૨. દોસપરિહારાવબોધ-દુતિયપરિચ્છેદ

૬૮. કદાચિ કવિકોસલ્લા, વિરોધો સકલો પ્ય’યં;

દોસસઙ્ખ્ય મતિક્કમ્મ, ગુણવીથિં વિગાહતે.

૬૯. તેન વુત્તવિરોધાન, મવિરોધો યથા સિયા;

તથા દોસપરિહારા, વબોધો દાનિ નીયતે.

તત્થ વિરુદ્ધત્થન્તરસ્સ પરિહારો યથા

૭૦. વિન્દન્તં પાકસાલીનં, સાલીનં દસ્સના સુખં;

તં કથં નામ મેઘો’યં, વિસદો સુખયે જનં?

યથા વા

૭૧. વિનાયકોપિ નાગો સિ, ગોતમોપિ મહામતિ;

પણીતોપિ રસા’પેતો, ચિત્તા મે સામિ તે ગતિ.

અઝ’ત્થસ્સ યથા

૭૨. કથં તાદિગુણાભાવે, લોકં તોસેતિ દુજ્જનો?

ઓભાસિતાસેસદિસો, ખજ્જોતો નામ કિં ભવે?

૭૩. પહેલિકાય [પહેળિકાય (ક.)] મારુળ્હા, ન હિ દુટ્ઠા કિલિટ્ઠતા;

પિયા સુખા’લિઙ્ગિતં ક, માલિઙ્ગતિ નુ નો ઇતિ.

૭૪. યમકે નો પયોજેય્ય, કિલિટ્ઠપદ મિચ્છિતે;

તતો યમક મઞ્ઞં તુ, સબ્બ મેતંમયં વિય.

દેસવિરોધિનો યથા

૭૫. બોધિસત્તપ્પભાવેન, થલેપિ જલજાન્ય’હું;

નુદન્તાનિ’વ સુચિરા, વાસક્લેસં તહિં જલે.

કાલવિરોધિનો યથા

૭૬. મહાનુભાવ પિસુનો, મુનિનો મન્દ મારુતો;

સબ્બોતુકમયં વાયિ, ધુનન્તો કુસુમં સમં.

કલાવિરોધિનો યથા

૭૭. નિમુગ્ગમાનસો બુદ્ધ, ગુણે પઞ્ચસિખસ્સપિ;

તન્તિસ્સર વિરોધો સો, ન સમ્પીણેતિ કં જનં?

લોકવિરોધિનો યથા

૭૮. ગણયે ચક્કવાળં સો, ચન્દનાયપિ સીતલં;

સમ્બોધિ સત્ત હદયો, પદિત્ત’ઙ્ગારપૂરિતં.

ઞાયવિરોધિનો યથા

૭૯. પરિચ્ચત્તભવોપિ ત્વ, મુપનીતભવો અસિ;

અચિન્ત્યગુણસારાય, નમો તે મુનિપુઙ્ગવ.

આગમવિરોધિનો યથા

૮૦. નેવા’લપતિ કેના’પિ, વચીવિઞ્ઞત્તિતો યતિ;

સમ્પજાનમુસાવાદા, ફુસેય્યા’પત્તિદુક્કટં.

નેય્યસ્સ યથા

૮૧. મરીચિચન્દના’લેપ, લાભા સીતમરીચિનો;

ઇમા સબ્બાપિ ધવલા, દિસા રોચન્તિ નિબ્ભરં.

યથા વા

૮૨. મનોનુરઞ્જનો માર, ઙ્ગનાસિઙ્ગારવિબ્ભમો;

જિનેના’સમનુઞ્ઞાતો, મારસ્સ હદયા’નલો.

વિસેસનાપેક્ખસ્સ યથા

૮૩. અપયાતા’પરાધમ્પિ, અયં વેરી જનં જનો;

કોધપાટલભૂતેન, ભિય્યો પસ્સતિ ચક્ખુના.

હીનત્થસ્સ યથા

૮૪. અપ્પકાનમ્પિ પાપાનં, પભાવં નાસયે બુધો;

અપિ નિપ્પભાતા’નીત, ખજ્જોતો હોતિ ભાણુમા.

અનત્થસ્સ યથા

૮૫. ન પાદપૂરણત્થાય, પદં યોજેય્ય કત્થચિ,

યથા વન્દે મુનિન્દસ્સ, પાદપઙ્કેરુહં વરં.

૮૬. ભયકોધપસંસાદિ, વિસેસો તાદિસો યદિ;

વત્તું કામીયતે દોસો, ન તત્થે’કત્થતાકતો.

યથા

૮૭. સપ્પો સપ્પો! અયં હન્દ, નિવત્તતુ ભવં તતો,

યદિ જીવિતુકામો’સિ, કથં ત મુપસપ્પસિ?

ભગ્ગરીતિનો યથા

૮૮. યોકોચિ રૂપા’તિસયો, કન્તિ કાપિ મનોહરા;

વિલાસા’તિસયો કોપિ,

અહો! બુદ્ધમહો’દયો.

૮૯. અબ્યામોહકરં બન્ધં, અબ્યાકિણ્ણં મનોહરં;

અદૂરપદ વિન્યાસં, પસંસન્તિ કવિસ્સરા.

યથા

૯૦. નીલુપ્પલા’ભં નયનં, બન્ધુકરુચિરો’ધરો;

નાસા હેમ’ઙ્કુસો તેન, જિનો’યં પિયદસ્સનો.

૯૧. સમતિક્કન્ત ગામ્મત્તં, કન્ત વાચા’ભિસઙ્ખતં;

બન્ધનં રસહેતુત્તા, ગામ્મત્તં અતિવત્તતિ.

