(૨૯) ૯. યથાકમ્મૂપગતઞાણકથા

૩૭૭. યથાકમ્મૂપગતં ઞાણં [યથાકમ્મૂપગતઞાણં (સ્યા. કં.)] દિબ્બચક્ખુન્તિ? આમન્તા. યથાકમ્મૂપગતઞ્ચ મનસિ કરોતિ, દિબ્બેન ચક્ખુના રૂપં પસ્સતીતિ? ન હેવં વત્તબ્બે…પે….

યથાકમ્મૂપગતઞ્ચ મનસિ કરોતિ, દિબ્બેન ચક્ખુના રૂપં પસ્સતીતિ? આમન્તા. દ્વિન્નં ફસ્સાનં દ્વિન્નં ચિત્તાનં સમોધાનં હોતીતિ? ન હેવં વત્તબ્બે…પે….

યથાકમ્મૂપગતં ઞાણં દિબ્બચક્ખુન્તિ? આમન્તા. ‘‘ઇમે વત ભોન્તો સત્તા’’તિ ચ મનસિ કરોતિ, ‘‘કાયદુચ્ચરિતેન સમન્નાગતા’’તિ ચ મનસિ કરોતિ, ‘‘વચીદુચ્ચરિતેન સમન્નાગતા’’તિ ચ મનસિ કરોતિ, ‘‘મનોદુચ્ચરિતેન સમન્નાગતા’’તિ ચ મનસિ કરોતિ, ‘‘અરિયાનં ઉપવાદકા’’તિ ચ મનસિ કરોતિ, ‘‘મિચ્છાદિટ્ઠિકા’’તિ ચ મનસિ કરોતિ, ‘‘મિચ્છાદિટ્ઠિકમ્મસમાદાના’’તિ ચ મનસિ કરોતિ, ‘‘તે કાયસ્સ ભેદા પરં મરણા અપાયં દુગ્ગતિં વિનિપાતં નિરયં ઉપપન્ના’’તિ ચ મનસિ કરોતિ, ‘‘ઇમે વા પન ભોન્તો સત્તા’’તિ ચ મનસિ કરોતિ, ‘‘કાયસુચરિતેન સમન્નાગતા’’તિ ચ મનસિ કરોતિ, ‘‘વચીસુચરિતેન સમન્નાગતા’’તિ ચ મનસિ કરોતિ, ‘‘મનોસુચરિતેન સમન્નાગતા’’તિ ચ મનસિ કરોતિ, ‘‘અરિયાનં અનુપવાદકા’’તિ ચ મનસિ કરોતિ, ‘‘સમ્માદિટ્ઠિકા’’તિ ચ મનસિ કરોતિ, ‘‘સમ્માદિટ્ઠિકમ્મસમ્માદાના’’તિ ચ મનસિ કરોતિ, ‘‘તે કાયસ્સ ભેદા પરં મરણા સુગતિં સગ્ગં લોકં ઉપપન્ના’’તિ ચ મનસિ કરોતિ, દિબ્બેન ચક્ખુના રૂપં પસ્સતીતિ? ન હેવં વત્તબ્બે…પે….

‘‘તે કાયસ્સ ભેદા પરં મરણા સુગતિં સગ્ગં લોકં ઉપપન્ના’’તિ ચ મનસિ કરોતિ, દિબ્બેન ચક્ખુના રૂપં પસ્સતીતિ? આમન્તા. દ્વિન્નં ફસ્સાનં દ્વિન્નં ચિત્તાનં સમોધાનં હોતીતિ? ન હેવં વત્તબ્બે…પે….

૩૭૮. યથાકમ્મૂપગતં ઞાણં દિબ્બચક્ખુન્તિ? આમન્તા. અત્થિ કોચિ અદિબ્બચક્ખુકો દિબ્બચક્ખું અપ્પટિલદ્ધો અનધિગતો અસચ્છિકતો યથાકમ્મૂપગતં જાનાતીતિ? આમન્તા. હઞ્ચિ અત્થિ કોચિ અદિબ્બચક્ખુકો દિબ્બચક્ખું અપ્પટિલદ્ધો અનધિગતો અસચ્છિકતો યથાકમ્મૂપગતં જાનાતિ, નો ચ વત રે વત્તબ્બે – ‘‘યથાકમ્મૂપગતં ઞાણં દિબ્બચક્ખુ’’ન્તિ.

યથાકમ્મૂપગતં ઞાણં દિબ્બચક્ખુન્તિ? આમન્તા. આયસ્મા સારિપુત્તો યથાકમ્મૂપગતં ઞાણં જાનાતીતિ? આમન્તા. હઞ્ચિ આયસ્મા સારિપુત્તો યથાકમ્મૂપગતં ઞાણં જાનાતિ, નો ચ વત રે વત્તબ્બે – ‘‘યથાકમ્મૂપગતં ઞાણં દિબ્બચક્ખુ’’ન્તિ.

યથાકમ્મૂપગતં ઞાણં દિબ્બચક્ખુન્તિ? આમન્તા. આયસ્મા સારિપુત્તો યથાકમ્મૂપગતં ઞાણં જાનાતીતિ? આમન્તા. અત્થાયસ્મતો સારિપુત્તસ્સ દિબ્બચક્ખુન્તિ? ન હેવં વત્તબ્બે…પે….

અત્થાયસ્મતો સારિપુત્તસ્સ દિબ્બચક્ખુન્તિ? આમન્તા. નનુ આયસ્મા સારિપુત્તો એતદવોચ –

‘‘નેવ પુબ્બેનિવાસાય, નપિ દિબ્બસ્સ ચક્ખુનો;

ચેતોપરિયાય ઇદ્ધિયા, સોતધાતુવિસુદ્ધિયા;

ચુતિયા ઉપપત્તિયા, પણિધિ મે ન વિજ્જતી’’તિ [થેરગા. ૯૯૬ થેરગાથાયં].

અત્થેવ સુત્તન્તોતિ? આમન્તા. તેન હિ ન વત્તબ્બં – ‘‘યથાકમ્મૂપગતં ઞાણં દિબ્બચક્ખુ’’ન્તિ.

યથાકમ્મૂપગતઞાણકથા નિટ્ઠિતા.