૪. ચતુત્થવગ્ગો

(૩૩) ૧. ગિહિસ્સ અરહાતિકથા

૩૮૭. ગિહિસ્સ અરહાતિ? આમન્તા. અત્થિ અરહતો ગિહિસંયોજનન્તિ? ન હેવં વત્તબ્બે…પે… નત્થિ અરહતો ગિહિસંયોજનન્તિ? આમન્તા. હઞ્ચિ નત્થિ અરહતો ગિહિસંયોજનં, નો ચ વત રે વત્તબ્બે – ‘‘ગિહિસ્સ અરહા’’તિ.

ગિહિસ્સ અરહાતિ? આમન્તા. નનુ અરહતો ગિહિસંયોજનં પહીનં ઉચ્છિન્નમૂલં તાલાવત્થુકતં અનભાવઙ્કતં આયતિં અનુપ્પાદધમ્મન્તિ? આમન્તા. હઞ્ચિ અરહતો ગિહિસંયોજનં પહીનં ઉચ્છિન્નમૂલં તાલાવત્થુકતં અનભાવઙ્કતં આયતિં અનુપ્પાદધમ્મં, નો ચ વત રે વત્તબ્બે – ‘‘ગિહિસ્સ અરહા’’તિ.

ગિહિસ્સ અરહાતિ? આમન્તા. અત્થિ કોચિ ગિહી ગિહિસંયોજનં અપ્પહાય દિટ્ઠેવ ધમ્મે દુક્ખસ્સન્તકરોતિ [મ. નિ. ૨.૧૮૬]? નત્થિ. હઞ્ચિ નત્થિ કોચિ ગિહી ગિહિસંયોજનં અપ્પહાય દિટ્ઠેવ ધમ્મે દુક્ખસ્સન્તકરો, નો ચ વત રે વત્તબ્બે – ‘‘ગિહિસ્સ અરહા’’તિ.

ગિહિસ્સ અરહાતિ? આમન્તા. નનુ વચ્છગોત્તો પરિબ્બાજકો ભગવન્તં એતદવોચ – ‘‘અત્થિ નુ ખો, ભો ગોતમ, કોચિ ગિહી ગિહિસંયોજનં અપ્પહાય કાયસ્સ ભેદા દુક્ખસ્સન્તકરો’’તિ? ‘‘નત્થિ ખો, વચ્છ, કોચિ ગિહી ગિહિસંયોજનં અપ્પહાય કાયસ્સ ભેદા દુક્ખસ્સન્તકરો’’તિ. અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘ગિહિસ્સ અરહા’’તિ.

ગિહિસ્સ અરહાતિ? આમન્તા. અરહા મેથુનં ધમ્મં પટિસેવેય્ય, મેથુનં ઉપ્પાદેય્ય, પુત્તસમ્બાધસયનં અજ્ઝાવસેય્ય, કાસિકચન્દનં પચ્ચનુભવેય્ય, માલાગન્ધવિલેપનં ધારેય્ય, જાતરૂપરજતં સાદિયેય્ય, અજેળકં પટિગ્ગણ્હેય્ય, કુક્કુટસૂકરં પટિગ્ગણ્હેય્ય, હત્થિગવસ્સવળવં પટિગ્ગણ્હેય્ય, તિત્તિરવટ્ટકમોરકપિઞ્જરં [… કપિઞ્જલં (સ્યા. કં. પી.)] પટિગ્ગણ્હેય્ય, ચિત્તવણ્ડવાલમોળિં [પીતવણ્ટવાલમોળિકં (સ્યા. કં. પી.)] ધારેય્ય, ઓદાતાનિ વત્થાનિ દીઘદસાનિ ધારેય્ય, યાવજીવં અગારિયભૂતો અસ્સાતિ? ન હેવં વત્તબ્બે…પે….

ન વત્તબ્બં – ‘‘ગિહિસ્સ અરહા’’તિ? આમન્તા. નનુ યસો કુલપુત્તો, ઉત્તિયો ગહપતિ, સેતુ માણવો, ગિહિબ્યઞ્જનેન અરહત્તં પત્તોતિ? આમન્તા. હઞ્ચિ યસો કુલપુત્તો, ઉત્તિયો ગહપતિ, સેતુ માણવો, ગિહિબ્યઞ્જનેન અરહત્તં પત્તો, તેન વત રે વત્તબ્બે – ‘‘ગિહિસ્સ અરહા’’તિ.

ગિહિસ્સ અરહાતિકથા નિટ્ઠિતા.

૪. ચતુત્થવગ્ગો

(૩૪) ૨. ઉપપત્તિકથા

૩૮૮. સહ ઉપપત્તિયા અરહાતિ? આમન્તા. સહ ઉપપત્તિયા સોતાપન્નો હોતીતિ? ન હેવં વત્તબ્બે…પે….

સહ ઉપપત્તિયા અરહાતિ? આમન્તા. સહ ઉપપત્તિયા સકદાગામી હોતીતિ? ન હેવં વત્તબ્બે…પે….

સહ ઉપપત્તિયા અરહાતિ? આમન્તા. સહ ઉપપત્તિયા અનાગામી હોતીતિ? ન હેવં વત્તબ્બે…પે….

સહ ઉપપત્તિયા સોતાપન્નો ન હોતીતિ? આમન્તા. હઞ્ચિ સહ ઉપપત્તિયા સોતાપન્નો ન હોતિ, નો ચ વત રે વત્તબ્બે – ‘‘સહ ઉપપત્તિયા અરહા’’તિ.

સહ ઉપપત્તિયા સકદાગામી ન હોતીતિ? આમન્તા. હઞ્ચિ સહ ઉપપત્તિયા સકદાગામી ન હોતિ, નો ચ વત રે વત્તબ્બે – ‘‘સહ ઉપપત્તિયા અરહા’’તિ.

સહ ઉપપત્તિયા અનાગામી ન હોતીતિ? આમન્તા. હઞ્ચિ સહ ઉપપત્તિયા અનાગામી ન હોતિ, નો ચ વત રે વત્તબ્બે – ‘‘સહ ઉપપત્તિયા અરહા’’તિ.

૩૮૯. સહ ઉપપત્તિયા અરહાતિ? આમન્તા. સારિપુત્તો થેરો સહ ઉપપત્તિયા અરહાતિ? ન હેવં વત્તબ્બે. મહામોગ્ગલ્લાનો થેરો …પે… મહાકસ્સપો થેરો…પે… મહાકચ્ચાનો થેરો…પે… મહાકોટ્ઠિકો થેરો…પે… મહાપન્થકો થેરો સહ ઉપપત્તિયા અરહાતિ? ન હેવં વત્તબ્બે…પે….

સારિપુત્તો થેરો ન સહ ઉપપત્તિયા અરહાતિ? આમન્તા. હઞ્ચિ સારિપુત્તો થેરો ન સહ ઉપપત્તિયા અરહા, નો ચ વત રે વત્તબ્બે – ‘‘સહ ઉપપત્તિયા અરહા’’તિ.

મહામોગ્ગલ્લાનો થેરો…પે… મહાકસ્સપો થેરો…પે… મહાકચ્ચાનો થેરો…પે… મહાકોટ્ઠિકો થેરો…પે… મહાપન્થકો થેરો ન સહ ઉપપત્તિયા અરહાતિ? આમન્તા. હઞ્ચિ મહાપન્થકો થેરો ન સહ ઉપપત્તિયા અરહા, નો ચ વત રે વત્તબ્બે – ‘‘સહ ઉપપત્તિયા અરહા’’તિ.

