૬. છટ્ઠવગ્ગો

(૫૩) ૧. નિયામકથા

૪૪૫. નિયામો અસઙ્ખતોતિ? આમન્તા. નિબ્બાનં તાણં લેણં સરણં પરાયનં અચ્ચુતં અમતન્તિ? ન હેવં વત્તબ્બે…પે….

નિયામો અસઙ્ખતો, નિબ્બાનં અસઙ્ખતન્તિ? આમન્તા. દ્વે અસઙ્ખતાનીતિ? ન હેવં વત્તબ્બે…પે….

દ્વે અસઙ્ખતાનીતિ? આમન્તા. દ્વે તાણાનિ દ્વે લેણાનિ દ્વે સરણાનિ દ્વે પરાયનાનિ દ્વે અચ્ચુતાનિ દ્વે અમતાનિ દ્વે નિબ્બાનાનીતિ? ન હેવં વત્તબ્બે…પે….

દ્વે નિબ્બાનાનીતિ? આમન્તા. અત્થિ દ્વિન્નં નિબ્બાનાનં ઉચ્ચનીચતા હીનપણીતતા ઉક્કંસાવકંસો સીમા વા ભેદો વા રાજિ વા અન્તરિકા વાતિ? ન હેવં વત્તબ્બે…પે….

નિયામો અસઙ્ખતોતિ? આમન્તા. અત્થિ કેચિ નિયામં ઓક્કમન્તિ પટિલભન્તિ ઉપ્પાદેન્તિ સમુપ્પાદેન્તિ ઉટ્ઠાપેન્તિ સમુટ્ઠાપેન્તિ નિબ્બત્તેન્તિ અભિનિબ્બત્તેન્તિ જનેન્તિ સઞ્જનેન્તીતિ? આમન્તા. અત્થિ કેચિ અસઙ્ખતં ઓક્કમન્તિ પટિલભન્તિ ઉપ્પાદેન્તિ સમુપ્પાદેન્તિ ઉટ્ઠાપેન્તિ સમુટ્ઠાપેન્તિ નિબ્બત્તેન્તિ અભિનિબ્બત્તેન્તિ જનેન્તિ સઞ્જનેન્તીતિ? ન હેવં વત્તબ્બે…પે….

૪૪૬. નિયામો અસઙ્ખતોતિ? આમન્તા. મગ્ગો અસઙ્ખતોતિ? ન હેવં વત્તબ્બે…પે….

મગ્ગો સઙ્ખતોતિ? આમન્તા. નિયામો સઙ્ખતોતિ? ન હેવં વત્તબ્બે…પે….

સોતાપત્તિનિયામો અસઙ્ખતોતિ? આમન્તા. સોતાપત્તિમગ્ગો અસઙ્ખતોતિ? ન હેવં વત્તબ્બે…પે….

સોતાપત્તિમગ્ગો સઙ્ખતોતિ? આમન્તા. સોતાપત્તિનિયામો સઙ્ખતોતિ? ન હેવં વત્તબ્બે…પે….

સકદાગામિનિયામો…પે… અનાગામિનિયામો…પે… અરહત્તનિયામો અસઙ્ખતોતિ? આમન્તા. અરહત્તમગ્ગો અસઙ્ખતોતિ? ન હેવં વત્તબ્બે …પે… અરહત્તમગ્ગો સઙ્ખતોતિ? આમન્તા. અરહત્તનિયામો સઙ્ખતોતિ? ન હેવં વત્તબ્બે…પે….

સોતાપત્તિનિયામો અસઙ્ખતો…પે… અરહત્તનિયામો અસઙ્ખતો, નિબ્બાનં અસઙ્ખતન્તિ? આમન્તા. પઞ્ચ અસઙ્ખતાનીતિ? ન હેવં વત્તબ્બે…પે… પઞ્ચ અસઙ્ખતાનીતિ? આમન્તા. પઞ્ચ તાણાનિ…પે… અન્તરિકા વાતિ? ન હેવં વત્તબ્બે…પે….

નિયામો અસઙ્ખતોતિ? આમન્તા. મિચ્છત્તનિયામો અસઙ્ખતોતિ? ન હેવં વત્તબ્બે…પે… મિચ્છત્તનિયામો સઙ્ખતોતિ? આમન્તા. સમ્મત્તનિયામો સઙ્ખતોતિ? ન હેવં વત્તબ્બે…પે….

૪૪૭. ન વત્તબ્બં – ‘‘નિયામો અસઙ્ખતો’’તિ? આમન્તા. નિયામે ઉપ્પજ્જ નિરુદ્ધે અનિયતો હોતીતિ? ન હેવં વત્તબ્બે…પે…. તેન હિ નિયામો અસઙ્ખતોતિ. મિચ્છત્તનિયામે ઉપ્પજ્જ નિરુદ્ધે અનિયતો હોતીતિ? ન હેવં વત્તબ્બે…પે… તેન હિ મિચ્છત્તનિયામો અસઙ્ખતોતિ.

નિયામકથા નિટ્ઠિતા.

