૪. સીલાનુસ્સતિકથા

૧૫૮. સીલાનુસ્સતિં ભાવેતુકામેન પન રહોગતેન પટિસલ્લીનેન ‘‘અહો વત મે સીલાનિ અખણ્ડાનિ અચ્છિદ્દાનિ અસબલાનિ અકમ્માસાનિ ભુજિસ્સાનિ વિઞ્ઞુપ્પસત્થાનિ અપરામટ્ઠાનિ સમાધિસંવત્તનિકાની’’તિ (અ. નિ. ૬.૧૦) એવં અખણ્ડતાદિગુણવસેન અત્તનો સીલાનિ અનુસ્સરિતબ્બાનિ. તાનિ ચ ગહટ્ઠેન ગહટ્ઠસીલાનિ, પબ્બજિતેન પબ્બજિતસીલાનિ.

ગહટ્ઠસીલાનિ વા હોન્તુ પબ્બજિતસીલાનિ વા, યેસં આદિમ્હિ વા અન્તે વા એકમ્પિ ન ભિન્નં, તાનિ પરિયન્તે છિન્નસાટકો વિય ન ખણ્ડાનીતિ અખણ્ડાનિ. યેસં વેમજ્ઝે એકમ્પિ ન ભિન્નં, તાનિ મજ્ઝે વિનિવિદ્ધસાટકો વિય ન છિદ્દાનીતિ અચ્છિદ્દાનિ. યેસં પટિપાટિયા દ્વે વા તીણિ વા ન ભિન્નાનિ, તાનિ પિટ્ઠિયા વા કુચ્છિયા વા ઉટ્ઠિતેન દીઘવટ્ટાદિસણ્ઠાનેન વિસભાગવણ્ણેન કાળરત્તાદીનં અઞ્ઞતરસરીરવણ્ણા ગાવી વિય ન સબલાનીતિ અસબલાનિ. યાનિ અન્તરન્તરા ન ભિન્નાનિ, તાનિ વિસભાગબિન્દુવિચિત્રા ગાવી વિય ન કમ્માસાનીતિ અકમ્માસાનિ. અવિસેસેન વા સબ્બાનિપિ સત્તવિધેન મેથુનસંયોગેન કોધુપનાહાદીહિ ચ પાપધમ્મેહિ અનુપહતત્તા અખણ્ડાનિ અચ્છિદ્દાનિ અસબલાનિ અકમ્માસાનિ. તાનિયેવ તણ્હાદાસબ્યતો મોચેત્વા ભુજિસ્સભાવકરણેન ભુજિસ્સાનિ. બુદ્ધાદીહિ વિઞ્ઞૂહિ પસત્થત્તા વિઞ્ઞુપ્પસત્થાનિ. તણ્હાદિટ્ઠીહિ અપરામટ્ઠતાય કેનચિ વા અયં તે સીલેસુ દોસોતિ એવં પરામટ્ઠું અસક્કુણેય્યતાય અપરામટ્ઠાનિ. ઉપચારસમાધિં અપ્પનાસમાધિં વા, અથ વા પન મગ્ગસમાધિં ફલસમાધિઞ્ચાપિ સંવત્તેન્તીતિ સમાધિસંવત્તનિકાનિ.

૧૫૯. એવં અખણ્ડતાદિગુણવસેન અત્તનો સીલાનિ અનુસ્સરતો નેવસ્સ તસ્મિં સમયે રાગપરિયુટ્ઠિતં ચિત્તં હોતિ. ન દોસ…પે… ન મોહપરિયુટ્ઠિતં ચિત્તં હોતિ. ઉજુગતમેવસ્સ તસ્મિં સમયે ચિત્તં હોતિ, સીલં આરબ્ભાતિ પુરિમનયેનેવ વિક્ખમ્ભિતનીવરણસ્સ એકક્ખણે ઝાનઙ્ગાનિ ઉપ્પજ્જન્તિ. સીલગુણાનં પન ગમ્ભીરતાય નાનપ્પકારગુણાનુસ્સરણાધિમુત્તતાય વા અપ્પનં અપ્પત્વા ઉપચારપ્પત્તમેવ ઝાનં હોતિ. તદેતં સીલગુણાનુસ્સરણવસેન ઉપ્પન્નત્તા સીલાનુસ્સતિચ્ચેવ સઙ્ખં ગચ્છતિ.

ઇમઞ્ચ પન સીલાનુસ્સતિં અનુયુત્તો ભિક્ખુ સિક્ખાય સગારવો હોતિ સભાગવુત્તિ, પટિસન્થારે અપ્પમત્તો, અત્તાનુવાદાદિભયવિરહિતો, અણુમત્તેસુ વજ્જેસુ ભયદસ્સાવી, સદ્ધાદિવેપુલ્લં અધિગચ્છતિ, પીતિપામોજ્જબહુલો હોતિ. ઉત્તરિ અપ્પટિવિજ્ઝન્તો પન સુગતિપરાયનો હોતિ.

તસ્મા હવે અપ્પમાદં, કયિરાથ સુમેધસો;

એવં મહાનુભાવાય, સીલાનુસ્સતિયા સદાતિ.

ઇદં સીલાનુસ્સતિયં વિત્થારકથામુખં.