૩. વિપાકત્તિકં

૧. પટિચ્ચવારો

૧. પચ્ચયાનુલોમં

૧. વિભઙ્ગવારો

હેતુપચ્ચયો

૧. વિપાકં ધમ્મં પટિચ્ચ વિપાકો ધમ્મો ઉપ્પજ્જતિ હેતુપચ્ચયા – વિપાકં એકં ખન્ધં પટિચ્ચ તયો ખન્ધા…પે… દ્વે ખન્ધે પટિચ્ચ દ્વે ખન્ધા; પટિસન્ધિક્ખણે વિપાકં એકં ખન્ધં પટિચ્ચ તયો ખન્ધા…પે… દ્વે ખન્ધે પટિચ્ચ દ્વે ખન્ધા. (૧)

વિપાકં ધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ હેતુપચ્ચયા – વિપાકે ખન્ધે પટિચ્ચ ચિત્તસમુટ્ઠાનં રૂપં; પટિસન્ધિક્ખણે વિપાકે ખન્ધે પટિચ્ચ કટત્તારૂપં, ખન્ધે પટિચ્ચ વત્થુ. (૨)

વિપાકં ધમ્મં પટિચ્ચ વિપાકો ચ નેવવિપાકનવિપાકધમ્મધમ્મો ચ ધમ્મા ઉપ્પજ્જન્તિ હેતુપચ્ચયા – વિપાકં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે પટિચ્ચ દ્વે ખન્ધા ચિત્તસમુટ્ઠાનઞ્ચ રૂપં; પટિસન્ધિક્ખણે વિપાકં એકં ખન્ધં પટિચ્ચ તયો ખન્ધા કટત્તા ચ રૂપં…પે… દ્વે ખન્ધે પટિચ્ચ દ્વે ખન્ધા કટત્તા ચ રૂપં. (૩)

૨. વિપાકધમ્મધમ્મં પટિચ્ચ વિપાકધમ્મધમ્મો ઉપ્પજ્જતિ હેતુપચ્ચયા – વિપાકધમ્મધમ્મં એકં ખન્ધં પટિચ્ચ તયો ખન્ધા…પે… દ્વે ખન્ધે પટિચ્ચ દ્વે ખન્ધા. (૧)

વિપાકધમ્મધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ હેતુપચ્ચયા – વિપાકધમ્મધમ્મે ખન્ધે પટિચ્ચ ચિત્તસમુટ્ઠાનં રૂપં. (૨)

વિપાકધમ્મધમ્મં પટિચ્ચ વિપાકધમ્મધમ્મો ચ નેવવિપાકનવિપાકધમ્મધમ્મો ચ ધમ્મા ઉપ્પજ્જન્તિ હેતુપચ્ચયા – વિપાકધમ્મધમ્મં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે પટિચ્ચ દ્વે ખન્ધા ચિત્તસમુટ્ઠાનઞ્ચ રૂપં. (૩)

૩. નેવવિપાકનવિપાકધમ્મધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ હેતુપચ્ચયા – નેવવિપાકનવિપાકધમ્મધમ્મં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે પટિચ્ચ દ્વે ખન્ધા ચિત્તસમુટ્ઠાનઞ્ચ રૂપં, એકં મહાભૂતં પટિચ્ચ તયો મહાભૂતા…પે… દ્વે મહાભૂતે પટિચ્ચ દ્વે મહાભૂતા, મહાભૂતે પટિચ્ચ ચિત્તસમુટ્ઠાનં રૂપં કટત્તારૂપં ઉપાદારૂપં. (૧)

નેવવિપાકનવિપાકધમ્મધમ્મં પટિચ્ચ વિપાકો ધમ્મો ઉપ્પજ્જતિ હેતુપચ્ચયા – પટિસન્ધિક્ખણે વત્થું પટિચ્ચ વિપાકા ખન્ધા. (૨)

નેવવિપાકનવિપાકધમ્મધમ્મં પટિચ્ચ વિપાકો ચ નેવવિપાકનવિપાકધમ્મધમ્મો ચ ધમ્મા ઉપ્પજ્જન્તિ હેતુપચ્ચયા – પટિસન્ધિક્ખણે વત્થું પટિચ્ચ વિપાકા ખન્ધા, મહાભૂતે પટિચ્ચ કટત્તારૂપં. (૩)

૪. વિપાકઞ્ચ નેવવિપાકનવિપાકધમ્મધમ્મઞ્ચ ધમ્મં પટિચ્ચ વિપાકો ધમ્મો ઉપ્પજ્જતિ હેતુપચ્ચયા – પટિસન્ધિક્ખણે વિપાકં એકં ખન્ધઞ્ચ વત્થુઞ્ચ પટિચ્ચ તયો ખન્ધા…પે… દ્વે ખન્ધે ચ વત્થુઞ્ચ પટિચ્ચ દ્વે ખન્ધા. (૧)

વિપાકઞ્ચ નેવવિપાકનવિપાકધમ્મધમ્મઞ્ચ ધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ હેતુપચ્ચયા – વિપાકે ખન્ધે ચ મહાભૂતે ચ પટિચ્ચ ચિત્તસમુટ્ઠાનં રૂપં; પટિસન્ધિક્ખણે વિપાકે ખન્ધે ચ મહાભૂતે ચ પટિચ્ચ કટત્તારૂપં. (૨)

વિપાકઞ્ચ નેવવિપાકનવિપાકધમ્મધમ્મઞ્ચ ધમ્મં પટિચ્ચ વિપાકો ચ નેવવિપાકનવિપાકધમ્મધમ્મો ચ ધમ્મા ઉપ્પજ્જન્તિ હેતુપચ્ચયા – પટિસન્ધિક્ખણે વિપાકં એકં ખન્ધઞ્ચ વત્થુઞ્ચ પટિચ્ચ તયો ખન્ધા…પે… દ્વે ખન્ધે ચ વત્થુઞ્ચ પટિચ્ચ દ્વે ખન્ધા, વિપાકે ખન્ધે ચ મહાભૂતે ચ પટિચ્ચ કટત્તારૂપં. (૩)

