૩૧. મહાસેનરઞ્ઞો વત્થુમ્હિ અયમાનુપુબ્બીકથા

ભગવતિ પરિનિબ્બુતે પાટલિપુત્તનગરે મહાસેનો નામ રાજા રજ્જં કારેસિ ધમ્મિકો ધમ્મરાજા. સો પન પિતુપિતામહાદીનં ધનરાસિં ઓલોકેત્વા ઇમે ઇમં સાપતેય્યં પહાય મચ્ચુનો મુખમુપગતા. અહો સંસારિકાનં અઞ્ઞાણતા. ધનં ઠપેત્વા અત્તનો વિનાસઞ્ચ અત્તાનં ઠપેત્વા ધનવિનાસઞ્ચ ન જાનન્તીતિ સમ્પત્તિયા અધિગમઞ્ચ વિનાસં ચાતિ સબ્બં ચિન્તેત્વા ધમ્મઞ્ચ સુત્વા પટિલદ્ધસદ્ધો દિવસે દિવસે દસસહસ્સાનં ભિક્ખૂનં મધુરેન અન્નપાનેન સન્તપ્પેન્તો અનેકાનિ પુઞ્ઞાનિ ઉપચિનન્તો એકદિવસં રહો પટિસલ્લિનો એવં ચિન્તેસિ. એવં રાજનિયોગેન જનસ્સ પીળનં કત્વા દિન્નદાનતો સહત્થેન કમ્મં કત્વા લદ્ધેન દિન્નદાનં મહપ્ફલં મહાનિસંસં ભવિસ્સતિ, એવં મયા કાતબ્બન્તિ સો સુહદા મચ્ચસ્સ રજ્જં નીય્યાતેત્વા અત્તનો કણિટ્ઠિકં આદાય કિઞ્ચિ અજાનાપેત્વા અઞ્ઞતરવેસેન નગરા નિક્ખમ્મ ઉત્તરમધુરં નામ નગરં અગમાસિ, તત્થ મહાવિભવો એકો સેટ્ઠિ પટિવસતિ, તે સેટ્ઠિનો સમીપ મુપગમ્મ ઠિતા. તેન કિમત્થાયાગતાતિ વુત્તે રાજા તવ ગેહે ભતિયા કમ્મં કરિસ્સામીતિ વત્વા તેનાનુઞ્ઞાતો તીણિ વસ્સાનિ કમ્મ મકાસિ, તતો એકદિવસં સેટ્ઠિ તે દિસ્વા પક્કોસિત્વા અતીવ તુમ્હે સુખુમાલતરા. તથાપિ ઇમસ્મિં ગેહે કમ્મકરણેન ચિરં વસિત્થ, એત્તકં કાલં કિસ્મિઞ્ચિ કમ્મેપિ કુસીતત્તં ન પઞ્ઞાયતિ. પગેવ અનાચારમ્પિ, યાગુભત્તં ઠપેત્વા અઞ્ઞં ઉપકારમ્પિ મમ સન્તિકા નત્થિ, કેનત્થેન કમ્મં કરોથાતિ પુચ્છિ. રાજા તસ્સ વચનં સુત્વા ઇમસ્મિં જનપદે સાલિનો મનાપભાવો બહુસો સૂયતિ. તસ્મા સાલીનમત્થાય ઇધા ગતમ્હાતિ આહ, તં સુત્વા તેસં તુટ્ઠો સેટ્ઠિ સાલીનં સકટસહસ્સં અદાસિ, રાજા સાલિંલભિત્વા સેટ્ઠિનો એવમાહ, ભો ઇમં અમ્હાકં નગરં પાપેથાતિ, તં સુત્વા સેટ્ઠિ સાધૂતિ વત્વા સાલિપરિપુણ્ણસકટસહસ્સં રઞ્ઞો નગરં પાપેસિ, રાજા નગરં ગન્ત્વા સેટ્ઠિસ્સ નાનાવણ્ણવત્થહિરઞ્ઞસુવણ્ણાદીહિ સકટે પૂરેત્વા પટિપેસેત્વા મેત્તિં થિરં કત્વા આભતવીહયો રાજગેહે સન્નિચયમકાસિ, અથ રાજા કતિપાહચ્ચયેન મુસલં પગ્ગય્હ સહત્થેનેવ વીહિં કોટ્ટેતિ, કોટ્ટિતકોટ્ટિતં કણિટ્ઠિકા પપ્ફોટેતિ. એવં ઉભોપિ તણ્ડુલાનં મહન્તં રાસિં કત્વા દારૂદકાદયો આહરિત્વા અમ્બિલભત્તં પચિત્વા રાજગેહે પઞ્ચસતઆસનાનિ પઞ્ઞાપેત્વા કાલં ઉગ્ઘોસેસું, આગચ્છન્તુ અય્યા અનુકમ્પં ઉપાદાય મમ ગેહે ભુઞ્જન્તૂતિ. તં સુત્વા પઞ્ચસતા ભિક્ખૂ આકાસેન આગમિંસુ, રાજા તે યાવદત્થં પરિવિસિ, તતો તેસં અન્તરે પિયંગુદીપવાસી એકો મહાસિવત્થેરો નામ ભત્તં ગહેત્વા એતે મં પસ્સન્તૂતિ અધિટ્ઠહિત્વા આકાસેન પિયંગુદીપં ગન્ત્વા ભત્તં પઞ્ચસતાનં ભિક્ખૂનં દત્વા પરિભુઞ્ચિ. તં તસ્સાનુભાવેન સબ્બેસં યાવદત્થં અહોસિ. એવં અપ્પકેનાપિ દેય્યધમ્મેન સપ્પુરિસા દાયકાનં મનં પસાદેત્વા પતિટ્ઠં કરોન્તીતિ. વુત્તઞ્હિ.

૧. અપ્પકેનપિ મેધાવી, દાયકાનં મનં પતિ;

સદ્ધં વડ્ઢેન્તિ ચન્દોવ, રંસિના ખીરસાગરં.

૨. અટ્ઠાને ન નિયોજેન્તા, કરોન્તા નેવ સન્નિધિં;

પરિભોગ મકત્વાન, નેવ નાસેન્તિ પચ્ચયં.

૩. ન પાપેન્તાચ થેય્યસ્સ, ન કરોન્તા તથેવિણં;

વિભજન્તિ સુસીલેસુ, સયં ભુત્વાન સીલવાતિ.

અથ રાજા કણિટ્ઠિકાય સદ્ધિં થત્થેવ ઠિતો પિયંગુદીપે પરિભુઞ્જન્તે પઞ્ચસતભિક્ખૂ દિસ્વા હટ્ઠો ઉદગ્ગો અહોસિ. અથ તે અપરભાગે અત્તના કતં દાનવરં અનુસ્સરન્તા ન ચિરેનેવ ઉભોપિ સોતાપન્ના અહેસુંતિ.

૪. ન ગણેન્તાત્તનો દુક્ખં, વિહાય મહતિં સિરિં;

આયતિંભવમિચ્છન્તા, સુજનેવં સુભે રતા.

૫. આયાસેન કતં પુઞ્ઞં, મહન્તફલદાયકં;

ઇતિ મન્ત્વાન મેધાવી, સહત્થેનેવ તં કરેતિ.

મહાસેનરઞ્ઞો વત્થું પથમં.