યથા

૯૨. દુનોતિ કામચણ્ડાલો, સો મં સદય નિદ્દયો;

ઈદિસં બ્યસના’પન્નં, સુખીપિ કિ મુપેક્ખસે?

૯૩. યતિહીનપરિહારો, ન પુને’દાનિ નીયતે;

યતો ન સવનુ’બ્બેગં, હેટ્ઠા યેસં વિચારિતં.

કમચ્ચુતસ્સ યથા

૯૪. ઉદારચરિતો’સિ ત્વં, તેને’વા’રાધના ત્વયિ;

દેસં વા દેહિ ગામં વા, ખેત્તં વા મમ સોભનં.

અતિવુત્તસ્સ યથા

૯૫. મુનિન્દચન્દસમ્ભૂત, યસોરાસિમરીચિનં;

સકલોપ્ય’ય માકાસો, ના’વકાસો વિજમ્ભને.

૯૬. વાક્યં બ્યાપન્નચિત્તાનં, અપેતત્થં અનિન્દિતં;

તેનુ’મ્મત્તાદિકાનં તં, વચના’ઞ્ઞત્ર દુસ્સતિ.

યથા

૯૭. સમુદ્દો પીયતે સો’ય, મહ’મજ્જ જરાતુરો;

ઇમે ગજ્જન્તિ જીમૂતા, સક્કસ્સે’રાવણો પિયો.

૯૮. સુખુમાલા’વિરોધિત્ત, દિત્તભાવપ્પભાવિતં;

બન્ધનં બન્ધફરુસ, દોસં સંદૂસયેય્ય તં.

યથા

૯૯. પસ્સન્તા રૂપવિભવં, સુણન્તા મધુરં ગિરં;

ચરન્તિ સાધૂ સમ્બુદ્ધ, કાલે કેળિપરમ્મુખા.

અપક્કમસ્સ યથા

૧૦૦. ભાવના, દાન, સીલાનિ, સમ્મા સમ્પાદિતાનિ’હ;

નિબ્બાન, ભોગ, સગ્ગાદિ, સાધનાનિ ન સંસયો.

૧૦૧. ઉદ્દિટ્ઠવિસયો કોચિ, વિસેસો તાદિસો યદિ;

અનુ’દ્દિટ્ઠેસુ નેવ’ત્થિ, દોસો કમવિલઙ્ઘને.

યથા

૧૦૨. કુસલા’કુસલં અબ્યા, કત’મિચ્ચેસુ પચ્છિમં;

અબ્યાકતં પાકદં ન, પાકદં પઠમદ્વયં.

૧૦૩. સગુણાના’વિકરણે, કારણે સતિ તાદિસે;

ઓચિત્યહીનતા’પત્તિ, નત્થિ ભૂતત્થસંસિનો.

૧૦૪. ઓચિત્યં નામ વિઞ્ઞેય્યં, લોકે વિખ્યાત માદરા;

તત્થો’પદેસપભવા, સુજના કવિપુઙ્ગવા.

૧૦૫. વિઞ્ઞાતોચિત્યવિભવો, ચિત્યહીનં પરિહરે;

તતો’ચિત્યસ્સ સમ્પોસે,

રસપોસો સિયા કતે.

યથા

૧૦૬. યો મારસેન માસન્ન, માસન્નવિજયુ’સ્સવો;

તિણાયપિ ન મઞ્ઞિત્થ, સો વો દેતુ જયં જિનો.

૧૦૭. આરદ્ધકત્તુકમ્માદિ, કમા’તિક્કમલઙ્ઘને;

ભગ્ગરીતિવિરોધો’યં, ગતિં ન ક્વા’પિ વિન્દતિ.

યથા

૧૦૮. સુજન’ઞ્ઞાન મિત્થીનં, વિસ્સાસો નો’પપજ્જતે;

વિસસ્સ સિઙ્ગિનો રોગ, નદીરાજકુલસ્સ ચ.

યથા

૧૦૯. ભેસજ્જે વિહિતે સુદ્ધ, બુદ્ધાદિરતનત્તયે;

પસાદ માચરે નિચ્ચં, સજ્જને સગુણેપિ ચ.

સસંસયસ્સ યથા

૧૧૦. મુનિન્દચન્દિમા’લોક, રસ લોલ વિલોચનો;

જનો’વક્કન્તપન્થો’વ, રંસિદસ્સનપીણિતો.

૧૧૧. સંસયાયે’વ યંકિઞ્ચિ, યદિ કીળાદિહેતુના;

પયુજ્જતે ન દોસો’વ, સસંસયસમપ્પિતો.

યથા

૧૧૨. યાતે દુતિયં નિલયં, ગરુમ્હિ સકગેહતો;

પાપુણેય્યામ નિયતં, સુખ’મજ્ઝયના’દિના.

૧૧૩. સુભગા ભગિની સા’યં, એતસ્સિ’ચ્ચેવમાદિકં;

ન ‘ગામ્મ’મિતિ નિદ્દિટ્ઠં, કવીહિ સકલેહિપિ.

૧૧૪. દુટ્ઠા’લઙ્કારવિગમે, સોભના’લઙ્કતિક્કમો;

અલઙ્કારપરિચ્છેદે, આવિભાવં ગમિસ્સતિ.

૧૧૫. દોસે પરીહરિતુ મેસ વરો’પદેસો,

સત્થન્તરાનુસરણેન કતો મયેવં;

વિઞ્ઞાયિ’મં ગરુવરાન’ધિક’પ્પસાદા,

દોસે પરં પરિહરેય્ય યસોભિલાસી.

ઇતિ સઙ્ઘરક્ખિતમહાસામિવિરચિતે સુબોધાલઙ્કારે

દોસપરિહારાવબોધો નામ

દુતિયો પરિચ્છેદો.