૫. વિપાકધમ્મધમ્મઞ્ચ નેવવિપાકનવિપાકધમ્મધમ્મઞ્ચ ધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ હેતુપચ્ચયા – વિપાકધમ્મધમ્મે ખન્ધે ચ મહાભૂતે ચ પટિચ્ચ ચિત્તસમુટ્ઠાનં રૂપં. (૧)

આરમ્મણપચ્ચયો

૬. વિપાકં ધમ્મં પટિચ્ચ વિપાકો ધમ્મો ઉપ્પજ્જતિ આરમ્મણપચ્ચયા – વિપાકં એકં ખન્ધં પટિચ્ચ તયો ખન્ધા…પે… દ્વે ખન્ધે પટિચ્ચ દ્વે ખન્ધા; પટિસન્ધિક્ખણે વિપાકં એકં ખન્ધં પટિચ્ચ તયો ખન્ધા…પે… દ્વે ખન્ધે પટિચ્ચ દ્વે ખન્ધા. (૧)

૭. વિપાકધમ્મધમ્મં પટિચ્ચ વિપાકધમ્મધમ્મો ઉપ્પજ્જતિ આરમ્મણપચ્ચયા – વિપાકધમ્મધમ્મં એકં ખન્ધં પટિચ્ચ તયો ખન્ધા…પે… દ્વે ખન્ધે પટિચ્ચ દ્વે ખન્ધા. (૧)

૮. નેવવિપાકનવિપાકધમ્મધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ આરમ્મણપચ્ચયા – નેવવિપાકનવિપાકધમ્મધમ્મં એકં ખન્ધં પટિચ્ચ તયો ખન્ધા…પે… દ્વે ખન્ધે પટિચ્ચ દ્વે ખન્ધા. (૧)

નેવવિપાકનવિપાકધમ્મધમ્મં પટિચ્ચ વિપાકો ધમ્મો ઉપ્પજ્જતિ આરમ્મણપચ્ચયા – પટિસન્ધિક્ખણે વત્થું પટિચ્ચ વિપાકા ખન્ધા. (૨)

૯. વિપાકઞ્ચ નેવવિપાકનવિપાકધમ્મધમ્મઞ્ચ ધમ્મં પટિચ્ચ વિપાકો ધમ્મો ઉપ્પજ્જતિ આરમ્મણપચ્ચયા – પટિસન્ધિક્ખણે વિપાકં એકં ખન્ધઞ્ચ વત્થુઞ્ચ પટિચ્ચ તયો ખન્ધા…પે… દ્વે ખન્ધે ચ વત્થુઞ્ચ પટિચ્ચ દ્વે ખન્ધા. (૧)

અધિપતિપચ્ચયો

૧૦. વિપાકં ધમ્મં પટિચ્ચ વિપાકો ધમ્મો ઉપ્પજ્જતિ અધિપતિપચ્ચયા – વિપાકં એકં ખન્ધં પટિચ્ચ તયો ખન્ધા…પે… દ્વે ખન્ધે પટિચ્ચ દ્વે ખન્ધા. (૧)

વિપાકં ધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ અધિપતિપચ્ચયા – વિપાકે ખન્ધે પટિચ્ચ ચિત્તસમુટ્ઠાનં રૂપં. (૨)

વિપાકં ધમ્મં પટિચ્ચ વિપાકો ચ નેવવિપાકનવિપાકધમ્મધમ્મો ચ ધમ્મા ઉપ્પજ્જન્તિ અધિપતિપચ્ચયા – વિપાકં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે પટિચ્ચ દ્વે ખન્ધા ચિત્તસમુટ્ઠાનઞ્ચ રૂપં. (૩)

વિપાકધમ્મધમ્મં પટિચ્ચ તીણિ.

૧૧. નેવવિપાકનવિપાકધમ્મધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ અધિપતિપચ્ચયા – નેવવિપાકનવિપાકધમ્મધમ્મં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે પટિચ્ચ દ્વે ખન્ધા ચિત્તસમુટ્ઠાનઞ્ચ રૂપં, એકં મહાભૂતં પટિચ્ચ તયો મહાભૂતા…પે… મહાભૂતે પટિચ્ચ ચિત્તસમુટ્ઠાનં રૂપં ઉપાદારૂપં. (૧)

૧૨. વિપાકઞ્ચ નેવવિપાકનવિપાકધમ્મધમ્મઞ્ચ ધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ અધિપતિપચ્ચયા – વિપાકે ખન્ધે ચ મહાભૂતે ચ પટિચ્ચ ચિત્તસમુટ્ઠાનં રૂપં. (૧)

વિપાકધમ્મધમ્મઞ્ચ નેવવિપાકનવિપાકધમ્મધમ્મઞ્ચ ધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ અધિપતિપચ્ચયા – વિપાકધમ્મધમ્મે ખન્ધે ચ મહાભૂતે ચ પટિચ્ચ ચિત્તસમુટ્ઠાનં રૂપં. (૧)

અનન્તરપચ્ચયાદિ

૧૩. વિપાકં ધમ્મં પટિચ્ચ વિપાકો ધમ્મો ઉપ્પજ્જતિ અનન્તરપચ્ચયા… સમનન્તરપચ્ચયા… (આરમ્મણપચ્ચયસદિસં) સહજાતપચ્ચયા… (સહજાતં સબ્બં હેતુપચ્ચયસદિસં).

નેવવિપાકનવિપાકધમ્મધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ સહજાતપચ્ચયા…પે… બાહિરં… આહારસમુટ્ઠાનં… ઉતુસમુટ્ઠાનં… અસઞ્ઞસત્તાનં (સહજાતે ઇદં નાનાકરણં).

