(૩૯) ૭. લક્ખણકથા

૪૦૦. લક્ખણસમન્નાગતો બોધિસત્તોતિ? આમન્તા. પદેસલક્ખણેહિ સમન્નાગતો પદેસબોધિસત્તોતિ? ન હેવં વત્તબ્બે…પે….

લક્ખણસમન્નાગતો બોધિસત્તોતિ? આમન્તા. તિભાગલક્ખણેહિ સમન્નાગતો તિભાગબોધિસત્તોતિ? ન હેવં વત્તબ્બે…પે….

લક્ખણસમન્નાગતો બોધિસત્તોતિ? આમન્તા. ઉપડ્ઢલક્ખણેહિ સમન્નાગતો ઉપડ્ઢબોધિસત્તોતિ? ન હેવં વત્તબ્બે…પે….

લક્ખણસમન્નાગતો બોધિસત્તોતિ? આમન્તા. ચક્કવત્તિસત્તો લક્ખણસમન્નાગતો, ચક્કવત્તિસત્તો બોધિસત્તોતિ? ન હેવં વત્તબ્બે…પે….

ચક્કવત્તિસત્તો લક્ખણસમન્નાગતો, ચક્કવત્તિસત્તો બોધિસત્તોતિ? આમન્તા. યાદિસો બોધિસત્તસ્સ પુબ્બયોગો પુબ્બચરિયા ધમ્મક્ખાનં ધમ્મદેસના, તાદિસો ચક્કવત્તિસત્તસ્સ પુબ્બયોગો પુબ્બચરિયા ધમ્મક્ખાનં ધમ્મદેસનાતિ? ન હેવં વત્તબ્બે…પે….

૪૦૧. યથા બોધિસત્તસ્સ જાયમાનસ્સ દેવા પઠમં પટિગ્ગણ્હન્તિ પચ્છા મનુસ્સા [દી. નિ. ૨.૨૭; મ. નિ. ૩.૨૦૫ વુત્તં દિસ્સાય પુચ્છતિ], એવમેવં ચક્કવત્તિસત્તસ્સ જાયમાનસ્સ દેવા પઠમં પટિગ્ગણ્હન્તિ પચ્છા મનુસ્સાતિ? ન હેવં વત્તબ્બે…પે….

યથા બોધિસત્તસ્સ જાયમાનસ્સ ચત્તારો નં દેવપુત્તા પટિગ્ગહેત્વા માતુ પુરતો ઠપેન્તિ – ‘‘અત્તમના, દેવિ, હોહિ! મહેસક્ખો તે પુત્તો ઉપ્પન્નો’’તિ, એવમેવં ચક્કવત્તિસત્તસ્સ જાયમાનસ્સ ચત્તારો નં દેવપુત્તા પટિગ્ગહેત્વા માતુ પુરતો ઠપેન્તિ – ‘‘અત્તમના, દેવિ, હોહિ! મહેસક્ખો તે પુત્તો ઉપ્પન્નો’’તિ? ન હેવં વત્તબ્બે…પે….

યથા બોધિસત્તસ્સ જાયમાનસ્સ દ્વે ઉદકસ્સ ધારા અન્તલિક્ખા પાતુભવન્તિ – એકા સીતસ્સ, એકા ઉણ્હસ્સ – યેન બોધિસત્તસ્સ ઉદકકિચ્ચં કરોન્તિ માતુ ચ, એવમેવં ચક્કવત્તિસત્તસ્સ જાયમાનસ્સ દ્વે ઉદકસ્સ ધારા અન્તલિક્ખા પાતુભવન્તિ – એકા સીતસ્સ, એકા ઉણ્હસ્સ – યેન ચક્કવત્તિસત્તસ્સ ઉદકકિચ્ચં કરોન્તિ માતુ ચાતિ? ન હેવં વત્તબ્બે…પે….

