૨૫. કવીરપટ્ટન વત્થુમ્હિ અયમાનુપુબ્બીકથા

જમ્બુદીપે કિર ચોળરટ્ઠે કાવીરપટ્ટનં નામ અહોસિ. તત્થ માહિસ્સરિકા બહૂ મિચ્છાદિટ્ઠિકા વસન્તિ. તત્થેકસ્મિં દેવાલયે ચિત્તકમ્મં કરોન્તા એકસ્મિં ફલકે ઇસ્સરસ્સ ઓનમિત્વા વન્દનાકારં ભગવતો રૂપં અકંસુ. તસ્મિં સમયે તત્થ બહૂ ઉપાસકા તં દેવકુલં ગન્ત્વા તત્થ તત્થ ચિત્તકમ્માનિ ઓલોકેન્તા તસ્મિં ફલકે તં ચિત્તકમ્મં અદ્દસંસુ. દિસ્વાન તે અહો અમ્હેહિ અપસ્સિતબ્બં પસ્સિતં. સદેવકે લોકે સમારકે સબ્રહ્મકે સસ્સમણબ્રાહ્મણિયાસદેવમનુસ્સાય પજાય ચ અપરિમાણેસુ ચક્કવાળેસુ ભગવતો ઉત્તરિતરં ઠપેત્વા સમસમોપિ નત્થિ. સકલેહિ સત્તનિકાયેહિ વન્દનીયો પૂજનીયો ભગવા. અનનુરૂપં તસ્સ એતેહિ કતંતિ રોદન્તા પરિદેવન્તા રાજદ્વારં ગન્ત્વા ઉગ્ઘોસેસું, તં સુત્વા રાજા તે પક્કોસાપેત્વા કસ્મા તુમ્હે ઉગ્ઘોસેથાતિ પુચ્છિ, તે એવ માહંસુ. દેવ અમ્હાકં ભગવા દેવાતિદેવો સક્કાતિસક્કો બ્રહ્માતિબ્રહ્મા મેરુવ અચલો સાગરો ગમ્ભીરો આકાસોવ અનન્તો પથવીવ પત્થટોતિઆદીહિ ભગવતો ગુણં વણ્ણેસું. તેન વુત્તં અપદાને.

૧. બત્તિંસલક્ખણધરો, સુનક્ખત્તોવ ચન્દિમા;

અનુબ્યઞ્જનસમ્પન્નો, સાલરાજાવ ફુલ્લિતો.

૨. રંસિજાલપરિક્ખિત્તો, દિત્તોવ કનકાચલો;

બ્યામપ્પભાપરિવુતો, સતરંસિ દિવાકરો.

૩. સોણ્ણા નનો જિનવરો, સમણીવ સિલુચ્ચયો;

કરુણાપુણ્ણહદયો, વિવટ્ટો વિય સાગરો.

૪. લોકવિસ્સુતકિત્તીવ, સિનેરુવ નગુત્તમો;

યસસા વિતતો ધીરો, આકાસસદિસો મુનિ.

૫. અસઙ્ગચિત્તો સબ્બત્થ, અનિલો વિય નાયકો;

પતિટ્ઠા સબ્બભૂતાનં, મહીવ મુનિસુત્તમો.

૬. અનૂપલિત્તો લોકેન, તોયેન પદુમં યથા;

કુવાદગચ્છદહનો, અગ્ગિક્ખન્ધોવ સોભતિ.

૭. અગદો વિય સબ્બત્થ, કિલેસવિસનાસકો;

ગન્ધમાદનસેલોવ, ગુણગન્ધવિભૂસિતો.

૮. ગુણાનં આકરો ધીરો, રતનાનંવ સાગરો;

સિન્ધૂવ વનરાજીનં, કિલેસમલહારકો.

૯. વિજયીવ મહાયોધો, મારસેનપ્પમદ્દનો;

ચક્કવત્તીવ સો રાજા, બોજ્ઝઙ્ગરતનિસ્સરો.

૧૦. મહાભિસક્કસઙ્કાસો, દોસબ્યાધિતિકિચ્છકો;

સલ્લકત્તો યથા વેજ્જા, દિટ્ઠિગણ્ડવિફાલકો.

૧૧. સત્થા નો ભગવા દેવ, મહાબ્રહ્મેહિ વન્દિતો;

દેવિન્દસુરસિદ્ધેહિ, વન્દનીયો સદા દરા.

૧૨. સબ્બેસુ ચક્કવાળેસુ, યે અગ્ગા યે ચ પૂજિતા;

તેસમગ્ગો મહારાજ, ભગવા નો પતાપવાતિ.