અઞ્ઞમઞ્ઞપચ્ચયો

૧૪. વિપાકં ધમ્મં પટિચ્ચ વિપાકો ધમ્મો ઉપ્પજ્જતિ અઞ્ઞમઞ્ઞપચ્ચયા – વિપાકં એકં ખન્ધં પટિચ્ચ તયો ખન્ધા…પે… દ્વે ખન્ધે પટિચ્ચ દ્વે ખન્ધા; પટિસન્ધિક્ખણે વિપાકં એકં ખન્ધં પટિચ્ચ તયો ખન્ધા…પે… દ્વે ખન્ધે પટિચ્ચ દ્વે ખન્ધા. (૧)

વિપાકં ધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ અઞ્ઞમઞ્ઞપચ્ચયા – પટિસન્ધિક્ખણે વિપાકે ખન્ધે પટિચ્ચ વત્થુ. (૨)

વિપાકં ધમ્મં પટિચ્ચ વિપાકો ચ નેવવિપાકનવિપાકધમ્મધમ્મો ચ ધમ્મા ઉપ્પજ્જન્તિ અઞ્ઞમઞ્ઞપચ્ચયા – પટિસન્ધિક્ખણે વિપાકં એકં ખન્ધં પટિચ્ચ તયો ખન્ધા વત્થુ ચ…પે… દ્વે ખન્ધે પટિચ્ચ દ્વે ખન્ધા વત્થુ ચ. (૩)

વિપાકધમ્મધમ્મં પટિચ્ચ વિપાકધમ્મધમ્મો ઉપ્પજ્જતિ અઞ્ઞમઞ્ઞપચ્ચયા – વિપાકધમ્મધમ્મં એકં ખન્ધં પટિચ્ચ તયો ખન્ધા…પે… દ્વે ખન્ધે પટિચ્ચ દ્વે ખન્ધા. (૧)

૧૫. નેવવિપાકનવિપાકધમ્મધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ અઞ્ઞમઞ્ઞપચ્ચયા – નેવવિપાકનવિપાકધમ્મધમ્મં એકં ખન્ધં પટિચ્ચ તયો ખન્ધા…પે… એકં મહાભૂતં…પે… બાહિરં… આહારસમુટ્ઠાનં… ઉતુસમુટ્ઠાનં… અસઞ્ઞસત્તાનં એકં મહાભૂતં…પે…. (૧)

નેવવિપાકનવિપાકધમ્મધમ્મં પટિચ્ચ વિપાકો ધમ્મો ઉપ્પજ્જતિ અઞ્ઞમઞ્ઞપચ્ચયા – પટિસન્ધિક્ખણે વત્થું પટિચ્ચ વિપાકા ખન્ધા. (૨)

વિપાકઞ્ચ નેવવિપાકનવિપાકધમ્મધમ્મઞ્ચ ધમ્મં પટિચ્ચ વિપાકો ધમ્મો ઉપ્પજ્જતિ અઞ્ઞમઞ્ઞપચ્ચયા – પટિસન્ધિક્ખણે વિપાકં એકં ખન્ધઞ્ચ વત્થુઞ્ચ પટિચ્ચ તયો ખન્ધા…પે… દ્વે ખન્ધે ચ વત્થુઞ્ચ પટિચ્ચ દ્વે ખન્ધા. (૧)

નિસ્સયપચ્ચયાદિ

૧૬. વિપાકં ધમ્મં પટિચ્ચ વિપાકો ધમ્મો ઉપ્પજ્જતિ નિસ્સયપચ્ચયા (સંખિત્તં)… ઉપનિસ્સયપચ્ચયા… પુરેજાતપચ્ચયા.

આસેવનપચ્ચયો

૧૭. વિપાકધમ્મધમ્મં પટિચ્ચ વિપાકધમ્મધમ્મો ઉપ્પજ્જતિ આસેવનપચ્ચયા – વિપાકધમ્મધમ્મં એકં ખન્ધં પટિચ્ચ તયો ખન્ધા…પે… દ્વે ખન્ધે પટિચ્ચ દ્વે ખન્ધા.

નેવવિપાકનવિપાકધમ્મધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ આસેવનપચ્ચયા – નેવવિપાકનવિપાકધમ્મધમ્મં એકં ખન્ધં પટિચ્ચ તયો ખન્ધા…પે… દ્વે ખન્ધે પટિચ્ચ દ્વે ખન્ધા.

કમ્મ-વિપાકપચ્ચયા

૧૮. વિપાકં ધમ્મં પટિચ્ચ વિપાકો ધમ્મો ઉપ્પજ્જતિ કમ્મપચ્ચયા (સંખિત્તં)… વિપાકપચ્ચયા… તીણિ.

નેવવિપાકનવિપાકધમ્મધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ વિપાકપચ્ચયા – એકં મહાભૂતં પટિચ્ચ તયો મહાભૂતા…પે… મહાભૂતે પટિચ્ચ ચિત્તસમુટ્ઠાનં રૂપં કટત્તારૂપં ઉપાદારૂપં. (૧)

નેવવિપાકનવિપાકધમ્મધમ્મં પટિચ્ચ વિપાકો ધમ્મો ઉપ્પજ્જતિ વિપાકપચ્ચયા – પટિસન્ધિક્ખણે વત્થું પટિચ્ચ વિપાકા ખન્ધા. (૨)

નેવવિપાકનવિપાકધમ્મધમ્મં પટિચ્ચ વિપાકો ચ નેવવિપાકનવિપાકધમ્મધમ્મો ચ ધમ્મા ઉપ્પજ્જન્તિ વિપાકપચ્ચયા – પટિસન્ધિક્ખણે વત્થું પટિચ્ચ વિપાકા ખન્ધા, મહાભૂતે પટિચ્ચ કટત્તારૂપં. (૩)

વિપાકઞ્ચ નેવવિપાકનવિપાકધમ્મધમ્મઞ્ચ ધમ્મં પટિચ્ચ વિપાકો ધમ્મો ઉપ્પજ્જતિ વિપાકપચ્ચયા…પે… નેવવિપાકનવિપાકધમ્મધમ્મો ઉપ્પજ્જતિ વિપાકપચ્ચયા. વિપાકો ચ નેવવિપાકનવિપાકધમ્મધમ્મો ચ ધમ્મા ઉપ્પજ્જન્તિ વિપાકપચ્ચયા…પે….

