચયેન પચ્ચયો…પે…. (૨)

મહગ્ગતો ધમ્મો મહગ્ગતસ્સ ધમ્મસ્સ અઞ્ઞમઞ્ઞપચ્ચયેન પચ્ચયો – મહગ્ગતો એકો ખન્ધો તિણ્ણન્નં ખન્ધાનં અઞ્ઞમઞ્ઞપચ્ચયેન પચ્ચયો…પે… પટિસન્ધિક્ખણે…પે…. (૧)

મહગ્ગતો ધમ્મો પરિત્તસ્સ ધમ્મસ્સ અઞ્ઞમઞ્ઞપચ્ચયેન પચ્ચયો – પટિસન્ધિક્ખણે મહગ્ગતા ખન્ધા વત્થુસ્સ અઞ્ઞમઞ્ઞપચ્ચયેન પચ્ચયો. (૨)

મહગ્ગતો ધમ્મો પરિત્તસ્સ ચ મહગ્ગતસ્સ ચ ધમ્મસ્સ અઞ્ઞમઞ્ઞપચ્ચયેન પચ્ચયો – પટિસન્ધિક્ખણે મહગ્ગતો એકો ખન્ધો તિણ્ણન્નં ખન્ધાનં વત્થુસ્સ ચ અઞ્ઞમઞ્ઞપચ્ચયેન પચ્ચયો…પે…. (૩)

અપ્પમાણો ધમ્મો અપ્પમાણસ્સ ધમ્મસ્સ અઞ્ઞમઞ્ઞપચ્ચયેન પચ્ચયો – અપ્પમાણો એકો ખન્ધો તિણ્ણન્નં ખન્ધાનં અઞ્ઞમઞ્ઞપચ્ચયેન પચ્ચયો…પે… દ્વે ખન્ધા…પે…. (૧)

પરિત્તો ચ મહગ્ગતો ચ ધમ્મા મહગ્ગતસ્સ ધમ્મસ્સ અઞ્ઞમઞ્ઞપચ્ચયેન પચ્ચયો – પટિસન્ધિક્ખણે મહગ્ગતો એકો ખન્ધો ચ વત્થુ ચ તિણ્ણન્નં ખન્ધાનં અઞ્ઞમઞ્ઞપચ્ચયેન પચ્ચયો…પે…. (૧)

નિસ્સયપચ્ચયો

૬૯. પરિત્તો ધમ્મો પરિત્તસ્સ ધમ્મસ્સ નિસ્સયપચ્ચયેન પચ્ચયો – પરિત્તો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં નિસ્સયપચ્ચયેન પચ્ચયો…પે… દ્વે ખન્ધા…પે… પટિસન્ધિક્ખણે…પે… ખન્ધા વત્થુસ્સ…પે… વત્થુ ખન્ધાનં નિસ્સયપચ્ચયેન પચ્ચયો…પે… એકં મહાભૂતં…પે… અસઞ્ઞસત્તાનં એકં મહાભૂતં…પે… ચક્ખાયતનં ચક્ખુવિઞ્ઞાણસ્સ…પે… કાયાયતનં કાયવિઞ્ઞાણસ્સ… વત્થુ પરિત્તાનં ખન્ધાનં નિસ્સયપચ્ચયેન પચ્ચયો. (૧)

પરિત્તો ધમ્મો મહગ્ગતસ્સ ધમ્મસ્સ નિસ્સયપચ્ચયેન પચ્ચયો – વત્થુ મહગ્ગતાનં ખન્ધાનં નિસ્સયપચ્ચયેન પચ્ચયો. પટિસન્ધિક્ખણે વત્થુ મહગ્ગતાનં ખન્ધાનં નિસ્સયપચ્ચયેન પચ્ચયો. (૨)

પરિત્તો ધમ્મો અપ્પમાણસ્સ ધમ્મસ્સ નિસ્સયપચ્ચયેન પચ્ચયો – વત્થુ અપ્પમાણાનં ખન્ધાનં નિસ્સયપચ્ચયેન પચ્ચયો. (૩)

૭૦. મહગ્ગતો ધમ્મો મહગ્ગતસ્સ ધમ્મસ્સ નિસ્સયપચ્ચયેન પચ્ચયો – મહગ્ગતો એકો ખન્ધો તિણ્ણન્નં ખન્ધાનં…પે… દ્વે ખન્ધા…પે… પટિસન્ધિક્ખણે…પે…. (૧)

મહગ્ગતો ધમ્મો પરિત્તસ્સ ધમ્મસ્સ નિસ્સયપચ્ચયેન પચ્ચયો – મહગ્ગતા ખન્ધા ચિત્તસમુટ્ઠાનાનં રૂપાનં નિસ્સયપચ્ચયેન પચ્ચયો. પટિસન્ધિક્ખણે મહગ્ગતા ખન્ધા કટત્તારૂપાનં નિસ્સયપચ્ચયેન પચ્ચયો. (૨)

મહગ્ગતો ધમ્મો પરિત્તસ્સ ચ મહગ્ગતસ્સ ચ ધમ્મસ્સ નિસ્સયપચ્ચયેન પચ્ચયો – મહગ્ગતો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં નિસ્સયપચ્ચયેન પચ્ચયો…પે… દ્વે ખન્ધા…પે… પટિસન્ધિક્ખણે…પે…. (૩)