૬. છટ્ઠવગ્ગો

(૫૪) ૨. પટિચ્ચસમુપ્પાદકથા

૪૪૮. પટિચ્ચસમુપ્પાદો અસઙ્ખતોતિ? આમન્તા. નિબ્બાનં તાણં લેણં સરણં પરાયનં અચ્ચુતં અમતન્તિ? ન હેવં વત્તબ્બે…પે… પટિચ્ચસમુપ્પાદો અસઙ્ખતો, નિબ્બાનં અસઙ્ખતન્તિ? આમન્તા. દ્વે અસઙ્ખતાનીતિ? ન હેવં વત્તબ્બે…પે… દ્વે અસઙ્ખતાનીતિ? આમન્તા. દ્વે તાણાનિ દ્વે લેણાનિ દ્વે સરણાનિ દ્વે પરાયનાનિ દ્વે અચ્ચુતાનિ દ્વે અમતાનિ દ્વે નિબ્બાનાનીતિ? ન હેવં વત્તબ્બે…પે… દ્વે નિબ્બાનાનીતિ? આમન્તા. અત્થિ દ્વિન્નં નિબ્બાનાનં ઉચ્ચનીચતા હીનપણીતતા ઉક્કંસાવકંસો સીમા વા ભેદો વા રાજિ વા અન્તરિકા વાતિ? ન હેવં વત્તબ્બે…પે….

૪૪૯. પટિચ્ચસમુપ્પાદો અસઙ્ખતોતિ? આમન્તા. અવિજ્જા અસઙ્ખતાતિ? ન હેવં વત્તબ્બે…પે… અવિજ્જા સઙ્ખતાતિ? આમન્તા. પટિચ્ચસમુપ્પાદો સઙ્ખતોતિ? ન હેવં વત્તબ્બે…પે… પટિચ્ચસમુપ્પાદો અસઙ્ખતોતિ? આમન્તા. અવિજ્જાપચ્ચયા સઙ્ખારા અસઙ્ખતાતિ? ન હેવં વત્તબ્બે…પે… અવિજ્જાપચ્ચયા સઙ્ખારા સઙ્ખતાતિ? આમન્તા. પટિચ્ચસમુપ્પાદો સઙ્ખતોતિ? ન હેવં વત્તબ્બે…પે… પટિચ્ચસમુપ્પાદો અસઙ્ખતોતિ? આમન્તા. સઙ્ખારપચ્ચયા વિઞ્ઞાણં અસઙ્ખતન્તિ? ન હેવં વત્તબ્બે…પે… સઙ્ખારપચ્ચયા વિઞ્ઞાણં સઙ્ખતન્તિ? આમન્તા. પટિચ્ચસમુપ્પાદો સઙ્ખતોતિ? ન હેવં વત્તબ્બે…પે… પટિચ્ચસમુપ્પાદો અસઙ્ખતોતિ? આમન્તા. વિઞ્ઞાણપચ્ચયા નામરૂપં અસઙ્ખતન્તિ? ન હેવં વત્તબ્બે…પે… વિઞ્ઞાણપચ્ચયા નામરૂપં સઙ્ખતન્તિ? આમન્તા. પટિચ્ચસમુપ્પાદો સઙ્ખતોતિ? ન હેવં વત્તબ્બે…પે… પટિચ્ચસમુપ્પાદો અસઙ્ખતોતિ? આમન્તા. જાતિપચ્ચયા જરામરણં અસઙ્ખતન્તિ? ન હેવં વત્તબ્બે…પે… જાતિપચ્ચયા જરામરણં સઙ્ખતન્તિ? આમન્તા. પટિચ્ચસમુપ્પાદો સઙ્ખતોતિ? ન હેવં વત્તબ્બે…પે….

૪૫૦. ન વત્તબ્બં – ‘‘પટિચ્ચસમુપ્પાદો અસઙ્ખતો’’તિ? આમન્તા. નનુ વુત્તં ભગવતા – ‘‘જાતિપચ્ચયા, ભિક્ખવે, જરામરણં. ઉપ્પાદા વા તથાગતાનં અનુપ્પાદા વા તથાગતાનં ઠિતાવ સા ધાતુ ધમ્મટ્ઠિતતા ધમ્મનિયામતા ઇદપ્પચ્ચયતા. તં તથાગતો અભિસમ્બુજ્ઝતિ અભિસમેતિ. અભિસમ્બુજ્ઝિત્વા અભિસમેત્વા આચિક્ખતિ દેસેતિ પઞ્ઞાપેતિ પટ્ઠપેતિ વિવરતિ વિભજતિ ઉત્તાનિં કરોતિ. ‘પસ્સથા’તિ ચાહ – જાતિપચ્ચયા, ભિક્ખવે, જરામરણં. ભવપચ્ચયા, ભિક્ખવે, જાતિ…પે… અવિજ્જાપચ્ચયા, ભિક્ખવે, સઙ્ખારા. ઉપ્પાદા વા તથાગતાનં અનુપ્પાદા વા તથાગતાનં ઠિતાવ સા ધાતુ…પે… ‘પસ્સથા’તિ ચાહ – અવિજ્જાપચ્ચયા, ભિક્ખવે, સઙ્ખારા. ઇતિ ખો, ભિક્ખવે, યા તત્ર તથતા અવિતથતા અનઞ્ઞથતા ઇદપ્પચ્ચયતા – અયં વુચ્ચતિ, ભિક્ખવે, પટિચ્ચસમુપ્પાદો’’તિ [સં. નિ. ૨.૨૦]. અત્થેવ સુત્તન્તોતિ? આમન્તા. તેન હિ પટિચ્ચસમુપ્પાદો અસઙ્ખતોતિ.

