(૫૯) ૭. આકાસો સનિદસ્સનોતિકથા

૪૬૩. આકાસો સનિદસ્સનોતિ? આમન્તા. રૂપં રૂપાયતનં રૂપધાતુ નીલં પીતકં લોહિતકં ઓદાતં ચક્ખુવિઞ્ઞેય્યં ચક્ખુસ્મિં પટિહઞ્ઞતિ ચક્ખુસ્સ આપાથં આગચ્છતીતિ? ન હેવં વત્તબ્બે…પે….

આકાસો સનિદસ્સનોતિ? આમન્તા. ચક્ખુઞ્ચ પટિચ્ચ આકાસઞ્ચ ઉપ્પજ્જતિ ચક્ખુવિઞ્ઞાણન્તિ? ન હેવં વત્તબ્બે …પે….

ચક્ખુઞ્ચ પટિચ્ચ આકાસઞ્ચ ઉપ્પજ્જતિ ચક્ખુવિઞ્ઞાણન્તિ? આમન્તા. ‘‘ચક્ખુઞ્ચ પટિચ્ચ આકાસઞ્ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ [અત્થિ (?)] સુત્તન્તોતિ? નત્થિ. ‘‘ચક્ખુઞ્ચ પટિચ્ચ રૂપે ચ ઉપ્પજ્જતિ ચક્ખુવિઞ્ઞાણ’’ન્તિ [મ. નિ. ૧.૪૦૦; ૩.૪૨૧; સં. નિ. ૪.૬૦] – અત્થેવ સુત્તન્તોતિ? આમન્તા. હઞ્ચિ ‘‘ચક્ખુઞ્ચ પટિચ્ચ રૂપે ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તો, નો ચ વત રે વત્તબ્બે – ‘‘ચક્ખુઞ્ચ પટિચ્ચ આકાસઞ્ચ ઉપ્પજ્જતિ ચક્ખુવિઞ્ઞાણ’’ન્તિ.

૪૬૪. ન વત્તબ્બં – ‘‘આકાસો સનિદસ્સનો’’તિ? આમન્તા. નનુ પસ્સતિ દ્વિન્નં રુક્ખાનં અન્તરં, દ્વિન્નં થમ્ભાનં અન્તરં, તાળચ્છિદ્દં વાતપાનચ્છિદ્દન્તિ? આમન્તા. હઞ્ચિ પસ્સતિ દ્વિન્નં રુક્ખાનં અન્તરં, દ્વિન્નં થમ્ભાનં અન્તરં, તાળચ્છિદ્દં વાતપાનચ્છિદ્દં, તેન વત રે વત્તબ્બે – ‘‘આકાસો સનિદસ્સનો’’તિ.

આકાસો સનિદસ્સનોતિકથા નિટ્ઠિતા.