૭૧. અપ્પમાણો ધમ્મો અપ્પમાણસ્સ ધમ્મસ્સ નિસ્સયપચ્ચયેન પચ્ચયો – અપ્પમાણો એકો ખન્ધો તિણ્ણન્નં ખન્ધાનં નિસ્સયપચ્ચયેન પચ્ચયો…પે…. (૧)

અપ્પમાણો ધમ્મો પરિત્તસ્સ ધમ્મસ્સ નિસ્સયપચ્ચયેન પચ્ચયો – અપ્પમાણા ખન્ધા ચિત્તસમુટ્ઠાનાનં રૂપાનં નિસ્સયપચ્ચયેન પચ્ચયો. (૨)

અપ્પમાણો ધમ્મો પરિત્તસ્સ ચ અપ્પમાણસ્સ ચ ધમ્મસ્સ નિસ્સયપચ્ચયેન પચ્ચયો – અપ્પમાણો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં નિસ્સયપચ્ચયેન પચ્ચયો…પે…. (૩)

પરિત્તો ચ અપ્પમાણો ચ ધમ્મા પરિત્તસ્સ ધમ્મસ્સ નિસ્સયપચ્ચયેન પચ્ચયો – અપ્પમાણા ખન્ધા ચ મહાભૂતા ચ ચિત્તસમુટ્ઠાનાનં રૂપાનં નિસ્સયપચ્ચયેન પચ્ચયો. (૧)

પરિત્તો ચ અપ્પમાણો ચ ધમ્મા અપ્પમાણસ્સ ધમ્મસ્સ નિસ્સયપચ્ચયેન પચ્ચયો – અપ્પમાણો એકો ખન્ધો ચ વત્થુ ચ તિણ્ણન્નં ખન્ધાનં નિસ્સયપચ્ચયેન પચ્ચયો…પે… દ્વે ખન્ધા…પે…. (૨)

પરિત્તો ચ મહગ્ગતો ચ ધમ્મા પરિત્તસ્સ ધમ્મસ્સ નિસ્સયપચ્ચયેન પચ્ચયો – મહગ્ગતા ખન્ધા ચ મહાભૂતા ચ ચિત્તસમુટ્ઠાનાનં રૂપાનં નિસ્સયપચ્ચયેન પચ્ચયો. પટિસન્ધિક્ખણે મહગ્ગતા ખન્ધા ચ મહાભૂતા ચ કટત્તારૂપાનં નિસ્સયપચ્ચયેન પચ્ચયો. (૧)

પરિત્તો ચ મહગ્ગતો ચ ધમ્મા મહગ્ગતસ્સ ધમ્મસ્સ નિસ્સયપચ્ચયેન પચ્ચયો – મહગ્ગતો એકો ખન્ધો ચ વત્થુ ચ તિણ્ણન્નં ખન્ધાનં નિસ્સયપચ્ચયેન પચ્ચયો…પે… પટિસન્ધિક્ખણે મહગ્ગતો એકો ખન્ધો ચ વત્થુ ચ તિણ્ણન્નં ખન્ધાનં નિસ્સયપચ્ચયેન પચ્ચયો…પે… દ્વે ખન્ધા…પે…. (૨)

ઉપનિસ્સયપચ્ચયો

૭૨. પરિત્તો ધમ્મો પરિત્તસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – પરિત્તં સદ્ધં ઉપનિસ્સાય દાનં દેતિ, સીલં સમાદિયતિ, ઉપોસથકમ્મં કરોતિ, વિપસ્સનં ઉપ્પાદેતિ, માનં જપ્પેતિ, દિટ્ઠિં ગણ્હાતિ, પરિત્તં સીલં…પે… પઞ્ઞં… રાગં…પે… પત્થનં… કાયિકં સુખં…પે… સેનાસનં ઉપનિસ્સાય દાનં દેતિ, સીલં…પે… ઉપોસથં…પે… વિપસ્સનં ઉપ્પાદેતિ, પાણં હનતિ…પે… સઙ્ઘં ભિન્દતિ. પરિત્તા સદ્ધા…પે… પઞ્ઞા, રાગો…પે… પત્થના, કાયિકં સુખં…પે… સેનાસનં પરિત્તાય સદ્ધાય…પે… પઞ્ઞાય, રાગસ્સ…પે… પત્થનાય, કાયિકસ્સ સુખસ્સ, કાયિકસ્સ દુક્ખસ્સ ઉપનિસ્સયપચ્ચયેન પચ્ચયો. કુસલાકુસલં કમ્મં વિપાકસ્સ ઉપનિસ્સયપચ્ચયેન પચ્ચયો. પાણાતિપાતો પાણાતિપાતસ્સ ઉપનિસ્સયપચ્ચયેન પચ્ચયો (ચક્કં કાતબ્બં). માતુઘાતિકમ્મં માતુઘાતિકમ્મસ્સ ઉપનિસ્સયપચ્ચયેન પચ્ચયો (ચક્કં કાતબ્બં કુસલત્તિકસદિસં). (૧)

