૨૧. એકવીસતિમવગ્ગો

(૨૦૫) ૬. સબ્બદિસાકથા

૮૮૬. સબ્બા દિસા બુદ્ધા તિટ્ઠન્તીતિ? આમન્તા. પુરત્થિમાય દિસાય બુદ્ધો તિટ્ઠતીતિ? ન હેવં વત્તબ્બે…પે… પુરત્થિમાય દિસાય બુદ્ધો તિટ્ઠતીતિ? આમન્તા. કિન્નામો સો ભગવા, કિંજચ્ચો, કિંગોત્તો, કિન્નામા તસ્સ ભગવતો માતાપિતરો, કિન્નામં તસ્સ ભગવતો સાવકયુગં, કોનામો તસ્સ ભગવતો ઉપટ્ઠાકો, કીદિસં ચીવરં ધારેતિ, કીદિસં પત્તં ધારેતિ, કતરસ્મિં ગામે વા નિગમે વા નગરે વા રટ્ઠે વા જનપદે વાતિ? ન હેવં વત્તબ્બે…પે….

દક્ખિણાય દિસાય…પે… પચ્છિમાય દિસાય…પે… ઉત્તરાય દિસાય…પે… હેટ્ઠિમાય દિસાય બુદ્ધો તિટ્ઠતીતિ? ન હેવં વત્તબ્બે…પે… હેટ્ઠિમાય દિસાય બુદ્ધો તિટ્ઠતીતિ? આમન્તા. કિન્નામો સો ભગવા…પે… જનપદે વાતિ? ન હેવં વત્તબ્બે…પે….

ઉપરિમાય દિસાય બુદ્ધો તિટ્ઠતીતિ? ન હેવં વત્તબ્બે…પે…. ઉપરિમાય દિસાય બુદ્ધો તિટ્ઠતીતિ? આમન્તા. ચાતુમહારાજિકે તિટ્ઠતિ…પે… તાવતિંસે તિટ્ઠતિ…પે… યામે તિટ્ઠતિ…પે… તુસિતે તિટ્ઠતિ…પે… નિમ્માનરતિયા તિટ્ઠતિ…પે… પરનિમ્મિતવસવત્તિયા તિટ્ઠતિ…પે… બ્રહ્મલોકે તિટ્ઠતીતિ? ન હેવં વત્તબ્બે…પે….

સબ્બદિસાકથા નિટ્ઠિતા.