૩૯૦. સહ ઉપપત્તિયા અરહાતિ? આમન્તા. ઉપપત્તેસિયેન ચિત્તેન અરહત્તં સચ્છિકરોતિ લોકિયેન સાસવેન…પે… સંકિલેસિયેનાતિ? ન હેવં વત્તબ્બે…પે….

સહ ઉપપત્તિયા અરહાતિ? આમન્તા. ઉપપત્તેસિયં ચિત્તં નિય્યાનિકં ખયગામી બોધગામી અપચયગામી અનાસવં…પે… અસંકિલેસિયન્તિ? ન હેવં વત્તબ્બે…પે….

નનુ ઉપપત્તેસિયં ચિત્તં અનિય્યાનિકં ન ખયગામિ ન બોધગામિ ન અપચયગામિ સાસવં…પે… સંકિલેસિયન્તિ? આમન્તા. હઞ્ચિ ઉપપત્તેસિયં ચિત્તં અનિય્યાનિકં ન ખયગામિ ન બોધગામિ ન અપચયગામિ સાસવં…પે… સંકિલેસિયં, નો ચ વત રે વત્તબ્બે – ‘‘સહ ઉપપત્તિયા અરહા’’તિ.

સહ ઉપપત્તિયા અરહાતિ? આમન્તા. ઉપપત્તેસિયેન ચિત્તેન રાગં પજહતિ, દોસં પજહતિ, મોહં પજહતિ, અનોત્તપ્પં પજહતીતિ? ન હેવં વત્તબ્બે…પે….

સહ ઉપપત્તિયા અરહાતિ? આમન્તા. ઉપપત્તેસિયં ચિત્તં મગ્ગો… સતિપટ્ઠાનં…પે… સમ્મપ્પધાનં… ઇદ્ધિપાદો… ઇન્દ્રિયં… બલં… બોજ્ઝઙ્ગોતિ? ન હેવં વત્તબ્બે…પે….

સહ ઉપપત્તિયા અરહાતિ? આમન્તા. ઉપપત્તેસિયેન ચિત્તેન દુક્ખં પરિજાનાતિ, સમુદયં પજહતિ, નિરોધં સચ્છિકરોતિ, મગ્ગં ભાવેતીતિ? ન હેવં વત્તબ્બે …પે… સહ ઉપપત્તિયા અરહાતિ? આમન્તા. ચુતિચિત્તં મગ્ગચિત્તં ઉપપત્તેસિયં ચિત્તં ફલચિત્તન્તિ? ન હેવં વત્તબ્બે…પે….

ઉપપત્તિકથા નિટ્ઠિતા.

૪. ચતુત્થવગ્ગો

(૩૫) ૩. અનાસવકથા

૩૯૧. અરહતો સબ્બે ધમ્મા અનાસવાતિ? આમન્તા. મગ્ગો ફલં નિબ્બાનં, સોતાપત્તિમગ્ગો સોતાપત્તિફલં, સકદાગામિમગ્ગો સકદાગામિફલં, અનાગામિમગ્ગો અનાગામિફલં, અરહત્તમગ્ગો અરહત્તફલં, સતિપટ્ઠાનં સમ્મપ્પધાનં ઇદ્ધિપાદો ઇન્દ્રિયં બલં બોજ્ઝઙ્ગોતિ? ન હેવં વત્તબ્બે…પે….

અરહતો સબ્બે ધમ્મા અનાસવાતિ? આમન્તા. અરહતો ચક્ખું અનાસવન્તિ? ન હેવં વત્તબ્બે…પે…. અરહતો ચક્ખું અનાસવન્તિ? આમન્તા. મગ્ગો ફલં નિબ્બાનં, સોતાપત્તિમગ્ગો સોતાપત્તિફલં…પે… બોજ્ઝઙ્ગોતિ? ન હેવં વત્તબ્બે…પે….

અરહતો સોતં…પે… અરહતો ઘાનં… અરહતો જિવ્હા… અરહતો કાયો અનાસવોતિ? ન હેવં વત્તબ્બે …પે… અરહતો કાયો અનાસવોતિ? આમન્તા. મગ્ગો ફલં નિબ્બાનં, સોતાપત્તિમગ્ગો સોતાપત્તિફલં…પે… બોજ્ઝઙ્ગોતિ? ન હેવં વત્તબ્બે…પે….

અરહતો કાયો અનાસવોતિ? આમન્તા. અરહતો કાયો પગ્ગહનિગ્ગહુપગો છેદનભેદનુપગો કાકેહિ ગિજ્ઝેહિ કુલલેહિ સાધારણોતિ? આમન્તા. અનાસવો ધમ્મો પગ્ગહનિગ્ગહુપગો છેદનભેદનુપગો કાકેહિ ગિજ્ઝેહિ કુલલેહિ સાધારણોતિ? ન હેવં વત્તબ્બે …પે….

અરહતો કાયે વિસં કમેય્ય, સત્થં કમેય્ય, અગ્ગિ કમેય્યાતિ? આમન્તા. અનાસવે ધમ્મે વિસં કમેય્ય, સત્થં કમેય્ય, અગ્ગિ કમેય્યાતિ? ન હેવં વત્તબ્બે…પે….

લબ્ભા અરહતો કાયો અદ્દુબન્ધનેન બન્ધિતું, રજ્જુબન્ધનેન બન્ધિતું, સઙ્ખલિકબન્ધનેન બન્ધિતું, ગામબન્ધનેન બન્ધિતું, નિગમબન્ધનેન બન્ધિતું, નગરબન્ધનેન બન્ધિતું, જનપદબન્ધનેન બન્ધિતું, કણ્ઠપઞ્ચમેહિ બન્ધનેહિ બન્ધિતુન્તિ? આમન્તા. લબ્ભા અનાસવો ધમ્મો અદ્દુબન્ધનેન બન્ધિતું, રજ્જુબન્ધનેન બન્ધિતું, સઙ્ખલિકબન્ધનેન બન્ધિતું, ગામનિગમનગરજનપદબન્ધનેન બન્ધિતું, કણ્ઠપઞ્ચમેહિ બન્ધનેહિ બન્ધિતુન્તિ? ન હેવં વત્તબ્બે…પે….

૩૯૨. યદિ અરહા પુથુજ્જનસ્સ ચીવરં દેતિ, અનાસવં હુત્વા સાસવં હોતીતિ? ન હેવં વત્તબ્બે…પે… અનાસવં હુત્વા સાસવં હોતીતિ? આમન્તા. તઞ્ઞેવ અનાસવં તં સાસવન્તિ? ન હેવં વત્તબ્બે…પે… તઞ્ઞેવ અનાસવં તં સાસવન્તિ? આમન્તા. મગ્ગો અનાસવો હુત્વા સાસવો હોતીતિ? ન હેવં વત્તબ્બે…પે… ફલં… સતિપટ્ઠાનં… સમ્મપ્પધાનં… ઇદ્ધિપાદો… ઇન્દ્રિયં… બલં… બોજ્ઝઙ્ગો અનાસવો હુત્વા સાસવો હોતીતિ? ન હેવં વત્તબ્બે…પે….

