૨૧. એકવીસતિમવગ્ગો

(૨૦૨) ૩. સંયોજનકથા

૮૮૧. અત્થિ કિઞ્ચિ સંયોજનં અપ્પહાય અરહત્તપ્પત્તીતિ? આમન્તા. અત્થિ કિઞ્ચિ સક્કાયદિટ્ઠિં અપ્પહાય…પે… વિચિકિચ્છં અપ્પહાય…પે… સીલબ્બતપરામાસં અપ્પહાય… રાગં અપ્પહાય… દોસં અપ્પહાય… મોહં અપ્પહાય… અનોત્તપ્પં અપ્પહાય અરહત્તપ્પત્તીતિ? ન હેવં વત્તબ્બે…પે….

અત્થિ કિઞ્ચિ સંયોજનં અપ્પહાય અરહત્તપ્પત્તીતિ? આમન્તા. અરહા સરાગો સદોસો સમોહો સમાનો સમક્ખો સપળાસો સઉપાયાસો સકિલેસોતિ? ન હેવં વત્તબ્બે…પે… નનુ અરહા નિરાગો નિદ્દોસો નિમ્મોહો નિમ્માનો નિમ્મક્ખો નિપ્પળાસો નિરુપાયાસો નિક્કિલેસોતિ? આમન્તા. હઞ્ચિ અરહા નિરાગો…પે… નિક્કિલેસો, નો ચ વત રે વત્તબ્બે – ‘‘અત્થિ કિઞ્ચિ સંયોજનં અપ્પહાય અરહત્તપ્પત્તી’’તિ.

૮૮૨. ન વત્તબ્બં – ‘‘અત્થિ કિઞ્ચિ સંયોજનં અપ્પહાય અરહત્તપ્પત્તી’’તિ? આમન્તા. અરહા સબ્બં બુદ્ધવિસયં જાનાતીતિ? ન હેવં વત્તબ્બે. તેન હિ અત્થિ કિઞ્ચિ સંયોજનં અપ્પહાય અરહત્તપ્પત્તીતિ.

સંયોજનકથા નિટ્ઠિતા.