પરિત્તો ધમ્મો મહગ્ગતસ્સ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – પરિત્તં સદ્ધં ઉપનિસ્સાય મહગ્ગતં ઝાનં ઉપ્પાદેતિ, અભિઞ્ઞં ઉપ્પાદેતિ, સમાપત્તિં ઉપ્પાદેતિ. પરિત્તં સીલં…પે… પઞ્ઞં… રાગં…પે… સેનાસનં ઉપનિસ્સાય મહગ્ગતં ઝાનં ઉપ્પાદેતિ, અભિઞ્ઞં ઉપ્પાદેતિ, સમાપત્તિં ઉપ્પાદેતિ. પરિત્તા સદ્ધા…પે… સેનાસનં મહગ્ગતાય સદ્ધાય…પે… પઞ્ઞાય ઉપનિસ્સયપચ્ચયેન પચ્ચયો. પઠમસ્સ ઝાનસ્સ પરિકમ્મં…પે… નેવસઞ્ઞાનાસઞ્ઞાયતનસ્સ પરિકમ્મં નેવસઞ્ઞાનાસઞ્ઞાયતનસ્સ ઉપનિસ્સયપચ્ચયેન પચ્ચયો. દિબ્બસ્સ ચક્ખુસ્સ પરિકમ્મં…પે… અનાગતંસઞાણસ્સ પરિકમ્મં…પે…. (૨)

પરિત્તો ધમ્મો અપ્પમાણસ્સ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો પરિત્તં સદ્ધં ઉપનિસ્સાય અપ્પમાણં ઝાનં ઉપ્પાદેતિ, મગ્ગં ઉપ્પાદેતિ, ફલસમાપત્તિં ઉપ્પાદેતિ. પરિત્તં સીલં…પે… પઞ્ઞં… રાગં…પે… પત્થનં… કાયિકં સુખં…પે… સેનાસનં ઉપનિસ્સાય અપ્પમાણં ઝાનં ઉપ્પાદેતિ, મગ્ગં ઉપ્પાદેતિ, ફલસમાપત્તિં ઉપ્પાદેતિ. પરિત્તા સદ્ધા…પે… સેનાસનં અપ્પમાણાય સદ્ધાય…પે… પઞ્ઞાય, મગ્ગસ્સ ફલસમાપત્તિયા ઉપનિસ્સયપચ્ચયેન પચ્ચયો. પઠમસ્સ મગ્ગસ્સ પરિકમ્મં પઠમસ્સ મગ્ગસ્સ…પે… ચતુત્થસ્સ મગ્ગસ્સ પરિકમ્મં ચતુત્થસ્સ મગ્ગસ્સ ઉપનિસ્સયપચ્ચયેન પચ્ચયો. (૩)

૭૩. મહગ્ગતો ધમ્મો મહગ્ગતસ્સ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – મહગ્ગતં સદ્ધં ઉપનિસ્સાય મહગ્ગતં ઝાનં ઉપ્પાદેતિ, અભિઞ્ઞં ઉપ્પાદેતિ, સમાપત્તિં ઉપ્પાદેતિ. મહગ્ગતં સીલં…પે… પઞ્ઞં ઉપનિસ્સાય મહગ્ગતં ઝાનં ઉપ્પાદેતિ, અભિઞ્ઞં ઉપ્પાદેતિ, સમાપત્તિં ઉપ્પાદેતિ. મહગ્ગતા સદ્ધા…પે… પઞ્ઞા મહગ્ગતાય સદ્ધાય…પે… પઞ્ઞાય ઉપનિસ્સયપચ્ચયેન પચ્ચયો. પઠમં ઝાનં દુતિયસ્સ ઝાનસ્સ…પે… આકિઞ્ચઞ્ઞાયતનં નેવસઞ્ઞાનાસઞ્ઞાયતનસ્સ ઉપનિસ્સયપચ્ચયેન પચ્ચયો. (૧)

મહગ્ગતો ધમ્મો પરિત્તસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – મહગ્ગતં સદ્ધં ઉપનિસ્સાય દાનં દેતિ, સીલં સમાદિયતિ, ઉપોસથકમ્મં કરોતિ, વિપસ્સનં ઉપ્પાદેતિ, માનં જપ્પેતિ, દિટ્ઠિં ગણ્હાતિ, મહગ્ગતં સીલં…પે… પઞ્ઞં ઉપનિસ્સાય દાનં દેતિ…પે… વિપસ્સનં ઉપ્પાદેતિ…પે… મહગ્ગતા સદ્ધા…પે… પઞ્ઞા પરિત્તાય સદ્ધાય…પે… પઞ્ઞાય…પે… કાયિકસ્સ સુખસ્સ, કાયિકસ્સ દુક્ખસ્સ ઉપનિસ્સયપચ્ચયેન પચ્ચયો. (૨)

મહગ્ગતો ધમ્મો અપ્પમાણસ્સ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – મહગ્ગતં સદ્ધં ઉપનિસ્સાય અપ્પમાણં ઝાનં ઉપ્પાદેતિ, મગ્ગં ઉપ્પાદેતિ, ફલસમાપત્તિં ઉપ્પાદેતિ. મહગ્ગતં સીલં…પે… પઞ્ઞં ઉપનિસ્સાય અપ્પમાણં ઝાનં ઉપ્પાદેતિ, મગ્ગં ઉપ્પાદેતિ, ફલસમાપત્તિં ઉપ્પાદેતિ. મહગ્ગતા સદ્ધા…પે… પઞ્ઞા અપ્પમાણાય સદ્ધાય…પે… પઞ્ઞાય મગ્ગસ્સ ફલસમાપત્તિયા ઉપનિસ્સયપચ્ચયેન પચ્ચયો. (૩)

