૬. છટ્ઠવગ્ગો

(૬૦) ૮. પથવીધાતુ સનિદસ્સનાતિઆદિકથા

૪૬૫. પથવીધાતુ સનિદસ્સનાતિ? આમન્તા. રૂપં રૂપાયતનં રૂપધાતુ નીલં પીતકં લોહિતકં ઓદાતં ચક્ખુવિઞ્ઞેય્યં ચક્ખુસ્મિં પટિહઞ્ઞતિ ચક્ખુસ્સ આપાથં આગચ્છતીતિ? ન હેવં વત્તબ્બે…પે….

પથવીધાતુ સનિદસ્સનાતિ? આમન્તા. ચક્ખુઞ્ચ પટિચ્ચ પથવીધાતુઞ્ચ ઉપ્પજ્જતિ ચક્ખુવિઞ્ઞાણન્તિ? ન હેવં વત્તબ્બે…પે….

ચક્ખુઞ્ચ પટિચ્ચ પથવીધાતુઞ્ચ ઉપ્પજ્જતિ ચક્ખુવિઞ્ઞાણન્તિ? આમન્તા. ‘‘ચક્ખુઞ્ચ પટિચ્ચ પથવીધાતુઞ્ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તોતિ? નત્થિ. ‘‘ચક્ખુઞ્ચ પટિચ્ચ રૂપે ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તોતિ? આમન્તા. હઞ્ચિ ‘‘ચક્ખુઞ્ચ પટિચ્ચ રૂપે ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તો, નો ચ વત રે વત્તબ્બે – ‘‘ચક્ખુઞ્ચ પટિચ્ચ પથવીધાતુઞ્ચ ઉપ્પજ્જતિ ચક્ખુવિઞ્ઞાણ’’ન્તિ.

૪૬૬. ન વત્તબ્બં – ‘‘પથવીધાતુ સનિદસ્સના’’તિ? આમન્તા. નનુ પસ્સતિ ભૂમિં પાસાણં પબ્બતન્તિ? આમન્તા. હઞ્ચિ પસ્સતિ [પસ્સસિ (સી. સ્યા. ક.) એવમુપરિપિ] ભૂમિં પાસાણં પબ્બતં, તેન વત રે વત્તબ્બે – ‘‘પથવીધાતુ સનિદસ્સના’’તિ…પે….

ન વત્તબ્બં – ‘‘આપોધાતુ સનિદસ્સના’’તિ? આમન્તા. નનુ પસ્સતિ ઉદકન્તિ? આમન્તા. હઞ્ચિ પસ્સતિ ઉદકં, તેન વત રે વત્તબ્બે – ‘‘આપોધાતુ સનિદસ્સનાતિ…પે….

ન વત્તબ્બં – તેજોધાતુ સનિદસ્સનાતિ? આમન્તા. નનુ પસ્સતિ અગ્ગિં જલન્તન્તિ? આમન્તા. હઞ્ચિ પસ્સતિ અગ્ગિં જલન્તં, તેન વત રે વત્તબ્બે – ‘‘તેજોધાતુ સનિદસ્સના’’તિ…પે….

ન વત્તબ્બં – ‘‘વાયોધાતુ સનિદસ્સના’’તિ? આમન્તા. નનુ પસ્સતિ વાતેન રુક્ખે સઞ્ચાલિયમાનેતિ? આમન્તા. હઞ્ચિ પસ્સતિ વાતેન રુક્ખે સઞ્ચાલિયમાને, તેન વત રે વત્તબ્બે – ‘‘વાયોધાતુ સનિદસ્સના’’તિ…પે….

પથવીધાતુ સનિદસ્સનાતિઆદિકથા નિટ્ઠિતા.