૩. પત્તવગ્ગો, ૯. સાસઙ્ક સિક્ખાપુચ્છા

પુચ્છા – તિણ્ણં આવુસો ચીવરાનં અઞ્ઞતરં ચીવરં અન્તરઘરે નિક્ખિપિત્વા અતિરેકછારત્તં વિપ્પવસન્તસ્સ નિસ્સગ્ગિયં પાચિત્તિયં કત્થ પઞ્ઞત્તં.

વિસ્સજ્જના – સાવત્થિયં ભન્તે પઞ્ઞત્તં.

પુચ્છા – કં આવુસો આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સમ્બહુલે ભન્તે ભિક્ખૂ આરબ્ભ પઞ્ઞત્તં, સમ્બહુલા ભન્તે ભિક્ખૂ તિણ્ણં ચીવરાનં અઞ્ઞતરં ચીવરં અન્તરઘરે નિક્ખિપિત્વા અતિરેકછારત્તં વિપ્પવસિંસુ, તસ્મિં ભન્તે વત્થુસ્મિં પઞ્ઞત્તં.