૭૪. અપ્પમાણો ધમ્મો અપ્પમાણસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – અપ્પમાણં સદ્ધં ઉપનિસ્સાય અપ્પમાણં ઝાનં ઉપ્પાદેતિ, મગ્ગં ઉપ્પાદેતિ, ફલસમાપત્તિં ઉપ્પાદેતિ. અપ્પમાણં સીલં…પે… પઞ્ઞં ઉપનિસ્સાય અપ્પમાણં ઝાનં ઉપ્પાદેતિ, મગ્ગં ઉપ્પાદેતિ, ફલસમાપત્તિં ઉપ્પાદેતિ. અપ્પમાણા સદ્ધા…પે… પઞ્ઞા અપ્પમાણાય સદ્ધાય…પે… પઞ્ઞાય ઉપનિસ્સયપચ્ચયેન પચ્ચયો. પઠમો મગ્ગો દુતિયસ્સ મગ્ગસ્સ…પે… તતિયો મગ્ગો ચતુત્થસ્સ મગ્ગસ્સ… મગ્ગો ફલસમાપત્તિયા ઉપનિસ્સયપચ્ચયેન પચ્ચયો. (૧)

અપ્પમાણો ધમ્મો પરિત્તસ્સ ધમ્મસ્સ ઉપનિસ્સયપચ્ચયેન પચ્ચયો – આરમ્મણૂપનિસ્સયો, અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – અપ્પમાણં સદ્ધં ઉપનિસ્સાય દાનં દેતિ, સીલં…પે… ઉપોસથકમ્મં… વિપસ્સનં ઉપ્પાદેતિ. અપ્પમાણં સીલં…પે… પઞ્ઞં ઉપનિસ્સાય દાનં દેતિ, સીલં…પે… ઉપોસથકમ્મં… વિપસ્સનં… અપ્પમાણા સદ્ધા…પે… પઞ્ઞા પરિત્તાય સદ્ધાય…પે… પઞ્ઞાય…પે… કાયિકસ્સ સુખસ્સ, કાયિકસ્સ દુક્ખસ્સ ઉપનિસ્સયપચ્ચયેન પચ્ચયો. ફલસમાપત્તિ કાયિકસ્સ સુખસ્સ ઉપનિસ્સયપચ્ચયેન પચ્ચયો. અરિયા મગ્ગં ઉપનિસ્સાય સઙ્ખારે અનિચ્ચતો…પે… વિપસ્સન્તિ, મગ્ગો અરિયાનં અત્થપ્પટિસમ્ભિદાય…પે… પટિભાનપ્પટિસમ્ભિદાય… ઠાનાઠાનકોસલ્લસ્સ ઉપનિસ્સયપચ્ચયેન પચ્ચયો. (૨)

અપ્પમાણો ધમ્મો મહગ્ગતસ્સ ધમ્મસ્સ ઉપનિસ્સયપચ્ચયેન પચ્ચયો – અનન્તરૂપનિસ્સયો, પકતૂપનિસ્સયો…પે…. પકતૂપનિસ્સયો – અપ્પમાણં સદ્ધં ઉપનિસ્સાય મહગ્ગતં ઝાનં ઉપ્પાદેતિ, અભિઞ્ઞં ઉપ્પાદેતિ, સમાપત્તિં ઉપ્પાદેતિ, અપ્પમાણં સીલં…પે… પઞ્ઞં ઉપનિસ્સાય મહગ્ગતં ઝાનં ઉપ્પાદેતિ, અભિઞ્ઞં ઉપ્પાદેતિ, સમાપત્તિં ઉપ્પાદેતિ. અપ્પમાણા સદ્ધા…પે… પઞ્ઞા મહગ્ગતાય સદ્ધાય…પે… પઞ્ઞાય ઉપનિસ્સયપચ્ચયેન પચ્ચયો, અરિયા મગ્ગં ઉપનિસ્સાય અનુપ્પન્નં સમાપત્તિં ઉપ્પાદેન્તિ, ઉપ્પન્નં સમાપજ્જન્તિ. (૩)

પુરેજાતપચ્ચયો

૭૫. પરિત્તો ધમ્મો પરિત્તસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – ચક્ખું અનિચ્ચતો…પે… વિપસ્સતિ અસ્સાદેતિ અભિનન્દતિ; તં આરબ્ભ રાગો ઉપ્પજ્જતિ…પે… દોમનસ્સં ઉપ્પજ્જતિ. સોતં…પે… વત્થું અનિચ્ચતો…પે… દોમનસ્સં ઉપ્પજ્જતિ. રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ પુરેજાતપચ્ચયેન પચ્ચયો. વત્થુપુરેજાતં – ચક્ખાયતનં ચક્ખુવિઞ્ઞાણસ્સ…પે… કાયાયતનં કાયવિઞ્ઞાણસ્સ… વત્થુ પરિત્તાનં ખન્ધાનં પુરેજાતપચ્ચયેન પચ્ચયો. (૧)

પરિત્તો ધમ્મો મહગ્ગતસ્સ ધમ્મસ્સ પુરેજાતપચ્ચયેન પચ્ચયો – આરમ્મણપુરેજાતં, વત્થુપુરેજાતં. આરમ્મણપુરેજાતં – દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ. વત્થુપુરેજાતં – વત્થુ મહગ્ગતાનં ખન્ધાનં પુરેજાતપચ્ચયેન પચ્ચયો. (૨)

