(૬૪) ૨. સમ્પયુત્તકથા

૪૭૩. નત્થિ કેચિ ધમ્મા કેહિચિ ધમ્મેહિ સમ્પયુત્તાતિ? આમન્તા. નનુ અત્થિ કેચિ ધમ્મા કેહિચિ ધમ્મેહિ સહગતા સહજાતા સંસટ્ઠા એકુપ્પાદા એકનિરોધા એકવત્થુકા એકારમ્મણાતિ? આમન્તા. હઞ્ચિ અત્થિ કેચિ ધમ્મા કેહિચિ ધમ્મેહિ સહગતા સહજાતા સંસટ્ઠા એકુપ્પાદા એકનિરોધા એકવત્થુકા એકારમ્મણા, નો ચ વત રે વત્તબ્બે – ‘‘નત્થિ કેચિ ધમ્મા કેહિચિ ધમ્મેહિ સમ્પયુત્તા’’તિ.

વેદનાક્ખન્ધો સઞ્ઞાક્ખન્ધેન સહજાતોતિ? આમન્તા. હઞ્ચિ વેદનાક્ખન્ધો સઞ્ઞાક્ખન્ધેન સહજાતો, તેન વત રે વત્તબ્બે – ‘‘વેદનાક્ખન્ધો સઞ્ઞાક્ખન્ધેન સમ્પયુત્તો’’તિ.

વેદનાક્ખન્ધો સઙ્ખારક્ખન્ધેન… વિઞ્ઞાણક્ખન્ધેન સહજાતોતિ? આમન્તા. હઞ્ચિ વેદનાક્ખન્ધો વિઞ્ઞાણક્ખન્ધેન સહજાતો, તેન વત રે વત્તબ્બે – ‘‘વેદનાક્ખન્ધો વિઞ્ઞાણક્ખન્ધેન સમ્પયુત્તો’’તિ.

સઞ્ઞાક્ખન્ધો … સઙ્ખારક્ખન્ધો… વિઞ્ઞાણક્ખન્ધો વેદનાખન્ધેન… સઞ્ઞાક્ખન્ધેન… સઙ્ખારક્ખન્ધેન સહજાતોતિ? આમન્તા. હઞ્ચિ વિઞ્ઞાણક્ખન્ધો સઙ્ખારક્ખન્ધેન સહજાતો, તેન વત રે વત્તબ્બે – ‘‘વિઞ્ઞાણક્ખન્ધો સઙ્ખારક્ખન્ધેન સમ્પયુત્તો’’તિ.

૪૭૪. યથા તિલમ્હિ તેલં અનુગતં અનુપવિટ્ઠં, ઉચ્છુમ્હિ રસો અનુગતો અનુપવિટ્ઠો; એવમેવ તે ધમ્મા તેહિ ધમ્મેહિ અનુગતા અનુપવિટ્ઠાતિ? ન હેવં વત્તબ્બે…પે….

સમ્પયુત્તકથા નિટ્ઠિતા.