(૧૩૬) ૧. કુસલાકુસલપટિસન્દહનકથા

૬૮૬. અકુસલમૂલં પટિસન્દહતિ કુસલમૂલન્તિ? આમન્તા. યા અકુસલસ્સ ઉપ્પાદાય આવટ્ટના…પે… પણિધિ, સાવ કુસલસ્સ ઉપ્પાદાય આવટ્ટના…પે… પણિધીતિ? ન હેવં વત્તબ્બે…પે….

અકુસલમૂલં પટિસન્દહતિ કુસલમૂલં, ન વત્તબ્બં – ‘‘યા અકુસલસ્સ ઉપ્પાદાય આવટ્ટના…પે… પણિધિ, સાવ કુસલસ્સ ઉપ્પાદાય આવટ્ટના…પે… પણિધી’’તિ? આમન્તા. કુસલં અનાવટ્ટેન્તસ્સ [અનાવટ્ટન્તસ્સ (સી. પી. ક.), અનાવજ્જન્તસ્સ (સ્યા. કં.)] ઉપ્પજ્જતિ …પે… અપ્પણિદહન્તસ્સ ઉપ્પજ્જતીતિ? ન હેવં વત્તબ્બે…પે… નનુ કુસલં આવટ્ટેન્તસ્સ ઉપ્પજ્જતિ…પે… પણિદહન્તસ્સ ઉપ્પજ્જતીતિ? આમન્તા. હઞ્ચિ કુસલં આવટ્ટેન્તસ્સ ઉપ્પજ્જતિ…પે… પણિદહન્તસ્સ ઉપ્પજ્જતિ, નો ચ વત રે વત્તબ્બે – ‘‘અકુસલમૂલં પટિસન્દહતિ કુસલમૂલ’’ન્તિ.

૬૮૭. અકુસલમૂલં પટિસન્દહતિ કુસલમૂલન્તિ? આમન્તા. અકુસલમૂલં અયોનિસો મનસિકરોતો ઉપ્પજ્જતીતિ? આમન્તા. કુસલં અયોનિસો મનસિકરોતો ઉપ્પજ્જતીતિ? ન હેવં વત્તબ્બે…પે… નનુ કુસલં યોનિસો મનસિકરોતો ઉપ્પજ્જતીતિ? આમન્તા. હઞ્ચિ કુસલં યોનિસો મનસિકરોતો ઉપ્પજ્જતિ, નો ચ વત રે વત્તબ્બે – ‘‘અકુસલમૂલં પટિસન્દહતિ કુસલમૂલ’’ન્તિ.

અકુસલમૂલં પટિસન્દહતિ કુસલમૂલન્તિ? આમન્તા. કામસઞ્ઞાય અનન્તરા નેક્ખમ્મસઞ્ઞા ઉપ્પજ્જતિ, બ્યાપાદસઞ્ઞાય અનન્તરા અબ્યાપાદસઞ્ઞા ઉપ્પજ્જતિ, વિહિંસાસઞ્ઞાય અનન્તરા અવિહિંસાસઞ્ઞા ઉપ્પજ્જતિ, બ્યાપાદસ્સ અનન્તરા મેત્તા ઉપ્પજ્જતિ, વિહિંસાય અનન્તરા કરુણા ઉપ્પજ્જતિ, અરતિયા અનન્તરા મુદિતા ઉપ્પજ્જતિ, પટિઘસ્સ અનન્તરા ઉપેક્ખા ઉપ્પજ્જતીતિ? ન હેવં વત્તબ્બે…પે….

૬૮૮. કુસલમૂલં પટિસન્દહતિ અકુસલમૂલન્તિ? આમન્તા. યા કુસલસ્સ ઉપ્પાદાય આવટ્ટના…પે… પણિધિ, સાવ અકુસલસ્સ ઉપ્પાદાય આવટ્ટના…પે… પણિધીતિ? ન હેવં વત્તબ્બે…પે….

