૧૫. બ્યગ્ઘસ્સ વત્થુમ્હિ અયમાનુપુબ્બીકથા

જમ્બુદીપે ચૂલરટ્ઠા સન્ને બારાણસીનગરે એકં પંસુપબ્બતં વિનિવિજ્ઝિત્વા મહામગ્ગો હોતિ, તત્થ વેમજ્ઝે એકો બ્યગ્ઘો અત્તનો અન્ધપિતરં પબ્બતગુહાયં કત્વા પોસેન્તો વસતિ. તસ્સેવ પબ્બતસ્સ વનદ્વારે તુણ્ડિલો નામ એકો સુવપોતકો રુક્ખસ્મિં વસતિ. તે ઉભોપિ અઞ્ઞમઞ્ઞં પિયસહાયા અહેસું, તસ્મિં સમયે પચ્ચન્તગામવાસી એકો મનુસ્સો અત્તનો માતુગામેન સદ્ધિં કલહં કત્વા બારાણસિં ગચ્છન્તો તં વનદ્વારં સમ્પાપુણિ. અથ સુવપોતકો પરિહીનત્તભાવં દુક્ખિતં તં દિસ્વા કમ્પમાનહદયો તં પક્કોસિત્વા ભો કુહિં ગચ્છસીતિ આહ, તેન પરખણ્ડં ગચ્છામીતિ વુત્તે તુણ્ડિલો ભો ઇમસ્મિં વનખણ્ડમજ્ઝે એકો બ્યગ્ઘો વસતિ. કક્ખલો ફરુસો સમ્પત્તસમ્પત્તે મારેત્વા ખાદતિ. મા ત્વં તેન ગચ્છાતિ આહ. સ્વાયં દુબ્ભગો મનુસ્સો હિતકામસ્સ તસ્સ વચનં અનાદિયિત્વા ગચ્છામેવાતિ આહ. તુણ્ડિલો તેનહિ સમ્મ યદિ અનિવત્તમાનો ગચ્છસિ. એસો બ્યગ્ઘો મમ સહાયો. મે વચનં તવ સન્તિકા સુત્વા ન ગણ્હાતીતિ. તસ્સ તં અનાદિયન્તો સો સુવરાજે પદુટ્ઠચિત્તો મુગ્ગરેન પહરિત્વા મારેત્વા અરણિં અગ્ગિં કત્વા મંસં ખાદિ. અસપ્પુરિસસંસગ્ગો નામે સ ઇધ લોકપરલોકેસુ દુક્ખાવહોયેવ. તથાહિ.

૧. મયા કતં મય્હમિદં, ઇતિ વેસ્સાનરં નરો;

સમાલિઙ્ગતિ સપ્પેમો, દહતેવસ્સ વિગ્ગહં.

૨. મધુખીરાદિદાનેન, પેમસા પરિપાલિતો;

સોરગો કુપિતોવસ્સ, ડસતેવસ્સ વિગ્ગહં.

૩. એવં નિહીનજચ્ચેન, પાપેન અકતઞ્ઞુના;

નરા ધમેન દીનેન, કતોપિ ખણસઙ્ગમો.

૪. અસાધુકો અયંતેવં, જાનમાનેન જન્તુના;

મુહુત્તમ્પિ ન કાતબ્બો, સઙ્ગમો સો અનત્થદોતિ.

તતો સો અસપ્પુરિસો મંસં ખાદિત્વા ગચ્છન્તો વનખણ્ડમજ્ઝં સમ્પાપુણિ. અથ બ્યગ્ઘો તં દિસ્વા મહાનાદં કરોન્તો ગહણત્થાય ઉટ્ઠાસિ. સો બ્યગ્ઘં દિસ્વા ભયપ્પત્તો તુણ્ડિલસ્સ વચનં સરિત્વા અહં ભો તવ સહાયતુણ્ડિલસ્સ સન્તિકા આગતોમ્હીતિ આહ, તં સુત્વા બ્યગ્ઘો અત્તમનો એહિ સમ્માતિ તં પક્કોસિત્વા અત્તનો વસનટ્ઠાનં નેત્વા ખાદિતબ્બાહારેન તં સન્તપ્પેત્વા પિતુસન્તિકે નિસીદાપેત્વા પુન વનખણ્ડ મગમાસિ. અથસ્સ પિતા પુત્તસ્સ ગતકાલે તેન સદ્ધિં સલ્લપન્તો તસ્સ વચનાનુસારેન તુણ્ડિલં મારેત્વા ખાદિતભાવં અઞ્ઞાસિ. તતો સો પુત્તસ્સ આગતકાલે તવ સહાયો તેન મારિતોતિ આહ. તં સુત્વા બ્યગ્ઘો અનત્તમનો વેગેન તસ્સ વસનટ્ઠાનં ગન્ત્વા સમ્મ તુણ્ડિલાતિ સદ્દં કત્વા અપસ્સન્તો લુઞ્ચિતપત્તંચસ્સ દિસ્વા નિસ્સંસયં તેન મારિતો મે સહાયોતિ સોચન્તો પરિદેવન્તો આગઞ્છિ. અથ સો અસપ્પુરિસો તસ્મિં તત્થ ગતે તસ્સ પિતરં પાસાણેન પહરિત્વા મારેત્વા બ્યગ્ઘંચ દાનિ મારેસ્સામીતિ બ્યગ્ઘાગમનમગ્ગં ઓલોકેન્તો નિલીનો અટ્ઠાસિ. તસ્મિં ખણે બ્યગ્ઘોપિ આગઞ્છિ. સો તસ્સા ગતકાલે તસ્સ તેજેન ભીતો ગન્ત્વા જીવિતં મે સામિ દેહીતિ પાદમૂલે ઉરેન નિપજ્જિ, બ્યગ્ઘો પન તેન કતકમ્મં દિસ્વા તસ્મિં ચિત્તં નિબ્બાપેત્વા મમ સહાયસ્સ સાસનમાદાયાગતસ્સ દુબ્ભિતું ન યુત્તન્તિ ચિન્તેન્તો તં સમસ્સાસેત્વા ગચ્છ સમ્માતિ સુખં પેસેસિ. એવઞ્હિ સપ્પુરિસસમાગમો નામ ઇધ લોકપરલોકેસુ સુખાવહોયેવ, વુત્તંહિ.

૫. સબ્ભિરેવ સમાસેથ, સબ્ભિ કુબ્બેથ સન્થવં;

સબ્બત્થ સન્થવો તેન, સેય્યો હોતિ ન પાપિયો.

૬. સુખાવહો દુક્ખનુદો, સદા સબ્ભિ સમાગમો;

તસ્મા સપ્પુરિસેહેવ, સઙ્ગમો હોતુ જન્તુનં.

તતો સો બ્યગ્ઘો તેન મેત્તચિત્તાનુભાવેન કાલં કત્વા સગ્ગે નિબ્બત્તોતિ.

૭. એવંવિધોપિ ફરુસો પરમંસભોજી;

બ્યગ્ઘો દયાયુપગતો સુગતિં સુમેધો;

તસ્મા કરોથ કરુણં સતતં જનાનં,

તં વો દદાતિ વિભવઞ્ચ ભવેસુ ભોગન્તિ.

બ્યગ્ઘસ્સ વત્થું પઞ્ચમં.