યથા સમ્પતિજાતો બોધિસત્તો સમેહિ પાદેહિ પતિટ્ઠહિત્વા ઉત્તરેન અભિમુખો સત્તપદવીતિહારેન ગચ્છતિ સેતમ્હિ છત્તે અનુધારિયમાને, સબ્બા ચ દિસા વિલોકેતિ, આસભિઞ્ચ વાચં ભાસતિ – ‘‘અગ્ગોહમસ્મિ લોકસ્સ, જેટ્ઠોહમસ્મિ લોકસ્સ, સેટ્ઠોહમસ્મિ લોકસ્સ, અયમન્તિમા જાતિ, નત્થિ દાનિ પુનબ્ભવો’’તિ, એવમેવં સમ્પતિજાતો ચક્કવત્તિસત્તો સમેહિ પાદેહિ પતિટ્ઠહિત્વા ઉત્તરેન અભિમુખો સત્તપદવીતિહારેન ગચ્છતિ સેતમ્હિ છત્તે અનુધારિયમાને, સબ્બા ચ દિસા વિલોકેતિ, આસભિઞ્ચ વાચં ભાસતિ – ‘‘અગ્ગોહમસ્મિ લોકસ્સ, જેટ્ઠોહમસ્મિ લોકસ્સ, સેટ્ઠોહમસ્મિ લોકસ્સ, અયમન્તિમા જાતિ, નત્થિ દાનિ પુનબ્ભવો’’તિ? ન હેવં વત્તબ્બે…પે….

યથા બોધિસત્તસ્સ જાયમાનસ્સ મહતો આલોકસ્સ મહતો ઓભાસસ્સ મહતો ભૂમિચાલસ્સ પાતુભાવો હોતિ, એવમેવં ચક્કવત્તિસત્તસ્સ જાયમાનસ્સ મહતો આલોકસ્સ મહતો ઓભાસસ્સ મહતો ભૂમિચાલસ્સ પાતુભાવો હોતીતિ? ન હેવં વત્તબ્બે…પે….

યથા બોધિસત્તસ્સ પકતિકાયો સમન્તા બ્યામં ઓભાસતિ, એવમેવં ચક્કવત્તિસત્તસ્સ પકતિકાયો સમન્તા બ્યામં ઓભાસતીતિ? ન હેવં વત્તબ્બે…પે….

યથા બોધિસત્તો મહાસુપિનં પસ્સતિ, એવમેવં ચક્કવત્તિસત્તો મહાસુપિનં પસ્સતીતિ? ન હેવં વત્તબ્બે…પે….

૪૦૨. ન વત્તબ્બં – ‘‘લક્ખણસમન્નાગતો બોધિસત્તો’’તિ? આમન્તા. નનુ વુત્તં ભગવતા – ‘‘દ્વત્તિંસિમાનિ, ભિક્ખવે, મહાપુરિસસ્સ મહાપુરિસલક્ખણાનિ, યેહિ સમન્નાગતસ્સ મહાપુરિસસ્સ દ્વેવ ગતિયો ભવન્તિ અનઞ્ઞા [ન અઞ્ઞા (ક.)]! સચે અગારં અજ્ઝાવસતિ, રાજા હોતિ ચક્કવત્તી ધમ્મિકો ધમ્મરાજા ચાતુરન્તો વિજિતાવી જનપદત્થાવરિયપ્પત્તો સત્તરતનસમન્નાગતો. તસ્સિમાનિ સત્ત રતનાનિ ભવન્તિ, સેય્યથિદં – ચક્કરતનં, હત્થિરતનં, અસ્સરતનં, મણિરતનં, ઇત્થિરતનં, ગહપતિરતનં, પરિણાયકરતનમેવ સત્તમં. પરોસહસ્સં ખો પનસ્સ પુત્તા ભવન્તિ સૂરા વીરઙ્ગરૂપા પરસેનપ્પમદ્દના. સો ઇમં પથવિં સાગરપરિયન્તં અદણ્ડેન અસત્થેન ધમ્મેન અભિવિજિય અજ્ઝાવસતિ. સચે ખો પન અગારસ્મા અનગારિયં પબ્બજતિ, અરહં હોતિ સમ્માસમ્બુદ્ધો લોકે વિવટ્ટચ્છદો’’તિ [દી. નિ. ૩.૨૦૦]. અત્થેવ સુત્તન્તોતિ? આમન્તા. તેન હિ લક્ખણસમન્નાગતો બોધિસત્તોતિ.

લક્ખણકથા નિટ્ઠિતા.