૯. છત્તુપાહનવગ્ગ, ૧૨. દ્વાદસમ સિક્ખાપુચ્છા

પુચ્છા – અનોકાસકતં આવુસો ભિક્ખું પઞ્હં પુચ્છન્તિયા પાચિત્તિયં કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે સમ્બહુલા ભિક્ખુનિયો આરબ્ભ પઞ્ઞત્તં, સમ્બહુલા ભન્તે ભિક્ખુનિયો અનોકાસકતં ભિક્ખું પઞ્હં પુચ્છિંસુ, તસ્મિં ભન્તે વત્થુસ્મિં પઞ્ઞત્તં.

પુચ્છા – સપ્પિં વા આવુસો તેલં વા મધું વા ફાણિતં વા મચ્છં વા મંસં વા ખીરં વા દધિં વા વિઞ્ઞાપેત્વા ભુઞ્જન્તિયા પાટિદેસનીયં કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે છબ્બગ્ગિયા ભિક્ખુનિયો આરબ્ભ પઞ્ઞત્તં, છબ્બગ્ગિયા ભન્તે ભિક્ખુનિયો સપ્પિમ્પિ તેલમ્પિ મધુમ્પિ ફાણિતમ્પિ મચ્છમ્પિ મંસમ્પિ ખીરમ્પિ દધિમ્પિ વિઞ્ઞાપેત્વા ભુઞ્જિંસુ, તસ્મિં ભન્તે વત્થુસ્મિં પઞ્ઞત્તં.

પુચ્છા – ચતુન્નં આવુસો વિપત્તીનં કતમા વિપત્તિ.

વિસ્સજ્જના – આચારવિપત્તિ ભન્તે.

પુચ્છા – છન્નં આવુસો આપત્તિસમુટ્ઠાનાનં કતિહિ સમુટ્ઠાનેહિ સમુટ્ઠાતિ.

વિસ્સજ્જના – ચતૂહિ ભન્તે સમુટ્ઠાનેહિ સમુટ્ઠાતિ, સિયા કાયતો સમુટ્ઠાતિ, નવાચતો નચિત્તતો, સિયા કાયતો ચ વાચતો ચ સમુટ્ઠાતિ, નચિત્તતો, સિયા કાયતો ચ ચિત્તતો ચ સમુટ્ઠાતિ, નવાચતો, સિયા કાયતો ચ વાચતો ચ ચિત્તતો ચ સમુટ્ઠાતિ, ઇમેહિ ભન્તે ચતૂહિ સમુટ્ઠાનેહિ સમુટ્ઠાતિ.

પુચ્છા – કા આવુસો વિપત્તિ.

વિસ્સજ્જના – અસંવરો ભન્તે વિપત્તિ.

પુચ્છા – કા આવુસો સમ્પત્તિ.

વિસ્સજ્જના – સંવરો ભન્તે સમ્પત્તિ.

પુચ્છા – કા આવુસો પટિપત્તિ.

વિસ્સજ્જના – ન એવરૂપં કરિસ્સામીતિ યાવજીવં આપાણકોટિકં સમાદાય સિક્ખતિ સિક્ખાપદેસુ, અયં ભન્તે પટિપત્તિ.

પુચ્છા – કસ્સ આવુસો વચનં.

વિસ્સજ્જના – ભગવતો ભન્તે વચનં અરહતો સમ્માસમ્બુદ્ધસ્સ.

પુચ્છા – કેનાવુસો આભતં.

વિસ્સજ્જના – પરમ્પરાય ભન્તે આભતં.

સુણાતુ મે ભન્તે સઙ્ઘો…પે… સંગાયેય્યામ.