યદિ અરહા પુથુજ્જનસ્સ પિણ્ડપાતં દેતિ, સેનાસનં દેતિ, ગિલાનપચ્ચયભેસજ્જપરિક્ખારં દેતિ, અનાસવો હુત્વા સાસવો હોતીતિ? ન હેવં વત્તબ્બે…પે… અનાસવો હુત્વા સાસવો હોતીતિ? આમન્તા. તઞ્ઞેવ અનાસવં તં સાસવન્તિ? ન હેવં વત્તબ્બે…પે… તઞ્ઞેવ અનાસવં તં સાસવન્તિ? આમન્તા. મગ્ગો અનાસવો હુત્વા સાસવો હોતીતિ? ન હેવં વત્તબ્બે…પે… ફલં… સતિપટ્ઠાનં… સમ્મપ્પધાનં… ઇદ્ધિપાદો… ઇન્દ્રિયં… બલં… બોજ્ઝઙ્ગો અનાસવો હુત્વા સાસવો હોતીતિ? ન હેવં વત્તબ્બે…પે….

યદિ પુથુજ્જનો અરહતો ચીવરં દેતિ, સાસવં હુત્વા અનાસવં હોતીતિ? ન હેવં વત્તબ્બે…પે… સાસવં હુત્વા અનાસવં હોતીતિ? આમન્તા. તઞ્ઞેવ સાસવં તં અનાસવન્તિ? ન હેવં વત્તબ્બે…પે… તઞ્ઞેવ સાસવં તં અનાસવન્તિ? આમન્તા. રાગો સાસવો હુત્વા અનાસવો હોતીતિ? ન હેવં વત્તબ્બે…પે… દોસો…પે… મોહો…પે… અનોત્તપ્પં સાસવં હુત્વા અનાસવં હોતીતિ? ન હેવં વત્તબ્બે…પે….

યદિ પુથુજ્જનો અરહતો પિણ્ડપાતં દેતિ, સેનાસનં દેતિ, ગિલાનપચ્ચયભેસજ્જપરિક્ખારં દેતિ, સાસવો હુત્વા અનાસવો હોતીતિ? ન હેવં વત્તબ્બે…પે… સાસવો હુત્વા અનાસવો હોતીતિ? આમન્તા. તઞ્ઞેવ સાસવં તં અનાસવન્તિ? ન હેવં વત્તબ્બે…પે… તઞ્ઞેવ સાસવં તં અનાસવન્તિ? આમન્તા. રાગો સાસવો હુત્વા અનાસવો હોતીતિ? ન હેવં વત્તબ્બે…પે… દોસો…પે… મોહો…પે… અનોત્તપ્પં સાસવં હુત્વા અનાસવં હોતીતિ? ન હેવં વત્તબ્બે…પે….

ન વત્તબ્બં – ‘‘અરહતો સબ્બે ધમ્મા અનાસવા’’તિ? આમન્તા. નનુ અરહા અનાસવોતિ? આમન્તા. હઞ્ચિ અરહા અનાસવો, તેન વત રે વત્તબ્બે – ‘‘અરહતો સબ્બે ધમ્મા અનાસવા’’તિ.

અનાસવકથા નિટ્ઠિતા.

૪. ચતુત્થવગ્ગો

(૩૬) ૪. સમન્નાગતકથા

૩૯૩. અરહા ચતૂહિ ફલેહિ સમન્નાગતોતિ? આમન્તા. અરહા ચતૂહિ ફસ્સેહિ ચતૂહિ વેદનાહિ ચતૂહિ સઞ્ઞાહિ ચતૂહિ ચેતનાહિ ચતૂહિ ચિત્તેહિ ચતૂહિ સદ્ધાહિ ચતૂહિ વીરિયેહિ ચતૂહિ સતીહિ ચતૂહિ સમાધીહિ ચતૂહિ પઞ્ઞાહિ સમન્નાગતોતિ? ન હેવં વત્તબ્બે…પે….

અનાગામી તીહિ ફલેહિ સમન્નાગતોતિ? આમન્તા. અનાગામી તીહિ ફસ્સેહિ…પે… તીહિ પઞ્ઞાહિ સમન્નાગતોતિ? ન હેવં વત્તબ્બે…પે….

સકદાગામી દ્વીહિ ફલેહિ સમન્નાગતોતિ? આમન્તા. સકદાગામી દ્વીહિ ફસ્સેહિ…પે… દ્વીહિ પઞ્ઞાહિ સમન્નાગતોતિ? ન હેવં વત્તબ્બે…પે….

અરહા સોતાપત્તિફલેન સમન્નાગતોતિ? આમન્તા. અરહા સોતાપન્નો સત્તક્ખત્તુપરમો, કોલઙ્કોલો, એકબીજીતિ? ન હેવં વત્તબ્બે…પે… અરહા સકદાગામિફલેન સમન્નાગતોતિ? આમન્તા. અરહા સકદાગામીતિ? ન હેવં વત્તબ્બે …પે… અરહા અનાગામિફલેન સમન્નાગતોતિ? આમન્તા. અરહા અનાગામી, અન્તરાપરિનિબ્બાયી, ઉપહચ્ચપરિનિબ્બાયી, અસઙ્ખારપરિનિબ્બાયી, સસઙ્ખારપરિનિબ્બાયી, ઉદ્ધંસોતો અકનિટ્ઠગામીતિ? ન હેવં વત્તબ્બે…પે….

અનાગામી સોતાપત્તિફલેન સમન્નાગતોતિ? આમન્તા. અનાગામી સોતાપન્નો સત્તક્ખત્તુપરમો, કોલઙ્કોલો, એકબીજીતિ? ન હેવં વત્તબ્બે …પે… અનાગામી સકદાગામિફલેન સમન્નાગતોતિ? આમન્તા. અનાગામી સકદાગામીતિ? ન હેવં વત્તબ્બે…પે….

સકદાગામી સોતાપત્તિફલેન સમન્નાગતોતિ? આમન્તા. સકદાગામી સોતાપન્નો સત્તક્ખત્તુપરમો, કોલઙ્કોલો, એકબીજીતિ? ન હેવં વત્તબ્બે…પે….

૩૯૪. સોતાપત્તિફલેન સમન્નાગતો ‘‘સોતાપન્નો’’તિ વત્તબ્બોતિ? આમન્તા. અરહા સોતાપત્તિફલેન સમન્નાગતોતિ? આમન્તા. સ્વેવ અરહા, સો સોતાપન્નોતિ? ન હેવં વત્તબ્બે…પે….

સકદાગામિફલેન સમન્નાગતો ‘‘સકદાગામી’’તિ વત્તબ્બોતિ? આમન્તા. અરહા સકદાગામિફલેન સમન્નાગતોતિ? આમન્તા. સ્વેવ અરહા, સો સકદાગામીતિ? ન હેવં વત્તબ્બે…પે….

અનાગામિફલેન સમન્નાગતો ‘‘અનાગામી’’તિ વત્તબ્બોતિ? આમન્તા. અરહા અનાગામિફલેન સમન્નાગતોતિ? આમન્તા. સ્વેવ અરહા, સો અનાગામીતિ? ન હેવં વત્તબ્બે…પે….

સોતાપત્તિફલેન સમન્નાગતો ‘‘સોતાપન્નો’’તિ વત્તબ્બોતિ? આમન્તા. અનાગામી સોતાપત્તિફલેન સમન્નાગતોતિ? આમન્તા. સ્વેવ અનાગામી, સો સોતાપન્નોતિ? ન હેવં વત્તબ્બે…પે….

