(૧૫૫) ૧૧. કમ્મૂપચયકથા

૭૩૭. અઞ્ઞં કમ્મં અઞ્ઞો કમ્મૂપચયોતિ? આમન્તા. અઞ્ઞો ફસ્સો, અઞ્ઞો ફસ્સૂપચયો; અઞ્ઞા વેદના, અઞ્ઞો વેદનૂપચયો; અઞ્ઞા સઞ્ઞા, અઞ્ઞો સઞ્ઞૂપચયો; અઞ્ઞા ચેતના, અઞ્ઞો ચેતનૂપચયો; અઞ્ઞં ચિત્તં, અઞ્ઞો ચિત્તૂપચયો; અઞ્ઞા સદ્ધા, અઞ્ઞો સદ્ધૂપચયો; અઞ્ઞં વીરિયં, અઞ્ઞો વીરિયૂપચયો; અઞ્ઞા સતિ, અઞ્ઞો સતૂપચયો; અઞ્ઞો સમાધિ, અઞ્ઞો સમાધૂપચયો; અઞ્ઞા પઞ્ઞા, અઞ્ઞો પઞ્ઞૂપચયો; અઞ્ઞો રાગો, અઞ્ઞો રાગૂપચયો…પે… અઞ્ઞં અનોત્તપ્પં, અઞ્ઞો અનોત્તપ્પૂપચયોતિ? ન હેવં વત્તબ્બે…પે….

૭૩૮. અઞ્ઞં કમ્મં, અઞ્ઞો કમ્મૂપચયોતિ? આમન્તા. કમ્મૂપચયો કમ્મેન સહજાતોતિ? ન હેવં વત્તબ્બે…પે….

કમ્મૂપચયો કમ્મેન સહજાતોતિ, આમન્તા. કુસલેન કમ્મેન સહજાતો કમ્મૂપચયો કુસલોતિ, ન હેવં વત્તબ્બે…પે….

કુસલેન કમ્મેન સહજાતો કમ્મૂપચયો કુસલોતિ? આમન્તા. સુખાય વેદનાય સમ્પયુત્તેન કમ્મેન સહજાતો કમ્મૂપચયો સુખાય વેદનાય સમ્પયુત્તોતિ? ન હેવં વત્તબ્બે…પે… દુક્ખાય વેદનાય…પે… અદુક્ખમસુખાય વેદનાય સમ્પયુત્તેન કમ્મેન સહજાતો કમ્મૂપચયો અદુક્ખમસુખાય વેદનાય સમ્પયુત્તોતિ? ન હેવં વત્તબ્બે…પે….

૭૩૯. કમ્મૂપચયો કમ્મેન સહજાતોતિ? આમન્તા. અકુસલેન કમ્મેન સહજાતો કમ્મૂપચયો અકુસલોતિ? ન હેવં વત્તબ્બે…પે….

અકુસલેન કમ્મેન સહજાતો કમ્મૂપચયો અકુસલોતિ? આમન્તા. સુખાય વેદનાય સમ્પયુત્તેન કમ્મેન સહજાતો કમ્મૂપચયો સુખાય વેદનાય સમ્પયુત્તોતિ? ન હેવં વત્તબ્બે…પે… દુક્ખાય વેદનાય…પે… અદુક્ખમસુખાય વેદનાય સમ્પયુત્તેન કમ્મેન સહજાતો કમ્મૂપચયો અદુક્ખમસુખાય વેદનાય સમ્પયુત્તોતિ? ન હેવં વત્તબ્બે…પે….

૭૪૦. કમ્મં ચિત્તેન સહજાતં, કમ્મં સારમ્મણન્તિ? આમન્તા. કમ્મૂપચયો ચિત્તેન સહજાતો, કમ્મૂપચયો સારમ્મણોતિ? ન હેવં વત્તબ્બે…પે… કમ્મૂપચયો ચિત્તેન સહજાતો, કમ્મૂપચયો અનારમ્મણોતિ? આમન્તા. કમ્મં ચિત્તેન સહજાતં, કમ્મં અનારમ્મણન્તિ? ન હેવં વત્તબ્બે…પે….

કમ્મં ચિત્તેન સહજાતં, ચિત્તં ભિજ્જમાનં કમ્મં ભિજ્જતીતિ? આમન્તા. કમ્મૂપચયો ચિત્તેન સહજાતો, ચિત્તં ભિજ્જમાનં કમ્મૂપચયો ભિજ્જતીતિ? ન હેવં વત્તબ્બે…પે….

કમ્મૂપચયો ચિત્તેન સહજાતો, ચિત્તં ભિજ્જમાનં કમ્મૂપચયો ન ભિજ્જતીતિ? આમન્તા. કમ્મં ચિત્તેન સહજાતં, ચિત્તં ભિજ્જમાનં કમ્મં ન ભિજ્જતીતિ? ન હેવં વત્તબ્બે…પે….

