૨૬. ચોરઘાતકવત્થુમ્હિ અયમાનુપુબ્બીકથા

એકસ્મિં કિર સમયે અમ્હાકં ભગવા સાવત્થિયં ઉપનિસ્સાય જેતવને વિહરતિ ધમ્મદેસનાય મહાજનસ્સ સગ્ગમોક્ખસમ્પદં દદમાનો. તસ્મિંસમયે પઞ્ચસતા ચોરા અટવિતો નગરં આગન્ત્વા રત્તિભાગે ચોરકમ્મં કત્વા તેન પુત્તદારે પોસેન્તિ. અથેકદિવસં ચોરા ચોરકમ્મત્થાય નગરં પવિસન્તા નગરદ્વારે એકં દુક્ખિતં જનપદમનુસ્સં પસ્સિત્વા હમ્ભો કત્થ વસતીતિ પુચ્છિંસુ, સો અત્તજના જનપદવાસિભાવં પકાસેસિ. અથસ્સ તે કસ્મા ભો ઇમિના દુક્ખવાસેન વસિસ્સસિ, એહિ અમ્હેહિ સદ્ધિં ચોરકમ્મં કરોન્તો વત્થાલઙ્કારસમ્પન્નો પુત્તદારં પોસેહિ. ઇમિના કપણવાસેન ન વસાતિ આહંસુ. સો પનિમે યુત્તં કથેન્તીતિ તેસં વચનં સમ્પટિચ્છિ. અથ તે એવં સતિ અમ્હેહિ સદ્ધિં આગચ્છાહીતિ વત્વા નં ગહેત્વા અન્તોનગરં પવિટ્ઠા તત્થ તત્થ વિલુમ્પન્તા ચોરકમ્મં અકંસુ. તદા જાનપદિકો લદ્ધવિભવો ઇમમેવ વરતરન્તિ તેહિ સદ્ધિં ચોરકમ્મં કરોન્તો જીવિકં કપ્પેસિ, અથેકદિવસં રાજપુરિસા કતકમ્મે તે સબ્બેવ ગહેત્વા પચ્છાબાહં ગાળ્હં બન્ધિત્વા કોસલરઞ્ઞો દસ્સેસું, રાજા તે દિસ્વા એવમાહ, ભણે તુમ્હાકં અન્તરે યો એતેસં મારેત્વા જીવિતક્ખયં પાપેસ્સતિ, તસ્સ જીવિતદાનં દમ્મીતિ, તં સુત્વા તે ચોરા સબ્બે અઞ્ઞમઞ્ઞઞાતિસુહદસમ્બન્ધભાવેન તં ન ઇચ્છિંસુ. સો પન જનપદવાસી મનુસ્સો અહમેતે સબ્બે મારેસ્સામીતિ રઞ્ઞો વત્વા તેનાનુઞ્ઞાતો તે સબ્બે મારેસિ. તં દિસ્વા તુટ્ઠો રાજા તસ્સ ચોરઘાતકમ્મં અદાસિ. સો ચોરે ચ વજ્ઝપ્પત્તે ચ મારેન્તો પઞ્ચવીસતિવસ્સાનિ વસન્તો અપરભાગે મહલ્લકો અહોસિ. અથ સો મન્દબલત્તા કતિપયપહારેનાપિ ચોરં મારેતું ન સક્કોતિ, રાજા તં ઞત્વા અઞ્ઞસ્સ ચોરઘાતકમ્મં અદાસિ. અથ સો ચોરઘાતકમ્મા [ચોરઘાતકમ્મ ઇતિપિકત્થચિ] પરિહીનો અત્તનો ગેહે વસતિ. તદા અઞ્ઞતરો મનુસ્સો મન્તં પરિવત્તેત્વા નાસાવાતેન મનુસ્સમારણકમન્તં જાનાતિ. તથાહિ હત્થપાદકણ્ણનાસસીસાદીસુ યંકિઞ્ચિ છેજ્જભેજ્જં કત્તુકામો મન્તં પરિવત્તેત્વા નાસાવાતં વિસ્સજ્જેતિ. તં તં ઠાનં છિજ્જતિ ભિજ્જતિ, એવં મહાનુભાવો સો મન્તો, અથ સો તં પુરિસં ઉપટ્ઠહિત્વા મન્તં લભિત્વા રઞ્ઞો સાસનં પેસેસિ. અહં ઇતો પુબ્બે મહલ્લકત્તા ચોરાનં હત્થપાદાદયો દુક્ખેન છેજ્જ ભેજ્જં કરોમિ, મારેતબ્બેપિ દુક્ખેન મારેમિ. ઇદાનિ પનાહં તથા ન કરોમિ, મમ મન્તાનુભાવેન છેજ્જભેજ્જકમ્મં કરિસ્સામીતિ. રાજા તં સાસનં સુત્વા સાધૂતિ તં પક્કોસાપેત્વા ઠાનન્તરં તસ્સેવ પાકતિક મકાસિ. સો તતો પટ્ઠાય તં કમ્મં કરોન્તો પુન પઞ્ચવસ્સાનિ અતિક્કામેસિ. સો મહલ્લકો ખીણાયુકો દુબ્બલો મરણમઞ્ચપરાયણો હુત્વા મરણવેદનાદુક્ખેન મહન્તેન ભયાનકેન સદ્દેન વિસ્સરં વિરવન્તો નિમીલિતેન ચક્ખુના ભયાનકં નરકગ્ગિજાલાપજ્જલન્તઅયકૂટમુગ્ગરધરે નિરયપાલે ચ પસ્સન્તો નિપન્નો હોતિ, તતો તસ્સ પટિવિસ્સકગેહે મનુસ્સા તસ્સ ભયાનકસદ્દસવણેન ગેહં છટ્ટેત્વા પલાયિંસુ. તસ્મિં કિર દિવસે મહાસારિપુત્તત્થેરો દિબ્બચક્ખુના લોકં ઓલોકેન્તા તં ચોરઘાતકં તદહેવ કાલંકત્વા નિરયે નિબ્બત્તમાનં દિસ્વા મયિ તત્થ ગતે પનેસ મયિ પસાદેન સગ્ગે નિબ્બત્તતીતિ ઞત્વા અજ્જ મયા તસ્સાનુગ્ગહં કાતું વટ્ટતીતિ પુબ્બણ્હસમયં નિવાસેત્વા તસ્સ ઘરદ્વાર મગમાસિ. અથ સો થેરં દિસ્વા કુદ્ધો કોપેન તટતટાયમાનદેહો અજ્જ તં વિજ્ઝિત્વા ફાલેત્વા મારેસ્સામીતિ નિપન્નોવ મન્તં પરિવત્તેત્વા નાસાવાતં વિસ્સજ્જેસિ, થેરો તસ્મિં ખણે નિરોધસમાપન્નો નિરોધા વુટ્ઠાય સુરિયો વિય વિરોચમાનો અટ્ઠાસિ, અથ સો થેરસ્સ તયો વારે તથેવ કત્વા કિઞ્ચિ કાતું અસક્કોન્તો અતિવિય વિમ્હિતચિત્તો થેરે ચિત્તં પસાદેત્વા અત્તનો પટિયત્તં પાયસં થેરસ્સ દાપેસિ, થેરો મઙ્ગલં વડ્ઢેત્વા વિહારમેવ અગમાસિ, ચોરઘાતકો થેરસ્સ દિન્નદાનં અનુસ્સરન્તો તસ્મિં ખણે કાલં કત્વા સગ્ગે નિબ્બત્તિ. અહો વીતરાગાનં બુદ્ધપુત્તાનં આનુભાવો. એવં નરકે નિબ્બત્તમાનોપિસ્સ બલેન સગ્ગે નિબ્બત્તોતિ. તથાહિ.