૪૫૧. અવિજ્જાપચ્ચયા સઙ્ખારાતિ યા તત્થ ધમ્મટ્ઠિતતા ધમ્મનિયામતા અસઙ્ખતા, નિબ્બાનં અસઙ્ખતન્તિ? આમન્તા. દ્વે અસઙ્ખતાનીતિ? ન હેવં વત્તબ્બે…પે… દ્વે અસઙ્ખતાનીતિ? આમન્તા. દ્વે તાણાનિ…પે… અન્તરિકા વાતિ? ન હેવં વત્તબ્બે…પે….

અવિજ્જાપચ્ચયા સઙ્ખારાતિ યા તત્થ ધમ્મટ્ઠિતતા ધમ્મનિયામતા અસઙ્ખતા, સઙ્ખારપચ્ચયા વિઞ્ઞાણન્તિ યા તત્થ ધમ્મટ્ઠિતતા ધમ્મનિયામતા અસઙ્ખતા, નિબ્બાનં અસઙ્ખતન્તિ? આમન્તા. તીણિ અસઙ્ખતાનીતિ? ન હેવં વત્તબ્બે…પે…. તીણિ અસઙ્ખતાનીતિ? આમન્તા. તીણિ તાણાનિ…પે… અન્તરિકા વાતિ? ન હેવં વત્તબ્બે…પે….

અવિજ્જાપચ્ચયા સઙ્ખારાતિ યા તત્થ ધમ્મટ્ઠિતતા ધમ્મનિયામતા અસઙ્ખતા, સઙ્ખારપચ્ચયા વિઞ્ઞાણન્તિ યા તત્થ ધમ્મટ્ઠિતતા ધમ્મનિયામતા અસઙ્ખતા…પે… જાતિપચ્ચયા જરામરણન્તિ યા તત્થ ધમ્મટ્ઠિતતા ધમ્મનિયામતા અસઙ્ખતા, નિબ્બાનં અસઙ્ખતન્તિ? આમન્તા. દ્વાદસ અસઙ્ખતાનીતિ? ન હેવં વત્તબ્બે…પે… દ્વાદસ અસઙ્ખતાનીતિ? આમન્તા. દ્વાદસ તાણાનિ દ્વાદસ લેણાનિ…પે… અન્તરિકા વાતિ? ન હેવં વત્તબ્બે…પે….

પટિચ્ચસમુપ્પાદકથા નિટ્ઠિતા.

૬. છટ્ઠવગ્ગો

(૫૫) ૩. સચ્ચકથા

૪૫૨. ચત્તારિ સચ્ચાનિ અસઙ્ખતાનીતિ? આમન્તા. ચત્તારિ તાણાનિ ચત્તારિ લેણાનિ ચત્તારિ સરણાનિ ચત્તારિ પરાયનાનિ ચત્તારિ અચ્ચુતાનિ ચત્તારિ અમતાનિ ચત્તારિ નિબ્બાનાનીતિ? ન હેવં વત્તબ્બે…પે… ચત્તારિ નિબ્બાનાનીતિ? આમન્તા. અત્થિ ચતુન્નં નિબ્બાનાનં ઉચ્ચનીચતા હીનપણીતતા ઉક્કંસાવકંસો સીમા વા ભેદો વા રાજિ વા અન્તરિકા વાતિ? ન હેવં વત્તબ્બે…પે….

દુક્ખસચ્ચં અસઙ્ખતન્તિ? આમન્તા. દુક્ખં અસઙ્ખતન્તિ? ન હેવં વત્તબ્બે…પે… દુક્ખસચ્ચં અસઙ્ખતન્તિ? આમન્તા. કાયિકં દુક્ખં ચેતસિકં દુક્ખં સોકપરિદેવદુક્ખદોમનસ્સઉપાયાસા અસઙ્ખતાતિ? ન હેવં વત્તબ્બે…પે… સમુદયસચ્ચં અસઙ્ખતન્તિ? આમન્તા. સમુદયો અસઙ્ખતોતિ? ન હેવં વત્તબ્બે…પે… સમુદયસચ્ચં અસઙ્ખતન્તિ? આમન્તા. કામતણ્હા ભવતણ્હા વિભવતણ્હા અસઙ્ખતાતિ? ન હેવં વત્તબ્બે…પે… મગ્ગસચ્ચં અસઙ્ખતન્તિ? આમન્તા. મગ્ગો અસઙ્ખતોતિ? ન હેવં વત્તબ્બે…પે… મગ્ગસચ્ચં અસઙ્ખતન્તિ? આમન્તા. સમ્માદિટ્ઠિ…પે… સમ્માસમાધિ અસઙ્ખતોતિ? ન હેવં વત્તબ્બે…પે….

દુક્ખં સઙ્ખતન્તિ? આમન્તા. દુક્ખસચ્ચં સઙ્ખતન્તિ? ન હેવં વત્તબ્બે…પે… કાયિકં દુક્ખં ચેતસિકં દુક્ખં સોકપરિદેવદુક્ખદોમનસ્સઉપાયાસા સઙ્ખતાતિ? આમન્તા. દુક્ખસચ્ચં સઙ્ખતન્તિ? ન હેવં વત્તબ્બે…પે… સમુદયો સઙ્ખતોતિ? આમન્તા. સમુદયસચ્ચં સઙ્ખતન્તિ? ન હેવં વત્તબ્બે…પે… કામતણ્હા ભવતણ્હા વિભવતણ્હા સઙ્ખતાતિ? આમન્તા. સમુદયસચ્ચં સઙ્ખતન્તિ? ન હેવં વત્તબ્બે…પે… મગ્ગો સઙ્ખતોતિ? આમન્તા. મગ્ગસચ્ચં સઙ્ખતન્તિ? ન હેવં વત્તબ્બે…પે… સમ્માદિટ્ઠિ…પે… સમ્માસમાધિ સઙ્ખતોતિ? આમન્તા. મગ્ગસચ્ચં સઙ્ખતન્તિ? ન હેવં વત્તબ્બે…પે….