પરિત્તો ધમ્મો અપ્પમાણસ્સ ધમ્મસ્સ પુરેજાતપચ્ચયેન પચ્ચયો. વત્થુપુરેજાતં – વત્થુ અપ્પમાણાનં ખન્ધાનં પુરેજાતપચ્ચયેન પચ્ચયો. (૩)

પચ્છાજાતપચ્ચયો

૭૬. પરિત્તો ધમ્મો પરિત્તસ્સ ધમ્મસ્સ પચ્છાજાતપચ્ચયેન પચ્ચયો – પચ્છાજાતા પરિત્તા ખન્ધા પુરેજાતસ્સ ઇમસ્સ કાયસ્સ પચ્છાજાતપચ્ચયેન પચ્ચયો. (૧)

મહગ્ગતો ધમ્મો પરિત્તસ્સ ધમ્મસ્સ પચ્છાજાતપચ્ચયેન પચ્ચયો – પચ્છાજાતા મહગ્ગતા ખન્ધા પુરેજાતસ્સ ઇમસ્સ કાયસ્સ પચ્છાજાતપચ્ચયેન પચ્ચયો. (૧)

અપ્પમાણો ધમ્મો પરિત્તસ્સ ધમ્મસ્સ પચ્છાજાતપચ્ચયેન પચ્ચયો – પચ્છાજાતા અપ્પમાણા ખન્ધા પુરેજાતસ્સ ઇમસ્સ કાયસ્સ પચ્છાજાતપચ્ચયેન પચ્ચયો. (૧)

આસેવનપચ્ચયો

૭૭. પરિત્તો ધમ્મો પરિત્તસ્સ ધમ્મસ્સ આસેવનપચ્ચયેન પચ્ચયો – પુરિમા પુરિમા પરિત્તા ખન્ધા પચ્છિમાનં પચ્છિમાનં પરિત્તાનં ખન્ધાનં…પે… અનુલોમં ગોત્રભુસ્સ, અનુલોમં વોદાનસ્સ આસેવનપચ્ચયેન પચ્ચયો. (૧)

પરિત્તો ધમ્મો મહગ્ગતસ્સ ધમ્મસ્સ આસેવનપચ્ચયેન પચ્ચયો – પઠમસ્સ ઝાનસ્સ પરિકમ્મં તસ્સેવ [પઠમસ્સ ઝાનસ્સ (?)] આસેવનપચ્ચયેન પચ્ચયો…પે… નેવસઞ્ઞાનાસઞ્ઞાયતનસ્સ પરિકમ્મં તસ્સેવ [નેવસઞ્ઞાનાસઞ્ઞાયતનસ્સ (?) અઞ્ઞેસુ તિકેસુ ઓલોકેતબ્બં] આસેવનપચ્ચયેન પચ્ચયો. દિબ્બસ્સ ચક્ખુસ્સ પરિકમ્મં…પે… અનાગતંસઞાણસ્સ પરિકમ્મં અનાગતંસઞાણસ્સ આસેવનપચ્ચયેન પચ્ચયો. (૨)

પરિત્તો ધમ્મો અપ્પમાણસ્સ ધમ્મસ્સ આસેવનપચ્ચયેન પચ્ચયો – ગોત્રભુ મગ્ગસ્સ… વોદાનં મગ્ગસ્સ આસેવનપચ્ચયેન પચ્ચયો. (૩)

મહગ્ગતો ધમ્મો મહગ્ગતસ્સ ધમ્મસ્સ આસેવનપચ્ચયેન પચ્ચયો – પુરિમા પુરિમા મહગ્ગતા ખન્ધા પચ્છિમાનં પચ્છિમાનં મહગ્ગતાનં ખન્ધાનં…પે… આસેવનપચ્ચયેન પચ્ચયો. (૧)

કમ્મપચ્ચયો

૭૮. પરિત્તો ધમ્મો પરિત્તસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – પરિત્તા ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો. પટિસન્ધિક્ખણે પરિત્તા ચેતના સમ્પયુત્તકાનં ખન્ધાનં કટત્તા ચ રૂપાનં કમ્મપચ્ચયેન પચ્ચયો. નાનાક્ખણિકા – પરિત્તા ચેતના વિપાકાનં પરિત્તાનં ખન્ધાનં કટત્તા ચ રૂપાનં કમ્મપચ્ચયેન પચ્ચયો. (૧)

મહગ્ગતો ધમ્મો મહગ્ગતસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – મહગ્ગતા ચેતના સમ્પયુત્તકાનં ખન્ધાનં કમ્મપચ્ચયેન પચ્ચયો. પટિસન્ધિક્ખણે મહગ્ગતા ચેતના સમ્પયુત્તકાનં ખન્ધાનં કમ્મપચ્ચયેન પચ્ચયો. નાનાક્ખણિકા – મહગ્ગતા ચેતના વિપાકાનં મહગ્ગતાનં ખન્ધાનં કમ્મપચ્ચયેન પચ્ચયો. (૧)

મહગ્ગતો ધમ્મો પરિત્તસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – મહગ્ગતા ચેતના ચિત્તસમુટ્ઠાનાનં રૂપાનં કમ્મપચ્ચયેન પચ્ચયો. પટિસન્ધિક્ખણે મહગ્ગતા ચેતના કટત્તારૂપાનં કમ્મપચ્ચયેન પચ્ચયો. નાનાક્ખણિકા – મહગ્ગતા ચેતના કટત્તારૂપાનં કમ્મપચ્ચયેન પચ્ચયો. (૨)

