૨૧. એકવીસતિમવગ્ગો

(૨૦૬) ૭. ધમ્મકથા

૮૮૭. સબ્બે ધમ્મા નિયતાતિ? આમન્તા. મિચ્છત્તનિયતાતિ? ન હેવં વત્તબ્બે…પે… સમ્મત્તનિયતાતિ? ન હેવં વત્તબ્બે…પે… નત્થિ અનિયતો રાસીતિ? ન હેવં વત્તબ્બે…પે… નનુ અત્થિ અનિયતો રાસીતિ? આમન્તા. હઞ્ચિ અત્થિ અનિયતો રાસિ, નો ચ વત રે વત્તબ્બે – ‘‘સબ્બે ધમ્મા નિયતા’’તિ.

સબ્બે ધમ્મા નિયતાતિ? આમન્તા. નનુ તયો રાસી વુત્તા ભગવતા – મિચ્છત્તનિયતો રાસિ, સમ્મત્તનિયતો રાસિ, અનિયતો રાસીતિ [ધ. સ. તિકમાતિકા ૧૫]? આમન્તા. હઞ્ચિ તયો રાસી વુત્તા ભગવતા – મિચ્છત્તનિયતો રાસિ, સમ્મત્તનિયતો રાસિ, અનિયતો રાસિ, નો ચ વત રે વત્તબ્બે – ‘‘સબ્બે ધમ્મા નિયતા’’તિ.

રૂપં રૂપટ્ઠેન નિયતન્તિ? આમન્તા. મિચ્છત્તનિયતન્તિ? ન હેવં વત્તબ્બે…પે… સમ્મત્તનિયતન્તિ? ન હેવં વત્તબ્બે…પે… વેદના…પે… સઞ્ઞા…પે… સઙ્ખારા…પે… વિઞ્ઞાણં વિઞ્ઞાણટ્ઠેન નિયતન્તિ? આમન્તા. મિચ્છત્તનિયતન્તિ? ન હેવં વત્તબ્બે…પે… સમ્મત્તનિયતન્તિ? ન હેવં વત્તબ્બે…પે….

૮૮૮. ન વત્તબ્બં – રૂપં રૂપટ્ઠેન નિયતં…પે… વેદના…પે… સઞ્ઞા…પે… સઙ્ખારા…પે… વિઞ્ઞાણં વિઞ્ઞાણટ્ઠેન નિયતન્તિ? આમન્તા. રૂપં વેદના હોતિ…પે… સઞ્ઞા હોતિ… સઙ્ખારા હોન્તિ… વિઞ્ઞાણં હોતિ… વેદના…પે… સઞ્ઞા…પે… સઙ્ખારા…પે… વિઞ્ઞાણં રૂપં હોતિ…પે… વેદના હોતિ… સઞ્ઞા હોતિ… સઙ્ખારા હોન્તીતિ? ન હેવં વત્તબ્બે. તેન હિ રૂપં રૂપટ્ઠેન નિયતં, વેદના…પે… સઞ્ઞા…પે… સઙ્ખારા…પે… વિઞ્ઞાણં વિઞ્ઞાણટ્ઠેન નિયતન્તિ.

ધમ્મકથા નિટ્ઠિતા.