૧. દાનં તાણં મનુસ્સાનં, દાનં દુગ્ગતિવારણં;

દાનં સગ્ગસ્સ સોપાનં, દાનં સન્તિકરં પરં.

૨. ઇચ્છિતિચ્છિતદાનેન, દાનં ચિન્તામણી વિય;

કપ્પરુક્ખોવ સત્તાનં, દાનં ભદ્દઘટોવિય.

૩. સીલવન્તસ્સ દાનેન, ચક્કવત્તિસિરિમ્પિ ચ;

લભન્તિ સક્કસમ્પત્તિં, તથા લોકુત્તરં સુખં.

૪. પાપકમ્મેસુ નિરતો, ઠિતોયં નરકાયને [નરકાવને ઇતિપિકત્થચિ];

સારિપુત્તસ્સ થેરસ્સ, પિણ્ડપાતસ્સ વાહસા.

૫. અપાયં પરિવજ્જેત્વા, નેકદુક્ખસમાકુલં;

દેવસઙ્ઘપરિબ્બૂળ્હો, ગતો દેવપુરં વરં.

૬. તસ્મા સુખેત્તે સદ્ધાય, દેથ દાનાનિ કામદં;

દાનં દેન્તેહિ સીલમ્પિ, પાલનીયંતિસુન્દરન્તિ [પાલનંચાતિસુન્દરં ઇતિપિકત્થચિ].

અથ ભિક્ખૂ ધમ્મસભાયં સન્નિપતિત્વા નિસિન્ના ભગવન્તં પુચ્છિંસુ, કિંભન્તે સો પાપો ચતૂસુ અપાયેસુ કતરસ્મિં નિબ્બત્તોતિ. અથ સત્થા અજ્જેસ ભિક્ખવે સારિપુત્તસ્સ દિન્નદાનાનુભાવેન દેવલોકે નિબ્બત્તો, તસ્સેવ નિસ્સન્દેન અનાગતે પચ્ચેકબુદ્ધો ભવિસ્સતીતિ બ્યાકાસીતિ.

૭. ભો સારિપુત્તે નિહિતપ્પદાનં,

ખણેન પાપેતિ હિ સગ્ગમગ્ગં;

તસ્મા સુખેત્તેસુ દદાથ દાનં,

કામત્થ ચે સગ્ગમોક્ખં પરત્થ.

ચોરઘાતકવત્થું છટ્ઠમં.