૪૫૩. નિરોધસચ્ચં અસઙ્ખતં, નિરોધો અસઙ્ખતોતિ? આમન્તા. દુક્ખસચ્ચં અસઙ્ખતં, દુક્ખં અસઙ્ખતન્તિ? ન હેવં વત્તબ્બે…પે… નિરોધસચ્ચં અસઙ્ખતં, નિરોધો અસઙ્ખતોતિ? આમન્તા. સમુદયસચ્ચં અસઙ્ખતં, સમુદયો અસઙ્ખતોતિ? ન હેવં વત્તબ્બે…પે… નિરોધસચ્ચં અસઙ્ખતં, નિરોધો અસઙ્ખતોતિ? આમન્તા. મગ્ગસચ્ચં અસઙ્ખતં, મગ્ગો અસઙ્ખતોતિ? ન હેવં વત્તબ્બે…પે….

દુક્ખસચ્ચં અસઙ્ખતં, દુક્ખં સઙ્ખતન્તિ? આમન્તા. નિરોધસચ્ચં અસઙ્ખતં, નિરોધો સઙ્ખતોતિ? ન હેવં વત્તબ્બે…પે… સમુદયસચ્ચં અસઙ્ખતં, સમુદયો સઙ્ખતોતિ? આમન્તા. નિરોધસચ્ચં અસઙ્ખતં, નિરોધો સઙ્ખતોતિ? ન હેવં વત્તબ્બે…પે… મગ્ગસચ્ચં અસઙ્ખતં, મગ્ગો સઙ્ખતોતિ? આમન્તા. નિરોધસચ્ચં અસઙ્ખતં, નિરોધો સઙ્ખતોતિ? ન હેવં વત્તબ્બે…પે….

૪૫૪. ન વત્તબ્બં – ‘‘ચત્તારિ સચ્ચાનિ અસઙ્ખતાની’’તિ? આમન્તા. નનુ વુત્તં ભગવતા – ‘‘ચત્તારિમાનિ, ભિક્ખવે, તથાનિ અવિતથાનિ અનઞ્ઞથાનિ! કતમાનિ ચત્તારિ? ‘ઇદં દુક્ખ’ન્તિ, ભિક્ખવે, તથમેતં અવિતથમેતં અનઞ્ઞથમેતં…પે… ‘અયં દુક્ખસમુદયો’તિ…પે… ‘અયં દુક્ખનિરોધો’તિ…પે… ‘અયં દુક્ખનિરોધગામિની પટિપદા’તિ તથમેતં અવિતથમેતં અનઞ્ઞથમેતં. ઇમાનિ ખો, ભિક્ખવે, ચત્તારિ તથાનિ અવિતથાનિ અનઞ્ઞથાની’’તિ [સં. નિ. ૫.૧૦૯૦]. અત્થેવ સુત્તન્તોતિ? આમન્તા. તેન હિ ચત્તારિ સચ્ચાનિ અસઙ્ખતાનીતિ.

સચ્ચકથા નિટ્ઠિતા.

૬. છટ્ઠવગ્ગો

(૫૬) ૪. આરુપ્પકથા

૪૫૫. આકાસાનઞ્ચાયતનં અસઙ્ખતન્તિ? આમન્તા. નિબ્બાનં તાણં લેણં સરણં પરાયનં અચ્ચુતં અમતન્તિ? ન હેવં વત્તબ્બે…પે… આકાસાનઞ્ચાયતનં અસઙ્ખતં, નિબ્બાનં અસઙ્ખતન્તિ? આમન્તા. દ્વે અસઙ્ખતાનીતિ? ન હેવં વત્તબ્બે…પે… દ્વે અસઙ્ખતાનીતિ? આમન્તા. દ્વે તાણાનિ…પે… અન્તરિકા વાતિ? ન હેવં વત્તબ્બે…પે….

આકાસાનઞ્ચાયતનં અસઙ્ખતન્તિ? આમન્તા. આકાસાનઞ્ચાયતનં ભવો ગતિ સત્તાવાસો સંસારો યોનિ વિઞ્ઞાણટ્ઠિતિ અત્તભાવપટિલાભોતિ? આમન્તા. અસઙ્ખતં ભવો ગતિ સત્તાવાસો સંસારો યોનિ વિઞ્ઞાણટ્ઠિતિ અત્તભાવપટિલાભોતિ? ન હેવં વત્તબ્બે…પે….

અત્થિ આકાસાનઞ્ચાયતનૂપગં કમ્મન્તિ? આમન્તા. અત્થિ અસઙ્ખતૂપગં કમ્મન્તિ? ન હેવં વત્તબ્બે…પે… અત્થિ આકાસાનઞ્ચાયતનૂપગા સત્તાતિ? આમન્તા. અત્થિ અસઙ્ખતૂપગા સત્તાતિ? ન હેવં વત્તબ્બે…પે….