કુસલમૂલં પટિસન્દહતિ અકુસલમૂલં, ન વત્તબ્બં – ‘‘યા કુસલસ્સ ઉપ્પાદાય આવટ્ટના…પે… પણિધિ, સાવ અકુસલસ્સ ઉપ્પાદાય આવટ્ટના…પે… પણિધી’’તિ? આમન્તા. અકુસલં અનાવટ્ટેન્તસ્સ ઉપ્પજ્જતિ…પે… અપ્પણિદહન્તસ્સ ઉપ્પજ્જતીતિ? ન હેવં વત્તબ્બે…પે… નનુ અકુસલં આવટ્ટેન્તસ્સ ઉપ્પજ્જતિ…પે… પણિદહન્તસ્સ ઉપ્પજ્જતીતિ? આમન્તા. હઞ્ચિ અકુસલં આવટ્ટેન્તસ્સ ઉપ્પજ્જતિ…પે… પણિદહન્તસ્સ ઉપ્પજ્જતિ, નો ચ વત રે વત્તબ્બે – ‘‘કુસલમૂલં પટિસન્દહતિ અકુસલમૂલ’’ન્તિ.

૬૮૯. કુસલમૂલં પટિસન્દહતિ અકુસલમૂલન્તિ? આમન્તા. કુસલં યોનિસો મનસિકરોતો ઉપ્પજ્જતીતિ? આમન્તા. અકુસલં યોનિસો મનસિકરોતો ઉપ્પજ્જતીતિ? ન હેવં વત્તબ્બે…પે… નનુ અકુસલં અયોનિસો મનસિકરોતો ઉપ્પજ્જતીતિ? આમન્તા. હઞ્ચિ અકુસલં અયોનિસો મનસિકરોતો ઉપ્પજ્જતિ, નો ચ વત રે વત્તબ્બે – ‘‘કુસલમૂલં પટિસન્દહતિ અકુસલમૂલ’’ન્તિ.

કુસલમૂલં પટિસન્દહતિ અકુસલમૂલન્તિ? આમન્તા. નેક્ખમ્મસઞ્ઞાય અનન્તરા કામસઞ્ઞા ઉપ્પજ્જતિ, અબ્યાપાદસઞ્ઞાય અનન્તરા બ્યાપાદસઞ્ઞા ઉપ્પજ્જતિ, અવિહિંસાસઞ્ઞાય અનન્તરા વિહિંસાસઞ્ઞા ઉપ્પજ્જતિ, મેત્તાય અનન્તરા બ્યાપાદો ઉપ્પજ્જતિ, કરુણાય અનન્તરા વિહિંસા ઉપ્પજ્જતિ, મુદિતાય અનન્તરા અરતિ ઉપ્પજ્જતિ, ઉપેક્ખાય અનન્તરા પટિઘં ઉપ્પજ્જતીતિ? ન હેવં વત્તબ્બે…પે….

૬૯૦. ન વત્તબ્બં – ‘‘અકુસલમૂલં પટિસન્દહતિ કુસલમૂલં, કુસલમૂલં પટિસન્દહતિ અકુસલમૂલ’’ન્તિ? આમન્તા. નનુ યસ્મિંયેવ વત્થુસ્મિં રજ્જતિ તસ્મિઞ્ઞેવ વત્થુસ્મિં વિરજ્જતિ, યસ્મિંયેવ વત્થુસ્મિં વિરજ્જતિ તસ્મિઞ્ઞેવ વત્થુસ્મિં રજ્જતીતિ? આમન્તા. હઞ્ચિ યસ્મિઞ્ઞેવ વત્થુસ્મિં રજ્જતિ તસ્મિઞ્ઞેવ વત્થુસ્મિં વિરજ્જતિ, યસ્મિઞ્ઞેવ વત્થુસ્મિં વિરજ્જતિ તસ્મિઞ્ઞેવ વત્થુસ્મિં રજ્જતિ, તેન વત રે વત્તબ્બે – ‘‘અકુસલમૂલં પટિસન્દહતિ કુસલમૂલં, કુસલમૂલં પટિસન્દહતિ અકુસલમૂલ’’ન્તિ.

કુસલાકુસલપટિસન્દહનકથા નિટ્ઠિતા.