(૪૨) ૧૦. સબ્બસંયોજનપ્પહાનકથા

૪૧૩. સબ્બસંયોજનાનં પહાનં અરહત્તન્તિ? આમન્તા. અરહત્તમગ્ગેન સબ્બે સંયોજના પહીયન્તીતિ? ન હેવં વત્તબ્બે…પે….

અરહત્તમગ્ગેન સબ્બે સંયોજના પહીયન્તીતિ? આમન્તા. અરહત્તમગ્ગેન સક્કાયદિટ્ઠિં વિચિકિચ્છં સીલબ્બતપરામાસં પજહતીતિ? ન હેવં વત્તબ્બે…પે….

અરહત્તમગ્ગેન સક્કાયદિટ્ઠિં વિચિકિચ્છં સીલબ્બતપરામાસં પજહતીતિ? આમન્તા. નનુ તિણ્ણં સંયોજનાનં પહાનં સોતાપત્તિફલં વુત્તં ભગવતાતિ? આમન્તા. હઞ્ચિ તિણ્ણં સંયોજનાનં પહાનં સોતાપત્તિફલં વુત્તં ભગવતા, નો ચ વત રે વત્તબ્બે – ‘‘અરહત્તમગ્ગેન સબ્બે સંયોજના પહીયન્તી’’તિ.

૪૧૪. અરહત્તમગ્ગેન સબ્બે સંયોજના પહીયન્તીતિ? આમન્તા. અરહત્તમગ્ગેન ઓળારિકં કામરાગં ઓળારિકં બ્યાપાદં પજહતીતિ? ન હેવં વત્તબ્બે…પે….

૪૧૫. અરહત્તમગ્ગેન ઓળારિકં કામરાગં ઓળારિકં બ્યાપાદં પજહતીતિ? આમન્તા. નનુ કામરાગબ્યાપાદાનં તનુભાવં સકદાગામિફલં વુત્તં ભગવતાતિ? આમન્તા. હઞ્ચિ કામરાગબ્યાપાદાનં તનુભાવં સકદાગામિફલં વુત્તં ભગવતા, નો ચ વત રે વત્તબ્બે – ‘‘અરહત્તમગ્ગેન સબ્બે સંયોજના પહીયન્તી’’તિ.

અરહત્તમગ્ગેન સબ્બે સંયોજના પહીયન્તીતિ? આમન્તા. અરહત્તમગ્ગેન અણુસહગતં કામરાગં અણુસહગતં બ્યાપાદં પજહતીતિ? ન હેવં વત્તબ્બે…પે….

૪૧૬. અરહત્તમગ્ગેન અણુસહગતં કામરાગં અણુસહગતં બ્યાપાદં પજહતીતિ? આમન્તા. નનુ કામરાગબ્યાપાદાનં અનવસેસપ્પહાનં અનાગામિફલં વુત્તં ભગવતાતિ? આમન્તા. હઞ્ચિ કામરાગબ્યાપાદાનં અનવસેસપ્પહાનં અનાગામિફલં વુત્તં ભગવતા, નો ચ વત રે વત્તબ્બે – ‘‘અરહત્તમગ્ગેન સબ્બે સંયોજના પહીયન્તી’’તિ.

અરહત્તમગ્ગેન સબ્બે સંયોજના પહીયન્તીતિ? આમન્તા. નનુ રૂપરાગઅરૂપરાગમાનઉદ્ધચ્ચઅવિજ્જાય અનવસેસપ્પહાનં અરહત્તં વુત્તં ભગવતાતિ? આમન્તા. હઞ્ચિ રૂપરાગઅરૂપરાગમાનઉદ્ધચ્ચઅવિજ્જાય અનવસેસપ્પહાનં અરહત્તં વુત્તં ભગવતા, નો ચ વત રે વત્તબ્બે – ‘‘અરહત્તમગ્ગેન સબ્બે સંયોજના પહીયન્તી’’તિ.

૪૧૭. ન વત્તબ્બં – ‘‘સબ્બસંયોજનાનં પહાનં અરહત્ત’’ન્તિ? આમન્તા. નનુ અરહતો સબ્બે સંયોજના પહીનાતિ? આમન્તા. હઞ્ચિ અરહતો સબ્બે સંયોજના પહીના, તેન વત રે વત્તબ્બે – ‘‘સબ્બસંયોજનાનં પહાનં અરહત્ત’’ન્તિ.

સબ્બસંયોજનપ્પહાનકથા નિટ્ઠિતા.

ચતુત્થવગ્ગો.

તસ્સુદ્દાનં –

ગિહિસ્સ અરહા, સહ ઉપપત્તિયા અરહા, અરહતો સબ્બે ધમ્મા અનાસવા, અરહા ચતૂહિ ફલેહિ સમન્નાગતો, એવમેવં છહિ ઉપેક્ખાહિ, બોધિયા બુદ્ધો, સલક્ખણસમન્નાગતો, બોધિસત્તો ઓક્કન્તનિયામો ચરિતબ્રહ્મચરિયો, પટિપન્નકો ફલેન સમન્નાગતો, સબ્બસંયોજનાનં પહાનં અરહત્તન્તિ.