મહગ્ગતો ધમ્મો પરિત્તસ્સ ચ મહગ્ગતસ્સ ચ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – મહગ્ગતા ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો. પટિસન્ધિક્ખણે મહગ્ગતા ચેતના સમ્પયુત્તકાનં ખન્ધાનં કટત્તા ચ રૂપાનં કમ્મપચ્ચયેન પચ્ચયો. નાનાક્ખણિકા – મહગ્ગતા ચેતના વિપાકાનં મહગ્ગતાનં ખન્ધાનં કટત્તા ચ રૂપાનં કમ્મપચ્ચયેન પચ્ચયો. (૩)

૭૯. અપ્પમાણો ધમ્મો અપ્પમાણસ્સ ધમ્મસ્સ કમ્મપચ્ચયેન પચ્ચયો – સહજાતા, નાનાક્ખણિકા. સહજાતા – અપ્પમાણા ચેતના સમ્પયુત્તકાનં ખન્ધાનં કમ્મપચ્ચયેન પચ્ચયો. નાનાક્ખણિકા – અપ્પમાણા ચેતના વિપાકાનં અપ્પમાણાનં ખન્ધાનં કમ્મપચ્ચયેન પચ્ચયો. (૧)

અપ્પમાણો ધમ્મો પરિત્તસ્સ ધમ્મસ્સ કમ્મપચ્ચયેન પચ્ચયો – અપ્પમાણા ચેતના ચિત્તસમુટ્ઠાનાનં રૂપાનં કમ્મપચ્ચયેન પચ્ચયો. (૨)

અપ્પમાણો ધમ્મો પરિત્તસ્સ ચ અપ્પમાણસ્સ ચ ધમ્મસ્સ કમ્મપચ્ચયેન પચ્ચયો – અપ્પમાણા ચેતના સમ્પયુત્તકાનં ખન્ધાનં ચિત્તસમુટ્ઠાનાનઞ્ચ રૂપાનં કમ્મપચ્ચયેન પચ્ચયો. (૩)

વિપાકપચ્ચયો

૮૦. પરિત્તો ધમ્મો પરિત્તસ્સ ધમ્મસ્સ વિપાકપચ્ચયેન પચ્ચયો – વિપાકો પરિત્તો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં વિપાકપચ્ચયેન પચ્ચયો…પે… પટિસન્ધિક્ખણે…પે… ખન્ધા વત્થુસ્સ વિપાકપચ્ચયેન પચ્ચયો. (૧)

મહગ્ગતો ધમ્મો મહગ્ગતસ્સ ધમ્મસ્સ વિપાકપચ્ચયેન પચ્ચયો…પે… (તિસ્સો પઞ્હા, પવત્તિપટિસન્ધિ કાતબ્બા). (૩)

અપ્પમાણો ધમ્મો અપ્પમાણસ્સ ધમ્મસ્સ વિપાકપચ્ચયેન પચ્ચયો… તીણિ (પવત્તિમેવ).

આહારપચ્ચયાદિ

૮૧. પરિત્તો ધમ્મો પરિત્તસ્સ ધમ્મસ્સ આહારપચ્ચયેન પચ્ચયો…પે… ઇન્દ્રિયપચ્ચયેન પચ્ચયો… ઝાનપચ્ચયેન પચ્ચયો… મગ્ગપચ્ચયેન પચ્ચયો… સમ્પયુત્તપચ્ચયેન પચ્ચયો… વિપ્પયુત્તપચ્ચયેન પચ્ચયો – સહજાતં, પુરેજાતં, પચ્છાજાતં. સહજાતા – પરિત્તા ખન્ધા ચિત્તસમુટ્ઠાનાનં રૂપાનં વિપ્પયુત્તપચ્ચયેન પચ્ચયો. પટિસન્ધિક્ખણે પરિત્તા ખન્ધા કટત્તારૂપાનં વિપ્પયુત્તપચ્ચયેન પચ્ચયો. ખન્ધા વત્થુસ્સ…પે… વત્થુ ખન્ધાનં વિપ્પયુત્તપચ્ચયેન પચ્ચયો. પુરેજાતં – ચક્ખાયતનં ચક્ખુવિઞ્ઞાણસ્સ વિપ્પયુત્તપચ્ચયેન પચ્ચયો…પે… કાયાયતનં કાયવિઞ્ઞાણસ્સ વિપ્પયુત્તપચ્ચયેન પચ્ચયો. વત્થુ પરિત્તાનં ખન્ધાનં વિપ્પયુત્તપચ્ચયેન પચ્ચયો. પચ્છાજાતા – પરિત્તા ખન્ધા પુરેજાતસ્સ ઇમસ્સ કાયસ્સ વિપ્પયુત્તપચ્ચયેન પચ્ચયો. (૧)

પરિત્તો ધમ્મો મહગ્ગતસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પુરેજાતં. સહજાતં – પટિસન્ધિક્ખણે વત્થુ મહગ્ગતાનં ખન્ધાનં વિપ્પયુત્તપચ્ચયેન પચ્ચયો. પુરેજાતં – વત્થુ મહગ્ગતાનં ખન્ધાનં વિપ્પયુત્તપચ્ચયેન પચ્ચયો. (૨)

