(૩૨) ૧૨. નેવસઞ્ઞાનાસઞ્ઞાયતનકથા

૩૮૪. નેવસઞ્ઞાનાસઞ્ઞાયતને ન વત્તબ્બં – ‘‘સઞ્ઞા અત્થી’’તિ? આમન્તા. અસઞ્ઞભવો અસઞ્ઞગતિ અસઞ્ઞસત્તાવાસો અસઞ્ઞસંસારો અસઞ્ઞયોનિ અસઞ્ઞત્તભાવપટિલાભોતિ? ન હેવં વત્તબ્બે…પે….

નનુ સઞ્ઞાભવો સઞ્ઞાગતિ સઞ્ઞાસત્તાવાસો સઞ્ઞાસંસારો સઞ્ઞાયોનિ સઞ્ઞત્તભાવપટિલાભોતિ? આમન્તા. હઞ્ચિ સઞ્ઞાભવો સઞ્ઞાગતિ…પે… સઞ્ઞત્તભાવપટિલાભો, નો ચ વત રે વત્તબ્બે – ‘‘નેવસઞ્ઞાનાસઞ્ઞાયતને ન વત્તબ્બં – ‘સઞ્ઞા અત્થી’’’તિ.

નેવસઞ્ઞાનાસઞ્ઞાયતને ન વત્તબ્બં – ‘‘સઞ્ઞા અત્થી’’તિ? આમન્તા. એકવોકારભવો ગતિ…પે… અત્તભાવપટિલાભોતિ? ન હેવં વત્તબ્બે…પે….

નનુ ચતુવોકારભવો ગતિ…પે… અત્તભાવપટિલાભોતિ? આમન્તા. હઞ્ચિ ચતુવોકારભવો ગતિ…પે… અત્તભાવપટિલાભો, નો ચ વત રે વત્તબ્બે – ‘‘નેવસઞ્ઞાનાસઞ્ઞાયતને ન વત્તબ્બં – ‘સઞ્ઞા અત્થી’’’તિ.

૩૮૫. અસઞ્ઞસત્તેસુ ન વત્તબ્બં – ‘‘સઞ્ઞા અત્થિ’’, સો ચ અસઞ્ઞભવો અસઞ્ઞગતિ અસઞ્ઞસત્તાવાસો અસઞ્ઞસંસારો અસઞ્ઞયોનિ અસઞ્ઞત્તભાવપટિલાભોતિ? આમન્તા. નેવસઞ્ઞાનાસઞ્ઞાયતને ન વત્તબ્બં – ‘‘સઞ્ઞા અત્થિ,’’ સો ચ અસઞ્ઞભવો અસઞ્ઞગતિ અસઞ્ઞસત્તાવાસો અસઞ્ઞસંસારો અસઞ્ઞયોનિ અસઞ્ઞત્તભાવપટિલાભોતિ? ન હેવં વત્તબ્બે…પે….

અસઞ્ઞસત્તેસુ ન વત્તબ્બં – ‘‘સઞ્ઞા અત્થિ,’’ સો ચ એકવોકારભવો ગતિ…પે… અત્તભાવપટિલાભોતિ? આમન્તા. નેવસઞ્ઞાનાસઞ્ઞાયતને ન વત્તબ્બં – ‘‘સઞ્ઞા અત્થિ,’’ સો ચ એકવોકારભવો ગતિ સત્તાવાસો સંસારો યોનિ અત્તભાવપટિલાભોતિ? ન હેવં વત્તબ્બે…પે….

નેવસઞ્ઞાનાસઞ્ઞાયતને ન વત્તબ્બં – ‘‘સઞ્ઞા અત્થિ,’’ સો ચ સઞ્ઞાભવો સઞ્ઞાગતિ…પે… સઞ્ઞત્તભાવપટિલાભોતિ? આમન્તા. અસઞ્ઞસત્તેસુ ન વત્તબ્બં – ‘‘સઞ્ઞા અત્થિ,’’ સો ચ સઞ્ઞાભવો સઞ્ઞાગતિ…પે… સઞ્ઞત્તભાવપટિલાભોતિ? ન હેવં વત્તબ્બે…પે….

નેવસઞ્ઞાનાસઞ્ઞાયતને ન વત્તબ્બં – ‘‘સઞ્ઞા અત્થિ,’’ સો ચ ચતુવોકારભવો ગતિ…પે… અત્તભાવપટિલાભોતિ? આમન્તા. અસઞ્ઞસત્તેસુ ન વત્તબ્બં – ‘‘સઞ્ઞા અત્થિ,’’ સો ચ ચતુવોકારભવો ગતિ…પે… અત્તભાવપટિલાભોતિ? ન હેવં વત્તબ્બે…પે….

નેવસઞ્ઞાનાસઞ્ઞાયતને ન વત્તબ્બં – ‘‘સઞ્ઞા અત્થી’’તિ? આમન્તા. નનુ નેવસઞ્ઞાનાસઞ્ઞાયતનં ચતુવોકારભવોતિ? આમન્તા. હઞ્ચિ નેવસઞ્ઞાનાસઞ્ઞાયતનં ચતુવોકારભવો, નો ચ વત રે વત્તબ્બે – ‘‘નેવસઞ્ઞાનાસઞ્ઞાયતને ન વત્તબ્બં – ‘સઞ્ઞા અત્થી’’’તિ.

૩૮૬. નેવસઞ્ઞાનાસઞ્ઞાયતનં ચતુવોકારભવો નેવસઞ્ઞાનાસઞ્ઞાયતને ન વત્તબ્બં – ‘‘સઞ્ઞા અત્થી’’તિ? આમન્તા. આકાસાનઞ્ચાયતનં ચતુવોકારભવો આકાસાનઞ્ચાયતને ન વત્તબ્બં – ‘‘સઞ્ઞા અત્થી’’તિ? ન હેવં વત્તબ્બે…પે….

