(૨૦૭) ૮. કમ્મકથા

૮૮૯. સબ્બે કમ્મા નિયતાતિ? આમન્તા. મિચ્છત્તનિયતાતિ? ન હેવં વત્તબ્બે…પે… સમ્મત્તનિયતાતિ? ન હેવં વત્તબ્બે…પે… નત્થિ અનિયતો રાસીતિ? ન હેવં વત્તબ્બે…પે… નનુ અત્થિ અનિયતો રાસીતિ? આમન્તા. હઞ્ચિ અત્થિ અનિયતો રાસિ, નો ચ વત રે વત્તબ્બે – ‘‘સબ્બે કમ્મા નિયતા’’તિ.

સબ્બે કમ્મા નિયતાતિ? આમન્તા. નનુ તયો રાસી વુત્તા ભગવતા – મિચ્છત્તનિયતો રાસિ, સમ્મત્તનિયતો રાસિ, અનિયતો રાસીતિ? આમન્તા. હઞ્ચિ તયો રાસી વુત્તા ભગવતા – મિચ્છત્તનિયતો રાસિ, સમ્મત્તનિયતો રાસિ, અનિયતો રાસિ, નો ચ વત રે વત્તબ્બે – ‘‘સબ્બે કમ્મા નિયતા’’તિ.

૮૯૦. દિટ્ઠધમ્મવેદનીયં કમ્મં દિટ્ઠધમ્મવેદનીયટ્ઠેન નિયતન્તિ? આમન્તા. મિચ્છત્તનિયતન્તિ? ન હેવં વત્તબ્બે…પે… સમ્મત્તનિયતન્તિ? ન હેવં વત્તબ્બે…પે…. ઉપપજ્જવેદનીયં કમ્મં…પે… અપરાપરિયવેદનીયં કમ્મં અપરાપરિયવેદનીયટ્ઠેન નિયતન્તિ? આમન્તા. મિચ્છત્તનિયતન્તિ? ન હેવં વત્તબ્બે…પે… સમ્મત્તનિયતન્તિ? ન હેવં વત્તબ્બે…પે….

૮૯૧. ન વત્તબ્બં – દિટ્ઠધમ્મવેદનીયં કમ્મં દિટ્ઠધમ્મવેદનીયટ્ઠેન નિયતં, ઉપપજ્જવેદનીયં કમ્મં…પે… અપરાપરિયવેદનીયં કમ્મં અપરાપરિયવેદનીયટ્ઠેન નિયતન્તિ? આમન્તા. દિટ્ઠધમ્મવેદનીયં કમ્મં ઉપપજ્જવેદનીયં હોતિ, અપરાપરિયવેદનીયં હોતિ…પે… ઉપપજ્જવેદનીયં કમ્મં દિટ્ઠધમ્મવેદનીયં હોતિ, અપરાપરિયવેદનીયં હોતિ…પે… અપરાપરિયવેદનીયં કમ્મં દિટ્ઠધમ્મવેદનીયં હોતિ, ઉપપજ્જવેદનીયં હોતીતિ? ન હેવં વત્તબ્બે. તેન હિ દિટ્ઠધમ્મવેદનીયં કમ્મં દિટ્ઠધમ્મવેદનીયટ્ઠેન નિયતં, ઉપપજ્જવેદનીયં કમ્મં…પે… અપરાપરિયવેદનીયં કમ્મં અપરાપરિયવેદનીયટ્ઠેન નિયતન્તિ.

કમ્મકથા નિટ્ઠિતા.

એકવીસતિમવગ્ગો.

તસ્સુદ્દાનં –

સાસનં નવં કતં અત્થિ કોચિ તથાગતસ્સ સાસનં નવં કરોતિ લબ્ભા તથાગતસ્સ સાસનં પુન નવં કાતું, પુથુજ્જનો તેધાતુકેહિ ધમ્મેહિ અવિવિત્તો, અત્થિ કિઞ્ચિ સંયોજનં અપ્પહાય અરહત્તપ્પત્તિ, અત્થિ અધિપ્પાયિદ્ધિ બુદ્ધાનં વા સાવકાનં વા, અત્થિ બુદ્ધાનં બુદ્ધેહિ હીનાતિરેકતા, સબ્બા દિસા બુદ્ધા તિટ્ઠન્તિ, સબ્બે ધમ્મા નિયતા, સબ્બે કમ્મા નિયતાતિ.