૩. પત્તવગ્ગો, ૧૦. પરિણત સિક્ખાપુચ્છા
પુચ્છા – યં તેન આવુસો ભગવતા પસ્સતા અરહતા સમ્માસમ્બુદ્ધેન જાનં સઙ્ઘિકં લાભં અત્થનો પરિણામેન્તસ્સ નિસ્સગ્ગિયં પાચિત્તિયં કત્થ પઞ્ઞત્તં.
વિસ્સજ્જના – સાવત્થિયં ભન્તે પઞ્ઞત્તં.
પુચ્છા – કં આવુસો આરબ્ભ કિસ્મિં વત્થુસ્મિં પઞ્ઞત્તં.
વિસ્સજ્જના – છબ્બગ્ગિયે ભન્તે ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ જાનં સઙ્ઘિકં લાભં પરિણતં અત્તનો પરિણામેસું, તસ્મિં ભન્તે વત્થુસ્મિં પઞ્ઞત્તં.
પુચ્છા – જાનં આવુસો સઙ્ઘિકં લાભં પરિણતં અત્તનો પરિણામેન્તો, કતિ આપત્તિયો આપજ્જતિ.
વિસ્સજ્જના – જાનં ભન્તે સઙ્ઘિકં લાભં પરિણતં અત્તનો પરિણામેન્તો દ્વે આપત્તિયો આપજ્જતિ, પરિણામેતિ પયોગે દુક્કટં, પરિણામિતે નિસ્સગ્ગિયં પાચિત્તિયં, જાનં ભન્તે સઙ્ઘિકં લાભં પરિણતં અત્તનો પરિણામેન્તો ઇમા દ્વે આપત્તિયો આપજ્જતિ.
પુચ્છા – કસ્સ આવુસો વચનં.
વિસ્સજ્જના – ભગવતો ભન્તે વચનં અરહતો સમ્માસમ્બુદ્ધસ્સ.
પુચ્છા – કેનાવુસો આભતં.
વિસ્સજ્જના – પરમ્પરાય ભન્તે આભતં.
પુચ્છા – અત્થિ નુખો આવુસો તત્થ કોચિપિ વિરદ્ધદોસો.
વિસ્સજ્જના – નત્થિ ભન્તે.
સંગાયનત્થાય ઞાપનં
સુણાતુ મે ભન્તે સઙ્ઘો, અહં ભન્તે ઇમેસં સોળસન્નં નિસ્સગ્ગિયપાચિત્તિયસિક્ખાપદાનં નિદાનાદીનિ અનેકાનિ પુચ્છિતબ્બાનિ આયસ્મન્તં વિચિત્તસારાભિવંસં તિપિટકધર ધમ્મભણ્ડાગારિકં પુચ્છિં, સો ચ પુટ્ઠો પુટ્ઠો વિસ્સજ્જેતિ, ઇતિહિદં ભન્તે સિક્ખાપદસઞ્જાતં નિમ્મલં સુ પરિસુદ્ધં તસ્સેવ ભગવતો વચનં અરહતો સમ્માસમ્બુદ્ધસ્સ, તસ્મા યથા પુરે મહાકસ્સપાદયો મહાથેર વરા પોરાણસંગીતિકારા બ્રહ્મચરિયસઙ્ખાતસ્સ બુદ્ધસાસનસ્સ ચિરટ્ઠિતિયા બહુજનહિતાય બહુજનસુખાય લોકાનુકમ્પાય અત્થાય હિતાય સુખાય દેવમનુસ્સાનં ધમ્મવિનયં સંગાયિંસુચેવ અનુસંગાયિંસુચ, એવમેવ મયમ્પિ દાનિ છટ્ઠસંગીતિ મહાધમ્મસભાપરિયાપન્ના ઇમાનિ સિક્ખાપદાનિ યથાનુપ્પત્તટ્ઠાનતો પટ્ઠાય એકતો ગણસજ્ઝાયં કત્વા સંગાયેય્યામ.