નેવસઞ્ઞાનાસઞ્ઞાયતનં ચતુવોકારભવો, નેવસઞ્ઞાનાસઞ્ઞાયતને ન વત્તબ્બં – ‘‘સઞ્ઞા અત્થી’’તિ? આમન્તા. વિઞ્ઞાણઞ્ચાયતનં…પે… આકિઞ્ચઞ્ઞાયતનં ચતુવોકારભવો, આકિઞ્ચઞ્ઞાયતને ન વત્તબ્બં – ‘‘સઞ્ઞા અત્થી’’તિ? ન હેવં વત્તબ્બે…પે….

આકાસાનઞ્ચાયતનં ચતુવોકારભવો, અત્થિ તત્થ સઞ્ઞાતિ? આમન્તા. નેવસઞ્ઞાનાસઞ્ઞાયતનં ચતુવોકારભવો, અત્થિ તત્થ સઞ્ઞાતિ? ન હેવં વત્તબ્બે…પે….

વિઞ્ઞાણઞ્ચાયતનં…પે… આકિઞ્ચઞ્ઞાયતનં ચતુવોકારભવો, અત્થિ તત્થ સઞ્ઞાતિ? આમન્તા. નેવસઞ્ઞાનાસઞ્ઞાયતનં ચતુવોકારભવો, અત્થિ તત્થ સઞ્ઞાતિ? ન હેવં વત્તબ્બે…પે….

નેવસઞ્ઞાનાસઞ્ઞાયતને ન વત્તબ્બં – ‘‘સઞ્ઞા અત્થી’’તિ વા ‘‘નત્થી’’તિ વાતિ? આમન્તા. નનુ નેવસઞ્ઞાનાસઞ્ઞાયતનં ચતુવોકારભવોતિ? આમન્તા. હઞ્ચિ નેવસઞ્ઞાનાસઞ્ઞાયતનં ચતુવોકારભવો, નો ચ વત રે વત્તબ્બે – ‘‘નેવસઞ્ઞાનાસઞ્ઞાયતને ન વત્તબ્બં – ‘સઞ્ઞા અત્થી’તિ વા ‘નત્થી’તિ વા’’તિ.

નેવસઞ્ઞાનાસઞ્ઞાયતનં ચતુવોકારભવો, નેવસઞ્ઞાનાસઞ્ઞાયતને ન વત્તબ્બં – ‘‘સઞ્ઞા અત્થી’’તિ વા ‘‘નત્થી’’તિ વાતિ? આમન્તા. આકાસાનઞ્ચાયતનં…પે… વિઞ્ઞાણઞ્ચાયતનં…પે… આકિઞ્ચઞ્ઞાયતનં ચતુવોકારભવો, આકિઞ્ચઞ્ઞાયતને ન વત્તબ્બં – ‘‘સઞ્ઞા અત્થી’’તિ વા ‘‘નત્થી’’તિ વાતિ? ન હેવં વત્તબ્બે…પે….

નેવસઞ્ઞાનાસઞ્ઞાયતને ન વત્તબ્બં [નેવસઞ્ઞાનાસઞ્ઞાયતને વત્તબ્બં (?)] – ‘‘સઞ્ઞા અત્થી’’તિ વા ‘‘નત્થી’’તિ વાતિ? આમન્તા. નનુ નેવસઞ્ઞાનાસઞ્ઞાયતનન્તિ? આમન્તા. હઞ્ચિ નેવસઞ્ઞાનાસઞ્ઞાયતનં, તેન વત રે વત્તબ્બે – ‘‘નેવસઞ્ઞાનાસઞ્ઞાયતને ન વત્તબ્બં – ‘સઞ્ઞા અત્થી’તિ વા ‘નત્થી’તિ વા’’તિ.

નેવસઞ્ઞાનાસઞ્ઞાયતનન્તિ કત્વા નેવસઞ્ઞાનાસઞ્ઞાયતને ન વત્તબ્બં – ‘‘સઞ્ઞા અત્થી’’તિ વા ‘‘નત્થી’’તિ વાતિ? આમન્તા. અદુક્ખમસુખા વેદનાતિ કત્વા અદુક્ખમસુખાય વેદનાય [અદુક્ખમસુખા વેદના (સી. ક.)] ન વત્તબ્બં – ‘‘વેદના’’તિ વા ‘‘અવેદના’’તિ વાતિ? ન હેવં વત્તબ્બે…પે….

નેવસઞ્ઞાનાસઞ્ઞાયતનકથા નિટ્ઠિતા.

તતિયવગ્ગો.

તસ્સુદ્દાનં –

બલં સાધારણં અરિયં, સરાગં ચિત્તં વિમુચ્ચતિ;

વિમુત્તં વિમુચ્ચમાનં, અત્થિ ચિત્તં વિમુચ્ચમાનં.

અટ્ઠમકસ્સ પુગ્ગલસ્સ, દિટ્ઠિપરિયુટ્ઠાનં પહીનં;

અટ્ઠમકસ્સ પુગ્ગલસ્સ, નત્થિ પઞ્ચિન્દ્રિયાનિ ચક્ખું.

સોતં ધમ્મુપત્થદ્ધં, યથાકમ્મૂપગતં ઞાણં;

દેવેસુ સંવરો અસઞ્ઞ-સત્તેસુ સઞ્ઞા એવમેવ ભવગ્ગન્તિ.