૭. સત્તમવગ્ગો

(૭૦) ૮. જરામરણં વિપાકોતિકથા

૪૯૫. જરામરણં વિપાકોતિ? આમન્તા. સુખવેદનિયં દુક્ખવેદનિયં અદુક્ખમસુખવેદનિયં, સુખાય વેદનાય સમ્પયુત્તં, દુક્ખાય વેદનાય સમ્પયુત્તં, અદુક્ખમસુખાય વેદનાય સમ્પયુત્તં, ફસ્સેન સમ્પયુત્તં, વેદનાય સમ્પયુત્તં, સઞ્ઞાય સમ્પયુત્તં, ચેતનાય સમ્પયુત્તં, ચિત્તેન સમ્પયુત્તં, સારમ્મણં; અત્થિ તસ્સ આવટ્ટના આભોગો સમન્નાહારો મનસિકારો ચેતના પત્થના પણિધીતિ? ન હેવં વત્તબ્બે…પે… નનુ ન સુખવેદનિયં ન દુક્ખવેદનિયં…પે… અનારમ્મણં; નત્થિ તસ્સ આવટ્ટના…પે… પણિધીતિ? આમન્તા. હઞ્ચિ ન સુખવેદનિયં ન દુક્ખવેદનિયં…પે… અનારમ્મણં; નત્થિ તસ્સ આવટ્ટના …પે… પણિધિ, નો ચ વત રે વત્તબ્બે – ‘‘જરામરણં વિપાકો’’તિ.

ફસ્સો વિપાકો, ફસ્સો સુખવેદનિયો દુક્ખવેદનિયો…પે… સારમ્મણો; અત્થિ તસ્સ આવટ્ટના…પે… પણિધીતિ? આમન્તા. જરામરણં વિપાકો, જરામરણં સુખવેદનિયં દુક્ખવેદનિયં…પે… સારમ્મણં; અત્થિ તસ્સ આવટ્ટના…પે… પણિધીતિ? ન હેવં વત્તબ્બે…પે….

જરામરણં વિપાકો, જરામરણં ન સુખવેદનિયં ન દુક્ખવેદનિયં…પે… અનારમ્મણં; નત્થિ તસ્સ આવટ્ટના…પે… પણિધીતિ? આમન્તા. ફસ્સો વિપાકો, ફસ્સો ન સુખવેદનિયો ન દુક્ખવેદનિયો…પે… અનારમ્મણો; નત્થિ તસ્સ આવટ્ટના…પે… પણિધીતિ? ન હેવં વત્તબ્બે…પે….

૪૯૬. અકુસલાનં ધમ્માનં જરામરણં, અકુસલાનં ધમ્માનં વિપાકોતિ? આમન્તા. કુસલાનં ધમ્માનં જરામરણં, કુસલાનં ધમ્માનં વિપાકોતિ? ન હેવં વત્તબ્બે…પે….

કુસલાનં ધમ્માનં જરામરણં, ન વત્તબ્બં – ‘‘કુસલાનં ધમ્માનં વિપાકો’’તિ? આમન્તા. અકુસલાનં ધમ્માનં જરામરણં, ન વત્તબ્બં – ‘‘અકુસલાનં ધમ્માનં વિપાકો’’તિ? ન હેવં વત્તબ્બે…પે….

કુસલાનં ધમ્માનં જરામરણં, અકુસલાનં ધમ્માનં વિપાકોતિ? આમન્તા. અકુસલાનં ધમ્માનં જરામરણં, કુસલાનં ધમ્માનં વિપાકોતિ? ન હેવં વત્તબ્બે…પે….

અકુસલાનં ધમ્માનં જરામરણં, ન વત્તબ્બં – ‘‘કુસલાનં ધમ્માનં વિપાકો’’તિ? આમન્તા. કુસલાનં ધમ્માનં જરામરણં, ન વત્તબ્બં – ‘‘અકુસલાનં ધમ્માનં વિપાકો’’તિ? ન હેવં વત્તબ્બે…પે….

કુસલાનઞ્ચ અકુસલાનઞ્ચ ધમ્માનં જરામરણં, અકુસલાનં ધમ્માનં વિપાકોતિ? આમન્તા. કુસલાનઞ્ચ અકુસલાનઞ્ચ ધમ્માનં જરામરણં, કુસલાનં ધમ્માનં વિપાકોતિ? ન હેવં વત્તબ્બે…પે….

કુસલાનઞ્ચ અકુસલાનઞ્ચ ધમ્માનં જરામરણં, ન વત્તબ્બં – ‘‘કુસલાનં ધમ્માનં વિપાકો’’તિ? આમન્તા. કુસલાનઞ્ચ અકુસલાનઞ્ચ ધમ્માનં જરામરણં, ન વત્તબ્બં – ‘‘અકુસલાનં ધમ્માનં વિપાકો’’તિ? ન હેવં વત્તબ્બે…પે….

૪૯૭. ન વત્તબ્બં – ‘‘જરામરણં વિપાકો’’તિ? આમન્તા. નનુ અત્થિ દુબ્બણ્ણસંવત્તનિયં કમ્મં અપ્પાયુકસંવત્તનિયં કમ્મન્તિ? આમન્તા. હઞ્ચિ અત્થિ દુબ્બણ્ણસંવત્તનિયં કમ્મં અપ્પાયુકસંવત્તનિયં કમ્મં, તેન વત રે વત્તબ્બે – ‘‘જરામરણં વિપાકો’’તિ.

જરામરણં વિપાકોતિકથા નિટ્ઠિતા.