સકદાગામિફલેન સમન્નાગતો ‘‘સકદાગામી’’તિ વત્તબ્બોતિ? આમન્તા. અનાગામી સકદાગામિફલેન સમન્નાગતોતિ? આમન્તા. સ્વેવ અનાગામી, સો સકદાગામીતિ? ન હેવં વત્તબ્બે…પે….

સોતાપત્તિફલેન સમન્નાગતો ‘‘સોતાપન્નો’’તિ વત્તબ્બોતિ? આમન્તા. સકદાગામી સોતાપત્તિફલેન સમન્નાગતોતિ? આમન્તા. સ્વેવ સકદાગામી, સો સોતાપન્નોતિ? ન હેવં વત્તબ્બે…પે….

૩૯૫. અરહા સોતાપત્તિફલેન સમન્નાગતોતિ? આમન્તા. નનુ અરહા સોતાપત્તિફલં વીતિવત્તોતિ? આમન્તા. હઞ્ચિ અરહા સોતાપત્તિફલં વીતિવત્તો, નો ચ વત રે વત્તબ્બે – ‘‘અરહા સોતાપત્તિફલેન સમન્નાગતો’’તિ.

અરહા સોતાપત્તિફલં વીતિવત્તો તેન સમન્નાગતોતિ? આમન્તા. અરહા સોતાપત્તિમગ્ગં વીતિવત્તો, સક્કાયદિટ્ઠિં વિચિકિચ્છં સીલબ્બતપરામાસં, અપાયગમનીયં રાગં, અપાયગમનીયં દોસં, અપાયગમનીયં મોહં વીતિવત્તો તેન સમન્નાગતોતિ? ન હેવં વત્તબ્બે…પે….

અરહા સકદાગામિફલેન સમન્નાગતોતિ? આમન્તા. નનુ અરહા સકદાગામિફલં વીતિવત્તોતિ? આમન્તા. હઞ્ચિ અરહા સકદાગામિફલં વીતિવત્તો, નો ચ વત રે વત્તબ્બે – ‘‘અરહા સકદાગામિફલેન સમન્નાગતો’’તિ.

અરહા સકદાગામિફલં વીતિવત્તો તેન સમન્નાગતોતિ? આમન્તા. અરહા સકદાગામિમગ્ગં વીતિવત્તો, ઓળારિકં કામરાગં, ઓળારિકં બ્યાપાદં વીતિવત્તો તેન સમન્નાગતોતિ? ન હેવં વત્તબ્બે…પે….

અરહા અનાગામિફલેન સમન્નાગતોતિ? આમન્તા. નનુ અરહા અનાગામિફલં વીતિવત્તોતિ? આમન્તા. હઞ્ચિ અરહા અનાગામિફલં વીતિવત્તો, નો ચ વત રે વત્તબ્બે – ‘‘અરહા અનાગામિફલેન સમન્નાગતો’’તિ.

અરહા અનાગામિફલં વીતિવત્તો તેન સમન્નાગતોતિ? આમન્તા. અરહા અનાગામિમગ્ગં વીતિવત્તો, અણુસહગતં કામરાગં, અણુસહગતં બ્યાપાદં વીતિવત્તો તેન સમન્નાગતોતિ? ન હેવં વત્તબ્બે…પે….

અનાગામી સોતાપત્તિફલેન સમન્નાગતોતિ? આમન્તા. નનુ અનાગામી સોતાપત્તિફલં વીતિવત્તોતિ? આમન્તા. હઞ્ચિ અનાગામી સોતાપત્તિફલં વીતિવત્તો, નો ચ વત રે વત્તબ્બે – ‘‘અનાગામી સોતાપત્તિફલેન સમન્નાગતો’’તિ.

અનાગામી સોતાપત્તિફલં વીતિવત્તો તેન સમન્નાગતોતિ? આમન્તા. અનાગામી સોતાપત્તિમગ્ગં વીતિવત્તો, સક્કાયદિટ્ઠિં…પે… અપાયગમનીયં મોહં વીતિવત્તો તેન સમન્નાગતોતિ? ન હેવં વત્તબ્બે…પે….

અનાગામી સકદાગામિફલેન સમન્નાગતોતિ? આમન્તા. નનુ અનાગામી સકદાગામિફલં વીતિવત્તોતિ? આમન્તા. હઞ્ચિ અનાગામી સકદાગામિફલં વીતિવત્તો, નો ચ વત રે વત્તબ્બે – ‘‘અનાગામી સકદાગામિફલેન સમન્નાગતો’’તિ.

અનાગામી સકદાગામિફલં વીતિવત્તો તેન સમન્નાગતોતિ? આમન્તા. અનાગામી સકદાગામિમગ્ગં વીતિવત્તો, ઓળારિકં કામરાગં, ઓળારિકં બ્યાપાદં વીતિવત્તો તેન સમન્નાગતોતિ? ન હેવં વત્તબ્બે…પે….

સકદાગામી સોતાપત્તિફલેન સમન્નાગતોતિ? આમન્તા. નનુ સકદાગામી સોતાપત્તિફલં વીતિવત્તોતિ? આમન્તા. હઞ્ચિ સકદાગામી સોતાપત્તિફલં વીતિવત્તો, નો ચ વત રે વત્તબ્બે – ‘‘સકદાગામી સોતાપત્તિફલેન સમન્નાગતો’’તિ.

સકદાગામી સોતાપત્તિફલં વીતિવત્તો તેન સમન્નાગતોતિ? આમન્તા. સકદાગામી સોતાપત્તિમગ્ગં વીતિવત્તો, સક્કાયદિટ્ઠિં…પે… અપાયગમનીયં મોહં વીતિવત્તો તેન સમન્નાગતોતિ? ન હેવં વત્તબ્બે…પે….

૩૯૬. ન વત્તબ્બં – ‘‘અરહા ચતૂહિ ફલેહિ સમન્નાગતો’’તિ? આમન્તા. નનુ અરહતા ચત્તારિ ફલાનિ પટિલદ્ધાનિ, તેહિ ચ અપરિહીનોતિ? આમન્તા. હઞ્ચિ અરહતા ચત્તારિ ફલાનિ પટિલદ્ધાનિ તેહિ ચ અપરિહીનો, તેન વત રે વત્તબ્બે – ‘‘અરહા ચતૂહિ ફલેહિ સમન્નાગતો’’તિ.

ન વત્તબ્બં – ‘‘અનાગામી તીહિ ફલેહિ સમન્નાગતો’’તિ? આમન્તા. નનુ અનાગામિના તીણિ ફલાનિ પટિલદ્ધાનિ, તેહિ ચ અપરિહીનોતિ? આમન્તા. હઞ્ચિ અનાગામિના તીણિ ફલાનિ પટિલદ્ધાનિ તેહિ ચ અપરિહીનો, તેન વત રે વત્તબ્બે – ‘‘અનાગામી તીહિ ફલેહિ સમન્નાગતો’’તિ.

ન વત્તબ્બં – ‘‘સકદાગામી દ્વીહિ ફલેહિ સમન્નાગતો’’તિ? આમન્તા. નનુ સકદાગામિના દ્વે ફલાનિ પટિલદ્ધાનિ, તેહિ ચ અપરિહીનોતિ? આમન્તા. હઞ્ચિ સકદાગામિના દ્વે ફલાનિ પટિલદ્ધાનિ તેહિ ચ અપરિહીનો, તેન વત રે વત્તબ્બે – ‘‘સકદાગામી દ્વીહિ ફલેહિ સમન્નાગતો’’તિ.