આહારપચ્ચયાદિ

૧૯. વિપાકં ધમ્મં પટિચ્ચ વિપાકો ધમ્મો ઉપ્પજ્જતિ આહારપચ્ચયા (સંખિત્તં)… ઇન્દ્રિયપચ્ચયા… ઝાનપચ્ચયા… મગ્ગપચ્ચયા… સમ્પયુત્તપચ્ચયા … વિપ્પયુત્તપચ્ચયા… અત્થિપચ્ચયા… નત્થિપચ્ચયા… વિગતપચ્ચયા… અવિગતપચ્ચયા.

૧. પચ્ચયાનુલોમં

૨. સઙ્ખ્યાવારો

સુદ્ધં

૨૦. હેતુયા તેરસ, આરમ્મણે પઞ્ચ, અધિપતિયા નવ, અનન્તરે પઞ્ચ, સમનન્તરે પઞ્ચ, સહજાતે તેરસ, અઞ્ઞમઞ્ઞે સત્ત, નિસ્સયે તેરસ, ઉપનિસ્સયે પઞ્ચ, પુરેજાતે તીણિ, આસેવને દ્વે, કમ્મે તેરસ, વિપાકે નવ, આહારે તેરસ, ઇન્દ્રિયે તેરસ, ઝાને તેરસ, મગ્ગે તેરસ, સમ્પયુત્તે પઞ્ચ, વિપ્પયુત્તે તેરસ, અત્થિયા તેરસ, નત્થિયા પઞ્ચ, વિગતે પઞ્ચ, અવિગતે તેરસ.

હેતુદુકં

૨૧. હેતુપચ્ચયા આરમ્મણે પઞ્ચ…પે… અવિગતે તેરસ…પે….

(યથા કુસલત્તિકસ્સ ગણના, એવં ગણેતબ્બં.)

આસેવનદુકં

૨૨. આસેવનપચ્ચયા હેતુયા દ્વે, આરમ્મણે દ્વે, અધિપતિયા દ્વે, અનન્તરે દ્વે, સમનન્તરે દ્વે, સહજાતે દ્વે, અઞ્ઞમઞ્ઞે દ્વે, નિસ્સયે દ્વે, ઉપનિસ્સયે દ્વે, પુરેજાતે દ્વે, કમ્મે દ્વે, આહારે દ્વે, ઇન્દ્રિયે દ્વે, ઝાને દ્વે, મગ્ગે દ્વે, સમ્પયુત્તે દ્વે, વિપ્પયુત્તે દ્વે, અત્થિયા દ્વે, નત્થિયા દ્વે, વિગતે દ્વે, અવિગતે દ્વે…પે….

વિપાકદુકં

૨૩. વિપાકપચ્ચયા હેતુયા નવ, આરમ્મણે તીણિ, અધિપતિયા પઞ્ચ, અનન્તરે તીણિ, સમનન્તરે તીણિ, સહજાતે નવ, અઞ્ઞમઞ્ઞે છ, નિસ્સયે નવ, ઉપનિસ્સયે તીણિ, પુરેજાતે એકં, કમ્મે નવ, આહારે નવ, ઇન્દ્રિયે નવ, ઝાને નવ, મગ્ગે નવ, સમ્પયુત્તે તીણિ, વિપ્પયુત્તે નવ, અત્થિયા નવ, નત્થિયા તીણિ, વિગતે તીણિ, અવિગતે નવ (સંખિત્તં).

અનુલોમગણના.

૨. પચ્ચયપચ્ચનીયં

૧. વિભઙ્ગવારો

નહેતુપચ્ચયો

૨૪. વિપાકં ધમ્મં પટિચ્ચ વિપાકો ધમ્મો ઉપ્પજ્જતિ નહેતુપચ્ચયા – અહેતુકં વિપાકં એકં ખન્ધં પટિચ્ચ તયો ખન્ધા…પે… દ્વે ખન્ધે પટિચ્ચ દ્વે ખન્ધા; અહેતુકપટિસન્ધિક્ખણે વિપાકં એકં ખન્ધં પટિચ્ચ તયો ખન્ધા, તયો ખન્ધે પટિચ્ચ એકો ખન્ધો, દ્વે ખન્ધે પટિચ્ચ દ્વે ખન્ધા. (૧)

વિપાકં ધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ નહેતુપચ્ચયા – અહેતુકે વિપાકે ખન્ધે પટિચ્ચ ચિત્તસમુટ્ઠાનં રૂપં; અહેતુકપટિસન્ધિક્ખણે વિપાકે ખન્ધે પટિચ્ચ કટત્તારૂપં, ખન્ધે પટિચ્ચ વત્થુ. (૨)

વિપાકં ધમ્મં પટિચ્ચ વિપાકો ચ નેવવિપાકનવિપાકધમ્મધમ્મો ચ ધમ્મા ઉપ્પજ્જન્તિ નહેતુપચ્ચયા – અહેતુકં વિપાકં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે પટિચ્ચ દ્વે ખન્ધા ચિત્તસમુટ્ઠાનઞ્ચ રૂપં; અહેતુકપટિસન્ધિક્ખણે વિપાકં એકં ખન્ધં પટિચ્ચ તયો ખન્ધા કટત્તા ચ રૂપં…પે… દ્વે ખન્ધે પટિચ્ચ દ્વે ખન્ધા કટત્તા ચ રૂપં. (૩)

૨૫. વિપાકધમ્મધમ્મં પટિચ્ચ વિપાકધમ્મધમ્મો ઉપ્પજ્જતિ નહેતુપચ્ચયા – વિચિકિચ્છાસહગતે ઉદ્ધચ્ચસહગતે ખન્ધે પટિચ્ચ વિચિકિચ્છાસહગતો ઉદ્ધચ્ચસહગતો મોહો. (૧)

નેવવિપાકનવિપાકધમ્મધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ નહેતુપચ્ચયા – અહેતુકં નેવવિપાકનવિપાકધમ્મધમ્મં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે પટિચ્ચ દ્વે ખન્ધા ચિત્તસમુટ્ઠાનઞ્ચ રૂપં, એકં મહાભૂતં પટિચ્ચ તયો મહાભૂતા…પે… દ્વે મહાભૂતે પટિચ્ચ દ્વે મહાભૂતા, મહાભૂતે પટિચ્ચ ચિત્તસમુટ્ઠાનં રૂપં કટત્તારૂપં ઉપાદારૂપં; બાહિરં… આહારસમુટ્ઠાનં… ઉતુસમુટ્ઠાનં… અસઞ્ઞસત્તાનં એકં મહાભૂતં પટિચ્ચ તયો મહાભૂતા…પે… મહાભૂતે પટિચ્ચ કટત્તારૂપં ઉપાદારૂપં. (૧)

