૭. સત્તમવગ્ગો

(૭૧) ૯. અરિયધમ્મવિપાકકથા

૪૯૮. નત્થિ અરિયધમ્મવિપાકોતિ? આમન્તા. નનુ મહપ્ફલં સામઞ્ઞં મહપ્ફલં બ્રહ્મઞ્ઞન્તિ? આમન્તા. હઞ્ચિ મહપ્ફલં સામઞ્ઞં મહપ્ફલં બ્રહ્મઞ્ઞં, નો ચ વત રે વત્તબ્બે – ‘‘નત્થિ અરિયધમ્મવિપાકો’’તિ.

નત્થિ અરિયધમ્મવિપાકોતિ? આમન્તા. નનુ અત્થિ સોતાપત્તિફલન્તિ? આમન્તા. હઞ્ચિ અત્થિ સોતાપત્તિફલં, નો ચ વત રે વત્તબ્બે – ‘‘નત્થિ અરિયધમ્મવિપાકો’’તિ. નનુ અત્થિ સકદાગામિફલં…પે… અનાગામિફલં…પે… અરહત્તફલન્તિ? આમન્તા. હઞ્ચિ અત્થિ અરહત્તફલં, નો ચ વત રે વત્તબ્બે – ‘‘નત્થિ અરિયધમ્મવિપાકો’’તિ.

સોતાપત્તિફલં ન વિપાકોતિ? આમન્તા. દાનફલં ન વિપાકોતિ? ન હેવં વત્તબ્બે…પે… સોતાપત્તિફલં ન વિપાકોતિ? આમન્તા. સીલફલં…પે… ભાવનાફલં ન વિપાકોતિ? ન હેવં વત્તબ્બે…પે….

સકદાગામિફલં…પે… અનાગામિફલં…પે… અરહત્તફલં ન વિપાકોતિ? આમન્તા. દાનફલં ન વિપાકોતિ? ન હેવં વત્તબ્બે…પે… અરહત્તફલં ન વિપાકોતિ? આમન્તા. સીલફલં…પે… ભાવનાફલં ન વિપાકોતિ? ન હેવં વત્તબ્બે…પે… દાનફલં વિપાકોતિ? આમન્તા. સોતાપત્તિફલં વિપાકોતિ? ન હેવં વત્તબ્બે…પે….

દાનફલં વિપાકોતિ? આમન્તા. સકદાગામિફલં…પે… અનાગામિફલં…પે… અરહત્તફલં વિપાકોતિ? ન હેવં વત્તબ્બે…પે… સીલફલં…પે… ભાવનાફલં વિપાકોતિ? આમન્તા. સોતાપત્તિફલં વિપાકોતિ? ન હેવં વત્તબ્બે…પે… ભાવનાફલં વિપાકોતિ? આમન્તા. સકદાગામિફલં…પે… અનાગામિફલં …પે… અરહત્તફલં વિપાકોતિ? ન હેવં વત્તબ્બે…પે….

૪૯૯. કામાવચરં કુસલં સવિપાકન્તિ? આમન્તા. લોકુત્તરં કુસલં સવિપાકન્તિ? ન હેવં વત્તબ્બે…પે… રૂપાવચરં કુસલં…પે… અરૂપાવચરં કુસલં સવિપાકન્તિ? આમન્તા. લોકુત્તરં કુસલં સવિપાકન્તિ? ન હેવં વત્તબ્બે…પે….

લોકુત્તરં કુસલં અવિપાકન્તિ? આમન્તા. કામાવચરં કુસલં અવિપાકન્તિ? ન હેવં વત્તબ્બે…પે… લોકુત્તરં કુસલં અવિપાકન્તિ? આમન્તા. રૂપાવચરં…પે… અરૂપાવચરં કુસલં અવિપાકન્તિ? ન હેવં વત્તબ્બે…પે….

૫૦૦. કામાવચરં કુસલં સવિપાકં આચયગામીતિ? આમન્તા. લોકુત્તરં કુસલં સવિપાકં આચયગામીતિ? ન હેવં વત્તબ્બે…પે… રૂપાવચરં…પે… અરૂપાવચરં કુસલં સવિપાકં આચયગામીતિ? આમન્તા. લોકુત્તરં કુસલં સવિપાકં આચયગામીતિ? ન હેવં વત્તબ્બે…પે….

લોકુત્તરં કુસલં સવિપાકં અપચયગામીતિ? આમન્તા. કામાવચરં કુસલં સવિપાકં અપચયગામીતિ? ન હેવં વત્તબ્બે…પે…. લોકુત્તરં કુસલં સવિપાકં અપચયગામીતિ? આમન્તા. રૂપાવચરં…પે… અરૂપાવચરં કુસલં સવિપાકં અપચયગામીતિ? ન હેવં વત્તબ્બે…પે….

અરિયધમ્મવિપાકકથા નિટ્ઠિતા.