આકાસાનઞ્ચાયતને સત્તા જાયન્તિ જીયન્તિ મીયન્તિ ચવન્તિ ઉપપજ્જન્તીતિ? આમન્તા. અસઙ્ખતે સત્તા જાયન્તિ જીયન્તિ મીયન્તિ ચવન્તિ ઉપપજ્જન્તીતિ? ન હેવં વત્તબ્બે…પે… આકાસાનઞ્ચાયતને અત્થિ વેદના સઞ્ઞા સઙ્ખારા વિઞ્ઞાણન્તિ? આમન્તા. અસઙ્ખતે અત્થિ વેદના સઞ્ઞા સઙ્ખારા વિઞ્ઞાણન્તિ? ન હેવં વત્તબ્બે…પે… આકાસાનઞ્ચાયતનં ચતુવોકારભવોતિ? આમન્તા. અસઙ્ખતં ચતુવોકારભવોતિ? ન હેવં વત્તબ્બે…પે….

૪૫૬. ન વત્તબ્બં – ‘‘ચત્તારો આરુપ્પા અસઙ્ખતા’’તિ? આમન્તા. નનુ ચત્તારો આરુપ્પા અનેજા વુત્તા ભગવતાતિ? આમન્તા. હઞ્ચિ ચત્તારો આરુપ્પા અનેજા વુત્તા ભગવતા, તેન વત રે વત્તબ્બે ‘‘ચત્તારો આરુપ્પા અસઙ્ખતા’’તિ.

આરુપ્પકથા નિટ્ઠિતા.

૬. છટ્ઠવગ્ગો

(૫૭) ૫. નિરોધસમાપત્તિકથા

૪૫૭. નિરોધસમાપત્તિ અસઙ્ખતાતિ? આમન્તા. નિબ્બાનં તાણં લેણં સરણં પરાયનં અચ્ચુતં અમતન્તિ? ન હેવં વત્તબ્બે…પે… નિરોધસમાપત્તિ અસઙ્ખતા, નિબ્બાનં અસઙ્ખતન્તિ? આમન્તા. દ્વે અસઙ્ખતાનીતિ? ન હેવં વત્તબ્બે…પે… દ્વે અસઙ્ખતાનીતિ? આમન્તા. દ્વે તાણાનિ…પે… અન્તરિકા વાતિ? ન હેવં વત્તબ્બે…પે….

નિરોધસમાપત્તિ અસઙ્ખતાતિ? આમન્તા. અત્થિ કેચિ નિરોધં સમાપજ્જન્તિ પટિલભન્તિ ઉપ્પાદેન્તિ સમુપ્પાદેન્તિ ઉટ્ઠપેન્તિ સમુટ્ઠપેન્તિ નિબ્બત્તેન્તિ અભિનિબ્બત્તેન્તિ જનેન્તિ સઞ્જનેન્તીતિ? આમન્તા. અત્થિ કેચિ અસઙ્ખતં સમાપજ્જન્તિ પટિલભન્તિ ઉપ્પાદેન્તિ સમુપ્પાદેન્તિ ઉટ્ઠપેન્તિ સમુટ્ઠપેન્તિ નિબ્બત્તેન્તિ અભિનિબ્બત્તેન્તિ જનેન્તિ સઞ્જનેન્તીતિ? ન હેવં વત્તબ્બે…પે….

૪૫૮. નિરોધા વોદાનં વુટ્ઠાનં પઞ્ઞાયતીતિ? આમન્તા. અસઙ્ખતા વોદાનં વુટ્ઠાનં પઞ્ઞાયતીતિ? ન હેવં વત્તબ્બે…પે… નિરોધં સમાપજ્જન્તસ્સ પઠમં નિરુજ્ઝતિ વચીસઙ્ખારો, તતો કાયસઙ્ખારો, તતો ચિત્તસઙ્ખારોતિ? આમન્તા. અસઙ્ખતં સમાપજ્જન્તસ્સ પઠમં નિરુજ્ઝતિ વચીસઙ્ખારો, તતો કાયસઙ્ખારો, તતો ચિત્તસઙ્ખારોતિ? ન હેવં વત્તબ્બે…પે… નિરોધા વુટ્ઠહન્તસ્સ પઠમં ઉપ્પજ્જતિ ચિત્તસઙ્ખારો, તતો કાયસઙ્ખારો, તતો વચીસઙ્ખારોતિ? આમન્તા. અસઙ્ખતા વુટ્ઠહન્તસ્સ પઠમં ઉપ્પજ્જતિ ચિત્તસઙ્ખારો, તતો કાયસઙ્ખારો, તતો વચીસઙ્ખારોતિ? ન હેવં વત્તબ્બે…પે….

નિરોધા વુટ્ઠિતં તયો ફસ્સા ફુસન્તિ – સુઞ્ઞતો ફસ્સો, અનિમિત્તો ફસ્સો, અપ્પણિહિતો ફસ્સોતિ? આમન્તા. અસઙ્ખતા વુટ્ઠિતં તયો ફસ્સા ફુસન્તિ – સુઞ્ઞતો ફસ્સો, અનિમિત્તો ફસ્સો, અપ્પણિહિતો ફસ્સોતિ? ન હેવં વત્તબ્બે…પે….

નિરોધા વુટ્ઠિતસ્સ વિવેકનિન્નં ચિત્તં હોતિ વિવેકપોણં વિવેકપબ્ભારન્તિ? આમન્તા. અસઙ્ખતા વુટ્ઠિતસ્સ વિવેકનિન્નં ચિત્તં હોતિ વિવેકપોણં વિવેકપબ્ભારન્તિ? ન હેવં વત્તબ્બે…પે….

