૧૬. ફલકખણ્ડદિન્નસ્સ વત્થુમ્હિ અયમાનુપુબ્બીકથા

સાવત્થિયં કિરેકો મનુસ્સો ઉત્તરાપથં ગચ્છામીતિ અદ્ધાનમગ્ગપટિપન્નો ગિમ્હાનમાસે મજ્ઝણ્હે બહલાતપેન કિલન્તો હુત્વા રુક્ખચ્છાયં પવિસિત્વા તમ્બુલં ખાદન્તો ફલકે નિસીદિ. અથ ઉત્તરાપથેનાગચ્છાન્તો એકો તથેવ આતપેન કિલન્તો આગન્ત્વા પુરિમસ્સ સન્તિકે નિસીદિત્વા ભો પાનીયં અત્થીતિ પુચ્છિ. ઇતરો પાનીયં નત્થીતિ આહ. અથસ્સ સો મય્હમ્પિ ભો તમ્બુલં દેહિ પિપાસિતોમ્હિતિ વત્વાપિ ન લભિ. ચતુકહાપણેન એકં તમ્બુલપણ્ણં કિણિત્વા લદ્ધો તત્થેવ નિસીદિત્વા ખાદિત્વા પિપાસં વિનોદેત્વા તેન ઉપકારેન તસ્સ સિનેહં કત્વા અત્તનો ગમનટ્ઠાન મગમાસિ, અથા પરભાગે સો પટ્ટનં ગન્ત્વા નાવાય વણિજ્જત્થાય ગચ્છન્તો સમુદ્દમજ્ઝં પાપુણિ. તતો સત્તમે દિવસે નાવા ભિજ્જિ. મનુસ્સા મચ્છકચ્છપાનં ભક્ખા જાતા. સો એવ પુરિસો અરોગો હુત્વા એકં ફલકખણ્ડં ઉરે કત્વા સમુદ્દં તરતિ. અથે તરોપિ તથેવ નાવાય ભિન્નાય સેસો હુત્વા સમુદ્દં તરન્તો પુરિમેન સમાગમિ. અથ તે સત્તદિવસં સમુદ્દે તરન્તા અઞ્ઞમઞ્ઞં સઞ્જાનિંસુ. તેસુ કહાપણે દત્વા તમ્બુલં ગહિતો એકં ફલકખણ્ડં ઉરે કત્વા તરતિ. ઇતરસ્સેતં નત્થિ. અથ સો કહાપણે ગહેત્વા દિન્નતમ્બુલમત્તસ્સો પકારં સરિત્વા અત્તનો ફલકખણ્ડં તસ્સ અદાસિ. સો તસ્મિં સયિત્વા તરન્તો તં પહાય અગમાસિ, અપરો અનાધારકેન તરન્તો ઓસ્સટ્ઠવિરિયો ઉદકે ઓસીદિતુમારતિ. તસ્મિં ખણે સમુદ્દે અધિવત્થા મણિમેખલા નામ દેવધીતા ઓસીદન્તં તં દિસ્વા સપ્પુરિસોતિ તસ્સ ગુણાનુસ્સરન્તી વેગેના ગન્ત્વા તં અત્તનો આનુભાવેન સમુદ્દતીરં પાપેસિ. ઇતરંપિ સા એતસ્સેવ ગુણાનુભાવેન તીરં પાપેસિ. અથ ફલકેનોતિણ્ણપુરિસો તં દિસ્વા વિમ્હિતો કથં પુરતો અહોસિ સમ્માતિ પુચ્છિ. સો ન જાનામિ. અપિચ ખો સુખેનેવ તીરં પત્તોસ્મીતિ આહ. અથ દેવધીતા દિસ્સમાનકસરીરેનેવ અત્તના આનીતભાવં આરોચેન્તી આહ.

૧. યો માતરં પિતરંવા, ધમ્મેન ઇધ પોસતિ;

રક્ખન્તિ તં સદા દેવા, સમુદ્દે વા થલેપિ વા.

૨. યો ચે બુદ્ધઞ્ચ ધમ્મઞ્ચ, સંઘઞ્ચ સરણં ગતો;

રક્ખન્તિ તં સદા દેવા, સમુદ્દે વા થલેપિ વા.

૩. પઞ્ચવિધં અટ્ઠવિધં, પાતિમોક્ખઞ્ચ સંવરં;

પાલેતિ યો તં પાલેન્તિ, દેવા સબ્બત્થ સબ્બદા.

૪. કાયેન વાચા મનસા, સુચરિત્તં ચરતી ધ યો;

પાલેન્તિ તં સદા દેવા, સમુદ્દે વા થલેપિ વા.

૫. યો સપ્પુરિસધમ્મેસુ, ઠિતો ધ કતવેદિકો;

પાલેન્તિ તં સદા દેવા, સમુદ્દે વા થલેપિ વા.

તતો સો આહ.

૬. નેવ દાનં અદાસાહં, ન સીલં પરિપાલયિં;

કેન મે પુઞ્ઞકમ્મેન, મમં રક્ખન્તિ દેવતા;

પુચ્છામિ સંસયં તુય્હં, તં મે અક્ખાહિ દેવતેતિ.

દેવતા આહ.

૭. અગાધા પારગે ભીમે, સાગરે દુરિતા કરે;

ભિન્નનાવો તરન્તો ત્વં, હદયે કત્વા કલિઙ્ગરં.

૮. ઠત્વા સપ્પુરિસે ધમ્મે, અત્તાન મનવેક્ખિય;

ખણસન્થવસ્સ પુરિસસ્સ, અદાસિ ફલકં સકં.

૯. તં તુય્હં મિત્તધમ્મઞ્ચ, દાનઞ્ચ ફલકસ્સ તે;

પતિટ્ઠાસિ સમુદ્દસ્મિં, એવં જાનાહિ મારિસાતિ.

એવઞ્ચ વત્વા સા તે દિબ્બાહારેન સન્તપ્પેત્વા દિબ્બવત્થાલઙ્કારેહિ અલઙ્કરિત્વા અત્તનો આનુભાવેન સાવત્થિનગરેયેવ તે પતિટ્ઠાપેસિ. તતો પટ્ઠાય તમેવ આરમ્મણં કત્વા તે દાનં દદન્તા સીલં રક્ખન્તા ઉપોસથકમ્મં કરોન્તા આયુપરિયોસાને સગ્ગપરાયણા અહેસું.

૧૦. એવં પરિત્તકુસલેનપિ સાગરસ્મિં,

સત્તા લભન્તિ સરણં ખલુ દેવતાહિ;

તુમ્હેપિ સપ્પુરિસતં ન વિનાસયન્તા,

મા ભો પમજ્જથ સદા કુસલપ્પયોગેતિ.

ફલકખણ્ડદિન્નસ્સ વત્થું છટ્ઠમં.