૩. તતિયવગ્ગો

(૩૧) ૧૧. અસઞ્ઞકથા

૩૮૧. અસઞ્ઞસત્તેસુ સઞ્ઞા અત્થીતિ? આમન્તા. સઞ્ઞાભવો સઞ્ઞાગતિ સઞ્ઞાસત્તાવાસો સઞ્ઞાસંસારો સઞ્ઞાયોનિ સઞ્ઞત્તભાવપટિલાભોતિ? ન હેવં વત્તબ્બે…પે….

નનુ અસઞ્ઞભવો અસઞ્ઞગતિ અસઞ્ઞસત્તાવાસો અસઞ્ઞસંસારો અસઞ્ઞયોનિ અસઞ્ઞત્તભાવપટિલાભોતિ? આમન્તા. હઞ્ચિ અસઞ્ઞભવો અસઞ્ઞગતિ અસઞ્ઞસત્તાવાસો અસઞ્ઞસંસારો અસઞ્ઞયોનિ અસઞ્ઞત્તભાવપટિલાભો, નો ચ વત રે વત્તબ્બે – ‘‘અસઞ્ઞસત્તેસુ સઞ્ઞા અત્થી’’તિ.

અસઞ્ઞસત્તેસુ સઞ્ઞા અત્થીતિ? આમન્તા. પઞ્ચવોકારભવો ગતિ સત્તાવાસો સંસારો યોનિ અત્તભાવપટિલાભોતિ? ન હેવં વત્તબ્બે…પે….

નનુ એકવોકારભવો ગતિ સત્તાવાસો સંસારો યોનિ અત્તભાવપટિલાભોતિ? આમન્તા. હઞ્ચિ એકવોકારભવો ગતિ સત્તાવાસો સંસારો યોનિ અત્તભાવપટિલાભો, નો ચ વત રે વત્તબ્બે – ‘‘અસઞ્ઞસત્તેસુ સઞ્ઞા અત્થી’’તિ.

અસઞ્ઞસત્તેસુ સઞ્ઞા અત્થીતિ? આમન્તા. તાય સઞ્ઞાય સઞ્ઞાકરણીયં કરોતીતિ? ન હેવં વત્તબ્બે…પે….

૩૮૨. મનુસ્સેસુ સઞ્ઞા અત્થિ, સો ચ સઞ્ઞાભવો સઞ્ઞાગતિ સઞ્ઞાસત્તાવાસો સઞ્ઞાસંસારો સઞ્ઞાયોનિ સઞ્ઞત્તભાવપટિલાભોતિ? આમન્તા. અસઞ્ઞસત્તેસુ સઞ્ઞા અત્થિ, સો ચ સઞ્ઞાભવો સઞ્ઞાગતિ સત્તાવાસો સંસારો યોનિ અત્તભાવપટિલાભોતિ? ન હેવં વત્તબ્બે…પે….

મનુસ્સેસુ સઞ્ઞા અત્થિ, સો ચ પઞ્ચવોકારભવો ગતિ સત્તાવાસો સંસારો યોનિ અત્તભાવપટિલાભોતિ? આમન્તા. અસઞ્ઞસત્તેસુ સઞ્ઞા અત્થિ, સો ચ પઞ્ચવોકારભવો ગતિ સત્તાવાસો સંસારો યોનિ અત્તભાવપટિલાભોતિ? ન હેવં વત્તબ્બે…પે….

મનુસ્સેસુ સઞ્ઞા અત્થિ, તાય સઞ્ઞાય સઞ્ઞાકરણીયં કરોતીતિ? આમન્તા. અસઞ્ઞસત્તેસુ સઞ્ઞા અત્થિ, તાય સઞ્ઞાય સઞ્ઞાકરણીયં કરોતીતિ? ન હેવં વત્તબ્બે…પે….

અસઞ્ઞસત્તેસુ સઞ્ઞા અત્થિ, સો ચ અસઞ્ઞભવો અસઞ્ઞગતિ અસઞ્ઞસત્તાવાસો અસઞ્ઞસંસારો અસઞ્ઞયોનિ અસઞ્ઞત્તભાવપટિલાભોતિ? આમન્તા. મનુસ્સેસુ સઞ્ઞા અત્થિ, સો ચ અસઞ્ઞભવો અસઞ્ઞગતિ…પે… અસઞ્ઞત્તભાવપટિલાભોતિ? ન હેવં વત્તબ્બે…પે….

અસઞ્ઞસત્તેસુ સઞ્ઞા અત્થિ, સો ચ એકવોકારભવો ગતિ સત્તાવાસો સંસારો યોનિ અત્તભાવપટિલાભોતિ? આમન્તા. મનુસ્સેસુ સઞ્ઞા અત્થિ, સો ચ એકવોકારભવો ગતિ…પે… અત્તભાવપટિલાભોતિ? ન હેવં વત્તબ્બે…પે….

અસઞ્ઞસત્તેસુ સઞ્ઞા અત્થિ, ન ચ તાય સઞ્ઞાય સઞ્ઞાકરણીયં કરોતીતિ? આમન્તા. મનુસ્સેસુ સઞ્ઞા અત્થિ, ન ચ તાય સઞ્ઞાય સઞ્ઞાકરણીયં કરોતીતિ? ન હેવં વત્તબ્બે…પે….

૩૮૩. ન વત્તબ્બં – ‘‘અસઞ્ઞસત્તેસુ સઞ્ઞા અત્થી’’તિ? આમન્તા. નનુ વુત્તં ભગવતા – ‘‘સન્તિ, ભિક્ખવે, અસઞ્ઞસત્તા નામ દેવા; સઞ્ઞુપ્પાદા ચ પન તે દેવા તમ્હા કાયા ચવન્તી’’તિ [દી. નિ. ૧.૬૮]! અત્થેવ સુત્તન્તોતિ? આમન્તા. તેન હિ અસઞ્ઞસત્તેસુ સઞ્ઞા અત્થીતિ.

અસઞ્ઞસત્તેસુ સઞ્ઞા અત્થીતિ? કિઞ્ચિ [કઞ્ચિ (સ્યા.)] કાલે અત્થિ, કિઞ્ચિ કાલે નત્થીતિ. કિઞ્ચિ કાલે સઞ્ઞસત્તા કિઞ્ચિ કાલે અસઞ્ઞસત્તા, કિઞ્ચિ કાલે સઞ્ઞભવો કિઞ્ચિ કાલે અસઞ્ઞભવો, કિઞ્ચિ કાલે પઞ્ચવોકારભવો કિઞ્ચિ કાલે એકવોકારભવોતિ? ન હેવં વત્તબ્બે…પે….

અસઞ્ઞસત્તેસુ સઞ્ઞા કિઞ્ચિ કાલે અત્થિ, કિઞ્ચિ કાલે નત્થીતિ? આમન્તા. કં કાલં અત્થિ, કં કાલં નત્થીતિ? ચુતિકાલે ઉપપત્તિકાલે અત્થિ, ઠિતિકાલે નત્થીતિ. ચુતિકાલે ઉપપત્તિકાલે સઞ્ઞસત્તા, ઠિતિકાલે અસઞ્ઞસત્તા; ચુતિકાલે ઉપપત્તિકાલે સઞ્ઞભવો, ઠિતિકાલે અસઞ્ઞભવો; ચુતિકાલે ઉપપત્તિકાલે પઞ્ચવોકારભવો, ઠિતિકાલે એકવોકારભવોતિ? ન હેવં વત્તબ્બે…પે….

અસઞ્ઞકથા નિટ્ઠિતા.