નેવવિપાકનવિપાકધમ્મધમ્મં પટિચ્ચ વિપાકો ધમ્મો ઉપ્પજ્જતિ નહેતુપચ્ચયા – અહેતુકપટિસન્ધિક્ખણે વત્થું પટિચ્ચ વિપાકા ખન્ધા. (૨)

નેવવિપાકનવિપાકધમ્મધમ્મં પટિચ્ચ વિપાકો ચ નેવવિપાકનવિપાકધમ્મધમ્મો ચ ધમ્મા ઉપ્પજ્જન્તિ નહેતુપચ્ચયા – અહેતુકપટિસન્ધિક્ખણે વત્થું પટિચ્ચ વિપાકા ખન્ધા, મહાભૂતે પટિચ્ચ કટત્તારૂપં. (૩)

૨૬. વિપાકઞ્ચ નેવવિપાકનવિપાકધમ્મધમ્મઞ્ચ ધમ્મં પટિચ્ચ વિપાકો ધમ્મો ઉપ્પજ્જતિ નહેતુપચ્ચયા – અહેતુકપટિસન્ધિક્ખણે વિપાકં એકં ખન્ધઞ્ચ વત્થુઞ્ચ પટિચ્ચ તયો ખન્ધા…પે… દ્વે ખન્ધે ચ વત્થુઞ્ચ પટિચ્ચ દ્વે ખન્ધા. (૧)

વિપાકઞ્ચ નેવવિપાકનવિપાકધમ્મધમ્મઞ્ચ ધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ નહેતુપચ્ચયા – અહેતુકે વિપાકે ખન્ધે ચ મહાભૂતે ચ પટિચ્ચ ચિત્તસમુટ્ઠાનં રૂપં; અહેતુકપટિસન્ધિક્ખણે વિપાકે ખન્ધે ચ મહાભૂતે ચ પટિચ્ચ કટત્તારૂપં. (૨)

વિપાકઞ્ચ નેવવિપાકનવિપાકધમ્મધમ્મઞ્ચ ધમ્મં પટિચ્ચ વિપાકો ચ નેવવિપાકનવિપાકધમ્મધમ્મો ચ ધમ્મા ઉપ્પજ્જન્તિ નહેતુપચ્ચયા – અહેતુકપટિસન્ધિક્ખણે વિપાકં એકં ખન્ધઞ્ચ વત્થુઞ્ચ પટિચ્ચ તયો ખન્ધા…પે… દ્વે ખન્ધે ચ વત્થુઞ્ચ પટિચ્ચ દ્વે ખન્ધા, વિપાકે ખન્ધે ચ મહાભૂતે ચ પટિચ્ચ કટત્તારૂપં. (૩)

નઆરમ્મણપચ્ચયો

૨૭. વિપાકં ધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ નઆરમ્મણપચ્ચયા – વિપાકે ખન્ધે પટિચ્ચ ચિત્તસમુટ્ઠાનં રૂપં; પટિસન્ધિક્ખણે વિપાકે ખન્ધે પટિચ્ચ કટત્તારૂપં, ખન્ધે પટિચ્ચ વત્થુ. (૧)

૨૮. વિપાકધમ્મધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ નઆરમ્મણપચ્ચયા – વિપાકધમ્મધમ્મે ખન્ધે પટિચ્ચ ચિત્તસમુટ્ઠાનં રૂપં. (૧)

૨૯. નેવવિપાકનવિપાકધમ્મધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ નઆરમ્મણપચ્ચયા – નેવવિપાકનવિપાકધમ્મધમ્મે ખન્ધે પટિચ્ચ ચિત્તસમુટ્ઠાનં રૂપં, એકં મહાભૂતં પટિચ્ચ તયો મહાભૂતા…પે… મહાભૂતે પટિચ્ચ ચિત્તસમુટ્ઠાનં રૂપં કટત્તારૂપં ઉપાદારૂપં; બાહિરં… આહારસમુટ્ઠાનં… ઉતુસમુટ્ઠાનં… અસઞ્ઞસત્તાનં એકં મહાભૂતં પટિચ્ચ તયો મહાભૂતા… મહાભૂતે પટિચ્ચ કટત્તારૂપં ઉપાદારૂપં. (૧)

૩૦. વિપાકઞ્ચ નેવવિપાકનવિપાકધમ્મધમ્મઞ્ચ ધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ નઆરમ્મણપચ્ચયા – વિપાકે ખન્ધે ચ મહાભૂતે ચ પટિચ્ચ ચિત્તસમુટ્ઠાનં રૂપં; પટિસન્ધિક્ખણે વિપાકે ખન્ધે ચ મહાભૂતે ચ પટિચ્ચ કટત્તારૂપં. (૧)

૩૧. વિપાકધમ્મધમ્મઞ્ચ નેવવિપાકનવિપાકધમ્મધમ્મઞ્ચ ધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ નઆરમ્મણપચ્ચયા – વિપાકધમ્મધમ્મે ખન્ધે ચ મહાભૂતે ચ પટિચ્ચ ચિત્તસમુટ્ઠાનં રૂપં. (૧)

નઅધિપતિપચ્ચયો

૩૨. વિપાકં ધમ્મં પટિચ્ચ વિપાકો ધમ્મો ઉપ્પજ્જતિ નઅધિપતિપચ્ચયા. (સંખિત્તં. યથા અનુલોમં સહજાતસદિસં.)

