૨૩. પાદપીઠિકાય વત્થુમ્હિ અયમાનુપુબ્બીકથા

જમ્બુદીપે મહાબોધિતો કિર દક્ખિણપસ્સે એતં પચ્ચન્તનગરં અહોસિ. તત્થ સદ્ધાસમ્પન્નો રતનત્તયમામકો એકો ઉપાસકો પટિવસતિ. તદા એકો ખીણાસવો ભગવતા પરિભુત્તં પાદપીઠં થવિકાય પક્ખિપિત્વા ગતગતટ્ઠાને પૂજેન્તો અનુક્કમેન તં નગરં સમ્પાપુણિત્વા સુનિવત્થો સુપારુતો પત્તં ગહેત્વા અન્તરવીથિં પટિપજ્જિ યુગમત્તદસો પબ્બજ્જાલીલાય જનં પરિતોસેન્તો. અથ સો ઉપાસકો તથા ગચ્છન્તં થેરં દિસ્વા પસન્નમાનસો ઉપગન્ત્વા પઞ્ચપતિટ્ઠિતેન વન્દિત્વા પત્તં ગહેત્વા ભોજેત્વા નિબદ્ધં મમ ગેહં આગમનમિચ્છામિ, મમાનુકમ્પાય એત્થેવ વસથ સામીતિ યાચિત્વા નગરાસન્ને રમણીયે વનસણ્ડે નદીકૂલે પણ્ણસાલં કત્વા થેરસ્સ તં નીય્યાતેત્વા ચતુપચ્ચયેહિ પટિજગ્ગન્તો માનેન્તો પૂજેન્તો વસતિ. થેરોપિ તત્થ ફાસુકટ્ઠાને ભગવતા પરિભુત્તપાદપીઠધાતું નિધાય વાલુકાહિ થૂપં કત્વા નિચ્ચં ગન્ધધૂપદીપપુપ્ફપૂજાદીહિ પૂજયમાનો વાસં કપ્પેતિ. તસ્મિં સમયે તસ્સો પાસકસ્સ અનન્તરગેહવાસિકો એકો ઇસ્સરભત્તિકો અત્તનો દેવતં નિબદ્ધં નમસ્સતિ. તં દિસ્વાસ્સ ઉપાસકો બુદ્ધગુણે વત્વા અખેત્તે સમ્મ મા વિરિયં કરોહિ. પજહેતં દિટ્ઠિંતિ આહ. તતો સો કેરાટિકો ઇસ્સરભત્તિકો કો તે સત્થુ ગુણાનુભાવો, અમ્હાકં ઇસ્સરસ્સ ગુણોવ મહન્તોતિ વત્વા તસ્સ અગુણં ગુણન્તિ કથેન્તો આહ.

૧. તિપુરં સો વિનાસેસિ, લલાટનયનગ્ગિના;

અસુરેચ વિનાસેસિ, તિસૂલેન મહિસ્સરો.

૨. જટાકલાપમાવત્તં, નચ્ચતી દિનસન્ધિયં;

વાદેતિ ભેરિવીણાદિં, ગીતંચાપિ સ ગાયતિ.

૩. ભરિયાયો તસ્સ તિસ્સો, જટાયેકં સમુબ્બહે;

એકમેકેન પસ્સેન, પસ્સમાનો ચરેકકં.

૪. હત્થિચમ્મમ્બરધરો, તેનેવ વારિતા તપો;

અસાદિસેહિ પુત્તેહિ, રૂપેન ચ સુપાકટો.

૫. રતિયા ચ મધુપાને ચ, બ્યાવટો સબ્બદા ચ સો;

મનુસ્સટ્ઠિધરો સીસ, કપાલેનેસ ભુઞ્જકિ.

૬. ન જાતો ન ભયં તસ્સ, મરણં નત્થિ સસ્સતો;

ઈદિસો મે મહાદેવો, નત્થઞ્ઞસ્સીદિસો ગુણોતિ.

