૨૦. સહાયસ્સ પરિચ્ચત્તજીવિતકસ્સ વત્થુમ્હિ અયમાનુપુબ્બીકથા

ભગવતિ પરિનિબ્બુતે સાવત્થિયં સોમબ્રાહ્મણો સોમદત્તબ્રાહ્મણોતિ દ્વે બ્રાહ્મણા વસન્તિ. તત્થ સોમદત્તબ્રાહ્મણેન સદ્ધિં સોમબ્રાહ્મણો યેભુય્યેન દૂતં કીળતિ. અથેકદિવસં સોમદત્તો સોમબ્રાહ્મણં તેન પરાજેત્વા તસ્સ ઉત્તરાસઙ્ગઞ્ચ લઞ્છનમુદ્દિકઞ્ચ ગહેત્વા અત્તનો ગેહં ગચ્છન્તો સોમબ્રાહ્મણસ્સ એહિ ગેહં ગચ્છા- માતિ આહ. તતો સોમો નાહં સમ્મ એકસાટકો હુત્વા અન્તરવીથિં ઓતરિતું સક્કોમિ. ગમનતો એત્થેવ મે ઠાનં વરતરન્તિ આહ, સોમદત્તેન એવં સતિ સમ્મ ઇમં ઉત્તરાસઙ્ગં ગણ્હાતિ તસ્સ તં દત્વા ઇદાનિ સમ્મ એહીતિ વુત્તોપિ નાગચ્છતિ. પુન તેન ભો કસ્મા નાગચ્છસીતિ પુટ્ઠો સમ્મ મમ હત્થે મુદ્દિકં અપસ્સન્તા મે પુત્તદારાદયો મયા સદ્ધિં કલહં કરોન્તીતિ આહ, અથ સો એવં સન્તે યદા તે પહોતિ. તદા મય્હં દેહીતિ મુદ્દિકમ્પિ દત્વા તં ગહેત્વા ગેહં અગમાસિ. અથ તે એત્તકેન સહાયા અહેસું. અપરભાગે સોમદત્તબ્રાહ્મણં અયં પરદારકમ્મં અકાસીતિ મનુસ્સા ગહેત્વા રઞ્ઞો દસ્સેસું. રાજા તસ્સ રૂપસમ્પત્તિં દિસ્વા રાજાણં અકત્વા મા ભો પુન એવમકાસીતિ ઓવદિત્વા વિસ્સજ્જેસિ. રાજા નં યાવતતિયવારં ઓવદન્તો વિસ્સજ્જેત્વા ચતુત્થેવારે ગચ્છથેતં આઘાતનં નેત્વા મારેથાતિ આણાપેસિ. એવં પાપકમ્મે નિરતા અનેકાકારેન ઓવદન્તાપિ ન સક્કા નિવારેતું. તથાહિ.

૧. સોણા ચેવ સિગાલા ચ, વાયસા નીલમક્ખિકા;

ઇચ્ચેતે કુણપે સત્તા, ન સક્કા તે નિસેધિતું.

૨. તથા પાણાતિપાતેસુ, પરદારે સુરાય ચ;

મુસાવાદેસુ થેય્યેસુ, સત્તસત્તા ન વારિયાતિ.

તતો રાજપુરિસા તં બન્ધિત્વા પક્કમિંસુ. તદા સોમબ્રાહ્મણો સોમદત્તં તથા નીયમાનં દિસ્વા કમ્પમાનહદયો રાજપુરિસાનં સન્તિકં ગન્ત્વા ઇમં ભો મુહુત્તં મા મારેથ. યાવ રાજાનં જાનાપેસ્સામીતિ વત્વા રઞ્ઞો સન્તિકં ગન્ત્વા વન્દિત્વા ઠિતો દેવ મમ જીવિતં સોમદત્તસ્સ બ્રાહ્મણસ્સ દસ્સામિ. એતં મુઞ્ચથ. યદિ મારેતુકામા, મં મારેથાતિ આહ. રાજા તુણ્હી [તુટ્ઠો ઇતિકત્થચિ] અહોસિ, રાજપુરિસા સોમદત્તં મુઞ્ચિત્વા સોમબ્રાહ્મણં આઘાતનં નેત્વા મારેસું, અહો કતઞ્ઞુનો કતવેદિતા.