૭૪૧. કમ્મમ્હિ કમ્મૂપચયોતિ? આમન્તા. તઞ્ઞેવ કમ્મં સો કમ્મૂપચયોતિ? ન હેવં વત્તબ્બે…પે….

કમ્મમ્હિ કમ્મૂપચયો, કમ્મૂપચયતો વિપાકો નિબ્બત્તતીતિ? આમન્તા. તઞ્ઞેવ કમ્મં, સો કમ્મૂપચયો, સો કમ્મવિપાકોતિ? ન હેવં વત્તબ્બે…પે….

કમ્મમ્હિ કમ્મૂપચયો, કમ્મૂપચયતો વિપાકો નિબ્બત્તતિ, વિપાકો સારમ્મણોતિ? આમન્તા. કમ્મૂપચયો સારમ્મણોતિ? ન હેવં વત્તબ્બે…પે… કમ્મૂપચયો અનારમ્મણોતિ? આમન્તા. વિપાકો અનારમ્મણોતિ? ન હેવં વત્તબ્બે…પે….

૭૪૨. અઞ્ઞં કમ્મં અઞ્ઞો કમ્મૂપચયોતિ, આમન્તા. નનુ વુત્તં ભગવતા – ‘‘ઇધ, પુણ્ણ, એકચ્ચો સબ્યાબજ્ઝમ્પિ અબ્યાબજ્ઝમ્પિ [સબ્યાપજ્ઝમ્પિ અબ્યાપજ્ઝમ્પિ (ક.) મ. નિ. ૨.૮૧ પસ્સિતબ્બં] કાયસઙ્ખારં અભિસઙ્ખરોતિ, સબ્યાબજ્ઝમ્પિ અબ્યાબજ્ઝમ્પિ વચીસઙ્ખારં…પે… મનોસઙ્ખારં અભિસઙ્ખરોતિ, સો સબ્યાબજ્ઝમ્પિ અબ્યાબજ્ઝમ્પિ કાયસઙ્ખારં અભિસઙ્ખરિત્વા, સબ્યાબજ્ઝમ્પિ અબ્યાબજ્ઝમ્પિ વચીસઙ્ખારં…પે… મનોસઙ્ખારં અભિસઙ્ખરિત્વા સબ્યાબજ્ઝમ્પિ અબ્યાબજ્ઝમ્પિ લોકં ઉપપજ્જતિ. તમેનં સબ્યાબજ્ઝમ્પિ અબ્યાબજ્ઝમ્પિ લોકં ઉપપન્નં સમાનં સબ્યાબજ્ઝાપિ અબ્યાબજ્ઝાપિ ફસ્સા ફુસન્તિ. સો સબ્યાબજ્ઝેહિપિ અબ્યાબજ્ઝેહિપિ ફસ્સેહિ ફુટ્ઠો સમાનો સબ્યાબજ્ઝમ્પિ અબ્યાબજ્ઝમ્પિ વેદનં વેદેતિ વોકિણ્ણસુખદુક્ખં, સેય્યથાપિ મનુસ્સા એકચ્ચે ચ દેવા એકચ્ચે ચ વિનિપાતિકા. ઇતિ ખો, પુણ્ણ, ભૂતા ભૂતસ્સ ઉપપત્તિ હોતિ, યં કરોતિ તેન ઉપપજ્જતિ, ઉપપન્નમેતં ફસ્સા ફુસન્તિ. એવમ્પાહં, પુણ્ણ, ‘કમ્મદાયાદા સત્તા’તિ વદામી’’તિ [મ. નિ. ૨.૮૧]. અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘અઞ્ઞં કમ્મં, અઞ્ઞો કમ્મૂપચયો’’તિ.

કમ્મૂપચયકથા નિટ્ઠિતા.

પન્નરસમવગ્ગો.

તસ્સુદ્દાનં –

પચ્ચયતા વવત્થિતા, પટિચ્ચસમુપ્પાદો, અદ્ધા, ખણો લયો મુહુત્તં, ચત્તારો આસવા અનાસવા, લોકુત્તરાનં ધમ્માનં જરામરણં લોકુત્તરા, સઞ્ઞાવેદયિતનિરોધસમાપત્તિ લોકુત્તરા, સઞ્ઞાવેદયિતનિરોધસમાપત્તિ લોકિયા, સઞ્ઞાવેદયિતનિરોધં સમાપન્નો કાલં કરેય્ય, સ્વેવ મગ્ગો અસઞ્ઞસત્તુપપત્તિયા, અઞ્ઞં કમ્મં અઞ્ઞો કમ્મૂપચયોતિ.

તતિયો પણ્ણાસકો.

તસ્સુદ્દાનં –

અનુસયા, સંવરો, કપ્પો, મૂલઞ્ચ વવત્થિતાતિ.