નઅનન્તરપચ્ચયાદિ

૩૩. વિપાકં ધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ નઅનન્તરપચ્ચયા … નસમનન્તરપચ્ચયા… નઅઞ્ઞમઞ્ઞપચ્ચયા…પે… મહાભૂતે પટિચ્ચ ચિત્તસમુટ્ઠાનં રૂપં કટત્તારૂપં ઉપાદારૂપં; બાહિરં… આહારસમુટ્ઠાનં… ઉતુસમુટ્ઠાનં, અસઞ્ઞસત્તાનં મહાભૂતે પટિચ્ચ કટત્તારૂપં ઉપાદારૂપં (ઇદં નાનત્તં) નઅઞ્ઞમઞ્ઞપચ્ચયા… નઉપનિસ્સયપચ્ચયા… (સંખિત્તં).

નપુરેજાતપચ્ચયો

૩૪. વિપાકં ધમ્મં પટિચ્ચ વિપાકો ધમ્મો ઉપ્પજ્જતિ નપુરેજાતપચ્ચયા – અરૂપે વિપાકં એકં ખન્ધં પટિચ્ચ તયો ખન્ધા…પે… દ્વે ખન્ધે પટિચ્ચ દ્વે ખન્ધા; પટિસન્ધિક્ખણે વિપાકં એકં ખન્ધં (સંખિત્તં). (૧)

વિપાકં ધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ નપુરેજાતપચ્ચયા – વિપાકે ખન્ધે પટિચ્ચ ચિત્તસમુટ્ઠાનં રૂપં, પટિસન્ધિક્ખણે (સંખિત્તં). (૨)

વિપાકં ધમ્મં પટિચ્ચ વિપાકો ચ નેવવિપાકનવિપાકધમ્મધમ્મો ચ ધમ્મા ઉપ્પજ્જન્તિ નપુરેજાતપચ્ચયા – પટિસન્ધિક્ખણે વિપાકં એકં ખન્ધં પટિચ્ચ તયો ખન્ધા કટત્તા ચ રૂપં…પે… દ્વે ખન્ધે પટિચ્ચ દ્વે ખન્ધા કટત્તા ચ રૂપં. (૩)

વિપાકધમ્મધમ્મં પટિચ્ચ વિપાકધમ્મધમ્મો ઉપ્પજ્જતિ નપુરેજાતપચ્ચયા – અરૂપે વિપાકધમ્મધમ્મં એકં ખન્ધં પટિચ્ચ તયો ખન્ધા…પે… દ્વે ખન્ધે પટિચ્ચ દ્વે ખન્ધા. (૧)

વિપાકધમ્મધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ નપુરેજાતપચ્ચયા – વિપાકધમ્મધમ્મે ખન્ધે પટિચ્ચ ચિત્તસમુટ્ઠાનં રૂપં. (૨)

૩૫. નેવવિપાકનવિપાકધમ્મધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ નપુરેજાતપચ્ચયા – અરૂપે નેવવિપાકનવિપાકધમ્મધમ્મં એકં ખન્ધં પટિચ્ચ તયો ખન્ધા…પે… દ્વે ખન્ધે પટિચ્ચ દ્વે ખન્ધા, નેવવિપાકનવિપાકધમ્મધમ્મે ખન્ધે પટિચ્ચ ચિત્તસમુટ્ઠાનં રૂપં, એકં મહાભૂતં પટિચ્ચ તયો મહાભૂતા…પે… બાહિરં… આહારસમુટ્ઠાનં… ઉતુસમુટ્ઠાનં… અસઞ્ઞસત્તાનં એકં મહાભૂતં પટિચ્ચ…પે…. (૧)

નેવવિપાકનવિપાકધમ્મધમ્મં પટિચ્ચ વિપાકો ધમ્મો ઉપ્પજ્જતિ નપુરેજાતપચ્ચયા – પટિસન્ધિક્ખણે વત્થું પટિચ્ચ વિપાકા ખન્ધા. (૨)

નેવવિપાકનવિપાકધમ્મધમ્મં પટિચ્ચ વિપાકો ચ નેવવિપાકનવિપાકધમ્મધમ્મો ચ ધમ્મા ઉપ્પજ્જન્તિ નપુરેજાતપચ્ચયા – પટિસન્ધિક્ખણે વત્થું પટિચ્ચ વિપાકા ખન્ધા, મહાભૂતે પટિચ્ચ કટત્તારૂપં. (૩)

૩૬. વિપાકઞ્ચ નેવવિપાકનવિપાકધમ્મધમ્મઞ્ચ ધમ્મં પટિચ્ચ વિપાકો ધમ્મો ઉપ્પજ્જતિ નપુરેજાતપચ્ચયા – પટિસન્ધિક્ખણે વિપાકં એકં ખન્ધઞ્ચ વત્થુઞ્ચ પટિચ્ચ તયો ખન્ધા…પે… દ્વે ખન્ધે ચ વત્થુઞ્ચ પટિચ્ચ દ્વે ખન્ધા. (૧)

વિપાકઞ્ચ નેવવિપાકનવિપાકધમ્મધમ્મઞ્ચ ધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ નપુરેજાતપચ્ચયા – વિપાકે ખન્ધે ચ મહાભૂતે ચ પટિચ્ચ ચિત્તસમુટ્ઠાનં રૂપં; પટિસન્ધિક્ખણે વિપાકે ખન્ધે ચ મહાભૂતે ચ પટિચ્ચ કટત્તારૂપં. (૨)

વિપાકઞ્ચ નેવવિપાકનવિપાકધમ્મધમ્મઞ્ચ ધમ્મં પટિચ્ચ વિપાકો ચ નેવવિપાકનવિપાકધમ્મધમ્મો ચ ધમ્મા ઉપ્પજ્જન્તિ નપુરેજાતપચ્ચયા – પટિસન્ધિક્ખણે વિપાકં એકં ખન્ધઞ્ચ વત્થુઞ્ચ પટિચ્ચ તયો ખન્ધા…પે… દ્વે ખન્ધે ચ વત્થુઞ્ચ પટિચ્ચ દ્વે ખન્ધા; વિપાકે ખન્ધે ચ મહાભૂતે ચ પટિચ્ચ કટત્તારૂપં. (૩)

૩૭. વિપાકધમ્મધમ્મઞ્ચ નેવવિપાકનવિપાકધમ્મધમ્મઞ્ચ ધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ નપુરેજાતપચ્ચયા – વિપાકધમ્મધમ્મે ખન્ધે ચ મહાભૂતે ચ પટિચ્ચ ચિત્તસમુટ્ઠાનં રૂપં.