હોતિ ચેત્થ.

૩. કકૂપકાર મત્તાનં, સરન્તા કેચિ માનુસા;

જીવિતં દેન્તિ સોમોવ, સોમદત્તસ્સ અત્તનોતિ.

સો તેન જીવિતદાનેન દેવલોકે નિબ્બત્તિત્વા મહન્તે કનકવિમાને દેવચ્છરાસહસ્સપરિવુતો દિબ્બસમ્પત્તિમનુભોન્તો પટિવસતિ. તદા સોમદત્તબ્રાહ્મણો એસો મં મરણપ્પત્તં મોચેસીતિ વત્વા તસ્સત્થાય દાનં દત્વા પત્તિં અદાસિ. તાવદેવસ્સ તતો બહુતરં દેવિસ્સરિયં અહોસિ દેવાનુભાવઞ્ચ. તતો સો સોમદેવો અત્તનો દેવિસ્સરિયં ઓલોકેન્તો સહાયસ્સ અત્તનો જીવિતદાનં અદ્દસ. દિસ્વા અત્તભાવં વિજહિત્વા માણવકવણ્ણેન સોમદત્તબ્રાહ્મણં ઉપસઙ્કમિત્વા પટિસન્થારં કત્વા અત્તાનં દેવલોકે નિબ્બત્તભાવં પકાસેત્વા તં ગહેત્વા અત્તનો આનુભાવેન દેવલોકં નેત્વા યથાકામં સમ્પત્તિ મનુભવાતિ વત્વા સત્તાહં દેવસ્સરિયં દત્વા સત્તમે દિવસે નેત્વા તસ્સ ગેહેયેવ પતિટ્ઠાપેસિ. તત્થ હિ દિબ્બસમ્પત્તિ મનુભૂતસ્સ મનુસ્સસમ્પત્તિ પટિક્કુલા હોતિ. તતો સો દિબ્બસમ્પત્તિમનુસ્સરન્તો કિસો દુબ્બલો ઉપ્પણ્ડુપ્પણ્ડુકજાતો અહોસિ. અથેકદિવસં દેવપુત્તો તં ઓલોકેન્તો તથા દુક્ખપ્પત્તં દિસ્વા ન સક્કા મનુસ્સેન દિબ્બસમ્પત્તિમનુભવિતુન્તિ ઇચ્છિતિચ્છિતસમ્પત્તિદાયકં એકં ચિન્તામણિં દત્વા તસ્સ ભરિયમ્પિ અત્તનો આનુભાવેન રૂપવન્થં યસવન્તં વણ્ણવન્તં અતિક્કન્તમનુસ્સિત્થિવણ્ણં અકાસિ, અપરભાગે તે જયમ્પતિકા પચ્ચક્ખતો દિટ્ઠદિબ્બસમ્પત્તિવિભવા દાનં દત્વા સીલં રક્ખિત્વા સહાયદેવપુત્તસ્સ સન્તિકેયેવ નિબ્બત્તિંસૂતિ.

૪. મન્દેન નન્દિતમના ઉપકારકેન,

પાણમ્પિ દેન્તિ સુજના ઇતિ ચિન્તયિત્વા;

મિત્તદ્દુ મા ભવથ ભો ઉપકારકસ્સ;

પાસંસિયા ભવથ સાધુજનેહિ નિચ્ચંતિ.

સહાયસ્સ પરિચ્ચત્તજીવિતકસ્સ વત્થું દસમં.

નન્દિયરાજવગ્ગો દુતિયો.