અરહતા ચત્તારિ ફલાનિ પટિલદ્ધાનિ તેહિ ચ અપરિહીનોતિ, અરહા ચતૂહિ ફલેહિ સમન્નાગતોતિ? આમન્તા. અરહતા ચત્તારો મગ્ગા પટિલદ્ધા તેહિ ચ અપરિહીનોતિ, અરહા ચતૂહિ મગ્ગેહિ સમન્નાગતોતિ? ન હેવં વત્તબ્બે…પે….

અનાગામિના તીણિ ફલાનિ પટિલદ્ધાનિ તેહિ ચ અપરિહીનોતિ, અનાગામી તીહિ ફલેહિ સમન્નાગતોતિ? આમન્તા. અનાગામિના તયો મગ્ગા પટિલદ્ધા તેહિ ચ અપરિહીનોતિ, અનાગામી તીહિ મગ્ગેહિ સમન્નાગતોતિ? ન હેવં વત્તબ્બે…પે….

સકદાગામિના દ્વે ફલાનિ પટિલદ્ધાનિ તેહિ ચ અપરિહીનોતિ, સકદાગામી દ્વીહિ ફલેહિ સમન્નાગતોતિ? આમન્તા. સકદાગામિના દ્વે મગ્ગા પટિલદ્ધા, તેહિ ચ અપરિહીનોતિ, સકદાગામી દ્વીહિ મગ્ગેહિ સમન્નાગતોતિ? ન હેવં વત્તબ્બે…પે….

સમન્નાગતકથા નિટ્ઠિતા.

૪. ચતુત્થવગ્ગો

(૩૭) ૫. ઉપેક્ખાસમન્નાગતકથા

૩૯૭. અરહા છહિ ઉપેક્ખાહિ સમન્નાગતોતિ? આમન્તા. અરહા છહિ ફસ્સેહિ, છહિ વેદનાહિ, છહિ સઞ્ઞાહિ…પે… છહિ પઞ્ઞાહિ સમન્નાગતોતિ? ન હેવં વત્તબ્બે…પે….

અરહા છહિ ઉપેક્ખાહિ સમન્નાગતોતિ? આમન્તા. અરહા ચક્ખુના રૂપં પસ્સન્તો સોતેન સદ્દં સુણાતિ, ઘાનેન ગન્ધં ઘાયતિ, જિવ્હાય રસં સાયતિ, કાયેન ફોટ્ઠબ્બં ફુસતિ, મનસા ધમ્મં વિજાનાતિ…પે… મનસા ધમ્મં વિજાનન્તો ચક્ખુના રૂપં પસ્સતિ, સોતેન સદ્દં સુણાતિ, ઘાનેન ગન્ધં ઘાયતિ, જિવ્હાય રસં સાયતિ, કાયેન ફોટ્ઠબ્બં ફુસતીતિ? ન હેવં વત્તબ્બે…પે….

અરહા છહિ ઉપેક્ખાહિ સમન્નાગતોતિ? આમન્તા. સતતં સમિતં અબ્બોકિણ્ણં છહિ ઉપેક્ખાહિ સમન્નાગતો સમોહિતો [સમાહિતો (સ્યા.)], છ ઉપેક્ખાયો પચ્ચુપટ્ઠિતાતિ? ન હેવં વત્તબ્બે…પે….

ન વત્તબ્બં – ‘‘અરહા છહિ ઉપેક્ખાહિ સમન્નાગતો’’તિ? આમન્તા. નનુ અરહા છળઙ્ગુપેક્ખોતિ? આમન્તા. હઞ્ચિ અરહા છળઙ્ગુપેક્ખો, તેન વત રે વત્તબ્બે – ‘‘અરહા છહિ ઉપેક્ખાહિ સમન્નાગતો’’તિ…પે….

ઉપેક્ખાસમન્નાગતકથા નિટ્ઠિતા.

૪. ચતુત્થવગ્ગો

(૩૮) ૬. બોધિયા બુદ્ધોતિકથા

૩૯૮. બોધિયા બુદ્ધોતિ? આમન્તા. બોધિયા નિરુદ્ધાય વિગતાય પટિપસ્સદ્ધાય અબુદ્ધો હોતીતિ? ન હેવં વત્તબ્બે…પે….

બોધિયા બુદ્ધોતિ? આમન્તા. અતીતાય બોધિયા બુદ્ધોતિ? ન હેવં વત્તબ્બે…પે… અતીતાય બોધિયા બુદ્ધોતિ? આમન્તા. તાય બોધિયા બોધિકરણીયં કરોતીતિ? ન હેવં વત્તબ્બે…પે….

તાય બોધિયા બોધિકરણીયં કરોતીતિ? આમન્તા. તાય બોધિયા દુક્ખં પરિજાનાતિ, સમુદયં પજહતિ, નિરોધં સચ્છિકરોતિ, મગ્ગં ભાવેતીતિ? ન હેવં વત્તબ્બે…પે….

બોધિયા બુદ્ધોતિ? આમન્તા. અનાગતાય બોધિયા બુદ્ધોતિ? ન હેવં વત્તબ્બે…પે….

અનાગતાય બોધિયા બુદ્ધોતિ? આમન્તા. તાય બોધિયા બોધિકરણીયં કરોતીતિ? ન હેવં વત્તબ્બે…પે….

તાય બોધિયા બોધિકરણીયં કરોતીતિ? આમન્તા. તાય બોધિયા દુક્ખં પરિજાનાતિ…પે… મગ્ગં ભાવેતીતિ? ન હેવં વત્તબ્બે…પે….

પચ્ચુપ્પન્નાય બોધિયા બુદ્ધો, તાય બોધિયા બોધિકરણીયં કરોતીતિ? આમન્તા. અતીતાય બોધિયા બુદ્ધો, તાય બોધિયા બોધિકરણીયં કરોતીતિ? ન હેવં વત્તબ્બે…પે….

પચ્ચુપ્પન્નાય બોધિયા બુદ્ધો, તાય બોધિયા દુક્ખં પરિજાનાતિ, સમુદયં પજહતિ, નિરોધં સચ્છિકરોતિ, મગ્ગં ભાવેતીતિ? આમન્તા. અતીતાય બોધિયા બુદ્ધો, તાય બોધિયા દુક્ખં પરિજાનાતિ…પે… મગ્ગં ભાવેતીતિ? ન હેવં વત્તબ્બે…પે….

પચ્ચુપ્પન્નાય બોધિયા બુદ્ધો, તાય બોધિયા બોધિકરણીયં કરોતીતિ? આમન્તા. અનાગતાય બોધિયા બુદ્ધો, તાય બોધિયા બોધિકરણીયં કરોતીતિ? ન હેવં વત્તબ્બે…પે….

પચ્ચુપ્પન્નાય બોધિયા બુદ્ધો, તાય બોધિયા દુક્ખં પરિજાનાતિ…પે… મગ્ગં ભાવેતીતિ? આમન્તા. અનાગતાય બોધિયા બુદ્ધો, તાય બોધિયા દુક્ખં પરિજાનાતિ…પે… મગ્ગં ભાવેતીતિ? ન હેવં વત્તબ્બે…પે….

અતીતાય બોધિયા બુદ્ધો, ન ચ તાય બોધિયા બોધિકરણીયં કરોતીતિ? આમન્તા. પચ્ચુપ્પન્નાય બોધિયા બુદ્ધો, ન ચ તાય બોધિયા બોધિકરણીયં કરોતીતિ? ન હેવં વત્તબ્બે…પે….