પરિત્તો ધમ્મો અપ્પમાણસ્સ ધમ્મસ્સ વિપ્પયુત્તપચ્ચયેન પચ્ચયો. પુરેજાતં – વત્થુ અપ્પમાણાનં ખન્ધાનં વિપ્પયુત્તપચ્ચયેન પચ્ચયો. (૩)

૮૨. મહગ્ગતો ધમ્મો પરિત્તસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પચ્છાજાતં. સહજાતા – મહગ્ગતા ખન્ધા ચિત્તસમુટ્ઠાનાનં રૂપાનં વિપ્પયુત્તપચ્ચયેન પચ્ચયો. પટિસન્ધિક્ખણે…પે… પચ્છાજાતા – મહગ્ગતા ખન્ધા પુરેજાતસ્સ ઇમસ્સ કાયસ્સ વિપ્પયુત્તપચ્ચયેન પચ્ચયો. (૧)

અપ્પમાણો ધમ્મો પરિત્તસ્સ ધમ્મસ્સ વિપ્પયુત્તપચ્ચયેન પચ્ચયો – સહજાતં, પચ્છાજાતં. સહજાતા – અપ્પમાણા ખન્ધા ચિત્તસમુટ્ઠાનાનં રૂપાનં વિપ્પયુત્તપચ્ચયેન પચ્ચયો. પચ્છાજાતા – અપ્પમાણા ખન્ધા પુરેજાતસ્સ ઇમસ્સ કાયસ્સ વિપ્પયુત્તપચ્ચયેન પચ્ચયો. (૧)

અત્થિપચ્ચયો

૮૩. પરિત્તો ધમ્મો પરિત્તસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં, પચ્છાજાતં, આહારં, ઇન્દ્રિયં. સહજાતો – પરિત્તો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં અત્થિપચ્ચયેન પચ્ચયો…પે… દ્વે ખન્ધા…પે… પટિસન્ધિક્ખણે…પે… ખન્ધા વત્થુસ્સ અત્થિપચ્ચયેન પચ્ચયો. વત્થુ ખન્ધાનં અત્થિપચ્ચયેન પચ્ચયો; એકં મહાભૂતં…પે… અસઞ્ઞસત્તાનં…પે…. પુરેજાતં – ચક્ખું…પે… વત્થું અનિચ્ચતો…પે… વિપસ્સતિ અસ્સાદેતિ અભિનન્દતિ, તં આરબ્ભ રાગો ઉપ્પજ્જતિ…પે… દોમનસ્સં ઉપ્પજ્જતિ, રૂપાયતનં ચક્ખુવિઞ્ઞાણસ્સ…પે… ફોટ્ઠબ્બાયતનં કાયવિઞ્ઞાણસ્સ અત્થિપચ્ચયેન પચ્ચયો. ચક્ખાયતનં ચક્ખુવિઞ્ઞાણસ્સ અત્થિપચ્ચયેન પચ્ચયો…પે… કાયાયતનં કાયવિઞ્ઞાણસ્સ…પે… વત્થુ પરિત્તાનં ખન્ધાનં અત્થિપચ્ચયેન પચ્ચયો. પચ્છાજાતા – પરિત્તા ખન્ધા પુરેજાતસ્સ ઇમસ્સ કાયસ્સ અત્થિપચ્ચયેન પચ્ચયો. કબળીકારો આહારો ઇમસ્સ કાયસ્સ અત્થિપચ્ચયેન પચ્ચયો. રૂપજીવિતિન્દ્રિયં કટત્તારૂપાનં અત્થિપચ્ચયેન પચ્ચયો. (૧)

પરિત્તો ધમ્મો મહગ્ગતસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતં – પટિસન્ધિક્ખણે વત્થુ મહગ્ગતાનં ખન્ધાનં અત્થિપચ્ચયેન પચ્ચયો. પુરેજાતં – દિબ્બેન ચક્ખુના રૂપં પસ્સતિ, દિબ્બાય સોતધાતુયા સદ્દં સુણાતિ, વત્થુ મહગ્ગતાનં ખન્ધાનં અત્થિપચ્ચયેન પચ્ચયો. (૨)

પરિત્તો ધમ્મો અપ્પમાણસ્સ ધમ્મસ્સ અત્થિપચ્ચયેન પચ્ચયો. પુરેજાતં – વત્થુ અપ્પમાણાનં ખન્ધાનં અત્થિપચ્ચયેન પચ્ચયો. (૩)

૮૪. મહગ્ગતો ધમ્મો મહગ્ગતસ્સ ધમ્મસ્સ અત્થિપચ્ચયેન પચ્ચયો. મહગ્ગતો એકો ખન્ધો તિણ્ણન્નં ખન્ધાનં…પે… દ્વે ખન્ધા…પે… પટિસન્ધિક્ખણે…પે…. (૧)

મહગ્ગતો ધમ્મો પરિત્તસ્સ ધમ્મસ્સ અત્થિપચ્ચયેન પચ્ચયો – સહજાતં, પચ્છાજાતં. સહજાતા – મહગ્ગતા ખન્ધા ચિત્તસમુટ્ઠાનાનં રૂપાનં અત્થિપચ્ચયેન પચ્ચયો. પટિસન્ધિક્ખણે મહગ્ગતા ખન્ધા કટત્તારૂપાનં અત્થિપચ્ચયેન પચ્ચયો. પચ્છાજાતા – મહગ્ગતા ખન્ધા પુરેજાતસ્સ ઇમસ્સ કાયસ્સ અત્થિપચ્ચયેન પચ્ચયો. (૨)

