૨૧. એકવીસતિમવગ્ગો

(૨૦૩) ૪. ઇદ્ધિકથા

૮૮૩. અત્થિ અધિપ્પાયઇદ્ધિ બુદ્ધાનં વા સાવકાનં વાતિ? આમન્તા. ‘‘નિચ્ચપણ્ણા રુક્ખા હોન્તૂ’’તિ – અત્થિ અધિપ્પાયઇદ્ધિ બુદ્ધાનં વા સાવકાનં વાતિ? ન હેવં વત્તબ્બે…પે… નિચ્ચપુપ્ફા રુક્ખા હોન્તુ…પે… નિચ્ચફલિકા રુક્ખા હોન્તુ… નિચ્ચં જુણ્હં હોતુ… નિચ્ચં ખેમં હોતુ… નિચ્ચં સુભિક્ખં હોતુ… ‘‘નિચ્ચં સુવત્થિ [સુવુટ્ઠિકં (સ્યા.)] હોતૂ’’તિ – અત્થિ અધિપ્પાયઇદ્ધિ બુદ્ધાનં વા સાવકાનં વાતિ? ન હેવં વત્તબ્બે…પે….

અત્થિ અધિપ્પાયઇદ્ધિ બુદ્ધાનં વા સાવકાનં વાતિ? આમન્તા. ‘‘ઉપ્પન્નો ફસ્સો મા નિરુજ્ઝી’’તિ – અત્થિ અધિપ્પાયઇદ્ધિ બુદ્ધાનં વા સાવકાનં વાતિ? ન હેવં વત્તબ્બે…પે….

ઉપ્પન્ના વેદના…પે… સઞ્ઞા… ચેતના… ચિત્તં… સદ્ધા… વીરિયં… સતિ… સમાધિ…પે… પઞ્ઞા મા નિરુજ્ઝીતિ – અત્થિ અધિપ્પાયઇદ્ધિ બુદ્ધાનં વા સાવકાનં વાતિ? ન હેવં વત્તબ્બે…પે….

અત્થિ અધિપ્પાયઇદ્ધિ બુદ્ધાનં વા સાવકાનં વાતિ? આમન્તા. ‘‘રૂપં નિચ્ચં હોતૂ’’તિ – અત્થિ અધિપ્પાયઇદ્ધિ… વેદના…પે… સઞ્ઞા…પે… સઙ્ખારા…પે… ‘‘વિઞ્ઞાણં નિચ્ચં હોતૂ’’તિ – અત્થિ અધિપ્પાયઇદ્ધિ બુદ્ધાનં વા સાવકાનં વાતિ? ન હેવં વત્તબ્બે…પે….

અત્થિ અધિપ્પાયઇદ્ધિ બુદ્ધાનં વા સાવકાનં વાતિ? આમન્તા. ‘‘જાતિધમ્મા સત્તા મા જાયિંસૂ’’તિ અત્થિ…પે… ‘‘જરાધમ્મા સત્તા મા જીરિંસૂ’’તિ…પે… ‘‘બ્યાધિધમ્મા સત્તા મા બ્યાધિયિંસૂ’’તિ…પે… ‘‘મરણધમ્મા સત્તા મા મીયિંસૂ’’તિ – અત્થિ અધિપ્પાયઇદ્ધિ બુદ્ધાનં વા સાવકાનં વાતિ? ન હેવં વત્તબ્બે…પે….

૮૮૪. ન વત્તબ્બં – ‘‘અત્થિ અધિપ્પાયઇદ્ધિ બુદ્ધાનં વા સાવકાનં વા’’તિ? આમન્તા. નનુ આયસ્મા પિલિન્દવચ્છો રઞ્ઞો માગધસ્સ સેનિયસ્સ બિમ્બિસારસ્સ પાસાદં ‘‘સુવણ્ણ’’ન્ત્વેવ અધિમુચ્ચિ, સુવણ્ણો ચ પન આસીતિ [પારા. ૬૨૧; મહાવ. ૨૭૧]? આમન્તા. હઞ્ચિ આયસ્મા પિલિન્દવચ્છો રઞ્ઞો માગધસ્સ સેનિયસ્સ બિમ્બિસારસ્સ પાસાદં સુવણ્ણન્ત્વેવ અધિમુચ્ચિ, સુવણ્ણો ચ પન આસિ, તેન વત રે વત્તબ્બે – ‘‘અત્થિ અધિપ્પાયઇદ્ધિ બુદ્ધાનં વા સાવકાનં વા’’તિ.

ઇદ્ધિકથા નિટ્ઠિતા.