અતીતાય બોધિયા બુદ્ધો, ન ચ તાય બોધિયા દુક્ખં પરિજાનાતિ…પે… મગ્ગં ભાવેતીતિ? આમન્તા. પચ્ચુપ્પન્નાય બોધિયા બુદ્ધો, ન ચ તાય બોધિયા દુક્ખં પરિજાનાતિ…પે… મગ્ગં ભાવેતીતિ? ન હેવં વત્તબ્બે…પે….

અનાગતાય બોધિયા બુદ્ધો, ન ચ તાય બોધિયા બોધિકરણીયં કરોતીતિ? આમન્તા. પચ્ચુપ્પન્નાય બોધિયા બુદ્ધો, ન ચ તાય બોધિયા બોધિકરણીયં કરોતીતિ? ન હેવં વત્તબ્બે…પે….

અનાગતાય બોધિયા બુદ્ધો, ન ચ તાય બોધિયા દુક્ખં પરિજાનાતિ…પે… મગ્ગં ભાવેતીતિ? આમન્તા. પચ્ચુપ્પન્નાય બોધિયા બુદ્ધો, ન ચ તાય બોધિયા દુક્ખં પરિજાનાતિ…પે… મગ્ગં ભાવેતીતિ? ન હેવં વત્તબ્બે…પે….

૩૯૯. અતીતાય બોધિયા બુદ્ધો, અનાગતાય બોધિયા બુદ્ધો, પચ્ચુપ્પન્નાય બોધિયા બુદ્ધોતિ? આમન્તા. તીહિ બોધીહિ બુદ્ધોતિ? ન હેવં વત્તબ્બે…પે….

તીહિ બોધીહિ બુદ્ધોતિ? આમન્તા. સતતં સમિતં અબ્બોકિણ્ણં તીહિ બોધીહિ સમન્નાગતો સમોહિતો, તિસ્સો બોધિયો પચ્ચુપટ્ઠિતાતિ? ન હેવં વત્તબ્બે…પે….

ન વત્તબ્બં – ‘‘બોધિયા બુદ્ધો’’તિ? આમન્તા. નનુ બોધિપટિલાભા બુદ્ધોતિ? આમન્તા. હઞ્ચિ બોધિપટિલાભા બુદ્ધો, તેન વત રે વત્તબ્બે – ‘‘બોધિયા બુદ્ધો’’તિ.

બોધિપટિલાભા બુદ્ધોતિ, બોધિયા બુદ્ધોતિ? આમન્તા. બોધિપટિલાભા બોધીતિ? ન હેવં વત્તબ્બે…પે….

બોધિયા બુદ્ધોતિકથા નિટ્ઠિતા.

૪. ચતુત્થવગ્ગો

(૩૯) ૭. લક્ખણકથા

૪૦૦. લક્ખણસમન્નાગતો બોધિસત્તોતિ? આમન્તા. પદેસલક્ખણેહિ સમન્નાગતો પદેસબોધિસત્તોતિ? ન હેવં વત્તબ્બે…પે….

લક્ખણસમન્નાગતો બોધિસત્તોતિ? આમન્તા. તિભાગલક્ખણેહિ સમન્નાગતો તિભાગબોધિસત્તોતિ? ન હેવં વત્તબ્બે…પે….

લક્ખણસમન્નાગતો બોધિસત્તોતિ? આમન્તા. ઉપડ્ઢલક્ખણેહિ સમન્નાગતો ઉપડ્ઢબોધિસત્તોતિ? ન હેવં વત્તબ્બે…પે….

લક્ખણસમન્નાગતો બોધિસત્તોતિ? આમન્તા. ચક્કવત્તિસત્તો લક્ખણસમન્નાગતો, ચક્કવત્તિસત્તો બોધિસત્તોતિ? ન હેવં વત્તબ્બે…પે….

ચક્કવત્તિસત્તો લક્ખણસમન્નાગતો, ચક્કવત્તિસત્તો બોધિસત્તોતિ? આમન્તા. યાદિસો બોધિસત્તસ્સ પુબ્બયોગો પુબ્બચરિયા ધમ્મક્ખાનં ધમ્મદેસના, તાદિસો ચક્કવત્તિસત્તસ્સ પુબ્બયોગો પુબ્બચરિયા ધમ્મક્ખાનં ધમ્મદેસનાતિ? ન હેવં વત્તબ્બે…પે….

૪૦૧. યથા બોધિસત્તસ્સ જાયમાનસ્સ દેવા પઠમં પટિગ્ગણ્હન્તિ પચ્છા મનુસ્સા [દી. નિ. ૨.૨૭; મ. નિ. ૩.૨૦૫ વુત્તં દિસ્સાય પુચ્છતિ], એવમેવં ચક્કવત્તિસત્તસ્સ જાયમાનસ્સ દેવા પઠમં પટિગ્ગણ્હન્તિ પચ્છા મનુસ્સાતિ? ન હેવં વત્તબ્બે…પે….

યથા બોધિસત્તસ્સ જાયમાનસ્સ ચત્તારો નં દેવપુત્તા પટિગ્ગહેત્વા માતુ પુરતો ઠપેન્તિ – ‘‘અત્તમના, દેવિ, હોહિ! મહેસક્ખો તે પુત્તો ઉપ્પન્નો’’તિ, એવમેવં ચક્કવત્તિસત્તસ્સ જાયમાનસ્સ ચત્તારો નં દેવપુત્તા પટિગ્ગહેત્વા માતુ પુરતો ઠપેન્તિ – ‘‘અત્તમના, દેવિ, હોહિ! મહેસક્ખો તે પુત્તો ઉપ્પન્નો’’તિ? ન હેવં વત્તબ્બે…પે….

યથા બોધિસત્તસ્સ જાયમાનસ્સ દ્વે ઉદકસ્સ ધારા અન્તલિક્ખા પાતુભવન્તિ – એકા સીતસ્સ, એકા ઉણ્હસ્સ – યેન બોધિસત્તસ્સ ઉદકકિચ્ચં કરોન્તિ માતુ ચ, એવમેવં ચક્કવત્તિસત્તસ્સ જાયમાનસ્સ દ્વે ઉદકસ્સ ધારા અન્તલિક્ખા પાતુભવન્તિ – એકા સીતસ્સ, એકા ઉણ્હસ્સ – યેન ચક્કવત્તિસત્તસ્સ ઉદકકિચ્ચં કરોન્તિ માતુ ચાતિ? ન હેવં વત્તબ્બે…પે….

યથા સમ્પતિજાતો બોધિસત્તો સમેહિ પાદેહિ પતિટ્ઠહિત્વા ઉત્તરેન અભિમુખો સત્તપદવીતિહારેન ગચ્છતિ સેતમ્હિ છત્તે અનુધારિયમાને, સબ્બા ચ દિસા વિલોકેતિ, આસભિઞ્ચ વાચં ભાસતિ – ‘‘અગ્ગોહમસ્મિ લોકસ્સ, જેટ્ઠોહમસ્મિ લોકસ્સ, સેટ્ઠોહમસ્મિ લોકસ્સ, અયમન્તિમા જાતિ, નત્થિ દાનિ પુનબ્ભવો’’તિ, એવમેવં સમ્પતિજાતો ચક્કવત્તિસત્તો સમેહિ પાદેહિ પતિટ્ઠહિત્વા ઉત્તરેન અભિમુખો સત્તપદવીતિહારેન ગચ્છતિ સેતમ્હિ છત્તે અનુધારિયમાને, સબ્બા ચ દિસા વિલોકેતિ, આસભિઞ્ચ વાચં ભાસતિ – ‘‘અગ્ગોહમસ્મિ લોકસ્સ, જેટ્ઠોહમસ્મિ લોકસ્સ, સેટ્ઠોહમસ્મિ લોકસ્સ, અયમન્તિમા જાતિ, નત્થિ દાનિ પુનબ્ભવો’’તિ? ન હેવં વત્તબ્બે…પે….