૪૫૯. ન વત્તબ્બં – ‘‘નિરોધસમાપત્તિ અસઙ્ખતા’’તિ? આમન્તા. સઙ્ખતાતિ? ન હેવં વત્તબ્બે…પે… તેન હિ નિરોધસમાપત્તિ અસઙ્ખતાતિ.

નિરોધસમાપત્તિકથા નિટ્ઠિતા.

૬. છટ્ઠવગ્ગો

(૫૮) ૬. આકાસકથા

૪૬૦. આકાસો અસઙ્ખતોતિ? આમન્તા. નિબ્બાનં તાણં લેણં સરણં પરાયનં અચ્ચુતં અમતન્તિ? ન હેવં વત્તબ્બે…પે… આકાસો અસઙ્ખતો, નિબ્બાનં અસઙ્ખતન્તિ? આમન્તા. દ્વે અસઙ્ખતાનીતિ? ન હેવં વત્તબ્બે…પે…. દ્વે અસઙ્ખતાનીતિ? આમન્તા. દ્વે તાણાનિ…પે… અન્તરિકા વાતિ? ન હેવં વત્તબ્બે…પે….

આકાસો અસઙ્ખતોતિ? આમન્તા. અત્થિ કેચિ અનાકાસં આકાસં કરોન્તીતિ? આમન્તા. અત્થિ કેચિ સઙ્ખતં અસઙ્ખતં કરોન્તીતિ? ન હેવં વત્તબ્બે…પે… અત્થિ કેચિ આકાસં અનાકાસં કરોન્તીતિ? આમન્તા. અત્થિ કેચિ અસઙ્ખતં સઙ્ખતં કરોન્તીતિ? ન હેવં વત્તબ્બે…પે….

આકાસે પક્ખિનો ગચ્છન્તિ, ચન્દિમસૂરિયા ગચ્છન્તિ, તારકરૂપાનિ ગચ્છન્તિ, ઇદ્ધિં વિકુબ્બન્તિ, બાહું ચાલેન્તિ, પાણિં ચાલેન્તિ, લેડ્ડું ખિપન્તિ, લગુળં ખિપન્તિ, ઇદ્ધિં [સત્તિં (?)] ખિપન્તિ, ઉસું ખિપન્તીતિ? આમન્તા. અસઙ્ખતે પક્ખિનો ગચ્છન્તિ, ચન્દિમસૂરિયા ગચ્છન્તિ, તારકરૂપાનિ ગચ્છન્તિ, ઇદ્ધિં વિકુબ્બન્તિ, બાહું ચાલેન્તિ, પાણિં ચાલેન્તિ, લેડ્ડું ખિપન્તિ, લગુળં ખિપન્તિ, ઇદ્ધિં ખિપન્તિ, ઉસું ખિપન્તીતિ? ન હેવં વત્તબ્બે…પે….

૪૬૧. આકાસં પરિવારેત્વા ઘરાનિ કરોન્તિ કોટ્ઠાનિ કરોન્તીતિ? આમન્તા. અસઙ્ખતં પરિવારેત્વા ઘરાનિ કરોન્તિ કોટ્ઠાનિ કરોન્તીતિ? ન હેવં વત્તબ્બે…પે….

ઉદપાને ખઞ્ઞમાને અનાકાસો આકાસો હોતીતિ? આમન્તા. સઙ્ખતં અસઙ્ખતં હોતીતિ? ન હેવં વત્તબ્બે…પે….

તુચ્છઉદપાને પૂરિયમાને, તુચ્છકોટ્ઠે પૂરિયમાને, તુચ્છકુમ્ભિયા પૂરિયમાનાય આકાસો અન્તરધાયતીતિ? આમન્તા. અસઙ્ખતં અન્તરધાયતીતિ? ન હેવં વત્તબ્બે…પે….

૪૬૨. ન વત્તબ્બં – ‘‘આકાસો અસઙ્ખતો’’તિ? આમન્તા. આકાસો સઙ્ખતોતિ? ન હેવં વત્તબ્બે…પે… તેન હિ આકાસો અસઙ્ખતોતિ.

આકાસકથા નિટ્ઠિતા.

૬. છટ્ઠવગ્ગો

(૫૯) ૭. આકાસો સનિદસ્સનોતિકથા

૪૬૩. આકાસો સનિદસ્સનોતિ? આમન્તા. રૂપં રૂપાયતનં રૂપધાતુ નીલં પીતકં લોહિતકં ઓદાતં ચક્ખુવિઞ્ઞેય્યં ચક્ખુસ્મિં પટિહઞ્ઞતિ ચક્ખુસ્સ આપાથં આગચ્છતીતિ? ન હેવં વત્તબ્બે…પે….

આકાસો સનિદસ્સનોતિ? આમન્તા. ચક્ખુઞ્ચ પટિચ્ચ આકાસઞ્ચ ઉપ્પજ્જતિ ચક્ખુવિઞ્ઞાણન્તિ? ન હેવં વત્તબ્બે …પે….