તં સુત્વા ઉપાસકો સમ્મ તુય્હં ઇસ્સરસ્સ એતે ગુણા નામ તાવ હોન્તુ. અગુણા નામ કિત્તકા હોન્તીતિ વત્વા ભગવતો સકલગુણે સંહરિત્વા કથેન્તો આહ.

૭. લોકે સબ્બસવન્તીનં, આધારો સાગરો યથા;

સબ્બેસં ગુણરાસીનં, આધારોવ તથાગતો.

૮. ચરાચરાનં સબ્બેસં, આધારાવ ધરા અયં;

તથા ગુણાનં સબ્બેસં, આધારોવ તથાગતો.

૯. એવં સન્તો વિયત્તોચ [વિયન્તો ઇતિકત્થચિ], એવં સો કરુણાપરો;

એવ મિદ્ધિવિધા તસ્સ, એવમેવં ગુણા ઇતિ.

૧૦. બુદ્ધોપિ સક્કોતિ ન યસ્સ વણ્ણે,

કપ્પમ્પિ વત્વા ખયતં ગમેતું;

પગેવ ચ બ્રહ્મસુરા સુરેહિ,

વત્તું ન હાનન્તગુણસ્સ વણ્ણન્તિ.

એવં વદન્તા પન તે ઉભોપિ અમ્હાકં દેવો ઉત્તમો અમ્હાકં દેવો ઉત્તમોતિ કલહં વડ્ઢેત્વા રઞ્ઞો સન્તિકમગમંસુ, રાજા તેસં કથં સુત્વા તેનહિ તુમ્હાકં દેવતાનં મહન્તભાવં ઇદ્ધિપાટિહારિયેન જાનિસ્સામ. દસ્સેથ તેહિ નો ઇદ્ધિંતિ નગરે ભેરિં ચરાપેસિ. ઇતો કિર સત્તાહચ્ચયેન ઇમેસં દ્વિન્નં સત્થારાનં પાટિહારિયાનિ ભવિસ્સન્તિ. સબ્બે સન્નિપતન્તૂતિ તં સુત્વા નાનાદિસાસુ બહૂ મનુસ્સા સમાગમિંસુ, અથ મિચ્છાદિટ્ઠિકા અજ્જ અમ્હાકં દેવસ્સ આનુભાવં પસ્સામાતિ મહન્તં પૂજં કરોન્તો તત્થ સારં નાદ્દસંસુ, સમ્માદિટ્ઠિકાપિ અજ્જ અમ્હાકં ભગવતો આનુભાવં પસ્સિસ્સામાતિ વાળુકાથૂપં ગન્ત્વા ગન્ધમાલાદીહિ પૂજેત્વા પદક્ખિણં કત્વા અઞ્જલિમ્પગ્ગય્હ અટ્ઠંસુ. અથ રાજાપિ બલવાહનપરિવુતો એકમન્તે અટ્ઠાસિ. નાનાસમયવાદિનોપિ અજ્જ તેસં પાટિહારિયં પસ્સિસ્સામાતિ મઞ્ચાતિમઞ્ચં કત્વા અટ્ઠંસુ. તેસં સમાગમે સમ્માદિટ્ઠિકા વાળુકાથૂપ મભિમુખં કત્વા અઞ્જલિમ્પગ્ગય્હ સામિ અમ્હાકં ભગવા સબ્બબુદ્ધકિચ્ચાનિ નિટ્ઠાપેત્વા અનુપાદિસેસાય નિબ્બાણધાતુયા પરિનિબ્બાયિ. સારિપુત્તમહામોગ્ગલ્લાનાદયો અસીતિમહાસાવકાપિ પરિનિબ્બાયિંસુ, નત્થેત્થ અમ્હાકં અઞ્ઞં પટિસરણન્તિ વત્વા સચ્ચકિરિયં કરોન્તા આહંસુ.

૧૧. આપાણકોટિં બુદ્ધસ્સ, સરણં નો ગતા યદિ;

તેન સચ્ચેન યં ધાતુ, દસ્સેતુ પાટિહારિયં.