યથા બોધિસત્તસ્સ જાયમાનસ્સ મહતો આલોકસ્સ મહતો ઓભાસસ્સ મહતો ભૂમિચાલસ્સ પાતુભાવો હોતિ, એવમેવં ચક્કવત્તિસત્તસ્સ જાયમાનસ્સ મહતો આલોકસ્સ મહતો ઓભાસસ્સ મહતો ભૂમિચાલસ્સ પાતુભાવો હોતીતિ? ન હેવં વત્તબ્બે…પે….

યથા બોધિસત્તસ્સ પકતિકાયો સમન્તા બ્યામં ઓભાસતિ, એવમેવં ચક્કવત્તિસત્તસ્સ પકતિકાયો સમન્તા બ્યામં ઓભાસતીતિ? ન હેવં વત્તબ્બે…પે….

યથા બોધિસત્તો મહાસુપિનં પસ્સતિ, એવમેવં ચક્કવત્તિસત્તો મહાસુપિનં પસ્સતીતિ? ન હેવં વત્તબ્બે…પે….

૪૦૨. ન વત્તબ્બં – ‘‘લક્ખણસમન્નાગતો બોધિસત્તો’’તિ? આમન્તા. નનુ વુત્તં ભગવતા – ‘‘દ્વત્તિંસિમાનિ, ભિક્ખવે, મહાપુરિસસ્સ મહાપુરિસલક્ખણાનિ, યેહિ સમન્નાગતસ્સ મહાપુરિસસ્સ દ્વેવ ગતિયો ભવન્તિ અનઞ્ઞા [ન અઞ્ઞા (ક.)]! સચે અગારં અજ્ઝાવસતિ, રાજા હોતિ ચક્કવત્તી ધમ્મિકો ધમ્મરાજા ચાતુરન્તો વિજિતાવી જનપદત્થાવરિયપ્પત્તો સત્તરતનસમન્નાગતો. તસ્સિમાનિ સત્ત રતનાનિ ભવન્તિ, સેય્યથિદં – ચક્કરતનં, હત્થિરતનં, અસ્સરતનં, મણિરતનં, ઇત્થિરતનં, ગહપતિરતનં, પરિણાયકરતનમેવ સત્તમં. પરોસહસ્સં ખો પનસ્સ પુત્તા ભવન્તિ સૂરા વીરઙ્ગરૂપા પરસેનપ્પમદ્દના. સો ઇમં પથવિં સાગરપરિયન્તં અદણ્ડેન અસત્થેન ધમ્મેન અભિવિજિય અજ્ઝાવસતિ. સચે ખો પન અગારસ્મા અનગારિયં પબ્બજતિ, અરહં હોતિ સમ્માસમ્બુદ્ધો લોકે વિવટ્ટચ્છદો’’તિ [દી. નિ. ૩.૨૦૦]. અત્થેવ સુત્તન્તોતિ? આમન્તા. તેન હિ લક્ખણસમન્નાગતો બોધિસત્તોતિ.

લક્ખણકથા નિટ્ઠિતા.

૪. ચતુત્થવગ્ગો

(૪૦) ૮. નિયામોક્કન્તિકથા

૪૦૩. બોધિસત્તો કસ્સપસ્સ ભગવતો પાવચને ઓક્કન્તનિયામો ચરિતબ્રહ્મચરિયોતિ [મ. નિ. ૨.૨૮૨ ઘટિકારસુત્તં નિસ્સાય પુચ્છતિ]? આમન્તા. બોધિસત્તો કસ્સપસ્સ ભગવતો સાવકોતિ? ન હેવં વત્તબ્બે…પે….

બોધિસત્તો કસ્સપસ્સ ભગવતો સાવકોતિ? આમન્તા. સાવકો હુત્વા બુદ્ધો હોતીતિ? ન હેવં વત્તબ્બે…પે….

સાવકો હુત્વા બુદ્ધો હોતીતિ? આમન્તા. અનુસ્સવિયોતિ? ન હેવં વત્તબ્બે…પે….

અનુસ્સવિયોતિ? આમન્તા. નનુ ભગવા સયમ્ભૂતિ? આમન્તા. હઞ્ચિ ભગવા સયમ્ભૂ, નો ચ વત રે વત્તબ્બે – ‘‘અનુસ્સવિયો’’તિ.

બોધિસત્તો કસ્સપસ્સ ભગવતો પાવચને ઓક્કન્તનિયામો ચરિતબ્રહ્મચરિયોતિ? આમન્તા. ભગવતા બોધિયા મૂલે તીણેવ સામઞ્ઞફલાનિ અભિસમ્બુદ્ધાનીતિ? ન હેવં વત્તબ્બે…પે….

નનુ ભગવતા બોધિયા મૂલે ચત્તારિ સામઞ્ઞફલાનિ અભિસમ્બુદ્ધાનીતિ? આમન્તા. હઞ્ચિ ભગવતા બોધિયા મૂલે ચત્તારિ સામઞ્ઞફલાનિ અભિસમ્બુદ્ધાનિ, નો ચ વત રે વત્તબ્બે – ‘‘બોધિસત્તો કસ્સપસ્સ ભગવતો પાવચને ઓક્કન્તનિયામો ચરિતબ્રહ્મચરિયો’’તિ.

૪૦૪. બોધિસત્તો કસ્સપસ્સ ભગવતો પાવચને ઓક્કન્તનિયામો ચરિતબ્રહ્મચરિયોતિ? આમન્તા. બોધિસત્તો દુક્કરકારિયં અકાસીતિ? આમન્તા. દસ્સનસમ્પન્નો પુગ્ગલો દુક્કરકારિયં કરેય્યાતિ? ન હેવં વત્તબ્બે…પે….

બોધિસત્તો અપરન્તપં [અમરં તપં (સં. નિ. ૧.૧૩૭)] અકાસિ, અઞ્ઞં સત્થારં ઉદ્દિસીતિ? આમન્તા. દસ્સનસમ્પન્નો પુગ્ગલો અઞ્ઞં સત્થારં ઉદ્દિસેય્યાતિ? ન હેવં વત્તબ્બે…પે….

આયસ્મા આનન્દો ભગવતો પાવચને ઓક્કન્તનિયામો ચરિતબ્રહ્મચરિયો, આયસ્મા આનન્દો ભગવતો સાવકોતિ? આમન્તા. બોધિસત્તો કસ્સપસ્સ ભગવતો પાવચને ઓક્કન્તનિયામો ચરિતબ્રહ્મચરિયો, બોધિસત્તો કસ્સપસ્સ ભગવતો સાવકોતિ? ન હેવં વત્તબ્બે…પે….