અયુત્તં દેવ દેવકુલેહિ કતંતિ આહંસુ. તં સુત્વા રાજા ભો સબ્બેપિ મનુસ્સા અત્તનો અત્તનો દેવતાનં મહન્તભાવં કથેન્તિ. તુમ્હાકં પન સત્થુનો મહન્તભાવં કથં અમ્હાકં જાનાપેથાતિ, ઉપાસકા ન ગરુ ત્વં મહારાજ ફલકં આહરાપેત્વા સુદ્ધવત્થેન વેઠેત્વા તં અત્તનો મુદ્દિકાય લઞ્છિત્વા સુરક્ખિતસુગોપિતે એકસ્મિં દેવકુલે ઠપેત્વા સત્તાહચ્ચયેન આહરાપેત્વા તં ઓલોકેથ, તદા નો સત્થુનો મહન્તાનુભાવં જાનાથાતિ આહંસુ, અથ રાજા તેસં વુત્તનિયામેનેવ કારાપેત્વા અન્તોદેવકુલે ઠપેત્વા સબ્બદ્વારાનિ પિદહિત્વા લઞ્છેત્વા રક્ખેય્યાથાતિ નિયોજેસિ. તતો તે ઉપાસકા સબ્બે સન્નિપતિત્વા સત્તાહં દાનં દેન્તા સીલં રક્ખન્તા ઉપોસથકમ્મં કરોન્તા સબ્બસત્તેસુ મેત્તિં ભાવેન્તા સબ્બસત્તાનં અત્તના કતપુઞ્ઞેસુ પત્તિં દેન્તા તિણ્ણં રતનાનં પૂજં કરોન્તા એવં ઉગ્ઘોસેસું. અમ્હાકં કતકુસલનિસ્સન્દેન લોકે મહિદ્ધિકા મહાનુભાવા સબ્બે દેવા ચ લોકં પાલેન્તા ચત્તારો મહારાજાનો ચ અમ્હાકં સત્થુનો ઉપટ્ઠાનાય [ઉપટ્ઠાય ઇતિસબ્બત્થ] ઠિતભાવં દસ્સેન્તૂતિ સચ્ચકિરિયં અકંસુ. અથ તેસં પુઞ્ઞાનુભાવેન તસ્મિં ખણે સક્કસ્સ દેવરઞ્ઞો પણ્ડુકમ્બલસિલાસનં ઉણ્હાકારં દસ્સેસિ. તતો સો મનુસ્સલોકં ઓલોકેન્તો મિચ્છાદિટ્ઠીહિ કતં તં વિપ્પકારં દિસ્વા સંવિગ્ગો આગન્ત્વા ઇસ્સરં ભગવતો પાદે વન્દિત્વા સયિતાકારં કત્વા તં પવત્તિં ઉપાસકાનં કથેત્વા સકટ્ઠાનમેવ અગમાસિ. તતો સત્તમે દિવસેપાતોવ તે સબ્બેપિ રઞ્ઞો સન્તિકં ગન્ત્વા વન્દિત્વા એવમાહંસુ. દેવ ઇસ્સરો અમ્હાકં ભગવતો પાદે સિરસા વન્દિત્વા નિપન્નોતિ. અથ રાજા તેસં કથં સુત્વા નગરે ભેરિં ચરાપેત્વા મહાજને સન્નિપાતેત્વા તેહિ પરિવુતો દેવકુલં ગન્ત્વા લઞ્છં ભિન્દાપેત્વા દ્વારં વિવરિત્વા ફલકં આહરાપેત્વા વેઠિતસાટકે મોચાપેસિ. અથ રાજા ચ મહાજનો ચ તં મહન્તં પાટિહારિયં દિસ્વા મિચ્છાદિટ્ઠિં પહાય સબ્બે સત્થુનો સરણ મગમંસુ. અથ રાજા તં દેવકુલં ભિન્દાપેત્વા મહન્તં રમણીયં વિહારં કારાપેત્વા યાવજીવં પુઞ્ઞકમ્મં કત્વા દેવલોકે નિબ્બત્તિ.

૧૩. અનબ્ભુતં સત્થુ ધરીયમાને,

કરોન્તિ દિસ્વા કુસલાનિ ઇદ્ધિં;

યે તં મુનિન્દે પરિનિબ્બુતમ્હિ,

કરોન્તિ પુઞ્ઞાનિ મહબ્ભૂતં યેતિ.

કાવીરપટ્ટનવત્થું પઞ્ચમં.