ચક્ખુઞ્ચ પટિચ્ચ આકાસઞ્ચ ઉપ્પજ્જતિ ચક્ખુવિઞ્ઞાણન્તિ? આમન્તા. ‘‘ચક્ખુઞ્ચ પટિચ્ચ આકાસઞ્ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ [અત્થિ (?)] સુત્તન્તોતિ? નત્થિ. ‘‘ચક્ખુઞ્ચ પટિચ્ચ રૂપે ચ ઉપ્પજ્જતિ ચક્ખુવિઞ્ઞાણ’’ન્તિ [મ. નિ. ૧.૪૦૦; ૩.૪૨૧; સં. નિ. ૪.૬૦] – અત્થેવ સુત્તન્તોતિ? આમન્તા. હઞ્ચિ ‘‘ચક્ખુઞ્ચ પટિચ્ચ રૂપે ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તો, નો ચ વત રે વત્તબ્બે – ‘‘ચક્ખુઞ્ચ પટિચ્ચ આકાસઞ્ચ ઉપ્પજ્જતિ ચક્ખુવિઞ્ઞાણ’’ન્તિ.

૪૬૪. ન વત્તબ્બં – ‘‘આકાસો સનિદસ્સનો’’તિ? આમન્તા. નનુ પસ્સતિ દ્વિન્નં રુક્ખાનં અન્તરં, દ્વિન્નં થમ્ભાનં અન્તરં, તાળચ્છિદ્દં વાતપાનચ્છિદ્દન્તિ? આમન્તા. હઞ્ચિ પસ્સતિ દ્વિન્નં રુક્ખાનં અન્તરં, દ્વિન્નં થમ્ભાનં અન્તરં, તાળચ્છિદ્દં વાતપાનચ્છિદ્દં, તેન વત રે વત્તબ્બે – ‘‘આકાસો સનિદસ્સનો’’તિ.

આકાસો સનિદસ્સનોતિકથા નિટ્ઠિતા.

૬. છટ્ઠવગ્ગો

(૬૦) ૮. પથવીધાતુ સનિદસ્સનાતિઆદિકથા

૪૬૫. પથવીધાતુ સનિદસ્સનાતિ? આમન્તા. રૂપં રૂપાયતનં રૂપધાતુ નીલં પીતકં લોહિતકં ઓદાતં ચક્ખુવિઞ્ઞેય્યં ચક્ખુસ્મિં પટિહઞ્ઞતિ ચક્ખુસ્સ આપાથં આગચ્છતીતિ? ન હેવં વત્તબ્બે…પે….

પથવીધાતુ સનિદસ્સનાતિ? આમન્તા. ચક્ખુઞ્ચ પટિચ્ચ પથવીધાતુઞ્ચ ઉપ્પજ્જતિ ચક્ખુવિઞ્ઞાણન્તિ? ન હેવં વત્તબ્બે…પે….

ચક્ખુઞ્ચ પટિચ્ચ પથવીધાતુઞ્ચ ઉપ્પજ્જતિ ચક્ખુવિઞ્ઞાણન્તિ? આમન્તા. ‘‘ચક્ખુઞ્ચ પટિચ્ચ પથવીધાતુઞ્ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તોતિ? નત્થિ. ‘‘ચક્ખુઞ્ચ પટિચ્ચ રૂપે ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તોતિ? આમન્તા. હઞ્ચિ ‘‘ચક્ખુઞ્ચ પટિચ્ચ રૂપે ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તો, નો ચ વત રે વત્તબ્બે – ‘‘ચક્ખુઞ્ચ પટિચ્ચ પથવીધાતુઞ્ચ ઉપ્પજ્જતિ ચક્ખુવિઞ્ઞાણ’’ન્તિ.

૪૬૬. ન વત્તબ્બં – ‘‘પથવીધાતુ સનિદસ્સના’’તિ? આમન્તા. નનુ પસ્સતિ ભૂમિં પાસાણં પબ્બતન્તિ? આમન્તા. હઞ્ચિ પસ્સતિ [પસ્સસિ (સી. સ્યા. ક.) એવમુપરિપિ] ભૂમિં પાસાણં પબ્બતં, તેન વત રે વત્તબ્બે – ‘‘પથવીધાતુ સનિદસ્સના’’તિ…પે….

ન વત્તબ્બં – ‘‘આપોધાતુ સનિદસ્સના’’તિ? આમન્તા. નનુ પસ્સતિ ઉદકન્તિ? આમન્તા. હઞ્ચિ પસ્સતિ ઉદકં, તેન વત રે વત્તબ્બે – ‘‘આપોધાતુ સનિદસ્સનાતિ…પે….

ન વત્તબ્બં – તેજોધાતુ સનિદસ્સનાતિ? આમન્તા. નનુ પસ્સતિ અગ્ગિં જલન્તન્તિ? આમન્તા. હઞ્ચિ પસ્સતિ અગ્ગિં જલન્તં, તેન વત રે વત્તબ્બે – ‘‘તેજોધાતુ સનિદસ્સના’’તિ…પે….

ન વત્તબ્બં – ‘‘વાયોધાતુ સનિદસ્સના’’તિ? આમન્તા. નનુ પસ્સતિ વાતેન રુક્ખે સઞ્ચાલિયમાનેતિ? આમન્તા. હઞ્ચિ પસ્સતિ વાતેન રુક્ખે સઞ્ચાલિયમાને, તેન વત રે વત્તબ્બે – ‘‘વાયોધાતુ સનિદસ્સના’’તિ…પે….

પથવીધાતુ સનિદસ્સનાતિઆદિકથા નિટ્ઠિતા.

૬. છટ્ઠવગ્ગો

(૬૧) ૯. ચક્ખુન્દ્રિયં સનિદસ્સનન્તિઆદિકથા

૪૬૭. ચક્ખુન્દ્રિયં સનિદસ્સનન્તિ? આમન્તા. રૂપં રૂપાયતનં રૂપધાતુ…પે… ચક્ખુસ્સ આપાથં આગચ્છતીતિ? ન હેવં વત્તબ્બે…પે….