નપચ્છાજાતપચ્ચયાદિ

૩૮. વિપાકં ધમ્મં પટિચ્ચ વિપાકો ધમ્મો ઉપ્પજ્જતિ નપચ્છાજાતપચ્ચયા…પે… નઆસેવનપચ્ચયા (સંખિત્તં).

નકમ્મપચ્ચયો

૩૯. વિપાકધમ્મધમ્મં પટિચ્ચ વિપાકધમ્મધમ્મો ઉપ્પજ્જતિ નકમ્મપચ્ચયા – વિપાકધમ્મધમ્મે ખન્ધે પટિચ્ચ વિપાકધમ્મધમ્મા ચેતના.

નેવવિપાકનવિપાકધમ્મધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ નકમ્મપચ્ચયા – નેવવિપાકનવિપાકધમ્મધમ્મે ખન્ધે પટિચ્ચ નેવવિપાકનવિપાકધમ્મધમ્મા ચેતના; બાહિરં… આહારસમુટ્ઠાનં… ઉતુસમુટ્ઠાનં એકં મહાભૂતં પટિચ્ચ તયો મહાભૂતા…પે… મહાભૂતે પટિચ્ચ ઉપાદારૂપં.

નવિપાકપચ્ચયો

૪૦. વિપાકધમ્મધમ્મં પટિચ્ચ વિપાકધમ્મધમ્મો ઉપ્પજ્જતિ નવિપાકપચ્ચયા – વિપાકધમ્મધમ્મં એકં ખન્ધં પટિચ્ચ તયો ખન્ધા…પે… દ્વે ખન્ધે પટિચ્ચ દ્વે ખન્ધા. (૧)

વિપાકધમ્મધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ નવિપાકપચ્ચયા – વિપાકધમ્મધમ્મે ખન્ધે પટિચ્ચ ચિત્તસમુટ્ઠાનં રૂપં. (૨)

વિપાકધમ્મધમ્મં પટિચ્ચ વિપાકધમ્મધમ્મો ચ નેવવિપાકનવિપાકધમ્મધમ્મો ચ ધમ્મા ઉપ્પજ્જન્તિ નવિપાકપચ્ચયા – વિપાકધમ્મધમ્મં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે પટિચ્ચ દ્વે ખન્ધા ચિત્તસમુટ્ઠાનઞ્ચ રૂપં. (૩)

૪૧. નેવવિપાકનવિપાકધમ્મધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ નવિપાકપચ્ચયા – નેવવિપાકનવિપાકધમ્મધમ્મં એકં ખન્ધં પટિચ્ચ તયો ખન્ધા ચિત્તસમુટ્ઠાનઞ્ચ રૂપં…પે… દ્વે ખન્ધે પટિચ્ચ દ્વે ખન્ધા ચિત્તસમુટ્ઠાનઞ્ચ રૂપં. એકં મહાભૂતં પટિચ્ચ તયો મહાભૂતા…પે… મહાભૂતે પટિચ્ચ ચિત્તસમુટ્ઠાનં રૂપં ઉપાદારૂપં; બાહિરં… આહારસમુટ્ઠાનં… ઉતુસમુટ્ઠાનં… અસઞ્ઞસત્તાનં એકં મહાભૂતં પટિચ્ચ તયો મહાભૂતા…પે… મહાભૂતે પટિચ્ચ કટત્તારૂપં ઉપાદારૂપં. (૧)

વિપાકધમ્મધમ્મઞ્ચ નેવવિપાકનવિપાકધમ્મધમ્મઞ્ચ ધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ નવિપાકપચ્ચયા – વિપાકધમ્મધમ્મે ખન્ધે ચ મહાભૂતે ચ પટિચ્ચ ચિત્તસમુટ્ઠાનં રૂપં. (૧)

નઆહારપચ્ચયો

૪૨. નેવવિપાકનવિપાકધમ્મધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ નઆહારપચ્ચયા – બાહિરં… ઉતુસમુટ્ઠાનં… અસઞ્ઞસત્તાનં એકં મહાભૂતં પટિચ્ચ તયો મહાભૂતા…પે… મહાભૂતે પટિચ્ચ કટત્તારૂપં ઉપાદારૂપં.

નઇન્દ્રિયપચ્ચયો

૪૩. નેવવિપાકનવિપાકધમ્મધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ નઇન્દ્રિયપચ્ચયા – બાહિરં… આહારસમુટ્ઠાનં… ઉતુસમુટ્ઠાનં એકં મહાભૂતં પટિચ્ચ તયો મહાભૂતા…પે… અસઞ્ઞસત્તાનં મહાભૂતે પટિચ્ચ રૂપજીવિતિન્દ્રિયં.

નઝાનપચ્ચયો

૪૪. વિપાકં ધમ્મં પટિચ્ચ વિપાકો ધમ્મો ઉપ્પજ્જતિ નઝાનપચ્ચયા – પઞ્ચવિઞ્ઞાણસહગતં એકં ખન્ધં પટિચ્ચ તયો ખન્ધા…પે… દ્વે ખન્ધે પટિચ્ચ દ્વે ખન્ધા.

નેવવિપાકનવિપાકધમ્મધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ નઝાનપચ્ચયા – બાહિરં… આહારસમુટ્ઠાનં… ઉતુસમુટ્ઠાનં… અસઞ્ઞસત્તાનં એકં મહાભૂતં પટિચ્ચ…પે….

નમગ્ગપચ્ચયો

૪૫. વિપાકં ધમ્મં પટિચ્ચ વિપાકો ધમ્મો ઉપ્પજ્જતિ નમગ્ગપચ્ચયા – અહેતુકં વિપાકં એકં ખન્ધં પટિચ્ચ… તીણિ.

નેવવિપાકનવિપાકધમ્મધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ નમગ્ગપચ્ચયા – અહેતુકં નેવવિપાકનવિપાકધમ્મધમ્મં એકં ખન્ધં પટિચ્ચ… તીણિ.

