૩. તતિયવગ્ગો

(૩૦) ૧૦. સંવરકથા

૩૭૯. અત્થિ દેવેસુ સંવરોતિ? આમન્તા. અત્થિ દેવેસુ અસંવરોતિ? ન હેવં વત્તબ્બે…પે….

નત્થિ દેવેસુ અસંવરોતિ? આમન્તા. નત્થિ દેવેસુ સંવરોતિ? ન હેવં વત્તબ્બે…પે….

નનુ અસંવરા સંવરો સીલં, અત્થિ દેવેસુ સંવરોતિ? આમન્તા. અત્થિ દેવેસુ અસંવરો, યમ્હા અસંવરા સંવરો સીલન્તિ? ન હેવં વત્તબ્બે…પે….

આજાનાહિ નિગ્ગહં. હઞ્ચિ અસંવરા સંવરો સીલં, અત્થિ દેવેસુ સંવરો, તેન વત રે વત્તબ્બે – ‘‘અત્થિ દેવેસુ અસંવરો, યમ્હા અસંવરા સંવરો સીલ’’ન્તિ. યં તત્થ વદેસિ – ‘‘વત્તબ્બે ખો – ‘અસંવરા સંવરો સીલં, અત્થિ દેવેસુ સંવરો,’ નો ચ વત્તબ્બે – ‘અત્થિ દેવેસુ અસંવરો, યમ્હા અસંવરા સંવરો સીલ’’’ન્તિ મિચ્છા.

નો ચે પન વત્તબ્બે – ‘‘અત્થિ દેવેસુ અસંવરો, યમ્હા અસંવરા સંવરો સીલ’’ન્તિ, નો ચ વત રે વત્તબ્બે – ‘‘અસંવરા સંવરો સીલં, અત્થિ દેવેસુ સંવરો’’તિ. યં તત્થ વદેસિ – ‘‘વત્તબ્બે ખો ‘અસંવરા સંવરો સીલં, અત્થિ દેવેસુ સંવરો,’ નો ચ વત્તબ્બે – ‘અત્થિ દેવેસુ અસંવરો, યમ્હા અસંવરા સંવરો સીલ’’’ન્તિ મિચ્છા.

અત્થિ મનુસ્સેસુ સંવરો, અત્થિ તત્થ અસંવરોતિ? આમન્તા. અત્થિ દેવેસુ સંવરો, અત્થિ તત્થ અસંવરોતિ? ન હેવં વત્તબ્બે…પે….

અત્થિ દેવેસુ સંવરો, નત્થિ તત્થ અસંવરોતિ? આમન્તા. અત્થિ મનુસ્સેસુ સંવરો, નત્થિ તત્થ અસંવરોતિ? ન હેવં વત્તબ્બે…પે….

૩૮૦. અત્થિ દેવેસુ પાણાતિપાતા વેરમણીતિ? આમન્તા. અત્થિ દેવેસુ પાણાતિપાતોતિ? ન હેવં વત્તબ્બે…પે….

અત્થિ દેવેસુ સુરામેરયમજ્જપમાદટ્ઠાના વેરમણીતિ? આમન્તા. અત્થિ દેવેસુ સુરામેરયમજ્જપમાદટ્ઠાનન્તિ? ન હેવં વત્તબ્બે…પે….

નત્થિ દેવેસુ પાણાતિપાતોતિ? આમન્તા. નત્થિ દેવેસુ પાણાતિપાતા વેરમણીતિ? ન હેવં વત્તબ્બે…પે….

નત્થિ દેવેસુ સુરામેરયમજ્જપમાદટ્ઠાનન્તિ? આમન્તા. નત્થિ દેવેસુ સુરામેરયમજ્જપમાદટ્ઠાના વેરમણીતિ? ન હેવં વત્તબ્બે…પે….

અત્થિ મનુસ્સેસુ પાણાતિપાતા વેરમણિ, અત્થિ તત્થ પાણાતિપાતોતિ? આમન્તા. અત્થિ દેવેસુ પાણાતિપાતા વેરમણિ, અત્થિ તત્થ પાણાતિપાતોતિ? ન હેવં વત્તબ્બે…પે….

અત્થિ મનુસ્સેસુ સુરામેરયમજ્જપમાદટ્ઠાના વેરમણિ, અત્થિ તત્થ સુરામેરયમજ્જપમાદટ્ઠાનન્તિ? આમન્તા. અત્થિ દેવેસુ સુરામેરયમજ્જપમાદટ્ઠાના વેરમણિ, અત્થિ તત્થ સુરામેરયમજ્જપમાદટ્ઠાનન્તિ? ન હેવં વત્તબ્બે…પે….

અત્થિ દેવેસુ પાણાતિપાતા વેરમણિ, નત્થિ તત્થ પાણાતિપાતોતિ? આમન્તા. અત્થિ મનુસ્સેસુ પાણાતિપાતા વેરમણિ, નત્થિ તત્થ પાણાતિપાતોતિ? ન હેવં વત્તબ્બે…પે….

અત્થિ દેવેસુ સુરામેરયમજ્જપમાદટ્ઠાના વેરમણિ, નત્થિ તત્થ સુરામેરયમજ્જપમાદટ્ઠાનન્તિ? આમન્તા. અત્થિ મનુસ્સેસુ સુરામેરયમજ્જપમાદટ્ઠાના વેરમણિ, નત્થિ તત્થ સુરામેરયમજ્જપમાદટ્ઠાનન્તિ? ન હેવં વત્તબ્બે…પે….

નત્થિ દેવેસુ સંવરોતિ? આમન્તા. સબ્બે દેવા પાણાતિપાતિનો અદિન્નાદાયિનો કામેસુમિચ્છાચારિનો મુસાવાદિનો સુરામેરયમજ્જપમાદટ્ઠાયિનોતિ? ન હેવં વત્તબ્બે…પે… તેન હિ અત્થિ દેવેસુ સંવરોતિ.

સંવરકથા નિટ્ઠિતા.