ચક્ખુન્દ્રિયં સનિદસ્સનન્તિ? આમન્તા. ચક્ખુઞ્ચ પટિચ્ચ ચક્ખુન્દ્રિયઞ્ચ ઉપ્પજ્જતિ ચક્ખુવિઞ્ઞાણન્તિ? ન હેવં વત્તબ્બે…પે….

ચક્ખુઞ્ચ પટિચ્ચ ચક્ખુન્દ્રિયઞ્ચ ઉપ્પજ્જતિ ચક્ખુવિઞ્ઞાણન્તિ? આમન્તા. ‘‘ચક્ખુઞ્ચ પટિચ્ચ ચક્ખુન્દ્રિયઞ્ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તોતિ? નત્થિ. ‘‘ચક્ખુઞ્ચ પટિચ્ચ રૂપે ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તોતિ? આમન્તા. હઞ્ચિ ‘‘ચક્ખુઞ્ચ પટિચ્ચ રૂપે ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તો, નો ચ વત રે વત્તબ્બે – ‘‘ચક્ખુઞ્ચ પટિચ્ચ ચક્ખુન્દ્રિયઞ્ચ ઉપ્પજ્જતિ ચક્ખુવિઞ્ઞાણ’’ન્તિ.

૪૬૮. ન વત્તબ્બં – ‘‘પઞ્ચિન્દ્રિયાનિ સનિદસ્સનાની’’તિ? આમન્તા. નનુ પસ્સતિ ચક્ખું સોતં ઘાનં જિવ્હં કાયન્તિ? આમન્તા. હઞ્ચિ પસ્સતિ ચક્ખું સોતં ઘાનં જિવ્હં કાયં, તેન વત રે વત્તબ્બે – ‘‘પઞ્ચિન્દ્રિયાનિ સનિદસ્સનાની’’તિ…પે….

ચક્ખુન્દ્રિયં સનિદસ્સનન્તિઆદિકથા નિટ્ઠિતા.

૬. છટ્ઠવગ્ગો

(૬૨) ૧૦. કાયકમ્મં સનિદસ્સનન્તિકથા

૪૬૯. કાયકમ્મં સનિદસ્સનન્તિ? આમન્તા. રૂપં રૂપાયતનં રૂપધાતુ નીલં પીતકં લોહિતકં ઓદાતં ચક્ખુવિઞ્ઞેય્યં ચક્ખુસ્મિં પટિહઞ્ઞતિ ચક્ખુસ્સ આપાથં આગચ્છતીતિ? ન હેવં વત્તબ્બે…પે….

કાયકમ્મં સનિદસ્સનન્તિ? આમન્તા. ચક્ખુઞ્ચ પટિચ્ચ કાયકમ્મઞ્ચ ઉપ્પજ્જતિ ચક્ખુવિઞ્ઞાણન્તિ? ન હેવં વત્તબ્બે…પે….

ચક્ખુઞ્ચ પટિચ્ચ કાયકમ્મઞ્ચ ઉપ્પજ્જતિ ચક્ખુવિઞ્ઞાણન્તિ? આમન્તા. ‘‘ચક્ખુઞ્ચ પટિચ્ચ કાયકમ્મઞ્ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તોતિ? નત્થિ. ‘‘ચક્ખુઞ્ચ પટિચ્ચ રૂપે ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તોતિ? આમન્તા. હઞ્ચિ ‘‘ચક્ખુઞ્ચ પટિચ્ચ રૂપે ચ ઉપ્પજ્જતિ ચક્ખુવિઞ્ઞાણ’’ન્તિ – અત્થેવ સુત્તન્તો, નો ચ વત રે વત્તબ્બે – ‘‘ચક્ખુઞ્ચ પટિચ્ચ કાયકમ્મઞ્ચ ઉપ્પજ્જતિ ચક્ખુવિઞ્ઞાણ’’ન્તિ.

૪૭૦. ન વત્તબ્બં – ‘‘કાયકમ્મં સનિદસ્સન’’ન્તિ? આમન્તા. નનુ પસ્સતિ અભિક્કમન્તં પટિક્કમન્તં આલોકેન્તં વિલોકેન્તં સમિઞ્જેન્તં પસારેન્તન્તિ? આમન્તા. હઞ્ચિ પસ્સતિ અભિક્કમન્તં પટિક્કમન્તં આલોકેન્તં વિલોકેન્તં સમિઞ્જેન્તં પસારેન્તં, તેન વત રે વત્તબ્બે – ‘‘કાયકમ્મં સનિદસ્સન’’ન્તિ.

કાયકમ્મં સનિદસ્સનન્તિકથા નિટ્ઠિતા.

છટ્ઠવગ્ગો.

તસ્સુદ્દાનં –

નિયમો અસઙ્ખતો, પટિચ્ચસમુપ્પાદો અસઙ્ખતો, ચત્તારિ સચ્ચાનિ અસઙ્ખતાનિ, ચત્તારો આરુપ્પા અસઙ્ખતા, નિરોધસમાપત્તિ અસઙ્ખતા, આકાસો અસઙ્ખતો, આકાસો સનિદસ્સનો, ચત્તારો મહાભૂતા, પઞ્ચિન્દ્રિયાનિ, તથેવ કાયકમ્મન્તિ.