મહગ્ગતો ધમ્મો પરિત્તસ્સ ચ મહગ્ગતસ્સ ચ ધમ્મસ્સ અત્થિપચ્ચયેન પચ્ચયો – મહગ્ગતો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં અત્થિપચ્ચયેન પચ્ચયો…પે… દ્વે ખન્ધા…પે… પટિસન્ધિક્ખણે…પે…. (૩)

૮૫. અપ્પમાણો ધમ્મો અપ્પમાણસ્સ ધમ્મસ્સ અત્થિપચ્ચયેન પચ્ચયો – અપ્પમાણો એકો ખન્ધો તિણ્ણન્નં ખન્ધાનં…પે…. (૧)

અપ્પમાણો ધમ્મો પરિત્તસ્સ ધમ્મસ્સ અત્થિપચ્ચયેન પચ્ચયો – સહજાતં, પચ્છાજાતં. સહજાતા – અપ્પમાણા ખન્ધા ચિત્તસમુટ્ઠાનાનં રૂપાનં અત્થિપચ્ચયેન પચ્ચયો. પચ્છાજાતા – અપ્પમાણા ખન્ધા પુરેજાતસ્સ ઇમસ્સ કાયસ્સ અત્થિપચ્ચયેન પચ્ચયો. (૨)

અપ્પમાણો ધમ્મો પરિત્તસ્સ ચ અપ્પમાણસ્સ ચ ધમ્મસ્સ અત્થિપચ્ચયેન પચ્ચયો – અપ્પમાણો એકો ખન્ધો તિણ્ણન્નં ખન્ધાનં ચિત્તસમુટ્ઠાનાનઞ્ચ રૂપાનં અત્થિપચ્ચયેન પચ્ચયો…પે…. (૩)

૮૬. પરિત્તો ચ અપ્પમાણો ચ ધમ્મા પરિત્તસ્સ ધમ્મસ્સ અત્થિપચ્ચયેન પચ્ચયો – સહજાતં, પચ્છાજાતં, આહારં, ઇન્દ્રિયં. સહજાતા – અપ્પમાણા ખન્ધા ચ મહાભૂતા ચ ચિત્તસમુટ્ઠાનાનં રૂપાનં અત્થિપચ્ચયેન પચ્ચયો. પચ્છાજાતા – અપ્પમાણા ખન્ધા ચ કબળીકારો આહારો ચ ઇમસ્સ કાયસ્સ અત્થિપચ્ચયેન પચ્ચયો. પચ્છાજાતા – અપ્પમાણા ખન્ધા ચ રૂપજીવિતિન્દ્રિયઞ્ચ કટત્તારૂપાનં અત્થિપચ્ચયેન પચ્ચયો. (૧)

પરિત્તો ચ અપ્પમાણો ચ ધમ્મા અપ્પમાણસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતો – અપ્પમાણો એકો ખન્ધો ચ વત્થુ ચ તિણ્ણન્નં ખન્ધાનં અત્થિપચ્ચયેન પચ્ચયો…પે… દ્વે ખન્ધા…પે…. (૨)

પરિત્તો ચ મહગ્ગતો ચ ધમ્મા પરિત્તસ્સ ધમ્મસ્સ અત્થિપચ્ચયેન પચ્ચયો – સહજાતં, પચ્છાજાતં, આહારં, ઇન્દ્રિયં. સહજાતા – મહગ્ગતા ખન્ધા ચ મહાભૂતા ચ ચિત્તસમુટ્ઠાનાનં રૂપાનં અત્થિપચ્ચયેન પચ્ચયો. પટિસન્ધિક્ખણે મહગ્ગતા ખન્ધા ચ મહાભૂતા ચ કટત્તારૂપાનં અત્થિપચ્ચયેન પચ્ચયો. પચ્છાજાતા – મહગ્ગતા ખન્ધા ચ કબળીકારો આહારો ચ ઇમસ્સ કાયસ્સ અત્થિપચ્ચયેન પચ્ચયો. પચ્છાજાતા – મહગ્ગતા ખન્ધા ચ રૂપજીવિતિન્દ્રિયઞ્ચ કટત્તારૂપાનં અત્થિપચ્ચયેન પચ્ચયો. (૧)

પરિત્તો ચ મહગ્ગતો ચ ધમ્મા મહગ્ગતસ્સ ધમ્મસ્સ અત્થિપચ્ચયેન પચ્ચયો – સહજાતં, પુરેજાતં. સહજાતો – મહગ્ગતો એકો ખન્ધો ચ વત્થુ ચ તિણ્ણન્નં ખન્ધાનં અત્થિપચ્ચયેન પચ્ચયો…પે… દ્વે ખન્ધા…પે… પટિસન્ધિક્ખણે મહગ્ગતો એકો ખન્ધો ચ વત્થુ ચ તિણ્ણન્નં ખન્ધાનં અત્થિપચ્ચયેન પચ્ચયો…પે… દ્વે ખન્ધા ચ વત્થુ ચ…પે… નત્થિપચ્ચયેન પચ્ચયો… વિગતપચ્ચયેન પચ્ચયો… અવિગતપચ્ચયેન પચ્ચયો. (૨)