વિપાકઞ્ચ નેવવિપાકનવિપાકધમ્મધમ્મઞ્ચ ધમ્મં પટિચ્ચ વિપાકો ધમ્મો ઉપ્પજ્જતિ નમગ્ગપચ્ચયા – અહેતુકપટિસન્ધિક્ખણે વિપાકં એકં ખન્ધઞ્ચ વત્થુઞ્ચ પટિચ્ચ… તીણિ.

નસમ્પયુત્તપચ્ચયો

૪૬. વિપાકં ધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ નસમ્પયુત્તપચ્ચયા… દ્વે.

વિપાકધમ્મધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ નસમ્પયુત્તપચ્ચયા… દ્વે.

નેવવિપાકનવિપાકધમ્મધમ્મં પટિચ્ચ… એકં.

નવિપ્પયુત્તપચ્ચયો

૪૭. વિપાકં ધમ્મં પટિચ્ચ વિપાકો ધમ્મો ઉપ્પજ્જતિ નવિપ્પયુત્તપચ્ચયા – અરૂપે વિપાકે એકં ખન્ધં પટિચ્ચ તયો ખન્ધા…પે… દ્વે ખન્ધે પટિચ્ચ દ્વે ખન્ધા.

વિપાકધમ્મધમ્મં પટિચ્ચ વિપાકધમ્મધમ્મો ઉપ્પજ્જતિ નવિપ્પયુત્તપચ્ચયા – અરૂપે વિપાકધમ્મધમ્મં એકં ખન્ધં પટિચ્ચ તયો ખન્ધા…પે… દ્વે ખન્ધે પટિચ્ચ દ્વે ખન્ધા.

નેવવિપાકનવિપાકધમ્મધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ નવિપ્પયુત્તપચ્ચયા – અરૂપે નેવવિપાકનવિપાકધમ્મધમ્મં એકં ખન્ધં પટિચ્ચ તયો ખન્ધા…પે… દ્વે ખન્ધે પટિચ્ચ દ્વે ખન્ધા; બાહિરં… આહારસમુટ્ઠાનં… ઉતુસમુટ્ઠાનં… અસઞ્ઞસત્તાનં એકં મહાભૂતં પટિચ્ચ તયો મહાભૂતા…પે… મહાભૂતે પટિચ્ચ કટત્તારૂપં ઉપાદારૂપં.

નોનત્થિ-નોવિગતપચ્ચયા

૪૮. વિપાકં ધમ્મં પટિચ્ચ નેવવિપાકનવિપાકધમ્મધમ્મો ઉપ્પજ્જતિ નોનત્થિપચ્ચયા… નોવિગતપચ્ચયા (સંખિત્તં).

૨. પચ્ચયપચ્ચનીયં

૨. સઙ્ખ્યાવારો

સુદ્ધં

૪૯. નહેતુયા દસ, નઆરમ્મણે પઞ્ચ, નઅધિપતિયા તેરસ, નઅનન્તરે પઞ્ચ, નસમનન્તરે પઞ્ચ, નઅઞ્ઞમઞ્ઞે પઞ્ચ, નઉપનિસ્સયે પઞ્ચ, નપુરેજાતે દ્વાદસ, નપચ્છાજાતે તેરસ, નઆસેવને તેરસ, નકમ્મે દ્વે, નવિપાકે પઞ્ચ, નઆહારે એકં, નઇન્દ્રિયે એકં, નઝાને દ્વે, નમગ્ગે નવ, નસમ્પયુત્તે પઞ્ચ, નવિપ્પયુત્તે તીણિ, નોનત્થિયા પઞ્ચ, નોવિગતે પઞ્ચ.

નહેતુદુકં

૫૦. નહેતુપચ્ચયા નઆરમ્મણે તીણિ, નઅધિપતિયા દસ, નઅનન્તરે તીણિ, નસમનન્તરે તીણિ, નઅઞ્ઞમઞ્ઞે તીણિ, નઉપનિસ્સયે તીણિ, નપુરેજાતે દસ, નપચ્છાજાતે દસ, નઆસેવને દસ, નકમ્મે એકં, નવિપાકે દ્વે, નઆહારે એકં, નઇન્દ્રિયે એકં, નઝાને દ્વે, નમગ્ગે નવ, નસમ્પયુત્તે તીણિ, નવિપ્પયુત્તે દ્વે, નોનત્થિયા તીણિ, નોવિગતે તીણિ.

તિકં

નહેતુપચ્ચયા નઆરમ્મણપચ્ચયા નઅધિપતિયા તીણિ, નઅનન્તરે તીણિ, નસમનન્તરે તીણિ…પે… નકમ્મે એકં, નવિપાકે એકં, નઆહારે એકં, નઇન્દ્રિયે એકં, નઝાને એકં, નમગ્ગે તીણિ, નસમ્પયુત્તે તીણિ, નવિપ્પયુત્તે એકં, નોનત્થિયા તીણિ, નોવિગતે તીણિ (સંખિત્તં).

નહેતુમૂલકં.

(યથા કુસલત્તિકે સજ્ઝાયમગ્ગેન ગણિતં, એવં ઇધાપિ ગણેતબ્બં.)

પચ્ચનીયં.

૩. પચ્ચયાનુલોમપચ્ચનીયં

હેતુદુકં

૫૧. હેતુપચ્ચયા નઆરમ્મણે પઞ્ચ, નઅધિપતિયા તેરસ, નઅનન્તરે પઞ્ચ, નસમનન્તરે પઞ્ચ, નઅઞ્ઞમઞ્ઞે પઞ્ચ, નઉપનિસ્સયે પઞ્ચ, નપુરેજાતે દ્વાદસ, નપચ્છાજાતે તેરસ, નઆસેવને તેરસ, નકમ્મે દ્વે, નવિપાકે પઞ્ચ, નસમ્પયુત્તે પઞ્ચ, નવિપ્પયુત્તે તીણિ, નોનત્થિયા પઞ્ચ, નોવિગતે પઞ્ચ.