૧૨. આપાણકોટિં ધમ્મસ્સ, સરણં નો ગતા યદિ;

તેન સચ્ચેન યં ધાતુ, દસ્સેતુ પાટિહારિયં.

૧૩. આપાણકોટિં સઙ્ઘસ્સ, સરણં નો ગતા યદિ;

તેન સચ્ચેન યં ધાતુ, દસ્સેતુ પાટિહારિયં.

૧૪. રામકાલે મુનિન્દસ્સ, પાદુકા ચાસિ અબ્ભુતા;

તેન સચ્ચેન યં ધાતુ, દસ્સેતુ પાટિહારિયં.

૧૫. છદ્દન્તકાલે મુનિનો, દાઠા છરંસિરઞ્જિતા;

તેન સચ્ચેનયં ધાતુ, નિચ્છારેતુ છ રંસિયો.

૧૬. જાતમત્તો તદા બુદ્ધો, ઠિતો પઙ્કજમુદ્ધનિ;

નિચ્છારેસાસભિંવાચં, અગ્ગો સેટ્ઠોતિઆદિના;

તેન સચ્ચેનયં ધાતુ, દસ્સેતુ પાટિહારિયં.

૧૭. નિમિત્તે ચતુરો દિસ્વા, નિક્ખન્તો અભિનિક્ખમં;

તેન સચ્ચેન યં ધાતુ, દસ્સેતુ પાટિહારિયં.

૧૮. મારસેનં પલાપેત્વા, નિસિન્નો બુજ્ઝિ બોધિયં;

તેન સચ્ચેન યં ધાતુ દસ્સેતુ પાટિહારિયં.

૧૯. ધમ્મચક્કં પવત્તેસિ, જિનો સિપતને તદા;

તેન સચ્ચેન યં ધાતુ, દસ્સેતુ પાટિહારિયં.

૨૦. નન્દોપનન્દભોગિન્દં, નાગં નાલાગિરિવ્હયં;

આળવકા દયો યક્ખે, બ્રહ્માનો ચ બકા દયો.

૨૧. સચ્ચકાદિનિગણ્ઠેચ, કૂટદન્તા દયો દ્વિજે;

દમેસિ તેન સચ્ચેન, દસ્સેતુ પાટિહારિયંતિ.

એવઞ્ચ પન વત્વા ઉપાસકા અમ્હાકં અનુકમ્મં પટિચ્ચ મહાજનસ્સ મિચ્છાદિટ્ઠિભેદનત્તં પાટિહારિયં દસ્સેથ સામીતિ આરાધેસું. અથ બુદ્ધાનુભાવઞ્ચ થેરાનુભાવઞ્ચ ઉપાસકાનં સચ્ચકિરિયાનુભાવઞ્ચ પટિચ્ચ વાળુકાથૂપં દ્વિધા ભિન્દિત્વા પાદપીઠધાતુ આકાસ મબ્ભુગ્ગન્ત્વા છબ્બણ્ણરંસિયો વિસ્સજ્જેન્તી વિલાસમાના અટ્ઠાસિ. અથ મહાજના ચેલુક્ખેપસહસ્સાનિ પવત્તેન્તા સાધુકીળ્હં કીળન્તા મહાનાદં પવત્તેન્તા મહન્તં પૂજમકંસુ. મિચ્છાદિટ્ઠિકાપિ ઇમં અચ્છરિયં દિસ્વા વિમ્હિતમાનસા મિચ્છાદિટ્ઠિં ભિન્દિત્વા રતનત્તયપરાયણા સરણ મગમંસૂતિ.

૨૨. ફુટ્ઠોપિ પાદેન જિનસ્સ એવં,

કલિઙ્ગરો પા સિ મહાનુભાવો;

લોકેકનાથસ્સ અનાસવસ્સ,

મહાનુભાવો હિ અચિન્તનીયોતિ.

પાદપીઠિકાય વત્થું તતિયં.