ચિત્તો ગહપતિ હત્થકો આળવકો ભગવતો પાવચને ઓક્કન્તનિયામો ચરિતબ્રહ્મચરિયો, ચિત્તો ગહપતિ હત્થકો આળવકો ભગવતો સાવકોતિ? આમન્તા. બોધિસત્તો કસ્સપસ્સ ભગવતો પાવચને ઓક્કન્તનિયામો ચરિતબ્રહ્મચરિયો, બોધિસત્તો કસ્સપસ્સ ભગવતો સાવકોતિ? ન હેવં વત્તબ્બે…પે….

બોધિસત્તો કસ્સપસ્સ ભગવતો પાવચને ઓક્કન્તનિયામો ચરિતબ્રહ્મચરિયો, ન ચ કસ્સપસ્સ ભગવતો સાવકોતિ? આમન્તા. આયસ્મા આનન્દો ભગવતો પાવચને ઓક્કન્તનિયામો ચરિતબ્રહ્મચરિયો, ન ચ ભગવતો સાવકોતિ? ન હેવં વત્તબ્બે…પે….

બોધિસત્તો કસ્સપસ્સ ભગવતો પાવચને ઓક્કન્તનિયામો ચરિતબ્રહ્મચરિયો, ન ચ કસ્સપસ્સ ભગવતો સાવકોતિ? આમન્તા. ચિત્તો ગહપતિ હત્થકો આળવકો ભગવતો પાવચને ઓક્કન્તનિયામો ચરિતબ્રહ્મચરિયો, ન ચ ભગવતો સાવકોતિ? ન હેવં વત્તબ્બે…પે….

બોધિસત્તો કસ્સપસ્સ ભગવતો પાવચને ઓક્કન્તનિયામો ચરિતબ્રહ્મચરિયો, ન ચ કસ્સપસ્સ ભગવતો સાવકોતિ? આમન્તા. સાવકો જાતિં વીતિવત્તો અસાવકો હોતીતિ? ન હેવં વત્તબ્બે…પે….

૪૦૫. ન વત્તબ્બં – ‘‘બોધિસત્તો કસ્સપસ્સ ભગવતો પાવચને ઓક્કન્તનિયામો ચરિતબ્રહ્મચરિયો’’તિ? આમન્તા. નનુ વુત્તં ભગવતા – ‘‘કસ્સપે અહં, આનન્દ, ભગવતિ બ્રહ્મચરિયં અચરિં આયતિં સમ્બોધાયા’’તિ! અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘બોધિસત્તો કસ્સપસ્સ ભગવતો પાવચને ઓક્કન્તનિયામો ચરિતબ્રહ્મચરિયો’’તિ.

બોધિસત્તો કસ્સપસ્સ ભગવતો પાવચને ઓક્કન્તનિયામો ચરિતબ્રહ્મચરિયોતિ? આમન્તા. નનુ વુત્તં ભગવતા –

‘‘સબ્બાભિભૂ સબ્બવિદૂહમસ્મિ,

સબ્બેસુ ધમ્મેસુ અનુપલિત્તો;

સબ્બઞ્જહો તણ્હક્ખયે વિમુત્તો,

સયં અભિઞ્ઞાય કમુદ્દિસેય્યં.

‘‘ન મે આચરિયો અત્થિ, સદિસો મે ન વિજ્જતિ;

સદેવકસ્મિં લોકસ્મિં, નત્થિ મે પટિપુગ્ગલો.

‘‘અહઞ્હિ અરહા લોકે, અહં સત્થા અનુત્તરો;

એકોમ્હિ સમ્માસમ્બુદ્ધો, સીતિભૂતોસ્મિ નિબ્બુતો.

‘‘ધમ્મચક્કં પવત્તેતું, ગચ્છામિ કાસિનં પુરં;

અન્ધીભૂતસ્મિં [અન્ધભૂતસ્મિં (સી. સ્યા. કં. પી.)] લોકસ્મિં, આહઞ્છં [આહઞ્ઞિં (ક.)] અમતદુન્દુભિ’’ન્તિ [દુદ્રભિન્તિ (ક.)].

‘‘યથા ખો ત્વં, આવુસો, પટિજાનાસિ, અરહસિ અનન્તજિનો’’તિ?

‘‘માદિસા વે જિના હોન્તિ, યે પત્તા આસવક્ખયં;

જિતા મે પાપકા ધમ્મા, તસ્માહં ઉપક જિનો’’તિ [મહાવ. ૧૧; મ. નિ. ૧.૨૮૫; ૨.૩૪૧].

અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘બોધિસત્તો કસ્સપસ્સ ભગવતો પાવચને ઓક્કન્તનિયામો ચરિતબ્રહ્મચરિયો’’તિ.

બોધિસત્તો કસ્સપસ્સ ભગવતો પાવચને ઓક્કન્તનિયામો ચરિતબ્રહ્મચરિયોતિ? આમન્તા. નનુ વુત્તં ભગવતા – ‘‘‘ઇદં દુક્ખં અરિયસચ્ચ’ન્તિ મે, ભિક્ખવે, પુબ્બે અનનુસ્સુતેસુ ધમ્મેસુ ચક્ખું ઉદપાદિ, ઞાણં ઉદપાદિ, પઞ્ઞા ઉદપાદિ, વિજ્જા ઉદપાદિ, આલોકો ઉદપાદિ. ‘તં ખો પનિદં દુક્ખં અરિયસચ્ચં પરિઞ્ઞેય્ય’ન્તિ મે, ભિક્ખવે…પે… પરિઞ્ઞાતન્તિ મે, ભિક્ખવે, પુબ્બે અનનુસ્સુતેસુ ધમ્મેસુ ચક્ખું ઉદપાદિ…પે… આલોકો ઉદપાદિ. ‘ઇદં દુક્ખસમુદયં અરિયસચ્ચ’ન્તિ મે, ભિક્ખવે…પે… ‘તં ખો પનિદં દુક્ખસમુદયં [દુક્ખસમુદયો (સ્યા. કં.)] અરિયસચ્ચં પહાતબ્બ’ન્તિ મે, ભિક્ખવે…પે… પહીનન્તિ મે, ભિક્ખવે…પે… ‘ઇદં દુક્ખનિરોધં [દુક્ખનિરોધો (સ્યા. કં.)] અરિયસચ્ચ’ન્તિ મે, ભિક્ખવે…પે… ‘તં ખો પનિદં દુક્ખનિરોધં અરિયસચ્ચં સચ્છિકાતબ્બ’ન્તિ મે, ભિક્ખવે…પે… સચ્છિકતન્તિ મે, ભિક્ખવે…પે… ‘ઇદં દુક્ખનિરોધગામિની પટિપદા અરિયસચ્ચ’ન્તિ મે, ભિક્ખવે…પે… ‘તં ખો પનિદં દુક્ખનિરોધગામિની પટિપદા અરિયસચ્ચં ભાવેતબ્બ’ન્તિ મે, ભિક્ખવે…પે… ભાવિતન્તિ મે, ભિક્ખવે, પુબ્બે અનનુસ્સુતેસુ ધમ્મેસુ ચક્ખું ઉદપાદિ, ઞાણં ઉદપાદિ, પઞ્ઞા ઉદપાદિ, વિજ્જા ઉદપાદિ, આલોકો ઉદપાદી’’તિ [મહાવ. ૧૫; સં. નિ. ૫.૧૦૮૧; પટિ. મ. ૨.૩૦]. અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘બોધિસત્તો કસ્સપસ્સ ભગવતો પાવચને ઓક્કન્તનિયામો ચરિતબ્રહ્મચરિયો’’તિ.